1 Kedinto 1:30 - Seysyo No Tao

³⁰ Am si Ama ta do to o yanimapanop jinyo ji Yeso Kizisto. So na ikanoyong a na yapwan no teneng ta. Iya o na niyapwan no yamvonas so raraten ta. Am ori o na abnekan jyaten ni Ama ta do to a abo so raraten do tangain na. So icyakma tey matnaw a ranom so onowned a macilovot ji Ama ta do to a ji na rana nalamozongan no raraten.

1 Kedinto 1:30 ပူးပေါင်းရင်းမြစ်များ

Matay 1:21

Si Madiya am mangahanas so mahakay. No si malikey am ingaran mo jya si Yeso, ta iya o mapatastas so omraralay nya tao do peyraratenan da.”

Locya 11:49

Am o mina ciring na ni Ama ta do to am, ‘Manovoy ko so panoyonoywan ko so ciring ko a kano nipamnekan ko a tao a omlivolivon no ciriciring ko a mangay jira. Am wakwaken da sira o karwan da. Am o karwan da am peyraraheten da sira.’

Locya 21:15

Ta ipanta ko inyo so teneng nyo, kaji da makatenngan do ciring nyo a tovisan no maoya ninyo a tao.

Yowani 1:18

Abo pa o tao a nimakacita si Ama ta do to. O Anak na yamacikto ji Ama ta do to a yamlisna do katangked na am ori o nipakateneng ta ji Ama ta do to.

Yowani 14:6

Maniring si Yeso am, “Yaken am rarahan nyo. Yaken am yanan no manoyong a nanao. Yaken am yapwan no to meyyonong a ikavyay no pahad nyo. No ko abo am abo tao a makatanggeh ji Ama ta do to. So ika yaken no ipakatokod nyo ji Ama ta do to.

Yowani 17:26

Ko na nipeylimwang imo jira. Am ipeylimwang ko pa imo a kanoyong no aglaglaw mo jyaken amyan jira, akman jyaken a macilovot jira.”

Yowani 17:8

Ta ko ninanao sira o mo nitoro jyaken a nanao. Sira manoyong a yarana mahap sya. Da katenngan o yako kanoyong a yapo jimo. Da anoyngan o yamo kanitomovoy jyaken.

Yowani 8:12

Maniring si Yeso jira am, “Yaken rana am zezak no karawan. O macilolo jyaken a tao am amyan jira o zezak no onowned da. So ji da rana ngyani do kasarisaryan.”

Nimlivolivon 26:18

Ko tovoin imo a omiwang do mata da kapakacita da rana so kazngangan a komaro do vazay ni Satan a omanoyong rana ji Ama ta do to. So ikanoyong da rana mavonas so raraten a macikaop do amraralay nyaken a tao,’ kwan na yaken ni Yeso.

Loma 1:17

Ta o Mapasaray a Ciriciring na ni Ama ta do to o ipakateneng ta do kabnek na jyaten ni Ama ta do to a abo so raraten do tangain na. O yapwan na no nya am amyapo do kapeyhanhan ta nya. Ta maniring do Seysyo am, “O tao rana a abneken na ni Ama ta do to a abo so raraten do tangain na am mahap da o to meyyonong a ikavyay no pahad da.”

Loma 11:36

Ta yamamimin o makakaday a yana nyamamaog. So ika iya na no tomalamozong no makakaday do karawan. Inaoy no si mangay jya o azwazway na mangay do kaidan no karawan. Amin.

Loma 12:5

Yakman sang, ta tana tamo aro a tao am tamo akmey asa ka tao ji Yeso Kizisto a yamacisidosidong.

Loma 16:11

Ko ipeyminaminasi o kasina ko so inawan a kakteh ta si Helotyan a kano akma tey kakteh do cinai a si Naciso asa ka vahay a omanoyong ji Yeso.

Loma 16:7

Ko ipeyminaminasi o kasina ko no inawan a si Antoniko a kani Yoniya. Sira ori am nimanmanma pa ka nyaken a niomanoyong ji Yeso Kizisto. No kapteng da jyamen am sira ori o mina kararay ko do pamemtengan. Katenngan da sira no nipamnekan na ni Yeso Kizisto a amlivolivon no ciriciring na.

Loma 4:25

Nimawakwak si Yeso no raraten ta a kapirwa na rana mavyay. So ikanoyong ta na ipanci ni Ama ta do to abo so raraten do tangain na.

Loma 4:6

O akman rana sang a tao am tey yapya an, ta ji monganay do apya icicirawat na o yana vonasan so raraten na. Ori o akman so nipanci ni Tawey. Maniring am,

Loma 5:19

Yakman sang o aro a tao a omamoon so raraten ni Adam. Am kanyahap na rana ni Yeso Kizisto so vazay ni Ama ta do to a mawakwak no raraten ta. Am ori o ikamimin no tao a meyhanhan nya abneken na ni Ama ta do to a abo so raraten do tangain na.

