Loma 9:30 - Seysyo No Tao

³⁰ O makdeng do jya am sira rana beken a tao do Yotay a yaji meyhanhan no apya icicirawat da am yana sira nivonas so raraten. Na abneken rana sira apya do tangain na do yada kapeyhanhan nya.

Loma 9:30 ပူးပေါင်းရင်းမြစ်များ

Loma 10:10

Ta no anoyngan ta si Yeso am abneken na yaten ni Ama ta do to a abo so raraten do tangain na. Akman sang, ta no to ta na patwawa do tao o kanoyong ta ji Kizisto am manoyong o kahap na rana jyaten ni Ama ta do to.

Loma 10:20

Nipakoyokoy na pa ni Isayya a ciring am, “Makala da rana yaken no ji ngala jyaken a tao. Mapacita ko do yaji ngala jyaken a tao.”

Loma 10:6

Am o meyhanhan ni Yeso a tao o vonasen na ni Ama ta do to so raraten a abneken na abo so raraten do tangain na. Ta maniring do Seysyo am, “Ji mo mancyan o, ‘Sino mangay do teyngato a mapeyhekas si Kizisto.’ ”

Loma 3:5

Ala yamyan so tao a manci no, “Apya o keyyan no raraten ta. Ta o raraten ta am ipakateneng da no tao ji Ama ta do to a ji meyraraten a kazwazway da sya. So ikalas na ni Ama ta do to a mapasingsingkad jyaten.”

Loma 4:11

O peypeypangayan na no kayongkad da do kataotao na am nivonas na rana ni Ama ta do to o raraten na, ta nipeyhanhan na si Ama ta do to. Am ori nipancyan na nya abo rana so raraten. Ori o da abnekan si Apolahan a ama da no yameyhanhan ni Ama ta do to a tao. Tana ji da yongkaji o kataotao da am to na rana abneken sira abo so raraten do kapeyhanhan da ni Ama ta do to.

Loma 4:13

O mina ciring na ni Ama ta do to ji Apolahan am itoro na o karawan ji Apolahan a kano sivosivovoong na. Am beken a kahap na ni Apolahan so iwawalam na ni Ama ta do to o peycirngan na sya, ta yamonganay do na kapeyhanhan ni Ama ta do to ni Apolahan. Ori nyabnekan na sya ni Ama ta do to abo so raraten do tangain na.

Loma 4:22

Am ori o nibnekan na sya ni Ama ta do to si Apolahan a abo so raraten do tangain na do kapeyhanhan na nya.

Loma 4:9

O ipanci na ni Tawey a tey yapya a tao am manngwa, o nimyongkad do kataotao na o peycirngan na sya? Beken a ori an. Ta macyangay sira o jya nimyongkad do kataotao da. Ta maniring do Seysyo am, “Na anoyngan si Ama ta do to ni Apolahan. Ori o nibnekan na sya ni Ama ta do to a abo so raraten.”

Loma 5:1

O na abnekan jyaten ni Ama ta do to a abo so raraten do tangain na am ta ipeyhanhan si Yeso Kizisto a Panirsirngen ta. So ikanoyong ta rana macikaop ji Ama ta do to.

Loma 9:14

Am manngwa, apya o kapanci ta ni Ama ta do to a mapeykakaban so tao? Jyabo kapya no nang a.

Loma 9:31

Am sira rana tao do Yotay a yamangozay do iwawalam na ni Moyse am jyabo da kapakahap so aryarilaw na sira ni Ama ta do to a.

Cyalatay 2:16

Am ta katenngan an, o ipacikaop no tao ji Ama ta do to am anoyngan si Yeso Kizisto. Beken a omagaz do kahap so iwawalam ni Moyse. Yaten rana am yata anoyngan si Yeso Kizisto. Am ori o ta ipacikaop ji Ama ta do to. So na ji monganai do ta kapangozay do iwawalam na ni Moyse. Ta abo o asa ka tao a meypapya no iwawalam na ni Moyse do tangain na ni Ama ta do to.

Cyalatay 3:24

Am ori o icyakma ney inyapwan ta no iwawalam ni Moyse amzat do onowned ta mangay do yai na rana ni Kizisto a kabnek na rana jyaten ni Ama ta do to a abo rana so raraten do tangain na, do kapeyhanhan ta nya.

Cyalatay 3:8

Nipaziman na rana ni Ama ta do to do Seysyo o kabnek na so beken a tao do Yotay a abo so raraten do tangain na, do kapeyhanhan da ni Ama ta do to. So nipazimanan na rana sya ji Apolahan so akman sang a Mapasaray a Ciriciring no kakwa pa. Maniring am, “Mamimin o tao do karawan a ipanta ko so aryarilaw ko, do mo kapeyhanhan nyaken.”

Cyalatay 5:5

Am yaten rana am na oyatan yaten no Seyzi a meyhanhan ni Yeso Kizisto. Am ori o na abnekan rana jyaten ni Ama ta do to a abo rana so raraten do tangain na.

Ivoso 2:12

No kano nang am abo o kasngesngenan nyo ji Kizisto, ta akma kamoy kadwan a ji da patwatopa do tangain ni Ama ta do to, do kaji nyo macitetngehan do tao do Yotay. Ta sira am nipanta na sira ni Ama ta do to so pangozayan na ciring. So ikanoyong nyo a to rana hayo so onowned, do kaji nyo makatenngan ji Ama ta do to.

Veydipi 3:9

Ko manoyong a yamacikaop jya. So ko na peymakarwan do mina vazay ko no kakwa. So ikanoyong ko na abo so karatan do tangain na ni Ama ta do to. O yako icyakman sang am ko ipeyhanhan si Kizisto. Beken a ko kahap so iwawalam na ni Moyse. Ta yamanoyong ya nitoro ni Ama ta do to o ikapya ko do tangain na.

1 Timotay 6:11

Am imo rana am na nipamnekan ni Ama ta do to a yamahap so vazay na. So peymakarwan mo na do akman sang a marahet a kahap mo so meysominogat a onowned. Macilolo ka do apyahen na ni Ama ta do to a kapeyhanhan mo nya. Ji mo a haywan o kapangarilaw mo. Ji ka hayohayowen. Ji ka oyaoyahen.

Sipolay 11:7

Si Noya rana am tana ji na pa nimacita o vazay am nyamizing na o nipaziman na sya ni Ama ta do to, do kapeyhanhan na ni Ama ta do to. Ori o nipamaring na so rako a avang. Ori o nikapya da asa ka vahay do henep, do katey rako no raraten no tao do karawan. So nikanoyong ni Noya a nibnek na ni Ama ta do to abo so raraten do tangain na, ta nipeyhanhan na si Ama ta do to.

1 Pite 4:3

Teywara o mina raraten nyo no kakwa. Ta meyyangay kamo pa so vazay a kano ji raralay ni Ama ta do to a tao a to meyvozaw a mapasagpyan so aktokto nyo a masakisakin, manaralay so malas a tao do to nyo, pacyangayan no makakaday a raraten nyo.