1 Jon 5:10 - Saniyo-Hiyewe

¹⁰ Sosu a'i pe lu taune tamo Owane Sitewi lo meni eime ne tote tawesisiya su, le Owane Sitewi lo peri wiyeme a'i marepi papu irosiya. Lu taune tamo Owane Sitewi ne tote tawesi ta'ame su, le Owane Sitewi ma'e au areare te'esiya. Piyene awere? Apou a'i le Owane Sitewi lo peri tote tawesi ta'ame. Apou a'i Owane Sitewi lai meni eime lo ne au te'e areiyeye.

1 Jon 5:10 ပူးပေါင်းရင်းမြစ်များ

Jisas Krasi lo Peri Heneruwe, Jon leseteye ape ne 3:16

Sosu a'i pe Owane Sitewi lai lu taune werese, awei irosiya ape, marepi erasi a'i tote wawesiyenamisiya. Serai le meni eime ta'i topo lo a'i hi awei ma'e nomo ne au temeniyeyei ne eimawesai. Lu taune tamo le ne tote tawesi umasiyei su, Owane Sitewi lai lowe ma'e mi mi pasi pasi weriyei marepi hepene he'i aurowa. Sosu lowe temeniyenamirowata.

Jisas Krasi lo Peri Heneruwe, Jon leseteye ape ne 3:18

Lu taune werese le ne tote tawesi umasiyei su, le yo seni luwaru a'i lowe lo au heserowata. Lu taune werese le ne tote tawesi ta'ame su, lowe a'i lai marepi towafi lowe lo umasiyei. Serai lowe omo yehe ma'e irowa.

Jisas Krasi lo Peri Heneruwe, Jon leseteye ape ne 3:33

Lu taune werese peri lo wanu tote tawesi umasiye su, lu taune tere'e yo seni lowe lo siyeyei. Yo seni lowe lo siyeyei su, lowe apou au te'e fiyariyei, ‘Owane Sitewi a'i lai wiyeme a'i tene.’

Jisas Krasi lo Peri Heneruwe, Jon leseteye ape ne 5:38

Sosu aiwawe peri lo ape lai marepi fene lo papu iro ta'ame. Piyene awere? Fene meni ape, le eimawe arosai ape, wanu tote tawesi ta'ame. Sosu fene meni eime lo umasi ta'ame.

Aposel 8:37

Sosu Filip le ma'e apou eiye, “Ne Jisas lo peri ne marepi werese no se tote tawesiyei su, ne fara'u sa'i ani huwei.” Sosu meni owane ape itiya'u apou eiye, “Ei! Ane lai Jisas ne, Owane Sitewi lo ariariye siye meni, marepi werese ano se tote tawesiye. Ane Jisas Owane Sitewi lo meni eime poto ne tote tawesiye. Jisas lai Owane Sitewi lo meni eime ne. Ane marepi eite tote tawesiye.”

Pol One Towe eite Omo Rom maꞌe Lese Ausawi 8:16

Sosu aiwawe a'i Owane Sitewi lo Hepene Wara'i a'i lai hepene nomo lo ma'e te'enamisiya. Le apou einamisiya, “Fene Owane Sitewi lo eimane pefine a'i ne.” Hepene nomo lo Owane Sitewi lo Hepene Wara'i a'i mase nateye su, nomo Owane Sitewi lo eimane pefine wou henerai.

Galesia 4:1

Sosu a'i pe ane fene ma'e te'esiya. Meni eime ta oso a'i irosiya su, le aite lo etiri iyami anirowata. Le wiyawi yahowa'i siye meni wou a'i ne. Nowe me'iye su meni eime erasi heneraiyei su, le aite lo etiri iyami werese anirowa.

Galesia 4:6

Serai fene eimane pefine lo henerai tepa'asiye su, Owane Sitewi lai meni eime lo Hepene Wara'i a'i fene ma'e eimawe arosai. Le marepi hepene fene lo papu fa ironamite. Sosu Hepene Wara'i a'i lo peri apou utesiya. “Owane Sitewi Tai Pefine a'i, ne Tai Pefine a'i nomo lo ne.”