Loma 5:21

No kakwa pa am niharag no raraten o tao do karawan. Am ori o ikamimin da mawakwak no tao. Am o pangangarilawan na ni Ama ta do to am na nitoro do meyhanhan nya tao. So ikamimin da rana vonasen na so raraten. So ipakahap da rana so to meyyonong a ikavyay no pahad da, do da kanoyong ji Yeso Kizisto a Panirsirngen ta.

Loma 8:1

O pacikaopan ni Kizisto a tao sicyaikwaya am ji na rana meydednai no peyoyaoyyan na ni Ama ta do to a mangay no makwa.

Loma 8:23

Beken a o nyamamaog na o akman sang. Ta yaten rana ya na yanan no Seyzi a tao a yongkad na no kapanta na nyaten ni Ama ta do to so to meyyonong a ikavyay no pahad ta am akman ta sang do onowned ta a macizizikna jya, a omapanala si Ama ta do to a mapanop jyaten a anak na a manta nyaten so ji rana wakwak a kataotao ta do teyngato.

Loma 8:9

No si italamozong na inyo no Seyzi am manoyong o kaji nyo na mangozayan do adan a onowned nyo. Ta o vazay no Seyzi o pangozayan nyo. O kabwan no Seyzi na ni Yeso Kizisto am ji macikaop ji Kizisto.

1 Kedinto 1:24

Am do tao do Yotay a kano beken a tao do Yotay a nipamnekan na ni Ama ta do to a omanoyong ji Kizisto am katenngan da si Kizisto a yanan no rako a oyowyat na ni Ama ta do to a kano teneteneng na ni Ama ta do to.

1 Kedinto 12:18

Am to na mangozai ni Ama ta do to o nakem na mapeykapyapinpin so makakaday do kataotao ta an.

1 Kedinto 12:27

Inyo rana am kataotao na inyo ni Kizisto. So ikamimin nyo akma ney kataotao.

1 Kedinto 12:8

O Seyzi rana am na itoro do yasa ka tao o teneteneng a makateneng do nanao na ni Ama ta do to. Yakman sang, ta na itoro do yasa ka tao o teneteneng na yana ipangnanao.

1 Kedinto 4:15

Tana todaro tao amnanao jinyo a mapeypahagnat so nakenakem nyo ji Kizisto am asa saon o ama nyo am. Ta yaken rana am nipeylimwang ko jinyo o Mapasaray a Ciriciring na ni Ama ta do to. So yako icyakmey ama nyo a omanoyong ji Yeso Kizisto.

1 Kedinto 6:11

Yamyan jinyo so nimakman so sang no kakwa. Am kanivonas na rana so raraten nyo ni Ama ta do to. So nyo rana ipacikownongan ji Ama ta do to a kabnek na rana ninyo a abo so raraten do tangain na, do kapeyhanhan nyo ni Yeso Kizisto a Panirsirngen ta kano katalamozong na jinyo no Seyzi na ni Ama ta do to.

2 Kedinto 12:2

Ko katenngan o keyyan no yasa ka sinjya a mina kapat so icyarwa (14) so awan a nikatkat na do teyngato ni Ama ta do to. Am ko jyatenngi kanimangay na no kataotao na, ta ala pahad na nimangay do teyngato.

2 Kedinto 4:6

O nimangamaog no ciring na so zezak a Tao do to am ori o amzezak so masyonowned ta. Ori o ta ipakateneng do azwazway na ni Ama ta do to amyan ji Yeso Kizisto.

Cyalatay 1:4

Si Yeso Kizisto am na pahawahen yaten do raraten do karawan. Am ori o na pangozayan do nakenakem na ni Ama ta do to a mawakwak no raraten ta.

Cyalatay 3:13

Am si Kizisto o nimalit jyaten do oyaoyyan na nyaten ni Ama ta do to a ji makataptap so iwawalam na ni Moyse. Ta o ciring pa do Seysyo am, “O nipadket da do jyojika am iya o nyangayan no peyoyaoyyan na ni Ama ta do to.”

Ivoso 1:10

Ta o pamnemnekan na ni Ama ta do to no kakwa am itoro na o makakaday do karawan a kado teyngato ji Kizisto a italamozong na, no marateng o araraw no nipamnekan na ni Ama ta do to.

Ivoso 1:14

O Seyzi na ni Ama ta do to am ori o akma tey yongkad a somidong jyaten a omamoon so nipanci na itoro ni Ama ta do to do monganay jya tao. So ikanoyong na ni Ama ta do to a mapatazadang jyaten do teyngato a yaomanoyong jya tao. So sarayan ta ni Ama ta do to a tey mazway a Tao do to!

Ivoso 1:7

Si Kizisto yanimawakwak nyaten. Am ori o yana nikavonas no raraten ta. Tey rako o pangangarilawan na ni Ama ta do to a yana nitoro jyaten.

