2 Kedinto 6:7 - Seysyo No Tao

⁷ Nioyatan na yamen ni Ama ta do to a meylimwang no manoyong a nanao na a mapacitacita no kanoyong namen a lamlamsoy na ni Ama ta do to. So icyakma nameney mapeyvoovoo so apya nakenakem namen a iharag namen so amrahet jyamen a tao.

2 Kedinto 6:7 ပူးပေါင်းရင်းမြစ်များ

Make 16:20

kangay da rana no nimacinanao ji Yeso a meylimwang no Mapasaray a Ciriciring na ni Ama ta do to do peycyeylilyan na. So ikanoyong ni Yeso a macikaop jira a manta nira so oyowyat da a mapeyvazay so mapeyzokab a vazay. Ori rana am yongkad no kanoyong no Mapasaray a Ciriciring na ni Ama ta do to a ipeylimwang da.]

Nimlivolivon 11:21

Amyan jira o oyowyat ni Ama ta do to. Am ori o nipeyparo da no tao a omraralay ni Yeso.

1 Kedinto 1:24

Am do tao do Yotay a kano beken a tao do Yotay a nipamnekan na ni Ama ta do to a omanoyong ji Kizisto am katenngan da si Kizisto a yanan no rako a oyowyat na ni Ama ta do to a kano teneteneng na ni Ama ta do to.

2 Kedinto 13:4

Tana yakmey yabo oyowyat na ni Kizisto do yada kanimapadket sya do jyojika am oyowyat na ni Ama ta do to o yanimapeyvangon sya. So namen ikakman sang akmey abo so oyowyat a yamacikaop ji Kizisto. Am no namen ioya inyo am oyowyat na ni Ama ta do to o namen pangozayan an.

2 Kedinto 2:17

Namen jyakman so aro a tao a yamacininizpi no nanao ni Ama ta do to. Ta namen meyngongyod a nipamnekan ni Ama ta do to a yameylimwang no ciriciring na. So namen ikanoyong a yaji mangalalas so ciring a lamlamsoy na ni Kizisto.

2 Kedinto 4:2

Namen ji ngapa o macimanig a vazay. Namen ji mangalalas. Namen ji palasa o ciriciring na ni Ama ta do to, ji powziba o nanao ni Ama ta do to. Ta ipacita namen do tao o icicirawat namen, do kanoyong namen a lamlamsoy na ni Ama ta do to.

2 Kedinto 7:14

Tana nyazwazway ko ninyo do tangain ni Tito am abo kalasan na no nang. Ta o mina ciring namen a pagazen namen jinyo am yamamimin a manoyong ori. So namen pacyanoyngan do namen pazwain do tangain ni Tito a yamanoyong.

Ivoso 1:13

Inyo rana beken a tao do Yotay am kamo akman sang, ta no kapakamizing nyo so manoyong a mapasaray a nanao am mina to nyo nganoyngi si Kizisto. Ori o na nitorwan rana no Seyzi jinyo ni Ama ta do to akma ney yongkad no kapacikownongan nyo rana jya.

Ivoso 3:20

Oyowyat na ni Ama ta do to am ori o yameyvazay do onowned ta a omoyat jyaten a meyhanhan nya. Ori o yata ipakahap so yamapeyzokab a ji tangtoktwan a vazay.

Ivoso 4:21

No kamo manoyong a yarana nimakamizing sya, yarana mangononong do manoyong a nanao na ni Yeso a ninanao namen jinyo am,

Kelosi 1:5

Ta no kavavayo nyo pa nimakamizing so Mapasaray a Ciriciring na ni Ama ta do to am to nyo na nganoyngi o itoro na jinyo ni Ama ta do to do teyngato.

1 Tesalonicya 5:8

No ta manoyong amyan do kazngangan am meytataziman ta an. O nakenakem ta ji Ama ta do to a kano pangangarilawan na am akma tey sirong. Akma tey sakop o jyagonay a onowned ta a mapanala sya mahap jyaten do teyngato. So ikabo rana no oyaoyyan na nyaten.

2 Timotay 2:15

Makowyowyat ka pa do tangain na ni Ama ta do to a mapacita no kaji mo ablisan no nakenakem jya a abo so karatan a mahap so vazay na a mapatak a mangnanao no manoyong a nanao na.

2 Timotay 4:7

O vazay ko rana ji Ama ta do to a na nitoro jyaken am ko na nimamimin a nipateyka nipeyvazay. Akman so malalayo a tao a omtad rana malayo. So ko rana nimiminan so manoyong a nanao a nyahap.

Sipolay 2:4

Yakman sang, ta nioyatan na sira ni Ama ta do to a mapeyvazay so makakaday a yamapeyzokab a vazay a yongkad no kanoyong no ipangnanao da. So yana ikakman sang ni Ama ta do to a yamangozay do nakem na a yamvonong so teneteneng a kano oyowyat no Seyzi do omanoyong jya tao a isidong da so icyatatao da.

Yake 1:18

Na to mangozai o nakem na a manci nyaten akma ney anak. Ta yaten rana am ipeyhanhan ta o manoyong a nanao na. Am ori o yata iyan do ney manokdwan na do makakaday a nyamamaog na.