Room 6:23 - Gooti Toolluro Yogalokwono

²³ Kevu kuudo neya jaullulo. A'mwo abolo ma'no ma'nodo tovi dolago tomuu mwalodupudo ton kemi mubiyo tov ma'dupudogano. Mubiyo su tov bolnodo tokwono. Toro kuvi kuruv nemi Aguto Krais Jisasolluro womdo sopiyoka tovida'ai Gooti toolno'gwowi aiyo yiunokuudo mujomwekovlaiyo'moneyokwe tov yiuno yasuwa'no nekullabodowodekono.

Room 6:23 ပူးပေါင်းရင်းမြစ်များ

Muuduko 2:17

Toro kuvi kuruv iko pwol gumiyo'mo kumakekono. Iko su toolluno yovo tov arokwono. Kuudo sugudo togai'aro kuudo ma'no ma'nodo togai'aro tonyu youromallo'molekono. Toro toolluro ikulsulo tov amuudanbi tov kuga'gwo kuuno nobolbinekugono.” Kuudokaikono.

Muuduko 3:19

Toro te guu womdo tov dukwogulo imo'naro'bi nyomjonomwekovla'mwalbinekugono. Toro tekwogu nuvu kwako tovida'ai saguukwollo tooku kwako tovi aki aiko te pla'binekwogugano. Tabunyuwuulo akav toro agubwemono.” Gooti Yawel a'mwo toollu toro kuudokaikono.

Matyuu 25:46

Toro wuudo'mi a'mwo abolo su tonyu yiunokuudo kirumwallo'moneyokwe tomuuno wuugollu'mokavlapinogano. Toro kuvi kuruv a'mwo abolo idopto'nodo tono'gwowi aiyo yiunokuudo mujomwekovlaiyo'moneyokwe toru'no plapinogano.”

Joon 10:28

Nuvu su toro tonyu aiyo yiunokuudo mujomwekovlaiyo'moneyokwe tov wiyodumdonyugono. Moro aiyo wiyodumdo su tov yiunokuudo mamjobolmovla'mwalpinogano. Aki a'mwo abolo moro ato tovi me'no mwora'dumdo su tonyu a'mwo pwolnodo kwol kuruv ku'nono mipolonumokavlawonekono.

Joon 17:2

Su tov aro tovinokwono. Guu gumoro Kwolaiyo toonyu me'no ajanubweyodekugono. Toro toonyu gumoro yiuwi'nokai a'mwo abolo tonyu mido mollomwalmwalmo'moneyokwe ajanubweyodekugono. Aki toro ajanubweyodo toonyu yiuwi'nokai a'mwo abolo nyabodumdo tonyu aiyo yiunokuudo mujomwekovlaiyo'mo tov wiyodumdonyugono.

Joon 3:36

Toro te a'mwo pwol Gooti toolluro Kwolaiyo su toolluno kuudo kuubweyo'ji tov aiyo yiunokuudo mujomwekovla'mwalonekono. Toro kuvi kuruv a'mwo pwol Kwolaiyo su toolluro yogalo tovi kisuvolo so'ji toolno'gwowi aiyo yiunokuudo mujomwekovlaiyo'moneyokwe tov mamaronekono. Yiuno Gooti toolluro suroulo to'no maronekono.”

Joon 4:14

Toro kuvi kuruv a'mwo pwol moro wonyo kwimi tovida'ai ano'ji su toolno'gwowi wonyo'mo kuuleyaluko yiunokuudo mwinmwalonekono. Wonyo kwimi su tov gamoro poowokalago tovi anakuuto tomuu wonyo sumdo to'busuko ilowilovabodowo'jure tovida'ai aiyo yiunokuudo mujomwekovla'mwalonekono.” Kuudokaikono.

