Ipaziman 1:5 - Seysyo No Tao

⁵ a kani Yeso Kizisto a ta ipeyhanhan so ciring. Iya rana am ney manma na nimirwa a mavyay. Si Yeso Kizisto rana am yatomalamozong no panipanirsirngen do karawan. Na ikarilaw yaten. Na nipahawa yaten no rala na do yata peyraratenan.

Ipaziman 1:5 ပူးပေါင်းရင်းမြစ်များ

Matay 20:28

Akman so Nipamnekan na ni Ama ta do to a tao. Ta o na nyai am beken a ilamnain no tao. Ta mapeylamnay so aro a tao a kangay na mapasansan so kataotao na yagag na sira do peyraratenan da.”

Matay 28:18

Omasngen jira si Yeso am maniring jira am, “Na rana nimimin ni Ama ta do to o oyowyat do teyngato a kado teyrahem a yanitoro jyaken.

Yowani 13:1

Kasaraw pa kapamaring da na so kanen do ngaranan da Iyeci am katenngan na rana ni Yeso o kakeykai na rana meysinaoli ji Ama na do to. Na tey karilaw o omanoyong jya tao do karawan. Tana marateng rana o ikawakwak na am ji namtadan o karilaw na nira.

Yowani 13:34

O itoro ko a vayo a inanao ko jinyo am masicyakarilaw kamo. To nyo nita o aryarilaw ko jinyo. Ta akman kamo so sang a masicyakarilaw.

Yowani 15:9

Ko ikaglaw inyo. Akman si Ama a maglaw nyaken. Peyyanen nyo do onowned nyo o pangangarilawan ko an.

Yowani 18:37

Maniring si Pilato jya am, “Ka manoyong a panirsirngen an?” Maniring si Yeso am, “Imo yamanci nyaken a panirsirngen. O ko nikatazak do karawan am yameykasa o peypeypangayan na. Ori rana am meylimwang no manoyong a nanao. O tao rana a makza no manoyong a nanao am ori o omamizing so ciring ko.”

Yowani 3:11

To ko na macitangayan jimo am o namen katenngan a kano namen nimacita o namen patwawen. Am yanyo ji ngapa o yakman sang a yanamen patwawen.

Yowani 3:16

Yatey rako na karilawan no tao do karawan ni Ama ta do to. Mangay do na veyvowen a Anak na o yana nitoro. So ikamimin da no omanoyong jya tao a ji rana meydednai no peyoyaoyyan na ni Ama ta do to, ta mahap da rana o to meyyonong a ikavyay no pahad da.

Yowani 3:32

Patwawen na o nimacita na kano nimamizing na. Am to da nazibwan no tao o nanao na.

Nimlivolivon 20:28

So ipeypepzat nyo an. Ahapen nyo o nitoro na jinyo no Seyzi a marilaw no kadwan jinyo. Ta sira rana am nipalit na no rala no Anak na ni Ama ta do to a yarana macikaop jya.

Nimlivolivon 26:23

Ta o nipeylimwang da da Moyse am manoyong keyyan no alalaw ni Kizisto a wakwaken da. So ika iya na no ney manma na a nimirwa a mavyay. Ta iya o mapatazadang jyaten a tao do Yotay a kano beken a tao do Yotay.”

Loma 3:25

Nitovoy na si Yeso Kizisto a mangay mawakwak no raraten ta. So ikanoyong no meyhanhan nya tao a mavonas rana so raraten. O ikakman na sang ni Ama ta do to am ipacita na o kaji na alasan a mapeykapyapinpin so tao. Ta o pangangasyan na am ori o ji na rana mapasingsingkaji do meyhanhan nya tao no kakwa.

Loma 8:37

Am cyaha, ta no si ipeyhanhan ta si Yeso Kizisto a yamarilaw nyaten am jyabo kaji ta makaharagan so yamakakaday a alalaw ta a.

1 Kedinto 6:11

Yamyan jinyo so nimakman so sang no kakwa. Am kanivonas na rana so raraten nyo ni Ama ta do to. So nyo rana ipacikownongan ji Ama ta do to a kabnek na rana ninyo a abo so raraten do tangain na, do kapeyhanhan nyo ni Yeso Kizisto a Panirsirngen ta kano katalamozong na jinyo no Seyzi na ni Ama ta do to.

Cyalatay 2:20

Am ori an, ikabeken a yaken rana no yamavyay sicyaikwaya. Ta si Kizisto rana o yamavyay do onowned ko. O yako ikavyay sicyaikwaya am yako ipeyhanhan o Anak na ni Ama ta do to. Na nikarilaw yaken a na nyangay no inawan.

Ivoso 2:4

Am tana akman ta sang a meyraraten a tao no kakwa am yatey rako o na karilawan nyaten ni Ama ta do to, do kanimanta na nyaten so to meyyonong a ikavyay no pahad ta a macikaop rana ji Kizisto. So ta ikanoyong a yana nipatazadang no pangangarilawan na.

