Yiuwi'nokai su tooro gumoro jurogudo tovi me'no wuu'nodupu luko bu'buto bwotonyo amujumoulmwolavo. Toro tooro luko yodupu nemi manekumjukupinorogano. Aki toro tonol pla'mdowa'jure toga nemi noonyumwonyu puruv miyanekullugolpinorogano. Luko bwotonyo yopi nokwo avlapureyokwe nekwonyapino ipinorogano. Oo Gooti Yaweloo, gumoro amollurolovonekumokobadokuudo tonollu aki aiko te ku'nono mameronekumwallupinonogano.
Taitos 2:14 - Gooti Toolluro Yogalokwono14 Jisas Kraisol a'mwo noromiyoso'mo tooravuro ato tovi gavnokwe tool morubwenyuno sumaiyokwe yiuno'no abolokaikono. Gamoro aboloka su tov nevu yiuwi'nokai ma'no ma'nodo tonyuro womdo tovi ki'na'dowore tonollu amollurolovonekwapiyokaikono. Aki gamoro a'mwo abolo kuunodo wimo'nowa'ji sugupasudo to'no guureji yomjomwekovla'mwalano'moneyokwe amollol'movonekumarokanogano. အခန်းကိုကြည့်ပါ။ |
Taitos 2:14
54 ပူးပေါင်းရင်းမြစ်များ
Aguto su tool abwo'ji toga sapoollo pilatokwe tov mworarowo'ji wit dapto toorai mobwokurodukwopiyonekono. Yowo'ji wit sugudo ton mollu'bworosowo'ji gami wosamuju'ago tovi kuulomorosonekono. Yowo'ji daptorodeyo ado'ji to'gwowi duko yiunokuudo maibuulopiyodowodo tovi molluroudapiyonekono.” Joonol su toro kuudokaikono.
Gooti toolluro ago muunyu kai'muuda'ai bret kwolaboka su tov nuu kwonyugono. Toro te yiuwi'nokai a'mwo abolo ton bret su tovi amanpi tov aiyo yiunokuudo mujomwekovla'mwalpinogano. Bret nonyo'mo su tov moro kulako tovino'busukokwono. Toro te moro kulako kwimi su tov a'mwo abolo kwako akavi mwalodupudo ton aiyo mujomwekovla'mwalpino'moneyokweyokwono.”
Toro te aga kevu a'mwono moduvomwallokwe toorekullu aro ikudumo'mokwono. Kevnokwe toorekul neya domoduvomwalnogaulo. Aki a'mwo abolo Gooti toolluno kuudo kuubwemwakopo kubuurai kuruv sipsip tobuuraibusuko kevu neya domoduvomwalogaulo. A'mwo abolo su tonyu Gooti tool gami kuunodo wimo'numwalpino'moneyokwe gami Kwolaiyo toolluro mujako tokwe abiyomarokagano. Toro abiyomaroka tonyu kevu mido mollomwalmwalpino'moneyokwe Gooti toolluro Kuullo tool me'no ajaikubweyokarekikono. Toro ajaikubweyoka toorekul Gooti toolluro a'mwo abolo su tobuurai sipsip duuwatokwe toorobusuko wimo'nopi neya domomjomwekovlavogaulo.
Nemi Nellunumiyago Gooti tool agasuro nevu kirovanyuvanyu kuumwiyokwe kwako mwalodowado akalluda'ai nobomollurolovonekumokalokwiyo'moneyokwe ilaiyo kwinyajukekono. Toro winodowodo tovi Jisasol kuvinono uumjunyuno sumaiyokwe nemoro ma'no ma'nodo tonyu mobiyodukwopiyo'moneyokwe tov gavnokwe tool morubweno'no abolokaikono.
