Nimlivolivon 1:8 - Seysyo No Tao

⁸ Am meyhekas jinyo o Seyzi. So iyan no rako a oyowyat nyo a meylimwang nyaken do Yelosaleng a kado peycyeylilyan na do Yotay a kado Samadiya a mangay do peycyamahamahatawan na.”

Nimlivolivon 1:8 ပူးပေါင်းရင်းမြစ်များ

Matay 24:14

O Mapasaray a Ciriciring a omaing do italamozong na ni Ama ta do to am manmanma a meylimwang do karawan a peyyamyamizngan da no tao do peycyamahamahatawan na a kapakaranes na rana no pangavosan no karawan.

Matay 28:19

Am ori o yangay nyo do peycyamahamahatawan na a mapanop so tao a omanoyong jyaken, a kahap nyo so ngaran ni Ama ta do to a kano Anak na kano Seyzi a tomaktak jira,

Make 16:15

Maniring si Yeso jira am, “Mangay kamo do peycyamahamahatawan na a meylimwang no Mapasaray a Ciriciring na ni Ama ta do to do tao do karawan.

Locya 1:35

Maniring o tinsi am, “O Seyzi na ni Ama ta do to o peyhekasen na jimo a kano oyowyat na. So na apzatan jimo ni Ama do to. Am ori o ikatazak na tao no Anak na ni Ama ta do to.

Locya 10:19

Amizngen nyo an, ta ko na nitoro jinyo oyowyat ko an. So ikanoyong nyo makazazat do oyowyat ni Satan. So ikabo no matarek a oyowyat a makataha jinyo. Tana to kanyo meyzasag so mavowaw am ji da peyzaza inyo.

Locya 24:29

Meyratateng am ipanci da si Yeso a macisan jira, ta makeykai rana o kahep na. Am ori o nionotan na jira ni Yeso.

Yowani 15:27

Akman kamo sang a meylimwang nyaken. Ta nimeycicinda kamo a nimacihza jyaken no kavavayo ko pa mangnanao.

Nimlivolivon 13:31

O mina kararay na apo do Cyadidi a mangay do Yelosaleng am nimacita da si Yeso a nimirwa a mavyay do sikapat a ngarnan (40) so araraw. Sira ori nimeylimwang ni Yeso jyaten a tao do Yotay, do kanimakacita da sya.

Nimlivolivon 2:32

“Ta si Yeso am nivyay ni Ama ta do to. Ta yamen rana am yongkad no akman sang a vazay. Ta nimacita namen rana ori a nimavyay. So namen pancyan nya jinyo.

Nimlivolivon 22:15

Imo rana am ipeylimwang mo do aro a tao o mo nimacita kano mo nimamizing.

Nimlivolivon 3:15

Am ori o nizakatan nyo si Yeso a yapwan no to meyyonong a ikavyay no pahad. Am kanimapeyvangon na sya ni Ama ta do to. Yamen rana am yongkad na yamen a nimakacita sya.

Nimlivolivon 4:33

O nipamnekan na rana ni Yeso a omlivolivon no ciriciring na am mowyat sira meylimwang no mina kapirwa na ni Yeso a mavyay. So nisidongan na sira ni Ama ta do to so omraralay nya tao.

Nimlivolivon 5:32

Am ori o namen peylimwangan no akman sya vazay. Ta yamen a kano Seyzi o yongkad na. Ta o Seyzi rana am na itoro ni Ama ta do to a macikaop do mahap so ciriciring na tao.”

Nimlivolivon 6:8

Si Setiven rana am aro mapeyzokab a vazay na do tangain da no tao, ta sidongen na ni Ama ta do to a kowyat na jya no Seyzi.

Nimlivolivon 8:1

Yamyan so amraralay ni Yeso a nimonong do inawan na ni Setiven. So nizezezeng da amlavi jya. Am si Sawlo rana am nisaray na o kazakat da sya. Nimapo no kano nang o kakdekdeng da pa a mapakakasi so amraralay ni Yeso a tao do Yelosaleng. Tey makdeng si Sawlo a mapakakasi sira, kakakaday na so kavahayan da peycyarakrakpen so mavakes a kano mahakay a kalolo na sira a pasasaziden a yangay na do pamemtengan. Am ori o nipeyvwak da rana no amraralay ni Yeso a mangay do peycyeylilyan na do Yotay a kado Samadiya. Am o nipamnekan ni Yeso a omlivolivon no ciriciring na am todavezed do Yelosaleng.

Loma 10:18

Am o ko ipanci am manoyong o kaji da nimakamizngan sya no tao do Yotay so ciriciring na ni Kizisto? Jyabo da kajya nimakamizngan sya. Ta maniring do Seysyo am, “O ciriciring na am yada rana nipeylimwang do aro a tao do karawan. Yakman sang, ta yarana nimeylimwang do peycyamahamahatawan na.”

Loma 15:19

So nikowyat ko a mapeyvazay so mapeyzokab a vazay do kanimoyat na jyaken no Seyzi. Am ori o nipapwan ko sya do Yelosaleng a kangay na do Ididiko o yako peylimwangan no Mapasaray a Ciriciring na ni Kizisto.

Kelosi 1:23

Am ori an, ji nyo na pasalai do nimamizing nyo pa no kakwa a Mapasaray a Ciriciring na ni Ama ta do to. Ta to kamo ngotokot so onowned a meyhanhan ni Ama ta do to a manta ninyo so to meyyonong a ikavyay no pahad nyo. So na rana nipeylimwangan no akman sang a nanao do karawan. So yako ikanoyong a lamlamsoy na ni Ama ta do to a meylimwang no ciriciring na.