2 Kedinto 3:6 - Seysyo No Tao

⁶ Iya o yanamen ipakahap so vayo a pangozayan a ciring na ni Ama ta do to a yanamen ipeylimwang. Oya rana am beken a nivatvatkan. Ta pangozayan a ciring no Seyzi. O nivatvatkan a iwawalam am ikawakwak no tao. Am o Seyzi am itoro na jyaten o to meyyonong a ikavyay no pahad ta.

2 Kedinto 3:6 ပူးပေါင်းရင်းမြစ်များ

Matay 13:52

Maniring si Yeso am, “O mangnanao no iwawalam ni Ama ta do to a tao a kapacikaop na rana do italamozong ni Ama ta do to am akman so katenngan a tao a aro so peymeymasaodan. Ta beken a o adan a nanao o katenngan na a ipangnanao, ta katenngan na o vayo a nanao ni Ama ta do to a patwawen.”

Matay 26:28

Oya rana am rala ko a nimvoyog a omaing do aro a tao a omvonas so raraten da. O rala ko rana ya am yongkad nyo do vayo a pangozayan nyo a ciring na ni Ama ta do to.

Make 14:24

Maniring si Yeso am, “Oya rana am rala ko a nimvoyog a omaing do aro a tao. O rala ko rana ya am yongkad nyo do avayo a pangozayan nyo a ciring na ni Ama ta do to a mapatastas so omanoyong jya tao.

Locya 22:20

Mateyka sira koman am akman so sang, ta ahapen na ni Yeso o kopo a yanan no potaw cyo. Maniring am, “Oya rana am rala ko a nimvoyog a omaing jinyo a yongkad no vayo a pangozayan a ciring na ni Ama ta do to.

Yowani 5:21

O vazay na ni Ama mapeyvangon so nimawakwak a tao am akman ko sang a to mangozay do nakenakem ko a omvyay so tao.

Yowani 6:63

O yamanta no tao so to meyyonong a ikavyay no pahad na am Seyzi. So ikabo no oyowyat no tao a ipakahap sya. O ko ipanci jinyo a ciriciring am apo do Seyzi na ni Ama ta do to. Ori rana am ikavyay ori.

Loma 1:5

Am ori o ko pangozayan do ngaran na a yamahap so vazay na yamapanop so tao a yaomanoyong ji Yeso Kizisto do peycyamahamahatawan na,

Loma 3:20

Abo asa ka tao a mangozay do iwawalam na ni Moyse a manoyong a manci no kabo no raraten na do tangain na ni Ama ta do to. Ta o iwawalam na ni Moyse am kapanidong na so tao a makateneng do raraten da.

Loma 4:15

O iwawalam na ni Moyse o yapwan no peyoyaoya na ni Ama ta do to. Ta abo yasa ka tao a manoyong a makahap sya. No abo pangozayan a iwawalam am do wanjin o kapwan no raraten no tao.

Loma 4:17

Ta maniring do Seysyo am, “Ko abneken imo a ama da no tao do peycyamahamahatawan na.” So ipangononong na no ciring ni Ama ta do to. Ta o na anoyngan ni Apolahan a Tao do to am yamapeyvangon so nimawakwak a tao a nimangamamaog so karawan.

Loma 7:6

Am sicyaikwa rana ya am na rana jyagogadan yaten no nivatvatkan a iwawalam na ni Moyse. Ta ori rana am adan rana ori. So ta na pangozayan do na ipananao jyaten no Seyzi a vayo a nakenakem ta ji Ama ta do to.

Loma 8:2

Ta o Seyzi am ori o yamapanop jyaten ji Yeso Kizisto. So ta ikanoyong rana yakmey nikowvayan so raraten a kano ji na rana meydednai no peyoyaoyyan na ni Ama ta do to.

1 Kedinto 11:25

Mateyka sira koman am akman so sang a mahap so ayoyopan. Maniring am, “Oya rana am yongkad no vayo a pangozayan nyo a ciring na ni Ama ta do to a manci no kahap na jinyo do kanimvoyog ko ninyo no rala. So to nyo amwamooni sya a iyapapaw nyo jyaken.”

1 Kedinto 12:28

Do kyokay na ni Ama ta do to am yamakakaday o tao a nipamnekan na mahap so vazay na. O ney manma na am nipamnekan na ni Yeso a amlivolivon no ciriciring na. Tomonton am mangononong so ciriciring na. O ikatlo na am mangnanao no ciriciring na, katwatonton na rana no meyvazay so mapeyzokab a vazay a kapacyangay da rana no manvonas so ingingnen no tao a kano marilaw no icyatatao da kano makayokod no aro a sinjya kano meyzezyak so macitarek a ciring.

1 Kedinto 15:45

Ta maniring do Seysyo am, “Si Adam am tao kamamaogan na.” Am o ipanci a manowji a Adam am si Kizisto a manta nyaten so to meyyonong a ikavyay no pahad ta.

1 Kedinto 3:10

No ko pangozayan o nitoro na jyaken ni Ama ta do to a teneteneng am ko akmey mateneng a mangamaog so vahay a tao, do kanimapangay ko so soil na a katonton da jya pakapyahen do teyngato no karwan no tao. So pakapyan da so paringen da vahay.

1 Kedinto 3:5

Ikongo angangayan ni Apolo a ka nyaken. Yamen rana am na kapeylamlamsoy jyamen ni Ama ta do to a yamapalolo jinyo a yaomanoyong ji Yeso Kizisto. Ta namen to mangozai o nitoro na ni Ama ta do to a vazay.