Toro te Krais toollu i'noguropte tovi amovoromiyoguroptowosopo toga nuu kweke me'no abolonyugono. Aki toro toonyu Krais toollu'aro aiyo mujomwekovla'mdumdonyugono. Toro te moro aiyo mujomwekovla'mdumdo tov nuvnokwenyuro'maiyo. Toro kuvi kuruv Krais toolno'gwowi moro poowokalago tovi aiyo kuulonumwalodowodo su toolluro aiyo tovida'ai mujomwekovla'mdumdonyugono. Aki aga nuu kulako akakwe mwalodumdo kwonyu kuruv moro aiyo to'gwowi Gooti toolluro Kwolaiyo toolluno kuudo uubweyodumdo tovi'aro mujomwekovla'mdumdonyugono. Kwolaiyo su tool mino kalo buuropino winodowodo tovida'ai mi nyo'mwojo'mo amorubwenokaikono.
Toro te nevu Moosesolluro loowo su tovi kisuvolo me'no yodowore tonollu Gooti tool kaiyako sanekullugolowo'jujukekono. Toro kuvi kuruv nemino tov kaiyako nomapiyokwe Krais tool aro abiyonekumorabokaikono. Krais su tool nemoro aiko toru malluno sumaiyokwe i'noguropte tovi ilejuku'na'duke toollu Gooti tool kaiyako sugolokaikono. Su toro tovino Gooti toolluro yogalo puruv aro sakwollungikokwono. “Yiuwi'nokai a'mwo iko te sulejuku'napi toorai Gooti tool kaiyako igolodowodorogano.” Sakwollungikokwono.
Kuudo neya jaullulo. Yiuwi'nokai ton Gooti tool gavnokweyolluro yo'mo tonyuno kuudo me'no yovo'dogallourosodowodekono. Toro tool buro'nyo buro'nyodeyo pun yo'mo kwino'ji tov kuvinono yokwekono. Toro te Gooti su tool nevu gamoro noonyumwonyu tollovai bilodukovomallo'moneyokwe sumdomgu me'no ajanekubweyokanogano. Toro ajanekubweyoka tovino tov nevu Krais tooke uuguro'mwonyodowado tonol Gooti toolluro a'mwo abolo kuunodo me'no wimo'nodowadonogano. Su tov Gooti gavnokwe toolluro aiyoga kuudo me'no sovo'dogallourosoka tovi kuvinono wimo'nodowadonogano.
Toro te neya duu'nyulo. Nevu yiuwi'nokai toga sugupasudo tonyu mujumovlaiyo'moneyokwe Gooti tool aiyogada'ai me'no sovrovanekubweyajukekono. Sugupasudo su tonyu kuvinono uumjungovlaiyo'moneyokwe Gooti tool nevu Krais Jisasollu uuguro'mwonyodowado tonollu aiyo aiko te me'no yokwollanekubweyodowodonogano.
Aki Krais tool nevu yiuwi'nokai tonolluno kalo buuropino winodowodekono. Toro toolluno tov nemi nonekullo'mwojo'moneyokwe Gooti toollu sipsip pwolbusuko wiroudapino'no Gooti toollu wobeya sudo kuunyokwe to'busuko kwimo'nokaikono. Krais tool nemino kalo buuropino wino'no toro sokaikono. Su toro to'busuko kubalno kev kugaikul kuruv yiuwi'nokai a'mwo abolo tonyuno kalo buuropino neya domollogaulo.
Kuuguudo ikudumo'mo akav yiuno nebal'nodokwono. Toro tovino nevu, “Oo nebalo'mdeyo,” dowa'ji kaduko kuvinono neya wiyogawano. Nebal'no yogalo su tov arokwono. Krais Jisasol yiuwi'nokai a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe kwako akavi kwolabokaikono. Nebaikuuguudo tov su torokwono. Neya duu'nyulo. Ma'no ma'no pasudo yo'moneyokwe tov nuu yiuwi'nokai a'mwo abolo tonyu uuwolo'mdumdonyugono.