Joon 4:36

Toro te wit sulo su tonyu muloma'dupudo ton kemi womnuugwiyo tov mollu'bworosodupudogano. Toro to'busuko kubalno a'mwo abolo aiyo yiunokuudo mujomwekovlaiyo'moneyokwe tovi ma'dopure tonyu aval'no mollu'bworosodupudogano. Toro te a'mwo wosamuju'womdo kuudosodowodo tooke'aro aki wosamujukuto muloma'dowodo tooke'aro yiuwi'nokai su tooral ilaiyo bwotonyo aval'no nokwo ibullunorakono.

Joon 5:24

Nuvu nebal'no kuunodo aro ikudumo'mokwono. A'mwo pwol moro yogalo tovi wuu'nowo'ji mi amonuwopiyaboka toolluno kuudo kuubweyo'ji su tool aiyo yiunokuudo mujomwekovla'mwalonekono. A'mwo kuudo me'no kuubwengiko su tool kooti yogalo tovida'ai jul'nyogalo tov mamaronekono. Toro kwol kuruv bolnodo tovi me'no wuugollu'mo'mdowo aiyo yiunokuudo mujomwekovlaiyo'moneyokwe tovi anakuuto tomuuno'gwowi me'no kuulai'mo'mdowodekono.

Joon 6:27

Toro wuujuno sumaiyokwe aki aro kuudokaikono. “Kevu wosamujuko bwiyo buu'dupudo tonyu mallo'mo womdo nyumwalpiyo. Toro kuvi kuruv kevu wosamujuko bwiyo mabuuropiyodupudo tonyu mallo'mo to'gwowi womdo neya jogaulo. Wosamujuko mabuuropiyodupudo su ton aiyo yiunokuudo mujomwekovlaiyo'moneyokweyogano. Toro te aiyo mujomwekovlaiyo'moneyokwe wosamujuko su ton nuvu A'mwo Kwolaiyo Kuunodo toonyu ikullamwalmokwono. Aki su toro ikullabiyo'moneyokwe jurogudo tov moro Nyunumiyago Gooti tool me'no anyabokaikono.” Kuudokaikono.

Joon 6:40

Aki Nyunumiyago toolluro ilaiyo winodowodo tov aro tovinokwono. Yiuwi'nokai a'mwo abolo pwolno puru'monodo ton gamoro Kwolaiyo toonyu nuwonopi kuudo anubwepi tov aiyo yiunokuudo mujomwekovlaiyo'moneyokwe tov nomapinogano. Aki toro tonyu aiyowo'mo toga nuvu aiyo aiko te nomoduka'monyugono.” Kuudokaikono.

Joon 6:68

Toro kuudoganoka tovi Saimoon Pital aro kuudokaikono. “Agutoloo, nevu agugollu'mowa'ji tov ala'mwollomno plawanonoldeyo? Guu tookuno'gwowi aiyo yiunokuudo mujomwekovlaiyo'moneyokwe yogalo tov mwora'dumdekugono.

Room 1:32

Aki toro ton kemi ma'no ma'nodo tonyuno Gooti tool nerumwallono tovino kuudo me'no souromallajupogano. Toro tovino Gooti toolluro kuuguudo sakwollungiko puruv aro dodowodokwono. “A'mwo abolo kaiya'no judo'no judo'no yodupudo tonyuro kirumwallo tov yiuno bolnodokwono.” Gooti toolluro kuuguudo su toro sakwollungiko tovino kuudo me'no youroma'dupudogano. Toro kun kuruv muu'nyubusuko yodupu kemi ma'no ma'nodo tonyu guureji amjumovlaiyajupogano. Aki toro ton aro sajupogano. A'mwo abolo punyuro ma'no ma'nodo tonyu wonodupu maduumjukullajupogano. Toro kun kuruv aro kuujajupogano. “Oo ilaiyo sadokwovo.” Kuujajupogano. Su toro kuujajupo tov kaiya'no bwotonyo sajupogano. Su toro tomgu'aro kaiyako sugolamo'nyajupogano.

