Nuu Gooti Yawel kemi Gooti kuunodo me'no ikullumo'nodumdo tovino tov kevu kuunano gooti pworai milomoropiyapinono. Toro kuvi kuruv kevu mi kisuvolo nyopi kuunano pworai sulomoropiyapi to'gwowi nuu ikwonyapino mimonyugono. Toro kwonyu kuruv kemi nerekumwallumonyugono. Aki kemoro su toro supi tovasuda'ai kemi kwolaiyo togai'aro tellukweyago togai'aro tellukweyago tooravuro kwolaiyo togai'aro tonyu nerumwallumonyugono. Mi kisuvolo anyupi tonyu toro wimonyugono.
Room 8:7 - Gooti Toolluro Yogalokwono7 Toro tovino tov a'mwo abolo pun kwako akavida'ai kuudo toorai kuumjunpi ton Gooti toolluro loowo tovi dolago tomuu mamwalopi ku'nono muumjunpinogano. Toro ton Gooti toolluro ikomago wimo'numwalpinogano. အခန်းကိုကြည့်ပါ။ |
Room 8:7
28 ပူးပေါင်းရင်းမြစ်များ
Kevu Farasi toorekul gabakuto yaunanyo tooravuro mulojai'nodupudo toorekulbusuko imo'nodupudorekikono. Toro toorekul a'mwo kirovanyuvanyu imo'nodupudo tovino tov yiuno kaiya'no yogalo to'no dodupudorekikono. Su tov aro tovinokwono. Kemoro poowokalago tonyu buro'nyo buro'nyo kuudo tooro kuulaikwo'dopure tovida'ai kemoro mago tokwe jokwerekikono.
Toro te kevu kuudo neya jaullulo. A'mwo pwol loowo tonyuro yogalo kula'nyo puru'monodo kuruv kisuvolo wiyowo'ji aki a'mwo abolo punyu kisuvolo aval'no ipureyokwe yodubwasonekono. A'mwo su toro so'ji toolluro yovo tov muunyu kai'muuda'ai mido mollomwalokwe kig toolluro sumdo tovi a'mwo yovomaiyokwe kuunodo imo'numwalonekono. Toro kuvi kuruv a'mwo pwol loowo su tonyu kuvinono uumjunowo'ji aki a'mwo abolo punyu neya uumjunyo'moneyokwe sodubwaso'ji toolno'gwowi muunyu kai'muuda'ai aguto kig toolluro mido mollomwalokwe tovi anakuuto tomuu yovo aguto kuunodo tov nomaronekono.
Neya duu'nyulo. Kwako akavida'ai a'mwo abolo mwalodupudo ton kemino surodo yo'moneyokwe kavlo puruv nonagutogano. Toro kuvi kuruv nuu toonyuno'gwowi a'mwo abolo su tonyuro ma'no ma'no pasudo mujumovla'mdopure tonyu kuu'maiyo toru dodolubweyodumdonyugono. Su toro tovino tov numino surodo wuunodupudogano.
Toro te a'mwo abolo su ton Gooti toollu kisuvolo wiyodupu kemi kuudo kaiya'nodo tonyu kuumjungovlaiyajupogano. Toro uumjungovla'mdopure tonyu Gooti tool nokwo wonyapino sajukekono. Aki toro tonyuro kirovanyuvanyu go'no go'no amjumovlaiyajupo su ton yiuno kaiya'no kuumwiyo kuunodogano. Toro kunyu kuruv a'mwo abolo su ton kuvinono mujumovla'mdopure toga Gooti tool muumjuku'dowo nokwo wonyapino sajukekono.
Aki toro ton buulo yogalo wuudodupu aki Gooti toolluno suroguudo saullajupogano. Aki a'mwo abolo punyu biyolo duu'mwojodupu aki kevnokwe ton ilomoropunyo'mo sajupogano. Aki aro kuudo saullajupogano. A'mwo pworo nemi neya ilomonekwopiyogapuro. Aki ma'no ma'no pasudo toorai kiroungovlaiyo'moneyokwe puuto muuduko ton soulosunyajupogano. Aki kemi kuunum kwolabolo tonyu kisuvolo kwiyajupogano.