Kolosi 3:3

Marepi hepene weriyei fene lo temeniye tepa'asiye. Sosu Owane Sitewi lai marepi hepene he'i a'i fene ma'e auwe. Marepi hepene he'i a'i fene lo meni Krais papu weriyei weriyei ironamisiya.

Hibru 3:12

Sosu a'i pe kaiyemo mo ano, fene Krais ne tote tawesisiya ape, fene tamo yo seni luwaru a'i ironamiyei su, fene weiyai! Meni ta, fene mase irosiya ape, yo seni luwaru a'i irowei su, sosu le Owane Sitewi ne tote tawesi ta'ame su, le lai Owane Sitewi, norohuwe ironamitesiya ape, me'iyeni ma'e atati arunatirowa. Marepi apou ape ne, fene weiyai!

2 Pita 1:19

Nomo etiri ape siyeye su, nomo Owane Sitewi lo peri au te'e siye lu tamo tu naifa weriyei leseye ape, tote anite tawesiye. Nomo fene ma'e peri lo ape au te'esiya. Fene peri lo ape wanu tote tawesire. Peri lo ape yehe erei lo mi erasi wou a'i ne. Fene nowe pasi se yehe erei ereti aniteyei su, fene yo amerame siye umasiyei. Peri lo ape marepi fene lo papu iroteyei su, peri lo ape Owane Sitewi lo yo seni werese ne fene ma'e au pati ferafereiyei. Serai fene peri lo tote umasite. Nowe me'iye su, le si tame itorairowa su, le nowe mitaiyeyei wou a'i ne. Le Owane Sitewi lo marepi fene ma'e au atuatu areiyeyei. Apou wou poweiye wirai su, le pasi a'i fiyari po'uteye. Peri lo ape nomo mi mi werese au pati aniyei. Jisas si tame itorairowa su, nomo le mase mi mi pasi pasi ironamitorowa.

1 Jon 1:10

Nomo peri ta apou au te'esiya su, “Nomo yo seni luwaru a'i iro ta'ame.” Nomo Owane Sitewi ma'e apou te'esiya, “Ne peri wawero a'i au te'esiya.” Sosu Owane Sitewi lo peri pefine a'i marepi nomo lo sahe iro ta'ame.

1 Jon 5:1

Lu taune tamo apou a'i te'esiya, “Meni Jisas lai lu taune werese lo yo seni luwaru a'i au ani sasari pamoweteye.” Lu taune ape mo apou a'i tote tawesinamisiya su, lowe Owane Sitewi lo eimane pefine heneraiyei. Lu taune tamo aite lowe lo ne marepi erasi a'i tote wawesiyenamisiya su, lowe aite lo eimane ma'e aiwawe marepi erasi a'i tote wawesiyesiya.

Kamapim Tok Hait 12:17

Sosu haru luwaru ape menitani ape ma'e ai marepi erasi a'i totenamiteye. Serene le menitani ape lo eimane tape tere'e werese ma'e ai atuwei ne fi. Sosu lu taune werese Owane Sitewi lo yo peri tote umasiteye ape, sosu lu taune werese Jisas lo peri au te'e fiyariteye ape, le aiwawe a'i lowe ma'e ai atuwei ne fi.

Kamapim Tok Hait 2:17

Owane Sitewi lo Hepene Wara'i a'i lu taune ma'e Owane Sitewi lo peri tote tawesinamisiya ape, au te'e fiyarisiya. Fene werese peri lo ape wanu umasite. Lu taune yo seni luwaru a'i ani araronamirowa su, ane lowe ma'e Owane Sitewi lo ene ayei fareyare tamo aurowa. Iyape mana. Ayei ape mo tote tawesiyei fene lo au kairefiyerowa. Ane lowe ma'e tapiye wapo a'i ta aurowa. Tapiye ape sahe iyape he'i au leserowa. Lu taune werese werese iyape he'i ape so'oru ta'ama. Meni ape tapiye anirowa ape, le a'i iyape topo lo ape so'oruwerowa.’”

Kamapim Tok Hait 2:28

Sosu ane lai eiwariyemi, esi pasi tei mitaiyerai ape, lowe ma'e aurowa.