1 Tesalonicya 5:10 - Seysyo No Tao

¹⁰ O nikawakwak na ni Kizisto am ahapen na yaten do kapyapyan. Am ori an, tana do ta ika mavyay pa ya a tana do ikawakwak ta rana am no si mai si Yeso am macikaop ta na jya a mangay do kaidan no karawan.

1 Tesalonicya 5:10 ပူးပေါင်းရင်းမြစ်များ

Matay 20:28

Akman so Nipamnekan na ni Ama ta do to a tao. Ta o na nyai am beken a ilamnain no tao. Ta mapeylamnay so aro a tao a kangay na mapasansan so kataotao na yagag na sira do peyraratenan da.”

Yowani 10:11

“Yaken rana am akma koy mapamangamangan so kagling a makapzat do omanop jyaken a tao. Ta mangay o kangay ko no inawan no omanop jyaken a tao.

Yowani 10:17

“Ikarilaw na yaken ni Ama. Ta ko ji macimamman o kangay ko no inawan nira. O ikakman na sang am meysinaoli pa jyaken o inawan ko.

Yowani 15:13

Ney rako na pangangarilawan am ji macivivyai o kagagan.

Loma 8:34

Am sino paro o yamanci no kaoya na nyaten ni Ama ta do to no makwa. Jyabo asa ka tao a. Ta si Yeso Kizisto rana nimawakwak a kapirwa na mavyay am yamyan rana do wanan na ni Ama ta do to a yameyneynozi nyaten.

1 Kedinto 15:3

Ninanao ko na jinyo o yaney makdeng na nimahap ko ji Yeso. Ori rana am nimawakwak si Yeso no raraten ta. So na idket do Seysyo no ciring eya.

2 Kedinto 5:15

Na nikawakwak ni Yeso o tao do karawan. Ori o ji ta to mangozai do aktokto ta. Ta pangozayan ta si Yeso Kizisto a nimawakwak no raraten ta a kapirwa na rana mavyay.

2 Kedinto 5:21

Na nikarilaw yaten ni Ama ta do to. So na nitovoyan si Kizisto abo so raraten a nimalit so raraten ta. Am ori o tanyo ipacikaop ji Kizisto a abwata rana so raraten do tangain na ni Ama ta do to.

Ivoso 5:2

Patwawen nyo do icicirawat nyo o pangangasyan na ni Ama ta do to, akman si Yeso Kizisto a yamarilaw nyaten a yajingbeywan do inawan na nisomidong jyaten. Ta o akman rana sang a vazay na am isaray na ni Ama ta do to.

1 Tesalonicya 4:13

Manga kakteh, o nimawakwak rana tao am inaoy no si katenngan nyo o peypeypangayan na a kaji nyo na zababan so onowned. Ji nyo nginarai o yaji manaralay a tao a yaji makateneng do peypeypangayan na.

1 Tesalonicya 4:15

Sicyaikwa rana ya am namen pangozayan o nanao na ni Yeso a Panirsirngen ta a manci nya jinyo. Yaten rana ya mavyay pa tao do ipeypanam na pa meygegcin ni Yeso am jyabo kapanmanma ta a kano nimawakwak a tao a mangay omrapong si Yeso a.

1 Tesalonicya 4:17

Am yaten rana yamavyay pa am pehzahen na yaten jira a katkaten do cinalab a kapakacita ta na si Yeso do hanit. So ikanoyong ta a macitovong ji Yeso a mangay do kaidan no karawan.

1 Tesalonicya 5:6

Ori o ji ta to nginarai so karwan no tao a to ngitkeh, ta meytataziman ta.

1 Timotay 2:6

Apyapyahen na pa o kataotao na a mawakwak, a omalit do oyaoyyan na nyaten ni Ama ta do to a meyraraten a tao. O akman rana sang a vazay am nipeyvazay na rana ni Yeso a yongkad na ni Ama ta do to a ji mamyapya no tao do karawan a mangay do kararatan.

2 Timotay 2:11

O ciring eya am tey manoyong: No si pazanoden ta o onowned ta ji Yeso Kizisto a nimawakwak nyaten am akman ta si Yeso Kizisto a avyain na ni Ama ta do to.

Tito 2:14

Na nipalit ni Yeso Kizisto no kataotao na o raraten ta. So ikaro ta rana do makakaday a ta pineyraratenan. So icyakma tamoy matnaw a ranom so onowned a omanod jya, mowyat a meyvazay so apya vazay.

1 Pite 2:24

Nisabway na ni Kizisto o raraten ta do jyojika. Ori o karwan ta na do peyraratenan ta a somazap so isaray na vazay ni Ama ta do to. O kataotao na ni Yeso a yanimanngannga nyaten am yata nipakahap so to meyyonong a ikavyay no pahad ta.

1 Pite 3:18

Ta ipisa si Yeso Kizisto a nimawakwak no raraten ta, kapakavos na rana so vazay na a mapatazadang jyaten do teyngato. So ikanoyong na abo so raraten a nisomabway no raraten no tao, do na kapanop jyaten ji Ama ta do to. Tana niwakwak da o kataotao na am jya nimawakwak o pahad na.