Ivoso 2:10

Si Ama ta do to o yata nikablis no onowned a yarana macikaop ji Yeso Kizisto. So na ikapya rana no vazay ta a mangonong do na peypalanginan nyaten ni Ama ta do to.

Ivoso 4:30

Ji nyo alavat o ikeyngen na no onowned no Seyzi na ni Ama ta do to a vazay. Ta o Seyzi am yongkad na jinyo ni Ama ta do to, do kavyay na jinyo no makwa.

Ivoso 5:26

O na peyvazayan jyaten ni Kizisto am na toda ji ngamoga jyaten a yaponged na ni Ama ta do to. Nivonas na o raraten ta a kayavayo na so onowned ta, do yata kahap so ciriciring na.

Veydipi 3:9

Ko manoyong a yamacikaop jya. So ko na peymakarwan do mina vazay ko no kakwa. So ikanoyong ko na abo so karatan do tangain na ni Ama ta do to. O yako icyakman sang am ko ipeyhanhan si Kizisto. Beken a ko kahap so iwawalam na ni Moyse. Ta yamanoyong ya nitoro ni Ama ta do to o ikapya ko do tangain na.

Kelosi 1:14

Nyagag na yaten ni Yeso Kizisto do peyraratenan ta. So ta ikanoyong rana nimavonas so raraten.

Kelosi 3:16

Pakolivavahen nyo do onowned nyo o nanao ni Kizisto. Pangozayan nyo o teneng a nitoro na jinyo ni Ama ta do to a macinanannao. Meyyanwanood kamo so Anwanood ni Tawey a kano meyngongyod apo do onowned nyo a yanood nyo si Ama ta do to.

1 Tesalonicya 5:23

Ko ipeynozi inyo ji Ama ta do to a yamanta ninyo so apiya nakenakem nyo a kapzat na do onowned nyo a kano pahad nyo a kano kataotao nyo. So ikanoyong na amzat jinyo a kabo no karatan nyo a mangay do ikeypirwa na mai ni Yeso Kizisto a Panirsirngen ta.

Tito 2:14

Na nipalit ni Yeso Kizisto no kataotao na o raraten ta. So ikaro ta rana do makakaday a ta pineyraratenan. So icyakma tamoy matnaw a ranom so onowned a omanod jya, mowyat a meyvazay so apya vazay.

Sipolay 9:12

Si Yeso Kizisto am ji rana mapalolo so rala no kagling a kano baka. Ta mina to na rana patananga o rala na ipatazadang na jyaten do teyngato. Am o akman rana sang a vazay am ipisa mapatanang nyaten a kakavos na rana a mangay do kaidan no karawan.

Yake 1:5

No amyan jinyo so makza no karapa do teneteneng na am makowyowyat pa mapasyasi ji Ama ta do to a kapanta na nya ni Ama ta do to so teneng na. Ta iya rana am tey mazonos a apiya so nakenakem a marilaw no mapasyasi jya tao.

1 Pite 1:2

Nakenakem na ni Ama ta do to o yana kanimapanop jinyo a omanoyong ji Yeso. So yanyo ikanoyong rana a yana nyavayo no Seyzi so onowned a yaomonot ji Yeso Kizisto, do kanimvonas na so raraten nyo no rala na. Inaoy si arakorako pa o pangangarilawan na kano apiya onowned nyo a itoro na jinyo ni Ama ta do to.

2 Pite 1:1

Yaken rana am si Simong Pite ko a nipamnekan na ni Yeso Kizisto a amlivolivon no ciriciring na a lamlamsoy na. Yako ipeyteygami inyo a yana rana nipatazadang ni Yeso Kizisto a Tao do to ta. Ta tamo na meyyangay a yamraralay ni Yeso, do kaji na mapeycyakabanan jyaten ni Ama ta do to.

1 Yowani 5:6

O nimai do teyrahem a nitaktakan no ranom a nimvoyog so rala am si Yeso Kizisto. O ranom a kano rala na am yongkad no ka Misayya na. So icyakman na sang no Seyzi na ni Ama ta do to a macyanoyong jya. Ta o Seyzi rana am tey manoyong.

Ipaziman 14:4

Sira rana am ji nagpyan so aktokto sira a macilocilolo do angayan no Kagling. Sira rana am nipasakay na sira do kapyapyan. So ipanoma da nira patanangen ji Ama ta do to a kano Kagling.

Ipaziman 5:9

a kapeyyanwanood da so vayo a anood. O kanwanoodan na am, “Imo o makahap so vakong a mapakaro so nipadketan a vakong. Ta imo rana am niwakwak da imo. O nimvoyog a rala mo am nimapatastas so tao do peycyeylilyan na kano meykataretarek so ciring a kano meytaretarek a tao do sinokob no hanit a yaitoro ji Ama ta do to a yaponged na.