1 Pite 2:24 - Seysyo No Tao

²⁴ Nisabway na ni Kizisto o raraten ta do jyojika. Ori o karwan ta na do peyraratenan ta a somazap so isaray na vazay ni Ama ta do to. O kataotao na ni Yeso a yanimanngannga nyaten am yata nipakahap so to meyyonong a ikavyay no pahad ta.

1 Pite 2:24 ပူးပေါင်းရင်းမြစ်များ

Matay 27:26

Meyratateng am pasawain na ni Pilato si Palapa a kapanci na rana no tao a somipsipzot ji Yeso a katoro na rana nya jira a padketen do jyojika.

Matay 5:20

Am ori o ko pancyan ninyo a makowyowyat pa kano mangnanao no iwawalam ni Ama ta do to a tao a kano tao a macyagom do Vadisay a mapeyvazay so vazay na ni Ama ta do to. Ta ori saon o ipacikaop nyo do italamozong na ni Ama ta do to am.

Matay 8:17

O vazay na am mina todey mangononong do mina ciring no panoyonoywan na so ciring ni Ama ta do to a meyngaran so Isayya. Ta maniring am, “Na nivonas o ingingnen ta a kano alalaw ta.”

Make 15:15

Ji na pasovoy o aro a tao ni Pilato am to na rana norwan jira si Palapa a kapanci na rana no tao a somipsipzot ji Yeso a katoro na rana ni Yeso jira yangay da padketen do jyojika.

Locya 4:18

“Yanimeygegcin jyaken o Seyzi na ni Ama ta do to. Ta yana nipamnekan yaken a mangay meylimwang no Mapasaray a Ciriciring na ni Ama ta do to do makasi a tao. Nitovoy na yaken a meylimwang no kasaway da rana no akmey kaneban a tao a kapakacita da rana no mavota tao a kasaliway da rana no peylamlamsoin da tao.

Yowani 1:29

Ikadwa na araw am macita ni Yowani si Yeso a mai. Maniring si Yowani am, “Oya rana am akmey kagling a nitovoy na ni Ama ta do to a omahap so tao do peyraratenan da.

Yowani 19:1

Karahan am ipanci ni Pilato o tao a somipsipzot ji Yeso.

Nimlivolivon 10:35

Tana tao do Yotay a tana beken a tao do Yotay am miminen na sira ikaglaw o omraralay nya a tao a mangononong do ciring na.

Nimlivolivon 10:39

Yamen rana am yongkad na, ta nimacita namen o vazay ni Yeso do Yelosaleng a kado peycyeylilyan na do Yotay. Nipadket da do jyojika si Yeso kawakwak na.

Nimlivolivon 13:29

Mangononong rana o nivatvatkan do Seysyo a omagaz ji Yeso am akasen da rana do jyojika kapakakasa da sya do heseb na.

Nimlivolivon 5:30

Si Yeso rana nipadket nyo do jyojika niwakwak nyo am yana rana nivyay no Tao do to da no ineynapo ta.

Loma 6:11

Akman sang, ta naknakmen nyo o kapacizanod no adan a onowned nyo ji Kizisto a nimawakwak no raraten nyo. So ikanoyong nyo na a meypahagnat so onowned ji Ama ta do to, ta kamo rana macikaop ji Yeso Kizisto.

Loma 6:13

Ji nyo mamyapyan o peyvongvongwan nyo a peylamlamsoin no raraten. Ta itoro nyo o kataotao nyo ji Ama ta do to a mahap so vazay na. O torwan nyo no kataotao nyo ji Ama ta do to am ahapen nyo o apya vazay na. Ta iya o na yapwan no vayo a inawan ta.

Loma 6:16

No onotan nyo o ciring no tao am manoyong kamo a lamlamsoy da. Akman sang, ta no si onotan nyo o raraten am manoyong kamo a lamlamsoy no raraten a mangay do kararatan. Am no si onotan nyo si Ama ta do to am abneken na inyo a abo so raraten do tangain na.

Loma 6:2

Jyabo kakman ta sang a. Ta yatamo rana nikarwan o peyraratenan ta. Am manngwa, olin ta pa o peyraratenan taha?

Loma 6:22

Am inyo rana sicyaikwaya am ji na rana peylamlamsoya inyo no raraten. Ta yanyo rana kakzeben si Ama ta do to a mapeylamlamsoy jinyo. So yanyo rana ipeyngongyod a yaomonot rana ji Ama ta do to. So ikanoyong nyo a makahap so to meyyonong a ikavyay no pahad nyo.

Loma 6:7

Ta no mawakwak rana o tao am ji na rana nalamozongan no raraten.