Su tov aro tovinokwono. Abolo sugudo ton yiuno kwa'mgu kulako tovi yovaisu'nyo'mo to'no kuudo miyau'dupudogano. Toro kun kuruv kemi sugupasudo tollovogai to'gwowi youro tousobusuko mollosopi wuuduuwallo'mo winodupudogano. Abolo su tonyuro pun aro dupinogano. “Oo nevu Gooti toollu uumjunyokwenogano.” Su toro adupi ton a'mwo abolo punyu kuu'maiyo toru'no wuuduuwallunyo'moneyokwe kemi sugupasudo tollovai'aro neya wuuduuwallunumwalpinogano.
Toro te Jisasolluro a'mwo abolo nuugwiyo bwotonyagokwe ton sugupasudo tollovaino apoo'nyaiyo tobuurobusuko nyumo'numwalpiyo. Toro kun kuruv sugupasudo bwotonyago tollovogai neya amomjumovlavogapuro. Aki a'mwo abolo su ton pubuuro supto yodopure tobuurai wiyo'mwojo'moneyokwe kemi nuugwiyo togai yado yere neya uumwodemwalpinogano.
Guvnokwe tooku a'mwononyunodo su toorai ilaiyo wuuduuwallunyo'moneyokwe neya jumo'nogawono. Toro tooku yiuwi'nokai sugupasudo go'no go'nodo tonyu pi'mwono molludo'movla'mdo'bure tookuji gwonopi a'mwononyunodo kworo kuruv aval'no nokwo molludo'movlapinorogano. Aki guu pi'mwono jodubwasogawono. Toro yodubwasodo'bure tovino a'mwo abolo ton kuudo yaguupinogano. Oo akal gamoro poowokalago kuunodo tokwe kuvinono kinamjodowo pi'mwono jodonekubwasadopiyo. Kuudo yaguupinogano.
Yogalo agudumo akan yiuno nebal'nodogano. Toro te a'mwo abolo Gooti toolluno kuudo uubweyodupudo ton yiuwi'nokai toga sugupasudo tonyu aulolukumowopiyogapuro. Toro tonyu guu moro yogalo agudumo akagai jurogudo neya doduuwimwojumovlavogawono. Yogalo su ton sugudogano. Aki yogalo su ton yiuwi'nokai a'mwo abolo tonyu nokwo wiyo'mwojupinogano.
Gooti toolluro Kwolaiyo su tool Gooti jurogudo kuunodo toolluro bako pwopiyodowodo tov nekuduuwallodowodekono. Aki toro tool gami Ganumiyago Gooti toolbusuko irol'mowosunodekono. Toro tool kwako tokwe'aro sulugumdo tokwe'aro tovalluda'ai yiuwi'nokai wo'dupudo tonyu gamoro yogalo jurogudo tokwe kuuno mollomwalodowodekono. Kwolaiyo su tool nemoro ma'no ma'nodo tovuro kirumwallo tovi me'no amollol'movonekudukwopiyokaikono. Toro mollol'movonekudukwopino sumaiyokwe toga muunyu kai'muu mwalodowodo Aguto Kuunodo toolluro anato toru sulomwalokaikono.
Aki yiuwi'nokai toga nevu Jisasolluro a'mwo abolo tonol imgu amgu jurogudo duuwimwoju'nyo'moneyokwe kuudo neya yau'mwalanonogano. Toro te nevu a'mwo abolo pubuuraino kalo buuropino winyo'moneyokwe tokwe'aro sugupasudo mujumovlaiyo'moneyokwe tokwe'aro tovalluno jurogudo neya duuwimwoju'numwalanonogano.
Meme toorogai'aro buulmokau toorogai'aro tooravuro mujako tokwe su toro amollol'movodukwopinyajupo kuvi kuruv Krais toolluro mujako to'gwowi meme toorogai'aro buulmokau toorogai'aro tooravuro mujako tovi muunyu toru'aro uuwolo'mdowodokwono. Su tov aro tovinokwono. Gooti toolluro Kuullo yiunokuudo mujomwekovla'mdowodo toolluro jurogudo tokwe Krais tool sipsip meme kaiya'nodomaiyokwe pwolbusuko imo'no'no gavnokwe tool Gooti toollu kwiroudapinokaikono. Toro toolluro mujako su tov nemi mollol'movanekudukwopiyodowodokwono. Mujako su tov nemi poowokalago tovida'ai bolnodo'moneyokwe pasudo me'no kuulanekwo'dupudo toorai mollol'movanekudukwopiyodowodokwono. Nemi toro mollol'movanekudukwopiyodowodo su tov nevu Gooti aiyokwe toollu womdo wimwalano'moneyokwe tovinokwono.
