Cyalatay 2:19 - Seysyo No Tao

¹⁹ Yaken rana am ko katenngan o kaji makahapan so to meyyonong a ikavyay no pahad ko no si pangozayan ko o iwawalam ni Moyse. Am ori o ko na ji ngapi so iwawalam ni Moyse. Ta ko na hapen o vazay na ni Ama ta do to. Ko akmey to macizasing so kataotao ji Kizisto a nimawakwak do jyojika.

Cyalatay 2:19 ပူးပေါင်းရင်းမြစ်များ

Loma 4:15

O iwawalam na ni Moyse o yapwan no peyoyaoya na ni Ama ta do to. Ta abo yasa ka tao a manoyong a makahap sya. No abo pangozayan a iwawalam am do wanjin o kapwan no raraten no tao.

Loma 5:20

O nitoro ni Ama ta do to a iwawalam na ni Moyse am ipakateneng no tao do raraten da. Am tana akman sang am arakorako pa o aryarilaw na jyaten ni Ama ta do to.

Loma 6:11

Akman sang, ta naknakmen nyo o kapacizanod no adan a onowned nyo ji Kizisto a nimawakwak no raraten nyo. So ikanoyong nyo na a meypahagnat so onowned ji Ama ta do to, ta kamo rana macikaop ji Yeso Kizisto.

Loma 6:14

So ji na rana nalamozongi ninyo no raraten. Ta nyo na ipeyhanhan o pangangarilawan na ni Ama ta do to a makavonas so raraten nyo. So ji na monganai do apya icicirawat nyo.

Loma 6:2

Jyabo kakman ta sang a. Ta yatamo rana nikarwan o peyraratenan ta. Am manngwa, olin ta pa o peyraratenan taha?

Loma 7:14

Manoyong o na kapo ji Ama ta do to no iwawalam na ni Moyse. Am yaten rana am tao ta. Jyabo kapakataptap ta so yadomket a ciring do iwawalam na ni Moyse a.

Loma 7:4

Manga kakteh, yakamo akman sang a na rana ji nalamozongan no iwawalam na ni Moyse. Ta kanyo na macikaop ji Yeso Kizisto a nimawakwak no raraten nyo. Inyo rana sicyaikwaya am na rana ipeymatmatngeh inyo ni Yeso a yanimirwa a mavyay a Panirsirngen ta. Ta iya o manoyong a ahapen ta so vazay.

Loma 8:2

Ta o Seyzi am ori o yamapanop jyaten ji Yeso Kizisto. So ta ikanoyong rana yakmey nikowvayan so raraten a kano ji na rana meydednai no peyoyaoyyan na ni Ama ta do to.

1 Kedinto 10:31

Am ori an, tana makakaday a vazay nyo a tana koman kamo a tana omyop kamo am naknakmen nyo o kazwazway nyo si Ama ta do to.

1 Kedinto 9:20

No macivazay ko do tao do Yotay am inarahen ko sira o tao do Yotay, do kakza ko no kapanop ko so aro a tao do Yotay. Tana ko na ji mangozai o iwawalam na ni Moyse am ko ahapen o iwawalam da, do ko kapanadnad sira a yapanopen.

2 Kedinto 5:15

Na nikawakwak ni Yeso o tao do karawan. Ori o ji ta to mangozai do aktokto ta. Ta pangozayan ta si Yeso Kizisto a nimawakwak no raraten ta a kapirwa na rana mavyay.

Cyalatay 2:20

Am ori an, ikabeken a yaken rana no yamavyay sicyaikwaya. Ta si Kizisto rana o yamavyay do onowned ko. O yako ikavyay sicyaikwaya am yako ipeyhanhan o Anak na ni Ama ta do to. Na nikarilaw yaken a na nyangay no inawan.

Cyalatay 3:10

O tao a meyhanhan no iwawalam na ni Moyse am meydedna jira o peyoyaoyyan na ni Ama ta do to, do kaji da makataptapan sya a peyvazain. Ta o ciring do Seysyo am, “O tao a ji makataptap sya peyvazain so yadomket a iwawalam ni Moyse am mangay jira o peyoyaoyyan na ni Ama ta do to.”

Cyalatay 3:24

Am ori o icyakma ney inyapwan ta no iwawalam ni Moyse amzat do onowned ta mangay do yai na rana ni Kizisto a kabnek na rana jyaten ni Ama ta do to a abo rana so raraten do tangain na, do kapeyhanhan ta nya.

Cyalatay 6:14

Am yaken rana am yabo ikadwa na no yako pazwain, ta si Yeso Kizisto a Panirsirngen ta o yako pazwain a yanimawakwak nyaten do jyojika. O peypeypangayan no jyojika jyaken am yanimavonas rana o marahet a nakenakem ko. O peypeypangayan no nang am yako na nimamlis.

Kelosi 2:20

Inyo rana yameyngongyod a macikaop ji Kizisto am ji nyo rana pasaklanga o adan a marahet a icicirawat nyo, do nyo kaji ngonotan rana do adan nyo a icicirawat. Am ikeykongo kamo ya a yapa macizavoz do icicirawat da no tao do karawan,

Kelosi 3:3

Ta inyo rana am yamyan rana jinyo so vayo a onowned nyo a ji nalamozongan rana no raraten. Ta kamo rana macikaop ji Yeso Kizisto a kani Ama ta do to.

1 Tesalonicya 5:10

O nikawakwak na ni Kizisto am ahapen na yaten do kapyapyan. Am ori an, tana do ta ika mavyay pa ya a tana do ikawakwak ta rana am no si mai si Yeso am macikaop ta na jya a mangay do kaidan no karawan.

Tito 2:14

Na nipalit ni Yeso Kizisto no kataotao na o raraten ta. So ikaro ta rana do makakaday a ta pineyraratenan. So icyakma tamoy matnaw a ranom so onowned a omanod jya, mowyat a meyvazay so apya vazay.

Sipolay 9:14

Kakwakwan na rana no rala no kagling a kano baka a ipanci da makavoga so nikaratan da. Imanngo rana o oyowyat no rala ni Kizisto. Ta nioyatan no Seyzi a mapatanang so abo so karatan a kataotao na ji Ama ta do to. Jyabo kaji na haraharan pa makavonas so marahet do onowned ta a ombalinas so malas a icicirawat ta. No si manoyong o kakman ta sang am manoyong ta pahanhanen na ni Ama ta do to do vazay na.

1 Pite 2:24

Nisabway na ni Kizisto o raraten ta do jyojika. Ori o karwan ta na do peyraratenan ta a somazap so isaray na vazay ni Ama ta do to. O kataotao na ni Yeso a yanimanngannga nyaten am yata nipakahap so to meyyonong a ikavyay no pahad ta.

1 Pite 4:6

Ori o yarana nipamizngan no Mapasaray a Ciriciring na ni Ama ta do to so yarana nimawakwak a tao. Ta tana meyyangangay o tao a tana mawakwak a komaro do karawan am o pahad da no nimraralay ni Ama ta do to am macitovong ji Ama ta do to do teyngato.