Loma 7:6

Am sicyaikwa rana ya am na rana jyagogadan yaten no nivatvatkan a iwawalam na ni Moyse. Ta ori rana am adan rana ori. So ta na pangozayan do na ipananao jyaten no Seyzi a vayo a nakenakem ta ji Ama ta do to.

1 Kedinto 15:3

Ninanao ko na jinyo o yaney makdeng na nimahap ko ji Yeso. Ori rana am nimawakwak si Yeso no raraten ta. So na idket do Seysyo no ciring eya.

2 Kedinto 6:17

Am ori o ji nyo pehngai so onowned nyo do ji manaralay a tao. Ji kamo macizanod jira. Ji nyo nginara o malas a vazay da. Ta ori o sarayan ko ninyo.”

Cyalatay 3:13

Am si Kizisto o nimalit jyaten do oyaoyyan na nyaten ni Ama ta do to a ji makataptap so iwawalam na ni Moyse. Ta o ciring pa do Seysyo am, “O nipadket da do jyojika am iya o nyangayan no peyoyaoyyan na ni Ama ta do to.”

Ivoso 5:9

Ta o icicirawat no makateneng do ciriciring na ni Ama ta do to am ji meylimoteng so onowned. Omonod do manoyong a ciring. Ji mapowzib so nakem do icyatatao.

Veydipi 1:11

So ikasasaray nyo a mapeyvazay so apiya vazay do kowyat na jinyo ni Yeso Kizisto. Ta si makman kamo sang am azwazwain da rana si Ama ta do to no aro a tao.

Kelosi 2:14

Nipeyyopowpas no rala ni Yeso Kizisto o domket a raraten ta a ji ngahap so iwawalam ni Moyse.

Kelosi 2:20

Inyo rana yameyngongyod a macikaop ji Kizisto am ji nyo rana pasaklanga o adan a marahet a icicirawat nyo, do nyo kaji ngonotan rana do adan nyo a icicirawat. Am ikeykongo kamo ya a yapa macizavoz do icicirawat da no tao do karawan,

Kelosi 3:3

Ta inyo rana am yamyan rana jinyo so vayo a onowned nyo a ji nalamozongan rana no raraten. Ta kamo rana macikaop ji Yeso Kizisto a kani Ama ta do to.

Sipolay 10:10

Na nipangononongan ni Yeso o nakenakem ni Ama ta do to a yamahap so vazay na a yamapasansan so kataotao na do jyojika. Am yaipisaha na kato miminan so raraten ta yanivonas.

Sipolay 10:5

Am ori an, pancyan na nya ni Kizisto ji Ama ta do to no kai na do teyrahem, “Mo jyakzan o yapatanangen a kagling a kano makakaday a nakem a patanangen jimo. Ta yamo rana nipanta yaken so kataotao a mahap so vazay mo.

Sipolay 12:13

Ji nyo pasala o pangonongan nyo. Ta ori o ji da tahaciji no makasapa so ai a tao. So ikanoyong nyo na karapan so onowned.

Sipolay 7:26

So yana ikanoyong ni Yeso a ney manokdwan na a ta ipeyhanhan a mapatanatanang nyaten so nakem ta ji Ama ta do to. Ta yabo na karatan a yabo so raraten. Iya rana am na nipapinpin ni Ama ta do to do yameyraraten a tao. So ikanoyong na rana ney mazway na do teyrahem a kado teyngato.

Sipolay 9:28

Yakman sang si Kizisto a ipisa mapatanang so kataotao na a ivonas na so raraten no aro a tao. So ikeypisa na pa mai do teyrahem. Am beken a raraten o vazay na. Ta mangay na hapen sira o mapanala sya tao.

Yake 5:16

Patwawen nyo o kalasan nyo do kadwan jinyo a kapeynozi nyo no kadwan jinyo a keywakwak jinyo. Ta tey rako o oyowyat no inozi no apiya so nakenakem a tao.

1 Yowani 2:29

Katenngan nyo o kabo no kararatan ni Kizisto. O tao rana abo so karatan a mangozay do nanao ni Ama ta do to am manoyong a anak ni Ama ta do to.

1 Yowani 3:7

Manga ovay, ji kamo a litai an. O apya so icicirawat a tao am manoyong o akman sang a ji meylimoteng so onowned a tao, akman si Kizisto a ji meylimoteng so onowned.

Ipaziman 22:2

O ranom rana am amvoyog a mangonong do rarahan do avak no ili. O sigisigil na no ayo am amyan so kayo a tomanek do dang a yapwan no to meyyonong a ikavyay no pahad. Do kasa kawan am ipidwa so icyarwa a meyyasi. So ipangday na do vehavehan a meyyasi. O voong na am makavavaw so ingingnen no tao do peycyamahamahatawan na.