Loma 5:10 - Seysyo No Tao

¹⁰ No kakwa am abo o kasngesngenan ta ji Ama ta do to. Am mina kawakwak na nyaten no Anak na. Am ori o ta na ipacikaop ji Ama ta do to. No manoyong o akman sang am jyabo kaji na ngahapan jyaten a. Ta si Yeso Kizisto rana am yamyan do teyngato a yasomidong jyaten.

Loma 5:10 ပူးပေါင်းရင်းမြစ်များ

Yowani 14:19

Alikey rana kaji da na makacittan jyaken no ji nganoyong jyaken a tao. Am inyo am macita nyo pa yaken no si mirwa ko pa a mavyay. So ikakman nyo sang a makahap so to meyyonong a ikavyay no pahad nyo.

Yowani 5:26

Si Ama ta do to o yapwan no to meyyonong a ikavyay no pahad no tao. So icyakman na sang no Anak na.

Yowani 6:40

Ta o nakenakem ni Ama am mahap da o to meyyonong a ikavyay no pahad da no makateneng jyaken a kano omanoyong jyaken a tao, a kapeyvangon ko pa sira no makaranes rana o araraw no kapeykapyapinpin na ni Ama ta do to so tao.”

Yowani 6:57

Yamacikaop jyaken si Ama a yanitomovoy jyaken do teyrahem a yana yapwan no to meyyonong a ikavyay no pahad no tao. So icyakman da sang no koman so kataotao ko a macirapa jyaken so inawan.

Loma 11:28

Da nitaosya no tao do Yotay o Mapasaray a Ciriciring na ni Ama ta do to. Am ori o na likodan jira ni Ama ta do to a na katoro nya jinyo a beken a tao do Yotay so na pangangasyan ni Ama ta do to. Am meykongwen o pamnemnekan na ni Ama ta do to a marilaw sira. Ta akman sang o aryarilaw na sira so ineynapo da no kakwa pa.

Loma 5:11

Tamo isaray ji Ama ta do to o na kanimapanop jyaten ni Yeso Kizisto ji Ama ta do to. Am ori o yata ipacikaop ji Ama ta do to. So ta na ikasaray do yana kanimahap ni Kizisto so vazay na ni Ama ta do to a yasomidong jyaten.

Loma 5:6

No kakwa pa am abo oyowyat ta a komaro do peyraratenan ta. Am kanimangozay na jya ni Kizisto do nipamnekan ni Ama ta do to a araraw a mangay mawakwak nyaten.

Loma 8:32

Kakwakwan no Anak na yana ji ingbeywani a yana nitoro a mawakwak nyaten. Ney manngo rana o yamakakaday a kakzeben ta no nakem. Ta jyabo o na ingbeywan jyaten a.

Loma 8:34

Am sino paro o yamanci no kaoya na nyaten ni Ama ta do to no makwa. Jyabo asa ka tao a. Ta si Yeso Kizisto rana nimawakwak a kapirwa na mavyay am yamyan rana do wanan na ni Ama ta do to a yameyneynozi nyaten.

Loma 8:7

O to mangozay do malas a onowned na tao am akma ney kavosoyan si Ama ta do to. Ta ji na ngonoci o iwawalam na ni Ama ta do to.

2 Kedinto 5:20

Lamlamsoy na yamen ni Kizisto. Na nitovoy yamen a amvavaga jinyo. Namen akmey kataotao ni Ama ta do to a manci nya jinyo so: Mamlis kamo rana a omanop si Ama ta do to. Ta ori o ipacikaop na jinyo.

2 Kedinto 5:21

Na nikarilaw yaten ni Ama ta do to. So na nitovoyan si Kizisto abo so raraten a nimalit so raraten ta. Am ori o tanyo ipacikaop ji Kizisto a abwata rana so raraten do tangain na ni Ama ta do to.

Ivoso 2:16

O nikawakwak na ni Kizisto do jyojika am balinasen na o kakma tey meykavosoyan. O jyojika na ni Yeso Kizisto o mapeyyanowanop jyaten, akmey asa ka tao so onowned a meyyangangay rana amraralay ni Ama ta do to.

Ivoso 2:3

No kakwa am akman tamo sira a to mangozangozay do nakenakem da. Am ori o ikanoyong ta meyraraten a tao a pasingsingtan na ni Ama ta do to no makwa.

Sipolay 2:17

O peypeypangayan no kapeyngongyod na tao ni Yeso Kizisto am amyan rana so peyneynaran na sya do alalaw no tao do karawan a kapakateneng na rana do ahahapan na sya a marilaw nyaten a mapasyasi nyaten ji Ama ta do to, do ka iya na no ney manhama na mapatanatanang nyaten so nakem ta ji Ama ta do to. Am ori o ikanoyong ta na nivonas na rana ni Ama ta do to so raraten.

Sipolay 7:25

Am ori o yana ikanoyong a yamakasidong so yaomanop ji Ama ta do to a tao, do yana kato meyyonongan a mavyay a yamapasyasi nyaten ji Ama ta do to.

1 Yowani 2:1

O yako peyteygamyan ninyo manga ovay am ko vavagan inyo a kakaro nyo do peyraratenan nyo. Am no si amyan so asa ka tao a meyraraten am cyaha, ta ipasyasi na yaten ni Yeso Kizisto ji Ama ta do to. Ta iya rana am abo o raraten na.

1 Yowani 4:10

O pangangarilawan rana am beken a yaten marilaw ni Ama ta do to, ta si Ama ta do to am ori o marilaw nyaten. Ta iya o yapwan no meyngongyod a pangangarilawan. Am ori o nitovoyan na so Anak na mangay mawakwak no raraten ta.

Ipaziman 1:18

Yaken rana am to ko meyyonong a mavyay. Nimawakwak ko no kakwa. Am ko na mavyay sicyaikwaya a mangay do kaidan no karawan. Yaken rana am yatomalamozong no kawakwakan a kano yaomanam pa vazay ko do mawakwak a tao.