1 Pite 1:19 - Seysyo No Tao

¹⁹ Ta o na nitbos jinyo ni Ama ta do to do nyo peyraratenan am rala na ni Yeso Kizisto, akman so icicirawat da no mapatanatanang so nakem ji Ama ta do to a mapatanang so rala no ney yapya na kagling da.

1 Pite 1:19 ပူးပေါင်းရင်းမြစ်များ

Matay 20:28

Akman so Nipamnekan na ni Ama ta do to a tao. Ta o na nyai am beken a ilamnain no tao. Ta mapeylamnay so aro a tao a kangay na mapasansan so kataotao na yagag na sira do peyraratenan da.”

Matay 26:28

Oya rana am rala ko a nimvoyog a omaing do aro a tao a omvonas so raraten da. O rala ko rana ya am yongkad nyo do vayo a pangozayan nyo a ciring na ni Ama ta do to.

Yowani 1:29

Ikadwa na araw am macita ni Yowani si Yeso a mai. Maniring si Yowani am, “Oya rana am akmey kagling a nitovoy na ni Ama ta do to a omahap so tao do peyraratenan da.

Yowani 1:36

Macita na si Yeso a meyhatay am maniring si Yowani am, “Iya rana am akmey kagling ni Ama ta do to.”

Nimlivolivon 20:28

So ipeypepzat nyo an. Ahapen nyo o nitoro na jinyo no Seyzi a marilaw no kadwan jinyo. Ta sira rana am nipalit na no rala no Anak na ni Ama ta do to a yarana macikaop jya.

Loma 3:25

Nitovoy na si Yeso Kizisto a mangay mawakwak no raraten ta. So ikanoyong no meyhanhan nya tao a mavonas rana so raraten. O ikakman na sang ni Ama ta do to am ipacita na o kaji na alasan a mapeykapyapinpin so tao. Ta o pangangasyan na am ori o ji na rana mapasingsingkaji do meyhanhan nya tao no kakwa.

Ivoso 1:7

Si Kizisto yanimawakwak nyaten. Am ori o yana nikavonas no raraten ta. Tey rako o pangangarilawan na ni Ama ta do to a yana nitoro jyaten.

Kelosi 1:14

Nyagag na yaten ni Yeso Kizisto do peyraratenan ta. So ta ikanoyong rana nimavonas so raraten.

1 Pite 1:2

Nakenakem na ni Ama ta do to o yana kanimapanop jinyo a omanoyong ji Yeso. So yanyo ikanoyong rana a yana nyavayo no Seyzi so onowned a yaomonot ji Yeso Kizisto, do kanimvonas na so raraten nyo no rala na. Inaoy si arakorako pa o pangangarilawan na kano apiya onowned nyo a itoro na jinyo ni Ama ta do to.

1 Pite 3:18

Ta ipisa si Yeso Kizisto a nimawakwak no raraten ta, kapakavos na rana so vazay na a mapatazadang jyaten do teyngato. So ikanoyong na abo so raraten a nisomabway no raraten no tao, do na kapanop jyaten ji Ama ta do to. Tana niwakwak da o kataotao na am jya nimawakwak o pahad na.

1 Yowani 1:7

Am no si amyan ta do kazngangan a akman si Ama ta do to am macikaop ta do akma tey kakteh do cinai a omraralay ni Ama ta do to. Ta o rala na ni Yeso Kizisto a Anak na ni Ama ta do to o amvonas so makakaday a raraten ta.

1 Yowani 2:2

Nimawakwak si Kizisto a omvonas so raraten ta. Am beken a yatehen, ta kazagoman no tao do karawan.

Ipaziman 1:5

a kani Yeso Kizisto a ta ipeyhanhan so ciring. Iya rana am ney manma na nimirwa a mavyay. Si Yeso Kizisto rana am yatomalamozong no panipanirsirngen do karawan. Na ikarilaw yaten. Na nipahawa yaten no rala na do yata peyraratenan.

Ipaziman 14:1

Macita ko pa o Kagling a meytatanek do meyngaran so Sian a tokon. O macihza jya tao am yamyan so ikakapatan da ranaw so ikalima da zivo no ikadwa da latos (144,000) no tao. So ikamimin no zozogwan da adketan no ngaran no Kagling a kano ngaran na ni Ama na.

Ipaziman 14:5

Ji pa nimangalalas sira. So ikanoyong da abo so kararatan.

Ipaziman 5:6

Karahan am macita ko o Kagling a amyan do avak no lilisnan a kano apat a ka omalalam a kano kamanrarakehan. O Kagling rana am akma raney niwakwak da a apito so ozong a kapito no mata na. O mata na am Seyzi na ni Ama ta do to a nitovoy na mangay do teyrahem.

Ipaziman 5:9

a kapeyyanwanood da so vayo a anood. O kanwanoodan na am, “Imo o makahap so vakong a mapakaro so nipadketan a vakong. Ta imo rana am niwakwak da imo. O nimvoyog a rala mo am nimapatastas so tao do peycyeylilyan na kano meykataretarek so ciring a kano meytaretarek a tao do sinokob no hanit a yaitoro ji Ama ta do to a yaponged na.

Ipaziman 7:14

Maniring ko am, “Imo o makateneng jya.” Maniring jyaken am, “Sira rana am nimasapa da o rako a alalaw da no kakwa. Sira rana am nioyasan da no rala no Kagling o ayob da. So na ikalalavang rana no ayob da.