1 Pite 2:5 - Seysyo No Tao

⁵ Inyo rana a tao a na yanan no to meyyonong a ikavyay no pahad nyo am itoro nyo o kataotao nyo ji Ama ta do to. So icyakma nyoy vato a ipatnek na so panaralayan. So nyo icyakmey mapatanatanang so nakem ji Ama ta do to. Am o patanangen nyo am sarasaray nyo. So sarayan na nya jinyo ni Ama ta do to so akman sang a nakem nyo sya, ta kamo na macikaop ji Yeso Kizisto a na rana yanan no Seyzi.

1 Pite 2:5 ပူးပေါင်းရင်းမြစ်များ

Loma 12:1

Manga kakteh, ko vavagan inyo an. Ta yatey rako na kasyan nyaten ni Ama ta do to. Am ori o torwan nyo no kataotao nyo a italamozong na a komaro do raraten nyo. Ta ori sarayan na ninyo ni Ama ta do to a meyngongyod so onowned a amraralay nya.

1 Kedinto 3:16

Manngwa, nyo jyatenngi o na kapacilovot jinyo ni Ama ta do to? Manngwa, nyo jyatenngi na keyyan jinyo no Seyzi?

1 Kedinto 3:9

Yamen rana am namen macipeyvazay ji Ama ta do to. Inyo rana am kanyo akmey nihakawan na ni Ama ta do to a namen pirwahen pa. So nyo icyakmey vahay a na patneken ni Ama ta do to.

1 Kedinto 6:19

Nyo jyatenngi o na keyyan jinyo no Seyzi na ni Ama ta do to a nitoro na jinyo? So ikabeken a inyo no kataotao nyo.

2 Kedinto 6:16

Ji nyo peyzavoza o raralayan nyo ni Ama ta do to a kano malas a iraralay da no tao. Ta yaten o na yanan no to meyyonong a Tao do to. Akman so ipanci na do Seysyo. Ta maniring am, “Macikaop ko do omanoyong jyaken a tao a keyyan ko do onowned da. So abnekan da jyaken a Tao do to da. So ikanoyong da italamozong ko a tao.

Cyalatay 6:10

Am ori an, no myan so sidongan ta so icyatatao ta am sidongen ta sira an. Am arakorako pa o sidongan ta so akma tey kakteh do cinai an.

Veydipi 1:11

So ikasasaray nyo a mapeyvazay so apiya vazay do kowyat na jinyo ni Yeso Kizisto. Ta si makman kamo sang am azwazwain da rana si Ama ta do to no aro a tao.

Veydipi 2:17

O raralayan nyo ni Ama ta do to am akmey nakem nyo a patanangen nyo jya. Tana wakwaken da rana yaken a pavoyogen so rala am cyaha, ta akmey nakem ko rana ori a patanangen ko ji Ama ta do to. So ko isaray, ta macizanod kamo jyaken a somaray.

Veydipi 4:18

O nyo nyazaw jyaken a apzapzatan am ko na nimamimin a yanimahap. So ko to meypanpani jya. Si Ipaloti a akma tey kakteh am ori o yanimai no aro a azaw ko. So na sarayan nya ni Ama ta do to so akma nyoy nakem jya.

Kelosi 3:17

O makakaday a vazay nyo a kano ciring nyo am mamimin a pagazen nyo do ngaran ni Yeso a Panirsirngen ta a somaray nya ji Ama ta do to.

1 Timotay 3:15

Am no si kahahay ko am cyaha, ta to ko na mancyan jinyo do teygami ko o iwawalam ta. Ta yaten rana amraralay ni Ama ta do to am akma tey asa ka vahay rana, do yana katketken jyaten ni Ama ta do to no ciriciring na no to meyyonong a mavyay a Tao do to.

Sipolay 3:6

Akman sang si Yeso Kizisto a ji mapasala do vazay ni Ama ta do to a tomalamozong no amraralay ni Ama ta do to a tao. Am iya am Anak na ni Ama ta do to. No ji ta hayo a meyhanhan nya a omapanala so nakem na jyaten no makwa am manoyong ta macikaop ji Ama ta do to.

1 Pite 2:9

Am inyo am na nipamnekan inyo a yasa so inawan a mapatanatanang so nakem ji Ama ta do to a Panirsirngen ta. So ikanoyong nyo a abo so karatan a asa ka mahataw a italamozong ni Ama ta do to, a na nipamnekan a meylimwang no yamapeyzokab a vazay na. Ta inyo am na nyagag inyo do kasarisaryan a yameyraratenen. So nyo rana iyan do kazngangan.

1 Pite 4:11

O meylimwang no Ciriciring ni Ama ta do to am Ciriciring na ni Ama ta do to o malavat da. No manidong ta so icyatatao ta am ipeyhanhan ta si Ama ta do to a tomoro no oyowyat na jyaten. Ta no si macita da no tao o vazay ta a sidongen ni Yeso Kizisto am azwazwain da si Ama ta do to no aro a tao. Inaoy si mangay ji Ama ta do to o azwazway a kano oyowyat a mangay do kaidan no karawan! Amin.

1 Pite 4:17

Yarana marateng sicyaikwaya o araraw no yana ipeykapyapinpin so tao ni Ama ta do to. Am papwen na do omanoyong jya tao o pacicin na. No si panmahen na yaten a pacicin ni Ama ta do to am makongo paro sira so wanjin o jya niomanoyong do Mapasaray a Ciriciring na ni Ama ta do to a tao.

Ipaziman 1:6

Na nipamnekan yaten ni Yeso a to ngonongonong do kangay ta do tangain na ni Ama ta do to a omraralay nya. Inaoy si omaing o azwazway a kano oyowyat ji Yeso Kizisto a mangay do kaidan no karawan. Amin.

Ipaziman 20:6

O nimacizanod do ipisa pa kapeyvangon a tao am manoyong sira akma ney anak ni Ama ta do to a tey yapya. Ta ji na rana nalamozongan sira no ipirwa kawakwak. Ta sira rana am abneken na rana sira ni Ama ta do to a kani Kizisto a to ngonongonong do kangay da do tangain na ni Ama ta do to a amraralay nya. So ipacizanod da ji Kizisto a meypanirsirngen so asa zivo (1000) a awawan.

Ipaziman 3:12

O jya nimablis so onowned a tao am akman sira so sominogat a ai no vahay a ralaralayan da ni Ama ta do to a vahay a kaji da na ngarwan do dang. Ta padketen ko do kataotao da o ngaran na ni Ama ta do to a kano ngaran no ili na ni Ama ta do to. Ori rana am apo ji Ama ta do to do teyngato a nipakas na a Vayo a Yelosaleng a kapadket ko so vayo a ngaran ko do kataotao da.

Ipaziman 5:10

Imo yada nipamlis a yada to ngonongonongi do kangay da do tangain na ni Ama ta do to a amraralay nya. So talamozongan da no teyrahem no makwa.”