2 Tesalonicya 1:7 - Seysyo No Tao

^7-8 Inyo rana a yakman jyamen a da peyrarehten am ji kamo alaw, ta balinasen na rana ni Ama ta do to o alalaw ta no si mai si Yeso a Panirsirngen ta a meygegcin apo do teyngato a maciralay do apoy a kano aro a mowyat a tinsi. So ikanoyong no ji nganoyong jya tao a kano ji ngamizing so Mapasaray a Ciriciring na ni Yeso a Panirsirngen ta a ioya na.

2 Tesalonicya 1:7 ပူးပေါင်းရင်းမြစ်များ

Matay 16:27

Yaken rana a Nipamnekan na ni Ama ta do to a tao am maciralay ko do azwazway na ni Ama kano aro a tinsi a meygegcin. To ko palololwa o yazaw ko so mina vazay da jyaken no tao.

Matay 16:28

To ko na macitangayan jinyo am o tao a yatomanek do jya am amyan jira ang so makapis pa jyaken a Nipamnekan na ni Ama ta do to a tao a mai a tomalamozong no karawan, do ikamavyay da pa.”

Matay 25:31

“No si meypanirsirngen o Nipamnekan na ni Ama ta do to a tao a macihza do tinsi ni Ama ta do to am amlisna do mazway a lilisnan na.

Matay 25:41

“Karahan am maniring o Panirsirngen do tao a amyan do ozi na am, ‘Kazey kamo a yana panircirngan ni Ama ta do to. Ji kamo macisngen jyaken. Angay kamo a pacilovot do na sokzan si Satan a kano kararay na a yamyan do to meyyonong a yajyahesep a makotokotod a lila no apoy.

Matay 26:64

Maniring si Yeso am, “Yamanoyong o mo ipanci ang. Am ko pa ipanci jinyo am macipinda sicyaikwaya o kapakacita nyo jyaken a Nipamnekan na ni Ama ta do to a tao a amlisna do wanan na ni Ama ta do to a maciralay do cinalab a meygegcin do karawan.”

Make 14:62

Maniring si Yeso am, “Noon. Manoyong. Mamimin kamo a makacita so Nipamnekan na ni Ama ta do to a tao a omlisna do wanan na ni Ama ta do to a meygegcin do cinalab a mai do teyrahem.”

Make 8:38

O tao rana do karawan sicyaikwaya am yatey yaro rana o raraten da. No amyan so tao a macimanig nyaken a kano ciring ko am no meysinaoli ko a Nipamnekan na ni Ama ta do to a tao a macihza do azwazway ni Ama ta do to a kano aro a tinsi am abo nakenakem ko sya.

Locya 16:25

Am maniring si Apolahan am, ‘Manganako, mo pa manakem no kapeyigegen mo do karawan asyo an, a to meypanpan do kanekanen mo an. Am si Lasalo am abo ipangakaday na do araraw. Am sicyaikwaya am yamyan rana do jya yamacikasaray jyamen, a imo am ka amlavi so onowned.

Locya 17:30

O araraw no yai ko a Nipamnekan na ni Ama ta do to a tao am akman so sang.

Yowani 1:3

Ciring o nyamaog na ni Ama ta do to so makakaday. So ikabo no asa ka maoran no karawan a ji na nyamaog no Ciring eya.

Yowani 1:51

Maniring pa jira si Yeso am, “To ko na macitangayan jinyo am macita nyo na o teyngato a kacyangan a kapakacita nyo na so aro a tinsi ni Ama ta do to a meygegcin jyaken a Nipamnekan na ni Ama ta do to a meysisinaoli sira do teyngato.”

Nimlivolivon 1:11

“Inyo rana a tao do Cyadidi am ikongo nyo ipeytatanek do jya a yatomangara so hanit. Ta si Yeso eya yakomaro rana jinyo a yamangay rana do teyngato am akman sang, ta mirwa pa meysinaoli do teyrahem a maciralay do cinalab.”

Nimlivolivon 3:19

Am ori o ipamlis nyo rana somazap si Ama ta do to. Ta ori o ivonas na so raraten nyo.

Loma 8:17

No manoyong o kakma tey anak ni Ama ta do to am manoyong keyyan no itoro na jyaten no makwa. So ikakman ta sang a macikasaray do Anak na si Yeso Kizisto. Ta yaten rana am no macyanod ta do alalaw na ni Kizisto am macikazway ta do azwazway na.

1 Kedinto 3:13

Am o mina vazay ta am macita ta rana no makwa o kehni na a kaji nehniyan. Ta no marateng rana o araraw na no yai ni Yeso am patwawen na rana. Ori o ipakateneng rana jya. Ta no makwa am askadan na rana ni Yeso o mina vazay ta.

2 Kedinto 4:17

O yaji meyyonownay a alalaw namen eya am ipakahap namen so maharahara pa, a to meyyonong a azwazway namen ji Ama ta do to.

Ivoso 1:2

Inaoy si itoro na jinyo o ikapiya no onowned nyo a kano pangangarilawan na ni Ama ta do to a kani Yeso Kizisto a Panirsirngen ta.

Kelosi 1:16

Iya o nyamaogan na sya ni Ama ta do to so hanit a kano karawan a kano meycyamadadayan a yamacita kano yajyacita, pacyangayan no yajyacita so oyowyat a kalamsoyan ni Satan a kano tinsi na ni Ama ta do to. So na ikanoyong a tey mazway a Tao do to.

1 Tesalonicya 3:13

Am ori o ikanoyong na ni Ama ta do to a mapakdeng so nakenakem nyo a omraralay nya. Ta no si meygegcin si Yeso a Panirsirngen ta kano niomraralay nya tao am manoyong kamo do tangain na ni Ama ta do to a ji meylimoteng so onowned a abo so karatan.

