1 Tesalonicya 5:6 - Seysyo No Tao

⁶ Ori o ji ta to nginarai so karwan no tao a to ngitkeh, ta meytataziman ta.

1 Tesalonicya 5:6 ပူးပေါင်းရင်းမြစ်များ

Matay 13:25

Mitkeh o tao ori am mangay o kavosoyan na a mangay a meymowa so tamek a kangay na rana a moli.

Matay 24:42

Am ori o ipeytataziman nyo, ta ji nyo a tenngi o araraw no yai ko a Panirsirngen nyo.

Matay 25:13

Maniring rana si Yeso am, “Ori an, ipeytataziman nyo an. Ta ji nyo a tenngi o araraw na no yai ko.

Matay 25:5

Ikongo do mahay a nimai o mapazagpit a tao, am ori o nipeykaititkeh da no mavavakes.

Matay 26:38

Maniring jira am, “Yako toda jyangay so inawan a yamazabab so onowned. So ipacizanod nyo jyaken do jya meytataziman.”

Make 13:37

O yako ipanci jinyo am inyo a aro a tao o ko peycirngan sya. So ipeytataziman nyo!”

Locya 12:37

Meysinaoli o lawpan am macita na o lamlamsoy na a yapiya so nakenakem. Ori o nisarayan na nira. Ko pa ciring jinyo am jyabo kaji na meyyaywayob no lawpan a mapalisna sira a kangay na tomaotao so lamlamsoy na.

Locya 12:39

Naknakmen nyo o yameykasayan. Ta no katenngan no mapeyvahay sya o araraw no yai no manakaw a tao am jyabo kapakatakaw no manakaw ang.

Locya 21:36

Ori o ikakdekdeng nyo pa meynozi an. Ta ori o ipakahatas nyo so yaomanam a alalaw. So ikabo no ikeykarahet nyo do tangain ko.”

Locya 22:46

Maniring jira am, “Ikongo nyo ipeykaititkeh. Kayokay kamo na kapeynozi nyo, ta kalittan kamo.”

Nimlivolivon 20:31

Ori o apzatan nyo do onowned nyo an. Manakem nyo o ninanao ko jinyo a nimeykaoo ninyo an. Ta mina katlo a kawan ko a mangday so araraw a kano ahep a amnanao jinyo.

1 Kedinto 15:34

Paolin nyo o nakenakem nyo do kapyapyan. Paseykeden nyo na o kapeyraraten nyo. Yatatasa jinyo a yana ji makateneng ji Ama ta do to. O ko peycirngan sya am kapakateneng nyo do kanigan nyo.

1 Kedinto 16:13

Meytataziman kamo an. Makahadpet kamo so nakenakem a omraralay ni Ama ta do to. Ji kamo a nyahey.

Ivoso 2:3

No kakwa am akman tamo sira a to mangozangozay do nakenakem da. Am ori o ikanoyong ta meyraraten a tao a pasingsingtan na ni Ama ta do to no makwa.

Ivoso 5:14

Am ori o pancyan da nya, “Kayokay rana yamitkeh a tao. Pamlis kamo na, yapa meyraraten. Ta cirain na inyo ni Kizisto.”

Ivoso 6:18

Miminen nyo ori a ipeynozi ji Ama ta do to a kasidong na jinyo. Abo ji nyo meynozyan a tomala so Seyzi a meypalanginan ninyo. Ori o ipeytataziman nyo. Ji nyo amtadan o kapeynozi nyo no akma nyoy kakteh do cinai.

Veydipi 4:5

Manakem nyo o kapangarilaw nyo so tao an. Ta yana makeykai si Yeso a yamai.

Kelosi 4:2

Makowyat kamo a meynozi. Ji kamo tongwakwan a meynozi. Ta mapo do onowned nyo o inozi nyo a kasaray nyo so onowned ji Ama ta do to.

