1 Jon 4:21 - Saniyo-Hiyewe

²¹ Sosu a'i pe Owane Sitewi lai peri kairefi a'i nomo ma'e apou a'i te'eye, “Lu taune tamo Owane Sitewi ma'e marepi erasi a'i tote wawesiyenamisiya su, lowe kaiyemo lowe lo marepi erasi a'i fa tote wawesiyete.

1 Jon 4:21 ပူးပေါင်းရင်းမြစ်များ

Matyu 5:43

“Tu naifa weriyei Owane Sitewi lo one towe sahe apou leseye, ‘Fene kaiyemo fene lo ne marepi erasi a'i tote wawesiyenamite. Sosu aiwawe a'i lu tamo fene ma'e au luwaruweyei ape, fene ai marepi erasi a'i lowe ne totenamite.’ Wkp 19:18

Jisas Krais lo Peri Heneruwe, Luk leseteye ape ne 10:37

Meni ape itiya'u eiye, “Meni ape lai meni ma'e au ferafereiye.” Jisas le ma'e eiye, “Ei, ne yo seni apou ape aiwawe a'i irorite.”

Jisas Krasi lo Peri Heneruwe, Jon leseteye ape ne 15:12

“Peri ano ape ane fene ma'e au te'esiya. Wanu umasire! Ane fene ne marepi erasi a'i totenamisiya su, serai fene ta'i ta'i marepi erasi a'i fa tote wawesiyenamite!

Galesia 5:14

Moses lo yo peri lo sitewi apou a'i te'esiya. Peri sitewi ape tutawe pefine a'i ne. Fene lu tewi towafi fene lo marepi erasi a'i tote wawesiyeteyei su, fene lu taune tere'e ma'e aiwawe a'i fa tote wawesiyenamite.

Galesia 5:6

Nomo Krais Jisas ne tote tawesi umasiyei, sosu le ne nateyei su, tahe touwei lo yo seni yahowa'i irorowa. Sosu aiwawe a'i fene tahe fene lo tou ta'ame su, etiri aiwawe yahowa'i irorowa. Krais ne tote tawesi umasiyei ape, etiri tutawe pefine a'i ne. Tote tawesiyei se, fene lu taune werese ma'e marepi erasi a'i tote wawesiye tiyatitorowa.

1 Tesalonaika 4:9

Sosu a'i pe fene Jisas lo lu feni werese marepi erasi a'i tote wawesiye tiyatinamisiya. Serai nomo peri ape te'e areiye ta'ame. Fene etiri ape wanu so'oruwe tepa'asiye. Owane Sitewi lai fene ma'e etiri ape te'e areiyeye.

1 Pita 3:8

Ane etiri tamo fene werese ma'e au te'esiya. Nomo werese marepi ta'i a'i tote tawesite! Meni ta, menitani ta marepi orese a'i teriteyei su, fene marepi ferafereiyei lowe ma'e au irote. Fene lu werese ne kaiyemo aiwawe a'i au irote! Fene lu taune werese au pati ferafereite! Sosu fene iyape towafi fene lo owe ape ei ani arowete! Fene etiri apou ape irowei su, Owane Sitewi lai fene ne au te'e wisereyeyei.

1 Pita 4:8

Etiri tutawe fene tote anite tawesite! Fene lu taune, Jisas lo marepi umasiteye ape, fene lowe ma'e marepi erasi a'i tote wawesiye tiyatinamite! Fene lu taune ma'e marepi erasi a'i tote wawesiye tiyatinamiyei su, yo seni luwaru a'i lowe fene ma'e au irowe ape, fene lai yo seni luwaru a'i lowe lo ape, tote i'anenamite.

1 Jon 2:7

Kaiyemo mo peri ape ane fene ma'e lese ausawisiya ape, peri ape he'i a'i ta'ama. Ahowa, fene tu naifa weriyei wanuteye. Ya'ariyei peri heneruwe, fene tu wanuteye.

1 Jon 3:11

Tu naifa weriyei peri ta, fene wanuwe ape apou a'i te'esiya, “Nomo lu taune werese ma'e marepi erasi a'i tote wawesiye tiyatite.”

1 Jon 3:14

Nomo lu taune werese ma'e, Krais lo marepi umasisiya ape, marepi erasi a'i tote wawesiyeteyei su, fene nomo aiwawe etiri ta so'oruwesiya. Hepene nomo lo temeniyerowata. Ahowa, marepi hepene nomo lo norohu mi mi pasi pasi weriyei ironamitorowa. Lu taune tamo marepi erasi a'i tote wawesiye ta'ame su, lowe hepene lowe lo temeniyerowa.

1 Jon 3:18

Eimane ano, fene lu taune tiyati ma'e marepi erasi a'i tote wawesiyeyei su, fene peri ta ahi se owe ape toteyei. Ahowa, fene marepi erasi a'i tote wawesiyeyei su, fene lowe ma'e peri pefine a'i, sosu aiwawe a'i yo seni wisere a'i au irowei.

1 Jon 3:23

Sosu a'i pe peri ano wanure! Owane Sitewi lo peri kairefi a'i apou a'i te'esiya. Fene werese Owane Sitewi lo meni eime ne, Jisas Krais, tote tawesite. Sosu aiwawe fene lu taune werese tiyati ma'e marepi erasi a'i tote wawesiyenamite. Peri hesi a'i ape Owane Sitewi lai nomo ma'e au te'eye.

1 Jon 4:11

Kaiyemo mo ano Owane Sitewi lai nomo ma'e marepi erasi a'i tote wawesiyenamiye su, nomo lu taune tiyati ma'e marepi erasi a'i tote wawesiyenamite.