Toro te nevu Jisasolluno kuudo kuubweya'ji toga Gooti toolluro sumdo tovi sugudo me'no wimo'nodowadonogano. Toro tovino tov nevu aro kuudo nyau'mwala'jo. Oo loowo tov womdo nonaguto tovino tov neya amodukwopiyano. Kuudo nyau'mwala'jo. Toro kuvi kuruv nevu Jisasolluno kuudo kuubweya'ji toga'no'gwowi loowo tovuro womdo tovi suwiyo guureji imwojonokwono.
Aki nevu Gooti toolluro ikomago kwimo'nyajuuwo kunol kuruv gamoro Kwolaiyo toolluro aboloka tovida'ai Gooti tool nemi amomgurovanekubweyokaikono. Toro amomgurovanekubweyoka tovida'ai nevu gamoro ibwoto'nyo wimo'nodowadonogano. Toro tovino tov aro nonekullumo'nononogano. Jisasol aiko te me'no dukavo'no aiyo mwallokwekono. Nevu toro tooke aiyo mwalodowado tovino tov Gooti toolluro kirumwallo tovi nobirolo'nugolokwanonogano.
Ma'no ma'nodo tovuro jurogudo tovi amodukwopiyoka su tov nevu sugudo to'no mujumovla'mwalano'moneyokweyokwono. Nevnokwe tonol Gooti toolluro loowo tonyu ku'nono muumjunanonogano. Toro kuvi kuruv nevu kwako akavida'ai kuudo toorai muu'nyubusuko yowa'ji yiuno Gooti toolluro Kuullo tool mollubworonekumokavla'mdowo'jure tovi kuumjuna'ji to'gwowi sugudo to'no nokwo mujumovla'mwalanonogano. Nevu Gooti toolluro Kuullo toollu toro kuumjuna'ji tov loowo tovi uumjunyokwe tonolbusuko imo'nanonogano. Su toro tov neya imo'noneyokweyo'mo Gooti toolluro Kwolaiyo tool ma'no ma'nodo tovuro jurogudo tovi amonekudukwopiyokaikono.
Toro kuvi kuruv a'mwo abolo Gooti toolluro Kuullo tool nonagutokwe ton Gooti toolluro yasuwa'no nonekullabodowodo su tonyu ku'nono mamallokweyogano. A'mwo abolo su ton aro kuudo yau'dupudogano. Oo kuuguudo su tov a'mwo junoruko pworavurokwono. Kuudo yau'dupudogano. Aki nebaikuuguudo su tonyuno kavlo tov yiuno Gooti toolluro Kuullo toollu'aro nokwo jagilpinogano. Toro tovino tov Gooti toolluro Kuullo tool nonagutokwe su ton kavlo tovino ku'nono miyouroma'dupudogano.
Aki a'mwo abolo Moosesolluro loowo nonagutokwe su togai amwalmi toga nuu kwonyu kuruv loowo nonagutokwe pwolbusuko imo'nodumdonyugono. Toro kwonyu kuruv Gooti toolluro loowo tovi kwa'mgu tomuu mamwalodumdonyugono. Su tov aro tovinokwono. Nuvu Krais toolluro loowo tovi dolago tomuu me'no mwalodum uumjunodumdonyugono. Toro tovino tov nuvu a'mwo abolo loowo nonagutokwe togai amwalmi toga su to kunbusuko imo'nodumdonyugono. A'mwo abolo su to kubuuro kuruv Krais toolluno kuudo neya uubwepino'moneyokwe su toro yodumdonyugono.