1 Tesalonicya 4:13

Manga kakteh, o nimawakwak rana tao am inaoy no si katenngan nyo o peypeypangayan na a kaji nyo na zababan so onowned. Ji nyo nginarai o yaji manaralay a tao a yaji makateneng do peypeypangayan na.

1 Tesalonicya 5:10

O nikawakwak na ni Kizisto am ahapen na yaten do kapyapyan. Am ori an, tana do ta ika mavyay pa ya a tana do ikawakwak ta rana am no si mai si Yeso am macikaop ta na jya a mangay do kaidan no karawan.

1 Tesalonicya 5:8

No ta manoyong amyan do kazngangan am meytataziman ta an. O nakenakem ta ji Ama ta do to a kano pangangarilawan na am akma tey sirong. Akma tey sakop o jyagonay a onowned ta a mapanala sya mahap jyaten do teyngato. So ikabo rana no oyaoyyan na nyaten.

1 Timotay 2:15

Am o mangahanas rana mavakes am apzatan na sira ni Ama ta do to no si jyablis o nakenakem da si Ama ta do to a mangarilaw so tao, ji meylimoteng so onowned, apiya so vazay.

1 Timotay 2:9

O mavakes rana am ko kakzeben sira ji mapakazwazway no ayob da. Akman sang o avook da kano taktakzes da. Ney yapya na am ji sira meyyayob so tey masingat a ayob.

1 Timotay 3:11

O katovong da do vahay a mavakes am apiya o icicirawat da. Ji sira manamwadan. Taosya o kapangalalas da no makakaday a vazay.

1 Timotay 3:2

O tomalamozong rana no kyokay am abo oyaoyyan da nya no tao an. Asa o katovong na do vahay. Ji na peyzavozavoza o vazay na. So apzatan na do kataotao na, katwatonton na so vazay na. Ikanig na o icyatatao na, kasaray na manaotao so apo do teysa ka ili a tao a kateneng na mangnanao so tao,

2 Timotay 4:5

Am imo rana am meypepzat ka do meykamadadayan a vazay mo. Ji mo a mamman o alalaw mo a meylimwang no Mapasaray a Ciriciring. Ta ori o ikowyat mo a mahap so vazay mo ji Ama ta do to.

Tito 2:12

O akman sang a pangangarilawan na ni Ama ta do to am ori o ipakateneng ta do kakaro ta do raten na ni Ama ta do to a vazay ta kano meykamadadayan a ikakza ta do karawan. So ipakateneng ta do kapzat ta do onowned ta a mapeypahagnat so nakenakem ta ji Ama ta do to.

Tito 2:6

Akman sang, ta vavagan mo sira o malalavayo a mahakay a amzat do kataotao da.

1 Pite 1:13

Am ori o ipeytataziman nyo a mahap so vazay na ni Ama ta do to a meyhanhan nya a manta ninyo so aryarilaw na no mai rana si Yeso Kizisto.

1 Pite 4:7

Yarana masngen o ikavos no karawan. Makowyowyat kamo pa omzat do onowned no kataotao nyo. Ta ori o ikabo no raraten a makazazat do inozi nyo.

1 Pite 5:8

Meypepzat kamo. Taosya o kakma nyoy mitkeh so onowned. Ta si Satan a kavosoyan nyo am yakmey kokoman so tao a yaji yakneng do na yanan a yameykala so tao a na kanen a na pasyain so nakem ji Ama ta do to.

Ipaziman 16:15

“Amizngen nyo an. No mai ko am akma koy manakaw a ji mapaziman a mai. O meytataziman a tao am tey yapya o akman sang, ta nyayoban na rana o kataotao na. So ji na rana macimasesneki no kataotao na do tangain no tao.”

Ipaziman 3:2

Am ori o ipeytataziman nyo an. Ta komdeng kamo so nakem an, do yanyo ikavyay pa eya an. Ta ko katenngan o vazay nyo do tangain ni Ama ta do to a yapa ji makanet.