Cyalatay 6:14 - Seysyo No Tao

¹⁴ Am yaken rana am yabo ikadwa na no yako pazwain, ta si Yeso Kizisto a Panirsirngen ta o yako pazwain a yanimawakwak nyaten do jyojika. O peypeypangayan no jyojika jyaken am yanimavonas rana o marahet a nakenakem ko. O peypeypangayan no nang am yako na nimamlis.

Cyalatay 6:14 ပူးပေါင်းရင်းမြစ်များ

Locya 20:16

Jyabo kaji na balinasan sira a kapapalit na so tao a amvood so nihakawan na.” Mamizing da no aro a tao o ciriciring na am ipanci da o, “Jyabo kato na akmanan sang no vazay a.”

Loma 1:16

Ko ipeyhanhan o Mapasaray a Ciriciring na ni Ama ta do to. Ta ori rana am oyowyat na ni Ama ta do to a omahap so omanoyong jya tao do kapyapyan. Oya rana am manmanma a nipeylimwang do tao do Yotay a kapacitonton da no beken a tao do Yotay.

Loma 6:2

Jyabo kakman ta sang a. Ta yatamo rana nikarwan o peyraratenan ta. Am manngwa, olin ta pa o peyraratenan taha?

Loma 6:6

Tamo na katenngan o adan ta onowned a yarana akmey nimacizanod ji Kizisto a nipadket do jyojika. So ikanoyong ta na a nikomaro rana do raraten ta. So ikabo na rana no oyowyat no raraten a tomalamozong nyaten.

1 Kedinto 1:23

Am yanamen ipeylimwang si Kizisto a nipadket da do jyojika. O akman rana sang do tao do Yotay am ipacimanig da. Am no citahen da o akman sang no beken a tao do Yotay am abwata o ayyaingan na.

1 Kedinto 15:58

Am ori an, manga keypong an, makakdeng kamo so nakenakem ji Yeso Kizisto a Panirsirngen ta. Makowyat kamo a mapeyvazay so vazay na. Cyaha, ta nyo katenngan o kaji na liklikan so mapeyvazay so vazay na tao.

1 Kedinto 2:2

Ta mina to ko na mamneki do kabo no yamatarek a yako inanao jinyo. Ta si Yeso Kizisto a nipadket da do jyojika o yako inanao jinyo.

1 Kedinto 3:21

Am ori o ikabo no tao a mapazway a manci no kownot na do kadwan jyamen. Ta yamen rana a yamangnanao am nitovoy na yamen jinyo ni Ama ta do to a amnanao jinyo.

2 Kedinto 11:12

So ji ko mirwai do akman sang a nakenakem ko a mahap so patodahen nyo jyaken. Ta izavat ko so pazwayan da so ciring da no mangalalas a beken a lamlamsoy ni Kizisto, do kabo no pacicingayan no vazay da jyamen.

Cyalatay 1:4

Si Yeso Kizisto am na pahawahen yaten do raraten do karawan. Am ori o na pangozayan do nakenakem na ni Ama ta do to a mawakwak no raraten ta.

Cyalatay 2:17

Yaten rana a yaomanoyong ji Kizisto a nibnek na ni Ama ta do to a abo rana so raraten do tangain na am no si meyyangay ta kano beken a tao do Yotay a meyraraten am manngwa, apyahen na ni Kizisto o kapeyraraten ta saon? Jyabo kapya na sya a.

Cyalatay 2:19

Yaken rana am ko katenngan o kaji makahapan so to meyyonong a ikavyay no pahad ko no si pangozayan ko o iwawalam ni Moyse. Am ori o ko na ji ngapi so iwawalam ni Moyse. Ta ko na hapen o vazay na ni Ama ta do to. Ko akmey to macizasing so kataotao ji Kizisto a nimawakwak do jyojika.

Cyalatay 2:20

Am ori an, ikabeken a yaken rana no yamavyay sicyaikwaya. Ta si Kizisto rana o yamavyay do onowned ko. O yako ikavyay sicyaikwaya am yako ipeyhanhan o Anak na ni Ama ta do to. Na nikarilaw yaken a na nyangay no inawan.

Cyalatay 3:21

No akman sang am manngwa, masipalpalpid o iwawalam ni Moyse a kano pangozayan na a ciring a nitoro na ni Ama ta do to? Jyabo kakman na sang a. No si manoyong o kapakahap ta no iwawalam ni Moyse so to meyyonong a ikavyay no pahad ta am makanet rana ori a ipacikaop ta ji Ama ta do to.

Cyalatay 5:24

O yaomanod ji Yeso Kizisto a tao am akma dey nipazanod o marahet a nakenakem da do jyojika ni Yeso Kizisto, do kanimawakwak na no raraten ta.

Veydipi 3:18

Beken a ko ipisa inyo a yavavagan. So ko to lavii a yamapamizing jinyo an. O icicirawat da no aro a tao am yamacisala ji Kizisto a nimawakwak do jyojika. So da ikanoyong a akmey mapeykavosoyan si Yeso.

Veydipi 3:3

Ta yaten rana am manoyong a niyongkadan na rana ni Ama ta do to, do kasidong na jyaten no Seyzi a yamraralay ni Ama ta do to. So ta ji mangozai do makakaday a iwawalam da no tao do Yotay a mapeypapya jyaten do tangain na ni Ama ta do to, ta si Yeso Kizisto o ozain ta. Am ori o yata ikasaray rana a yamacikaop jya.

Kelosi 2:20

Inyo rana yameyngongyod a macikaop ji Kizisto am ji nyo rana pasaklanga o adan a marahet a icicirawat nyo, do nyo kaji ngonotan rana do adan nyo a icicirawat. Am ikeykongo kamo ya a yapa macizavoz do icicirawat da no tao do karawan,