Paglappas 38:9 - Kitab Injil and Kitab Awal-Jaman

^9-15 Pasunu', tahinang e' sigām halaman ma Luma' Pangarapan e', taha'na duwampū' maka limand'ppa, luhana sangpū' maka duwand'ppa maka tonga'. Aniya' kultina ahāp kakana'na tahinang e' sigām panasak halaman e', maka ba'anan hāgna isab panagnatan. Duwa-duwampū' heka hāg min bihingna tampal ni uttala' maka ni satan, sangpū' isab min tōngna tampal ni s'ddopan. Kamemon hāg itu bay nihinangan durukan min dī tumbaga maka sasabit pilak isab panagnatan kultina. In baran hāg isab bay nileboran pilak. Aniya' palabayan pagsōd-luwasan a'a tahinang ma tōng halaman tampal ni sobangan, maka aniya' kultina min karuwambila' lalabayan itu t'llu-t'llun d'ppa maka tonga' taha'na. Aniya' isab hāg t'llu hekana jukup maka durukanna pinat'nna' ma dambila' maka dambila'.

Paglappas 38:9 ပူးပေါင်းရင်းမြစ်များ

Kalangan 100:4

Palabay kam min saga lawangna salta' kam magsarang-sukul. Pasōd kam ni halaman luma'na hinabubi magpudji. Pagsukulinbi iya, pudjihunbi ōnna!

Kalangan 84:10

Aku itu, pād-pād dangibu llaw maingga-maingga lahat, gom lagi' dang'llaw ma deyom halaman luma'nu. Pād-pād aku pat'nna' ma kaluma'an saga a'a jahulaka', gom lagi' ma luma'nu, minsan hal an'ngge ma atag bowa' lawang.

Kalangan 84:2

Sali' aku apunung e' baya'ku pi'ilu ni halaman luma' PANGHŪꞋ. Magkalang aku ni Tuhan kakkal ma sabab kakōranku, luwas min palnyawahanku maka min ginhawa-baranku.

Paglappas 26:1

Na, amalman Tuhan ma si Musa, yukna, “Buwattitu ya pangahinangbi Luma' Pangarapan ni aku. Angahinang kam sangpū' sugpat kultina landu' ahāp kakana'na pinaglamuran salban bilu, salban taluk maka salban keyat bo' ahāp luwana. Pabuldahinbi isab luwa mala'ikat pikpikan ma a'a apanday magbubulda.

Paglappas 40:33

Pagubus inān, sinasakan e' disi Musa halaman ma sakalibutan Luma' Pangarapan maka lapohan pagkulbanan e'. Pinasangon isab kultina ya panambol pagsosōran ni halaman. Minnē' atangbus e' si Musa kamemon bay panoho'an PANGHŪꞋ ma iya.

Paglappas 40:8

Ubus, sasakinbi katilibut halaman maka pasangonunbi isab kultina panambol pagsosōranna.