Ivoso 5:2

Patwawen nyo do icicirawat nyo o pangangasyan na ni Ama ta do to, akman si Yeso Kizisto a yamarilaw nyaten a yajingbeywan do inawan na nisomidong jyaten. Ta o akman rana sang a vazay na am isaray na ni Ama ta do to.

Kelosi 1:18

Yaten rana a yamraralay nya am akma ney kataotao yaten ni Yeso Kizisto. So ika iya na no yameymatmatngeh nyaten. Iya o na yapwan no to meyyonong a ikavyay no pahad ta. Iya am Anak na ni Ama ta do to a nimirwa mavyay. So ika iya na no ney manokdwan na do karawan.

1 Timotay 6:13

O yako ipanci jimo am yongkad ko si Ama ta do to a nimangamaog so meycyamadadayan a kani Yeso Kizisto a jyanyahey a manci no manoyong a ciring do tangain na ni Pangsyo Pilato.

1 Timotay 6:15

Si marateng rana o araraw a nipamnekan na ni Ama ta do to am mai rana si Yeso Kizisto. Ta iya o manoyong a azwazwain ta a maveyvow abwata so ikararwa a Panirsirngen do peycyamahamahatawan na.

Sipolay 10:29

O to ngolala so Anak na ni Ama ta do to a kano rala na a makavonas so raraten na, kato na nazibo no yamanta no tao so pangangasyan a Seyzi am o akman rana sang a tao am makongo so wanjin. Naknakmen nyo pala. Jyabo kaji nakdengan no ipasingsingkad na sya ni Ama ta do to a.

Sipolay 9:14

Kakwakwan na rana no rala no kagling a kano baka a ipanci da makavoga so nikaratan da. Imanngo rana o oyowyat no rala ni Kizisto. Ta nioyatan no Seyzi a mapatanang so abo so karatan a kataotao na ji Ama ta do to. Jyabo kaji na haraharan pa makavonas so marahet do onowned ta a ombalinas so malas a icicirawat ta. No si manoyong o kakman ta sang am manoyong ta pahanhanen na ni Ama ta do to do vazay na.

1 Pite 1:19

Ta o na nitbos jinyo ni Ama ta do to do nyo peyraratenan am rala na ni Yeso Kizisto, akman so icicirawat da no mapatanatanang so nakem ji Ama ta do to a mapatanang so rala no ney yapya na kagling da.

1 Yowani 1:7

Am no si amyan ta do kazngangan a akman si Ama ta do to am macikaop ta do akma tey kakteh do cinai a omraralay ni Ama ta do to. Ta o rala na ni Yeso Kizisto a Anak na ni Ama ta do to o amvonas so makakaday a raraten ta.

1 Yowani 4:10

O pangangarilawan rana am beken a yaten marilaw ni Ama ta do to, ta si Ama ta do to am ori o marilaw nyaten. Ta iya o yapwan no meyngongyod a pangangarilawan. Am ori o nitovoyan na so Anak na mangay mawakwak no raraten ta.

Ipaziman 11:15

Avyotan no ikapapito no tinsi am amyan so macyak a ciring do teyngato. Maniring am, “Oyowyat a yatomalamozong no karawan am yamonganay do Panirsirngen ta kani Kizisto a nipamnekan na a yatomalamozong nya a mangay do kaidan no karawan.”

Ipaziman 11:3

Manovoy ko so rarwa ka meyyayob so zaping a tao a yongkad na ni Ama ta do to. Sira rana am ipeylimwang da o ciring na so adwa so ikasikalima (42) vehan.”

Ipaziman 17:14

Sira rana am arapen da o Kagling am haragen na sira no Kagling a kano nipamnekan na tao a omanop jya. Ta iya rana am kabtekan a Panirsirngen.”

Ipaziman 19:11

Makarahan am macita ko o teyngato a kacyangan a keyyan no asa ka malavang a baka. O ngaran no maoran do baka tao am meyngaran si Manoyong a kani Ipeyhanhan. Iya rana am to na mangozai o apya aktokto na a mapacici so tao a omarap so kavosoyan na.

Ipaziman 19:16

O vatvatek a domket do ayob na kado appa na am, “Kabtekan a Panirsirngen.”

Ipaziman 2:13

Ko katenngan na katey mowyat ni Satan do yanyo peyilyan. Am yanyo jya nipasaklangan yaken no kawakwak da so meylimwang no ciring ko a tao a meyngaran so Antipa do italamozong na ni Satan a ili nyo. Nyo jya nipeymakarwan yaken a iraralay.

Ipaziman 3:14

“Ipeyteygami mo o yamimong no kyokay do Lawticya. Si maniring ka am, ‘Yamaniring o meyngaran so Amin a yatey manoyong a ipeyhanhan so ciring a yapwan no makakaday a na nyamamaog ni Ama ta do to am:

Ipaziman 7:14

Maniring ko am, “Imo o makateneng jya.” Maniring jyaken am, “Sira rana am nimasapa da o rako a alalaw da no kakwa. Sira rana am nioyasan da no rala no Kagling o ayob da. So na ikalalavang rana no ayob da.