Kevu Gooti toollu wobo toru kuuru'mapi tov Gooti kwol kuruv kemi wobo toru nobekuru'ma'mwalonekono. Kevu ma'no ma'no amjumovlapi to'gwowi kemi ma'no ma'no pasudo su toorai kevnokwe togaikul neya domollol'movodukwopinogaulo. Aki kevu pugaikul Gooti toollu uumjunyo'mo tovino kuudo noullo maullo saupi kugaikul kuruv kemi poowokalago tovida'ai ma'no ma'no kuudo kuulaikwo'dupudo su tooro neya domodukwopiyogaulo.
Kevu aro tovino kuudo me'no youroma'dupudogaikikono. Sumdomgu toga kevu kemi tellukweyago tooravuro kaiya'no pasudo somjomwekovlaiyajupo su toorai uumjunodupu yiuno aval'no somjomwekovlaiyajupogaikikono. Pasudo su tooro ikulsulo ilaiyo mai'nyokweyorogano. Kevu kaiya'no pasudo su toorogai kwa'mgu tomuu yomjomwekovla'mdopure togaikullu Gooti tool kemi mollurolovekumallo'moneyokwe me'no abiyekumarokaikono. Su toro abiyekumaroka tov kaiyako i'nopiyodupudo goolodeyo oo silvadeyo togai abiyekumarokalmaiyo.
Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.
Kevu a'mwo abolo Jisasolluno kuudo muubweyodopure tonyuro akuuto tomuu amwalpi toga yiuno sugupasudo tollovogai to'no jogaulo. Su tov aro tovinokwono. A'mwo abolo Jisasolluno kuudo muubweyodupudo ton kemi bwolomekumwogapiyo'mo winodopure toga kemoro sugupasudo su tollovai wonopi lukomgu Gooti tool kuu'maiyo abiyalo'no'ji toga gamino yovo tov nyulomoropiyapinogano.
Toro kuvi kuruv kemino'gwowi Gooti tool me'no ajaikubweyokaikono. Toro togaikul kemi aguto kig Gooti toolluro pris womdokwe wimo'numwalpino'moneyokwe me'no imo'nodupudogaikikono. Aki a'mwo abolo pun kemi aguto kig toolluro kantri toru mwalodupudo tonbusuko kubalno kevu Gooti gavnokwe tooke mujomwekovla'mwalpino'moneyokwe gamoro a'mwo abolo wimo'nodupudogaikikono. Aki kevu Gooti toolluro me'no ajaikubweyoka togaikul yiuno gavnokweyolluro a'mwo abolo wimo'nugovla'mdupudogaikikono. Toro tovino tov kevu Gooti toolluro pasudo sugumaluko yaikullugolodowodo tonyuno a'mwo abolo punyu nokwo moruudumwalpinogaikikono. Gooti su tool kevu dugumwuulo tomuu amwallajupo togaikullu bomollurolovekumokalokwiyo'moneyokwe dekuma'no sumaiyokwe gamoro bako sugumaluko tomuuno amogaibworekumokaulokaikono.
Kuudo neya jaullulo. Krais kwol kuruv a'mwo abolo tonyuro ma'no ma'nodo tovi modukwopiyo'moneyokwe danyu'nyuwuulo ton yiuno puru'monodo toga'no amarokaikono. Krais su tool yiuno sugudo to'no imo'nodowodo kwol kuruv nevu sugudo mimo'nodowado tonolluro aiko toru maro'no abolokaikono. Aki nemi Gooti toollu wobo toru nekumokabiyo'moneyokwe abolokaikono. Krais toolluro kulako tov me'no aboloka kuvi kuruv aiyo aiko te adukavoka toga'no'gwowi Kuullo sumo'nokaikono.
