Loma 3:4 - Seysyo No Tao

⁴ Jyabo kakman na sang a. Tana todamimin o tao a mangalalas am jyabo kapangalalas na ni Ama ta do to a. Akman so ciring na do Seysyo. Ta maniring am, “No mehtaw o ciring mo am yamo pangononongan an. No kapacici da jimo am ji ka nikapatawan.”

Loma 3:4 ပူးပေါင်းရင်းမြစ်များ

Matay 11:19

Yaken rana a Nipamnekan na ni Ama ta do to a tao am ko koman a ko keyyop. Am no kamo maniring am, ‘Yamatetehnan a yameyyeyyopen a yamacizavoz do mapeyvazay so deyking a tao a kano meyraraten a tao.’ Am o teneteneng na ni Ama ta do to am manoyong a meytotwaw do makza nya tao.”

Locya 20:16

Jyabo kaji na balinasan sira a kapapalit na so tao a amvood so nihakawan na.” Mamizing da no aro a tao o ciriciring na am ipanci da o, “Jyabo kato na akmanan sang no vazay a.”

Yowani 3:33

Am o mahap so nanao na tao am pacyanoyngan da si Ama ta do to a tey manoyong.

Loma 11:1

To ko na macitangain jinyo am manngwa, nitaosya na sira ni Ama ta do to o nipamnekan na tao? Jyabo a. Ta yaken rana am Isedi a tao ko a sivovoong na ni Apolahan a macitetngehan ji Penyaming.

Loma 11:11

Am o yako ipacici jinyo am manngwa, to sira na nakeb o tao do Yotay a ji na ngapa rana ni Ama ta do to? Jyabo kakman na sang a. Ta sicyaikwaya am na avyain o beken a tao do Yotay. So kaoyyan da nira ikeynanahet no tao do Yotay a kablis da rana so onowned da a omanoyong rana ji Ama ta do to.

Loma 3:31

No akman sang am manngwa, todabo rana o oyowyat na no iwawalam na ni Moyse? Jyabo kakman na sang a. Ta o manoyong a meyhanhan ni Yeso Kizisto a tao am ori o ipanci a manoyong a mangononong do iwawalam na ni Moyse.

Loma 6:15

No akman sang am manngwa, apya saon o kato ta na meyraratenan a meyhanhan no pangangarilawan na ni Ama ta do to a makavonas so raraten ta? Jyabo kakman ta sang a.

Loma 6:2

Jyabo kakman ta sang a. Ta yatamo rana nikarwan o peyraratenan ta. Am manngwa, olin ta pa o peyraratenan taha?

Loma 7:13

Manngwa, iwawalam na ni Moyse o yangay ko do kararatan? Jyabo kakman na sang a. O yangay ko do kararatan am raraten ko. Abo o karatan no iwawalam na ni Moyse. Ta ipakateneng no tao do raraten na. So na ikanoyong no raraten a mapeyparai jyaten ji Ama ta do to.

Loma 7:7

No akman sang am manngwa, ipanci ta o iwawalam na ni Moyse a yapwan no raraten? Jyabo kakman na sang a. Ta o iwawalam na ni Moyse am ipakateneng ta do raraten. No abo iwawalam a yamanci no kaji mangagoman am jyabo ko kapakateneng do karahet no mangagom a.

Loma 9:14

Am manngwa, apya o kapanci ta ni Ama ta do to a mapeykakaban so tao? Jyabo kapya no nang a.

1 Kedinto 6:15

Nyo jyatenngi o na kaponged no kataotao nyo ni Kizisto? Manngwa, apya kapasagpyan ko so akma ney kataotao ni Kizisto? Tey marahet o akman sang!

2 Kedinto 1:18

Am beken a akman so nyo ipanci. Ta o ipanci ko jinyo a ciring am beken a yameyveyvalyat. Ta si Ama ta do to a ko anopen am yabo na kalasan.

Cyalatay 2:17

Yaten rana a yaomanoyong ji Kizisto a nibnek na ni Ama ta do to a abo rana so raraten do tangain na am no si meyyangay ta kano beken a tao do Yotay a meyraraten am manngwa, apyahen na ni Kizisto o kapeyraraten ta saon? Jyabo kapya na sya a.

Cyalatay 2:21

Ko ji zazaci o pangangasyan na ni Ama ta do to. No si iwawalam na ni Moyse o abnekan na jyaken ni Ama ta do to a abo rana so raraten do tangain na am manngwa, abo saon o peypeypangayan no na kanimawakwak ni Kizisto am.”

Cyalatay 6:14

Am yaken rana am yabo ikadwa na no yako pazwain, ta si Yeso Kizisto a Panirsirngen ta o yako pazwain a yanimawakwak nyaten do jyojika. O peypeypangayan no jyojika jyaken am yanimavonas rana o marahet a nakenakem ko. O peypeypangayan no nang am yako na nimamlis.

1 Timotay 3:16

Yata katenngan an, o makdeng a nanao a nipatwaw ni Ama ta do to a yata anoyngan. Nimatazak a tao si Kizisto. O Seyzi am yongkad na a abo so raraten. Nimacita da no tinsi, a yarana meylimwang do peycyamahamahatawan na, a yada rana anoyngan no aro a tao do karawan. So nikatkatan na sya ni Ama ta do to a yangay do teyngato.

Tito 1:2

O peypeypangayan na rana no nanao eya am ipakahap ta so to meyyonong a ikavyay no pahad ta. Manoyong o nipanci na a itoro na jyaten no kaji na pa mangamaogan so karawan. Ta si Ama ta do to rana am abo kalalasan na.

Sipolay 6:18

a ipadnadna na so nakem ta a yameyhanhan nya. Ta iya rana am jyabliblis o ahahapan na sya.

1 Yowani 5:10

Am o tao rana omanoyong do Anak na ni Ama ta do to am manoyong keyyan na do onowned na no ciring na ni Ama ta do to. Am o ji nganoyong ji Ama ta do to am alalasen na si Ama ta do to. Ta ji na nganoyngi o ciring na ni Ama ta do to a meylimwang no Anak na.

1 Yowani 5:20

Tamo katenngan o Anak ni Ama ta do to a yanimai rana a yamanta nyaten so teneteneng ta a ta ipakateneng do manoyong a Tao do to. So ta ikanoyong a macikaop do ney manoyong na a Tao do to a kani Yeso Kizisto a Anak na. Iya rana am manoyong a Tao do to a yapwan no to meyyonong a ikavyay no pahad ta.

Ipaziman 3:7

“Ipeyteygami mo o yamimong no kyokay do Veylatevey. Si maniring ka am, ‘Yamaniring o yaji meylimoteng so onowned a tey manoyong am: Yaken rana am akman ko so panirsirngen a meyngaran so Tawey a yatomalamozong no kagi. So ikabo no tao a makaneb do niwangan ko. O yako nyaneban am abo makeywang jya.