Ioane 14:3 - Ginitago Variguna

³ Benamo aiaḡoni, ḡomi ḡemi gabu barovina-toreani. Barovinatore-ḡosiani vau, ma baḡenoḡoi-iaḡomani, benamo ḡomi baḡori-iaḡomini au ḡesi bita tanuni. Be au ainai batanuni gabunai, ḡomi maki monai au ḡesi bita tanuni.

Ioane 14:3 ပူးပေါင်းရင်းမြစ်များ

Ioane 12:26

Au vetuḡunaḡigu eiaḡo-vinini tarimana tu au murigu na bene raka; be au ainai, au vetuḡunaḡigu eiaḡo-vinini tarimana maki monai au ḡesi. Au vetuḡunaḡigu eiaḡo-vinini tarimana tu, au Tamagu na ḡia maki bevaḡa-namoani.”

Ioane 14:28

Au baguruḡa boḡo seḡaḡia, au bakira, ‘Au tu araka-ḡerevaḡini, senaḡi ma baḡenoḡoi-iaḡomani ḡomi ḡemi ai.’ Bema au boḡoro ura-vinigu nai tu, Tamagu ḡenai aiaḡoni, be ḡoro iaku, korana au Tamagu tu iaru-korokoro, au iata-raḡegu ai.

Ioane 14:4

Au baiaḡoni gabuna dabarana tu ḡomi ma ribami.”

Ioane 17:24

Tama, au ḡegu ura baregona tu, au ainai batanuni, au oviniguto tarimari maki au ḡesi, be monai baḡana tanu, be au mareva baregona oviniguto marevana beḡene ḡitaia. Mo mareva oviniguto, korana au ḡoi na tu tanobara roḡosi roḡo boro veia nuḡanai veḡata oura-viniguto.

Apostolo 1:11

Benamo ḡekirato, “Galilea tarimami, karase maninai boḡo ruḡa vau guba ḡoḡita-taḡoani? Mai Iesu, ḡomi ḡemina guba ḡana beḡabi-varaḡea tarimana, tu ma beḡenoḡoi-iaḡomani. Ḡia tu guba ḡana bevaraḡe boḡo ḡitaia kavana, guba na ma bemariḡoni.”

Roma 8:17

Bema ḡita Barau natuna nai, ḡita maki ma bakura, be Barau na ekiraḡi-torerito dagarari bita ḡaunarini. Mai tu Keriso na varau eḡaunarito dagarari Keriso ḡesi bita ḡauna-sebonarini. Mo tu dabara sebonai moḡo: Keriso emidigu-midiguto moḡesi bita midigu-midiguni nai, ḡia na marevana baregona eḡabiato moḡa, ḡita na maki bita ḡabiani.

Filipi 1:23

Au tu dagara ruarua auravini-baregorini: Ḡegu ura mai maḡuri bara raga-kwanea, be Keriso sevinai bara tanu tu dagara namo vedaureana moḡo;

2 Tesalonika 1:12

Monana, Iesu Vereḡauka arana beḡene vaḡa-raḡea ḡomi daimi ai, ema ḡomi beḡene vaḡa-raḡemi ḡia bakunai. Ḡita ḡera Barau e Vereḡauka Iesu Keriso na ḡeri varevare-bara ḡerina moḡeri dagara mabarari beḡene vaḡa-ḡorari.

2 Timoteo 2:12

Bema tavevaḡa-gwaḡiḡini nai, ḡia ḡesi maki bita veḡorikau-sebonani. Bema ḡia takira-ḡuniḡauani nai, ḡia na maki ḡita bekira-ḡuniḡaurani.

Heberu 9:28

Keriso kavana vaḡa-sebona moḡo ginitaḡo dagaranai eiaḡoto, tarimarima mabarari ḡeri rakava bene ḡabi-veḡitari ḡana. Senaḡi ḡia tu ma bema-fofori ḡenoḡoini. Mo tu dia rakava ma benema ḡabi-vaḡiri ḡana, senaḡina deikara ḡia ḡenari-taḡoani tarimari vaḡa-maḡuriri ḡana.

Apokalupo 3:21

Bekokoreni tarimana tu au na maoro baviniani, au ḡesi ḡegu teronai baḡa tanuni. Au kavana, au akokoreto nai Tamagu ḡena teronai Tamagu ḡesi ḡatanuni.