Nimlivolivon 19:8 - Seysyo No Tao

⁸ So nipakatlo na vehan dang ni Pawlo a to ngyan do peyneynozyan a macinekanekad jira a manci no agagazan no italamozong na ni Ama ta do to a mapanod so tao a omanoyong ji Yeso Kizisto.

Nimlivolivon 19:8 ပူးပေါင်းရင်းမြစ်များ

Nimlivolivon 13:14

Am sira Pawlo a kani Parnapo am to sira meysosonong a mangay do asa ka ili a meyngaran so Antia a macinapnap do Pisitiya. O araw na no ipeywalam no tao am mangay sira do peyneynozyan a omamizing so ciriciring na ni Ama ta do to.

Nimlivolivon 13:46

Am ikakdekdeng ni Pawlo a kani Parnapo a meyzezyak a omnanao sira. Maniring sira am, “O ciriciring na ni Ama ta do to am nimanma kamo a peylimwangan nya. Am nyo kaji nganoyngan jya. Nyo to nazibwan o na kapanta ninyo ni Ama ta do to so to meyyonong a ikavyay no pahad nyo. Am ori o namen karwan rana jinyo a mangay do beken a tao do Yotay.

Nimlivolivon 14:1

Makaranes si Pawlo a kani Parnapo do Ikenyan a ili am mangay sira do peyneynozyan da no tao do Yotay a mangnanao. So nikaro no tao do Yotay a kano beken a tao do Yotay a omanoyong rana ji Yeso.

Nimlivolivon 17:17

Am ori o nipacinekanekad na do tao do Yotay a kano omraralay ni Ama ta do to a beken a tao do Yotay do peyneynozyan. So nikasangib na do araraw a macinekanekad do masazi na tao do rarahan.

Nimlivolivon 18:19

Makaranes rana sira do Ivoso am taitaiden na rana sira Paycila kani Akwila kangay na rana do peyneynozyan a macinekanekad do tao do Yotay.

Nimlivolivon 18:26

Ori o ji na rana mogawi a mangnanao do peyneynozyan. Mamizing ni Paycila kani Akwila am rarahen da mangay do vahay da kapanci da no ji na pa nimamizing a nanao a omagaz ji Yeso. Ori o nikapiya na rana no ipangnanao na.

Nimlivolivon 18:4

Mangday so ipeywalam no tao yangay ni Pawlo do peyneynozyan a macinekanekad, kananao na so tao do Yotay a kano tao do Sila. Ta kakdain na sira omanoyong ji Yeso.

Nimlivolivon 19:10

O akman rana sang a vazay am mina kadwa kawan. Tana tao do Yotay a tana tao do Sila am nimamimin sira o meyvahay do Yasiya a nimakamizing so ciring ni Yeso Kizisto.

Nimlivolivon 19:7

Sira rana am rarwa sira so ikakarwan o tao.

Nimlivolivon 19:9

Am tatasa jira o ji mapownot so nakem da amraherahet so nipangnanao ni Pawlo a omagaz ji Yeso Kizisto. Am ori o nipalolwan na so sinjya ni Pawlo a komaro jira. So nipangday da so araw a meysirisiring do pangananawan na vahay no meyngaran so Tilano a tao.

Nimlivolivon 20:31

Ori o apzatan nyo do onowned nyo an. Manakem nyo o ninanao ko jinyo a nimeykaoo ninyo an. Ta mina katlo a kawan ko a mangday so araraw a kano ahep a amnanao jinyo.

Nimlivolivon 28:23

Meyratateng am mamnek sira so kasaraw a ipeylovolovot da so tao a omamizing so ciring ni Pawlo. Marateng rana o araraw na am aro sira o tao a nimai a omamizing so ciring ni Pawlo. Meyratateng am papwen na ni Pawlo do penzak a kangay na nya do mahep a omononong do italamozong na ni Ama ta do to a mapanod sira. Meyratateng am vilangan na o iwawalam na ni Moyse a kano vakong da no panoyonoywan na ciring ni Ama ta do to no kakwa a mapanop sira a omanoyong ji Yeso.

Yota 1:3

Manga keypong, nimanakem ko o kapeyteygami ko ninyo a pancyan ko no kapatazadang na jyaten ni Ama ta do to do teyngato. Am apyapya pa o kavavaga ko jinyo a kowyat nyo a mangozay do nipeylimwang da rana jinyo no nipamnekan na ni Yeso a amlivolivon no ciriciring na ni Ama ta do to. Ta oya rana am yajyablis a pangozayan no amraralay nya tao.