Nimlivolivon 26:22 - Seysyo No Tao

²² Yato ngai sicyaraw eya o na nisidongan jyaken ni Ama ta do to a meylimwang no ciriciring na do meynakem a tao a kano ipangoyongoyod da tao. O nipeylimwang ko am meyyangay a kano nipeylimwang ni Moyse a kano panoyonoywan na so ciring ni Ama ta do to no kakwa.

Nimlivolivon 26:22 ပူးပေါင်းရင်းမြစ်များ

Matay 26:24

Akman so ciring do Seysyo, ta mangay o kawakwak da so Nipamnekan na ni Ama ta do to a tao. Am o manazang nya tao am to makasi. Apyapya rana o kaji na nimatazakan a tao do karawan.”

Locya 16:28

a kapamizing na pa so yalalima a kakteh ko, ta maraherahet o kai da pa macitovong jyaken a makaliliw so kataotao da.’

Locya 24:27

Meyratateng am pangozayan na o nivatvatkan ni Moyse a kano panoyonoywan na so ciring ni Ama ta do to a kaononong na rana do mina ciring da sya do Seysyo a omagaz do kataotao na.

Locya 24:44

Meyratateng am maniring jira si Yeso am, “O aro a vazay rana ya am nimalavat ko na jinyo no kakwa pa. O nivatvatkan ni Moyse a kano panoyonoywan na so ciring ni Ama ta do to a kano nivatvatkan a Anwanood a yaomagaz jyaken am yarana nimangononong.”

Locya 24:46

Maniring pa jira am, “O nivatvatkan da do Seysyo a ciriciring am amyan so alalaw ni Kizisto. Ikatlo na araw am mirwa pa mavyay.

Yowani 1:17

O iwawalam na ni Ama ta do to o nipangnanao na ni Moyse a onotan ta. Am o pangangarilawan na kano manoyong a nanao na ni Ama ta do to am ori o nyai na ni Yeso Kizisto do tao do karawan.

Yowani 1:45

Makala ni Veydipo si Natannay. Maniring jya am, “Namen rana nimacita o yadomket do iwawalam ni Moyse a kano ciring da no panoyonoywan na so ciring ni Ama ta do to do Seysyo. Ori rana am si Yeso anak ni Yoseyvo a yameyvahay do Nasale a ili.”

Yowani 5:39

O nyo ipeyvilang a Seysyo am nyo naknakmen o nyo kapakahap do dang so to meyyonong a ikavyay no pahad nyo. Am na malavat no Seysyo am yaken.

Yowani 5:46

No si anoyngan nyo si Moyse am akman kamo sang a omanoyong jyaken. Ta o ciriciring na yadomket do Seysyo am yaken na paingan sya.

Nimlivolivon 10:43

Si Yeso o pakacirngan da so ciring da no panoyonoywan na so ciring ni Ama ta do to no kakwa. Ipanci da o ka si Yeso no makavonas so raraten no omanoyong jya tao.”

Nimlivolivon 13:29

Mangononong rana o nivatvatkan do Seysyo a omagaz ji Yeso am akasen da rana do jyojika kapakakasa da sya do heseb na.

Nimlivolivon 24:14

Am yasa ka vazay pa o ko ji naywa jimo. Ori rana am ko anoyngan o da iraralay no ineynapo namen. Ko anoyngan o iwawalam ni Moyse a kano nivatvatkan da no panoyonoywan na so ciring ni Ama ta do to. So na ikanoyong no ko kahap so yada ipanci a malas a nanao.

Nimlivolivon 26:17

Ko tovoin imo a meylimwang nyaken do tao do Yotay a kano beken a tao do Yotay. No si myan so omraherahet jimo am cyaha, ta apzatan ko imo.

Nimlivolivon 26:6

Sicyaraw rana ya am ko myan do tangain nyo a nyo pacicin, ta ko anoyngan o kanoyong na no nipanci na ni Ama ta do to do ineynapo ta do keypirwa da mavyay no nimawakwak a tao.

Nimlivolivon 28:23

Meyratateng am mamnek sira so kasaraw a ipeylovolovot da so tao a omamizing so ciring ni Pawlo. Marateng rana o araraw na am aro sira o tao a nimai a omamizing so ciring ni Pawlo. Meyratateng am papwen na ni Pawlo do penzak a kangay na nya do mahep a omononong do italamozong na ni Ama ta do to a mapanod sira. Meyratateng am vilangan na o iwawalam na ni Moyse a kano vakong da no panoyonoywan na ciring ni Ama ta do to no kakwa a mapanop sira a omanoyong ji Yeso.

Loma 3:21

Sicyaikwaya am na rana nipananao jyaten o na kabnek jyaten ni Ama ta do to a abo so raraten do tangain na. Ori rana am beken a iwawalam na ni Moyse, ta monganay do kapeyhanhan ni Yeso Kizisto akman so mina ciring da no panoyonoywan na so ciring ni Ama ta do to.

1 Kedinto 15:3

Ninanao ko na jinyo o yaney makdeng na nimahap ko ji Yeso. Ori rana am nimawakwak si Yeso no raraten ta. So na idket do Seysyo no ciring eya.

1 Kedinto 15:4

Nipakakasa da si Yeso. Ikatlo na araw am mirwa a mavyay. So na idket pa do Seysyo no akman sang a ciring.

2 Timotay 3:11

Mo katenngan o ko kato nazibwan no aro a alalaw ko do Antia kado Ikenyan a kado Disetela. Am kanisomidong na jyaken ni Yeso a komaro do akman sang a nipeyrarehtan da jyaken no tao.

Ipaziman 11:18

Ta no kapeyoyaoya da no ji raralay nimo a tao am nipadna mo rana o peyoyaoyyan mo jira. Yarana marateng o araraw no yamo ipacici so nimawakwak a tao. O lamlamsoy mo a panoyonoywan mo so ciring mo a kano yaomanop jimo a yamraralay nimo a tao am tana meynakem sira, tana makasi a tao sira am mo miminen sira azawen. Sira rana yamapeykaraherahet so karawan a tao am yamo balinasen sira.”

Ipaziman 15:3

a meyyanwanood so anood ni Moyse a lamlamsoy ni Ama ta do to a kano anood no Kagling. O aingan no anood da am, “Mo Panirsirngen a tey mowyat a Tao do to a yatomalamozong no peycyamahamahatawan na. Yatey manoyong o vazay mo a yaji mapeycyakaban so tao.

Ipaziman 20:12

Makacita ko pa so nimawakwak a tao. Tana meynakem a tana jyeynakem am abo ji nanek do tangain na. So nikawasak na rana no vakong. O asa ka vakong a adketan no ngarangaran no yanan na rana no to meyyonong a inawan da am akman sang a mawasak. O nimawakwak rana tao am to macilocilolo do mina iwawalam da no keyyan da pa do karawan o domket do aro a vakong ang a ipacici na sira.