Loma 9:4 - Seysyo No Tao

⁴ Sira rana Isedi a tao am nipamnekan na ni Ama ta do to a akma ney anak do karawan. So yada rana nipakacita so azwazway na ni Ama ta do to. Sira o nitorwan na no pangozayan da ciring a kano iwawalam na. So da pakatenngan rana do da kararalay ni Ama ta do to. So da rana nipakahap so nakem na jira ni Ama ta do to.

Loma 9:4 ပူးပေါင်းရင်းမြစ်များ

Matay 21:33

Maniring pa si Yeso am, “Amizngey nyo pala o pehngehngayan ko so ciring ko. Amyan so asa ka tao a nimeymowa so asa lan a potaw. Karahan am zazacitan na a kapamaring na do sahad na no nihakawan na so pangangatesan na so potaw a kapatnek na so makarang a tagakal a pamozimozyan na. Karahan am itoro na do tao a vooden da a kangay na rana do marai a ili.

Yowani 1:17

O iwawalam na ni Ama ta do to o nipangnanao na ni Moyse a onotan ta. Am o pangangarilawan na kano manoyong a nanao na ni Ama ta do to am ori o nyai na ni Yeso Kizisto do tao do karawan.

Yowani 1:47

Macita ni Yeso si Natannay mangay jya am maniring jya am, “Yameysinogat ori a Isedi a tao. Yabo do onowned na o yamalahet.”

Nimlivolivon 2:39

Ta ori o nipanci na itoro na jinyo a kano ananak nyo a pacyangayan da no tao do peycyamahamahatawan na. Ta tamo mamimin a rarahen ni Ama ta do to a Panirsirngen ta.”

Loma 3:2

Yaro peypeypangayan no nang. O ney manma na am na nitoro jira ni Ama ta do to o ciriciring na.

Loma 8:15

Ta o itoro na ni Ama ta do to a Seyzi am beken a mapeylamlamsoy jinyo a omanyanyahey jinyo, ta peyvaliwen na inyo a akma ney anak ni Ama ta do to. So oyatan na jyaten no Seyzi a tomawag ji Ama ta do to a manci no, “Mo Ama.”

Loma 9:6

Beken a ko ipanci o kabo na rana no peypeypangayan no mina ciring na ni Ama ta do to jira, do da kaji nganoyngan ji Yeso Kizisto. Ta beken a todamimin sira o sivosivovoong ni Isedi a meyngongyod a Isedi a tao a italamozong na ni Ama ta do to.

2 Kedinto 11:22

No si Sipolay a tao sira am Sipolay ko an. No si Isedi a tao sira am Isedi ko an. No si apwapo na sira ni Apolahan am apo na yaken an.

Cyalatay 3:16

Akman sang an, o nipanci ni Ama ta do to a nakem na a itoro na ji Apolahan a kano asa ka tao do sivosivovoong na. So ji na nimapakaciringi sya do aro a tao, ta asa ka tao. Iya rana am si Kizisto.

Ivoso 2:12

No kano nang am abo o kasngesngenan nyo ji Kizisto, ta akma kamoy kadwan a ji da patwatopa do tangain ni Ama ta do to, do kaji nyo macitetngehan do tao do Yotay. Ta sira am nipanta na sira ni Ama ta do to so pangozayan na ciring. So ikanoyong nyo a to rana hayo so onowned, do kaji nyo makatenngan ji Ama ta do to.

Sipolay 9:1

O manmanma a pangozayan a ciring na ni Ama ta do to am domket dang o katwatontonan no raralayan da ni Ama ta do to a kano nipatnek da no tao a vahay a raralayan da nya.

Sipolay 9:10

Ta do ji na pa nimapatwawi ni Ama ta do to so apyapya pa kano adan a pangozayan a ciring am mamimin pa ori a omagaz do icicirawat a kano isovo a kanen.

Sipolay 9:3

O peyyawwan no manma aspangan a kano katangked na vahay am milakayob o nipeyhawa da sya. O peyyawwan da sya no milakayob am Ney manokdwan na vahay.

Sipolay 9:5

O teyngato no kavangan am amyan dang so akmey tinsi a nyamaog no ovay a ngaranan da keloping. O peypeypangayan no nang am peydednan ni Ama ta do to. O panid no keloping ori am mavezay a ombonbon do pangapangayan da so rala no kagling a kano baka a ivonas so raraten no tao. O makakaday rana vazay am ji to mimin a ipanci sicyaikwaya.

Sipolay 9:6

O katwatontonan no makakaday a vazay am mangday sira so araw o mapatanatanang so nakem a mangay do sahad no manma aspangan na vahay a mapatanang so nakem da ji Ama ta do to.