2 Timotay 2:12

Si ji ta hayo so nakenakem am macizanod ta jya tomalamozong no teyngato. Si ji ta nganoyngi am ji na singkaji yaten.

Tito 2:13

So ikanoyong ta mapananala so ipeygegcin na no Tao do to ta si Yeso Kizisto a kapacizanod ta somaray do azwazway na. Ta iya o mapatazadang jyaten do teyngato.

Sipolay 10:27

Sira rana to nazibo ni Ama ta do to a tao am kapananala da rana so peyoyaoyyan na ni Ama ta do to do makotokotod a lila no apoy a ombalinas sira.

Sipolay 12:29

So ikakdekdeng ta pa so onowned a mahap so vazay na. Ta o peyoyaoyyan na ni Ama ta do to am akmey lila no apoy a manemtem so meyraraten a tao.

Sipolay 4:1

Am ori o naknakman nyo so kato nyo ngotokotan so nakem a omanoyong ji Ama ta do to. Ta no si ji kamo manganoyong am ji kamo macikaop ji Ama ta do to.

Sipolay 4:11

Am ori o ikowyowyat ta pa a omonot do ciriciring na ni Ama ta do to. Ta ori o ipacikaop ta ji Ama ta do to. Sino ka paro a ominara so ji nganoyong do ciriciring na ni Ama ta do to a tao a yatey marahet so vazay.

Sipolay 4:9

So na ikanoyong ni Ama ta do to a yanimangata so kasaraw a yana itaziman do yamonganay jya tao.

Sipolay 9:28

Yakman sang si Kizisto a ipisa mapatanang so kataotao na a ivonas na so raraten no aro a tao. So ikeypisa na pa mai do teyrahem. Am beken a raraten o vazay na. Ta mangay na hapen sira o mapanala sya tao.

1 Pite 3:22

Yana myan si Yeso Kizisto do teyngato a yamlisna do wanan ni Ama ta do to a yatomalamozong no tinsi. So ji da makapeysopoi do oyowyat ni Kizisto no makakaday do teyngato.

2 Pite 3:7

Am sicyaikwaya am yajyablis o hanit a kano teyrahem, do yana kahad sya no ciring na ni Ama ta do to, mangay do itemtem na so hanit a kano karawan a kano ji manganoyong a tao, no marateng rana o araraw no ipeykapyapinpin na so tao ni Ama ta do to.

Yota 1:7

Naknakmen nyo o tao a yameyvahay do Sotoma kado Hamola kano yamacitangked do dang so ili a tao a yamapasala so aktokto da a yamapeyvazay so macimasesnek a vazay. So ikanoyong no jyahesep a lila no apoy a nimangay meydedna jira. O akman rana sang a vazay am ikananao da rana ori no meyraraten a tao.

Ipaziman 1:7

Citahen nyo an, si Yeso Kizisto a maciralay do cinalab a mai an. Mamimin o tao a makacita sya, mangay do nimapadket sya do jyojika tao o makacita sya. So ikamimin no tao do karawan a malaw nya so onowned a makaranes do karawan. So ikanoyong no akman so sang.

Ipaziman 14:10

ayopen da o masozi a saki ni Ama ta do to. O saki rana am sozisozyan na ni Ama ta do to. So ikabo no kasyasyan na nira. O paglowan na so ayoyopen no peyoyaoyyan na am pasingsingkadan na sira do tangain no aro a tinsi a kano Kagling a matemtem no lila no apoy.

Ipaziman 14:13

Makamizing ko pa so ciring a apo do teyngato. Maniring am, “Amyapo sicyaraw eya o katey rako na rana no sarasaray da no mawakwak no vazay ni Yeso a tao. So vatvatkan mo do ciring eya.” Maniring o Seyzi am, “Manoyong o kakavos na rana no zikzikna da. So ipeywalam da rana, ta amyan so kakownongan no mina zikna da.”

Ipaziman 20:11

Meyratateng am makacita ko so malavang a rako a lilisnan no panirsirngen a kano amlisna do dang. Ji rana cita o hanit a kano teyrahem a tomayo do tangain na.

Ipaziman 21:4

Linasan na ni Ama ta do to o kaoo da. Abo rana o mawakwak. Abo rana mazabab so onowned a kano amlavi so onowned a kano meyngen. So ikanoyong na rana komavos no mina vazay no kakwa.”

Ipaziman 22:16

“Yaken rana am si Yeso ko. Nimanovoy ko so lamlamsoy ko a tinsi a meylimwang nya jinyo so vazay eya do peycyakyokyokayan na. Yaken rana am sivovoong na yaken ni Tawey. Yaken rana am akmey karow a mata no hanit.”

Ipaziman 22:6

Maniring jyaken o tinsi am, “Yabo na kalalasan no ciring eya. Ta si Ama ta do to a yaniomoyat do panoyonoywan na so ciring am yanimanovoy so tinsi a mapaziman so yaomanam pa vazay do aro a lamlamsoy na. Ta ji rana meyyahahay a mai.”

Ipaziman 22:9

Am maniring jyaken am, “Ji ka akman sang. Ta yaken rana ka nimo a kano akma moy kakteh do cinai a yana panoyonoywan so ciring a kano yamangozay do ciring do vakong eya am to meyyangangay a lamlamsoy na. So ikapyapya na pa ni Ama ta do to a iraralay mo.”

Ipaziman 6:11

Makarahan am maponged sira no malavang a magorogod a kapakamizing ko so ciring a manci nira meywalam pa, mangay no si mablit rana sira o kararay da a mahap so vazay ni Yeso Kizisto a akma dey kakteh do cinai a akman sira wakwaken da.