2 Kedinto 11:23

No si lamlamsoy na sira ni Kizisto am ji ko pazway a ciring ko am jyabo kaji ko a haraharan pa ka nira. Ta yarakorako o zikzikna ko so vazay na ni Ama ta do to. Yako ipiro a da aptengen, yada bakbakan, kaji ko angayan no inawan.

2 Kedinto 3:14

Am o onowned da am yakmey kaneban yatodangay sicyaikwaya. Ta no yada vilangan o yamakakaday a vakong do adan a Seysyo am yakman sang a yamabengbeng o onowned da. Ta o macitovong a tao ji Kizisto o ikapakaro no ombengbeng do onowned da.

2 Kedinto 3:3

Kamo mapayok a akma ney teygami ni Kizisto a yana nivatvatkan a yana niparara jyamen. O teygami rana ya am beken a yana nivatvatkan ni Ama ta do to no ipeyveyvatvatek do mataripis a vato a nitaid na ji Moyse. Ta nivatvatkan no Seyzi no to meyyonong a Tao do to do onowned no tao.

2 Kedinto 3:7

O iwawalam ni Moyse am nivatvatkan do mataripis a vato. No keyyan no nang am tomwaw rana o azwazway na ni Ama ta do to. No kanang am nimaniray o moing ni Moyse. Am ori o nikakowap da no Isedi a tao no oyowyat na ni Ama ta do to. No si manoyong a mazway o na kapwan no peyoyaoyyan ni Ama ta do to a iwawalam ni Moyse am

2 Kedinto 3:9

No manoyong o kazway no iwawalam ni Moyse a manci no raraten am arakorako pa o kazwayan na no vayo a pangozayan a ciring na ni Ama ta do to a makavonas so raraten ta, a kabo na rana no raraten ta do tangain na.

Cyalatay 3:21

No akman sang am manngwa, masipalpalpid o iwawalam ni Moyse a kano pangozayan na a ciring a nitoro na ni Ama ta do to? Jyabo kakman na sang a. No si manoyong o kapakahap ta no iwawalam ni Moyse so to meyyonong a ikavyay no pahad ta am makanet rana ori a ipacikaop ta ji Ama ta do to.

Ivoso 2:1

No kaji nyo pa manaralayan am pasobnan nyo pa o ciriciring na ni Ama ta do to a meyraraten.

Ivoso 3:7

Na nitenngan yaken ni Ama ta do to a lamlamsoy na a meylimwang no Mapasaray a Ciriciring na. Am pangangarilawan ni Ama ta do to a kano oyowyat na o yasomidong jyaken a yamahap so vazay na.

1 Timotay 4:6

No si vahangsowen mo o aro a vazay eya do akma moy kakteh do cinai am manoyong ka lamlamsoy ni Yeso Kizisto, do kakdeng no nakenakem mo a mapeyvazay so manoyong a nanao ni Ama ta do to a yameypahagnat so onowned rana ji Ama ta do to.

2 Timotay 1:11

Na nipamnekan yaken ni Ama ta do to a amlivolivon a meylimwang no Mapasaray a Ciriciring na a ipangnanao so tao.

Sipolay 12:24

Inyo rana am kamo rana nimakaranes do tangain ni Yeso a yanimanta ninyo so vayo a pangozayan a ciring na ni Ama ta do to a na rana nitaktakan no rala na. Ta o rala na ni Yeso o mapanop jyaten ji Ama ta do to a omagaz do kapyapyan. Ta o rala na ni Yapo am omagaz do kararatan.

Sipolay 13:20

Si Ama ta do to rana a yamanta nyaten so ikapiya no onowned ta am nipeyvangon na si Yeso a Panirsirngen ta do heseb na. Na rana nipangononongan ni Ama ta do to no rala ni Yeso o to meyyonong a pangozayan a ciring na. So na ikanoyong a tomalamozong nyaten aro a tao.

Sipolay 7:22

So ikanoyong na ni Yeso Kizisto a yongkad ni Ama ta do to a mangononong do vayo a pangozayan a ciring na jyaten. So ikapyapya na pa no vayo a pangozayan a ciring na ni Ama ta do to a kano adan a ciring na a nitaid na ji Moyse.

Sipolay 8:13

Yarana nimangamaog si Ama ta do to so vayo a pangozayan a ciring a nyalit na do adan a pangozayan a ciring. So to na rana tastasi no adan a pangozayan a ciring, ta abo rana o oyowyat na.

1 Pite 3:18

Ta ipisa si Yeso Kizisto a nimawakwak no raraten ta, kapakavos na rana so vazay na a mapatazadang jyaten do teyngato. So ikanoyong na abo so raraten a nisomabway no raraten no tao, do na kapanop jyaten ji Ama ta do to. Tana niwakwak da o kataotao na am jya nimawakwak o pahad na.

1 Yowani 1:1

Namen padketen do teygami eya o Ciring a yapwan no to meyyonong a ikavyay no pahad. Ori rana am Ciring na ni Ama ta do to a nimeycicinda a nimyan no kakwa. Nimamizing namen rana o ciring na. Nimacita namen rana ori. So na ikanoyong no kanimakacita namen sya do kanimacihza namen jya no keyyan na do teyrahem. Iya rana am si Yeso Kizisto.