Toro kuvi kuruv Gooti bako tomuu mwalodowodo toolbusuko kubalno ne kunol kuruv bako tovi anakuuto tomuu'aro neya yomjomwekovla'mwalanonogano. Nevu su toro amjomwekovlawa'ji tov Gooti toolluro a'mwo abolo togai nokwo ibwoto'nomwalmwalanonogano. Aki Gooti toolluro Kwolaiyo Jisasolluro mujako tov nemoro yiuwi'nokai ma'no ma'nodo tonyu mollol'movanekudukwopiyokweyokwono.
Toro kuvi kuruv nevu Gooti toollu nemoro ma'no ma'no pasudo tonyuno kuu'maiyo adodowiyoku'bworosuna'ji to'gwowi Gooti tool nemoro yiuwi'nokai ma'no ma'no pasudo tonyuro kirumwallo tovi nomodukwopiyonekono. Aki yiuwi'nokai kaiya'no pasudo mollugolanekumo'mdupudo kworai kuruv nomollol'movanekudukwopiyonekono. Gooti tool pasudo idopto'nodo tovi uumjunowo'ji su toro kuvinono yonekono.
Miyobuuravoo, Krais tool aikomgu yere mabiyalo'noduke akaga nemoro lukomgu nyumo'nano tov kuu'maiyo toru'no miyainyunyokwenogano. Toro kuvi kuruv aro kuudo me'no youroma'dowadonogano. Oo nevu Gooti toolluro kwoloraiyo me'no wimo'nodowadonoldeyo. Toro tonol lukomgu Krais tool kuvinono abiyalo'no'ji toga Krais su toollu yiuno'no noonanoldeyo. Aki nevu me'no kwona'ji su to kwolbusuko nyumo'numwalanonoldeyo. Su toro tovino kuudo me'no youroma'dowadonogano.
Aki Jisas Krais kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo ikubwemwalonekono. Jisas Kraisol Gooti toolluno kuu'maiyo toru'no pi'mwono dodoluwosodowodekono. Aki Jisas Kraisol yiuwi'nokai me'no bolodupudo tooravuro aiyo aiko te dukaiyo'moneyokwe tov kwolda'ai amollubworosokaikono. Toro tool yiuwi'nokai kwako akavida'ai a'mwo aguto kig mido mollomwalokwe tooravuro Agutekono. Jisas Kraisol nemino kalo buuropino winyuno sumaiyokwe gamoro mujako abwoloka tokwe nemi ma'no ma'no pasudo tonyuda'ai me'no abomollurolovonekumokalokwokaikono.
Aki aiyokwe aral aral toorogai'aro 24-pela a'mwono moduvomwallokwe toorogai'aro tooro Sipsip Muugunyo toollu ilomoropiyo'moneyokwe dato muuduko puruv aro adoporogano. “Guvu judo tookuno puukwollikwiyo aweyogunyugolowosungiko su tovi maro'bi gamoro 7-pela gwomalo amugutowopingiko su tonyu nokwo modogaipolodukwopibinekugono. Yo'bi puukwollikwiyo su tovi guu nokwo kuusogunyugolowosubinekugono. Su tov aro tovinokwono. Gumi aromiyagubweyopo toga guu judo tookujuro mujako abwoloka tokwe Gooti tool a'mwo abolo tonyu abiyomarokagano. A'mwo abolo abiyomaroka su ton yiuwi'nokai judo'no judo'no yovodolobunyo togai'aro aki judo'no judo'no yogaljo togai'aro aki judo'no judo'no kula'nokakwe togai'aro aki judo'no judo'no kantri tovida'ai togai'aro yiuwi'nokai su tonyuda'ai a'mwo abolo tonyu Gooti tool gamiyo'mo abiyomarokagano.
ကြော်ငြာတွေ