A'mwo pwol kemi aro ikudonekono. “Oo nuu wojo suwo'numwa'jo tovida'ai pasudo muuduko uumjunyo'mo puvino me'no kwonoma'mwa'jonyugono. Su tov arokwono. Kevnokwe togaikul neya bwolomorumwogapinapi ensel toorai julomoropiyogaulo. Moro wojo kwonmwa'jo su tov agutokwono. Toro tovi kevu neya duumjunyulo.” Ikudonekono. A'mwo pwol su toro aikudo'ji kuvi kuruv kevu muumjunpinono. A'mwo su toolluro yogalo aikudo'ji tovi kevu kaduko kwipi tov a'mwo su tool kemoro muunyu kai'muuda'ai mubiyo sugudo tonyu nyupolekumaro'jo. Toro te kevu a'mwo su toollu kaduko nuuwimwalpiyo. Kuudo neya jaullulo. A'mwo su tooro kemi kuudo uumdo toorai uumjunodupudo tovino tov ilomoropunyu bwotonyo yodapudorogano.
Aki kemi ibwoto'nyo tonyu ikomago pworavuro ato tovi morubwepinogano. Aki duudapi yogalo tonyu kisuvolo to'no mujumovla'mwalpinogano. Aki kevnokwenyuno ilomoropunyo'mo kuudo tov muunyu toru'aro bwotonyo ilomoropinapinogano. Aki Gooti toolluno kalo buuropino mwingovlapinogano. Toro kun kuruv yiuno kevnokwenyuro ilaiyo igollunyo'moneyokwe pasudo tooraino'gwowi kalo buuropino wingovla'mwalpinogano.
Aki Aguto tool aro adokaikono. “Nuu Isuraiyolda'ai a'mwo abolo togai subuu'yamju muuduko yajunanonyugono. Toro sajuna'ji toga moro loowo ton kemoro kuudo tonyu kuulubwemonyugono. Aki moro loowo ton kemoro poowokalago tonyu nyokwollubwemonyugono. Aki nuu kemi Gooti kuunodo nuuwimo'numwalmonyugono. Aki toro ton moro a'mwo abolo yovodolobunyo kuunodo nonyumo'numwalpinogano.
Kevu Gooti toollu wuugollu'mo'mdupudo su tov kwonyalabolo puruv gami kwolo toollu wuugollu'mo'mdowodo to'busuko yodupudogaikikono. Kevu aro tovino kuudo nyau'mwakovo. A'mwo pwol kwako akavida'ai pasudo toorai ibwoto'nyo kwimo'no'ji tov a'mwo su tool Gooti toollu ikomago wimo'nyokwekono. Toro tovino tov neya duu'nyulo. Buro'nyo buro'nyo a'mwo abolodeyo pun kwako akavida'ai pasudo toorai ibwoto'nyo'mo kwinpi su ton Gooti toollu ikomago wimo'nupinogano.
A'mwo kuunano ibwasokwe su tooro kemi sumdo togai kwonyalabolo punyu yo'mgonomallo'mo guureji ya'mgonodupudorogano. Aki su tooro aro to'busukorogano. A'mwo sumwoluko manyuto'nodowodo pwol yiuwi'nokai toga wosamujuko tov guureji nugovlaiyo'mo winodowodekono. Toro toolbusuko kubalno a'mwo su tooro ma'no ma'no pasudo tonyuno yiuwi'nokai toga nonyuto'nugovlaiyo'moneyokwe guureji winodupudorogano. Aki a'mwo su tooro a'mwo abolo pubuurai ki'nomallokwerogano. A'mwo abolo su tobuuro Gooti toolluno kuudo me'no uubweyodupudo kuvi kuruv guureji magudupola'dupudogano. Toro magudupola'dupudo tobuurai ma'no ma'no ipureyokweyo'mo a'mwo kuunano ibwasokwe su tooro ki'nomallokwerogano. Aki a'mwo kuunano ibwasokwe su tooravuro poowokalago tonyu nuugwiyo bwotonyago ki'nomallo'mo kuudo tov kuullo'mowopiyodowodokwono. A'mwo su tooro Gooti toolluro tabunyuwuulo nuubweyono tovi dolago tomuu me'no mwalodupudorogano.
ကြော်ငြာတွေ