Loma 8:38 - Seysyo No Tao

^38-39 Ta yako anoyngan o kabo no makapasyay jyaten do pangangarilawan ni Ama ta do to. Tana mavyay ta, tana mawakwak ta am to meyyonong o karilawan na nyaten ni Ama ta do to. Tana tinsi a tana kalamsoyan ni Satan am abo o makapasyay jyaten ji Ama ta do to a marilaw nyaten. So ikabo no oyowyat do sinokob no hanit a makapasyay jyaten do aryarilaw na jyaten ni Ama ta do to. Tana sicyaikwaya, tana no makwa am abo do karawan o amyan so oyowyat a mapasyay jyaten do pangangarilawan na ni Ama ta do to a yarana macikaop ji Yeso Kizisto a Panirsirngen ta.

Loma 8:38 ပူးပေါင်းရင်းမြစ်များ

Yowani 10:28

Ipanta ko sira so to meyyonong a ikavyay no pahad da. So ji rana meydednai jira no peyoyaoyyan na ni Ama ta do to. So ikabo no tao a makapehes sira do lima ko.

Loma 14:7

O cinatazak ta tao do karawan a yamraralay ni Yeso am beken a kakakzeb ta so kapeypapya no kataotao.

Loma 14:8

Ta si Yeso a Panirsirngen ta am yapwan no inawan ta. Am ori o ika si Yeso na no pasarain ta. Tana do ika mavyay ta pa, tana do ikawakwak ta na am ji ta hamangi o ka si Yeso no tomalamozong nyaten.

Loma 4:21

Anoyngan na si Ama ta do to a mangononong do mina ciring na jya.

Loma 6:23

Ta o kapalit no raraten am mangay do makotokotod a lila no apoy a mangay no makwa. Am o yazaw na ni Ama ta do to so yamacibedbed ji Yeso Kizisto a Panirsirngen ta am ipanta na so to meyyonong a ikavyay no pahad da.

1 Kedinto 15:24

a kapakaranes na rana no pangavosan no karawan. No si marateng o araraw no nang am balinasen na ni Kizisto o oyowyat no jyacita a kalamsoyan na ni Satan a kavosoyan na ni Ama ta do to a katoro na rana ni Yeso no karawan ji Ama ta do to a italamozong na.

2 Kedinto 11:14

Am jyabo kazyak no akman sang a. Ta kakwakwan ni Satan a mapatpetpeh akmey maniray a tinsi ni Ama ta do to.

2 Kedinto 4:13

Ta maniring do Seysyo am, “Ko anoyngan si Ama ta do to an. Am ori o ko peylimwangan nya.” Namen akman so sang a meyhanhan nya. Am ori o namen peylimwangan nya.

Ivoso 1:21

a kabtekan rana a Panirsirngen do sinokob no hanit. So ikabo rana no makahad so oyowyat na kano azwazway na do karawan a kado teyngato mangay do kaidan no karawan.

Kelosi 1:16

Iya o nyamaogan na sya ni Ama ta do to so hanit a kano karawan a kano meycyamadadayan a yamacita kano yajyacita, pacyangayan no yajyacita so oyowyat a kalamsoyan ni Satan a kano tinsi na ni Ama ta do to. So na ikanoyong a tey mazway a Tao do to.

Kelosi 2:15

Na nibalinas ni Yeso Kizisto no jyojika na o oyowyat ni Satan. So na ikanoyong a yarana nimharag sya do tangain no tao do karawan.

2 Timotay 1:12

Ori o yana niyapwan no alalaw ko. Am cyaha, ta yako katenngan si Yeso a yako ipeyhanhan. So ko anoyngan ji Yeso a makasidong jyaken a mapeyvazay so vazay na mangay do araraw no ikeypirwa na mai.

Sipolay 11:13

Sira rana ori am to da noiban do karawan o kapeyhanhan da ni Ama ta do to. Tana abo nimahap da do nipanci na ni Ama ta do to am da ji macimangsahi o da kapananala so akman sang a nakem na sira ni Ama ta do to. Da anoyngan o da kakmey mangilili a tao a yato ngiseysan do karawan.

1 Pite 3:22

Yana myan si Yeso Kizisto do teyngato a yamlisna do wanan ni Ama ta do to a yatomalamozong no tinsi. So ji da makapeysopoi do oyowyat ni Kizisto no makakaday do teyngato.