Room 2:7

Toro te a'mwo abolo pun Gooti toolluro bako bwotonyo tovi anakuuto tomuu kuulomwallo'moneyokwe puuto tovi a'mgono yodupudogano. Aki Gooti tool muunyu toru'aro yomollonekumwallowo'ji yiunokuudo nobola'jokwe tovino winodupudogano. Su toro winodupudo ton sugupasudo yomjumovla'mdupu mimwogapiyodupudogano. Toro tonyu Gooti tool aiyo yiunokuudo mujomwekovlaiyo'moneyokwe tov kuvinono nuubweyonekono.

Room 5:12

Toruda'ai ma'no ma'nodo tov a'mwo yiuno pwolnodo toolluro amolloujulowosoka tovida'ai bolnodo tov sumo'nokakwono. A'mwo su toolluno yovo tov Adamolekono. Bolnodo tov me'no imo'nyuno sumaiyokwe yiuwi'nokai kwako akavida'ai a'mwo abolo tonollu aiyowomno so'movanekwopiyokakwono. Aki nevu yiuwi'nokai a'mwo abolo tonol ma'no ma'nodokwe imo'nodowado tovino tov mujobolmovla'mdowadonogano.

Room 5:17

Kevu kuudo neya jaullulo. Adamolluro ma'no ma'no soka tovida'ai bolnodo tov mido mollonekumwallo'moneyokwe gamoro dolago tomuu amonekumwallokanogano. Toro kuvi kuruv Gooti toolluro yasuwa'wino sugumaluko anekullaboka to'gwowi bolnodo tovuro jurogudo tovi kuuwolovokakwono. Toro te yiuwi'nokai a'mwo abolo ton Gooti toolluro yasuwa'wino sugumaluko nekullabodowo'jure su tovi amapi ton gamoro sumdo tovi sugudo wimo'nupinogano. Toro ton Jisas Kraiseke aiyo yiunokuudo mujomwekovlavopi gavuge mido mollomwalokwe imo'nupinogano.

Room 5:21

Kevu kuudo neya jaullulo. Muudu'nodo toga ma'no ma'nodo tovi dolago tomuu mwalodowa abollajuwonogano. Toro kuvi kuruv aga'no'gwowi nevu Gooti toolluro yasuwa'wino sugumaluko tovi dolago tomuu mwalodowadonogano. Nemi su toro kuulomonekumwallo'moneyokwe Aguto Jisas Kraisol womdo me'no sopiyokaikono. Toro tovino tov nevu Gooti toolluro sumdo tovi sugudo wimo'nodowa aiyo yiunokuudo mujomwekovlaiyo'moneyokwe tovi ma'dowadonogano.

Room 6:16

Toro tonol aro kuudo neya yaurogawano. Nevu buro'nyo buro'nyorodeyo toorai kuumjuna'ji tov su tooro nemi mido mollonekumwalokwe nekullumo'nupinorogano. Su toro kuudo me'no yau'dowado tovino tov kevu pugaikul ma'no ma'nodo tovi kuumjunpi tov ma'no ma'nodo su tovuro mido mollomwalo tovi dolago tomuu kuulai'movopi ki'nato womdokwe wimo'nugovlapinogaikikono. Ma'no ma'no pasudo tovi ki'nato womdo kwipi tov nobolpinogaikikono. Toro kuvi kuruv kevu Gooti toolluro yogalo tovino'gwowi kaduko wiyopi kemi poowokalago tokwe kuudo kuubwepi togaikul Gooti tool gamoro sumdo tovi sugudo wimo'nyo'moneyokwe ilaiyo mollekumaronogaikikono.

Room 6:21

Aki ma'no ma'nodo tovi dolago tomuu amwallajupo toga ma'no ma'no judo'no judo'nodo tonyu mujeroungovla'mdupu wogulo'mo sajupogaikikono. Su toro tovida'ai sugudo pun abaiki'meyajukogaikuldukono? Awiyo, sugudo pun mabaiki'meyajuko kuvi kuruv yiuno bolnodo to'gwowi abaiki'meyajukokwono.

Room 8:13

Kevu pugaikul kwako akavida'ai kuudo toorai'aro kuumjungovlapi tov nobolpinogaikikono. Toro kuvi kuruv Gooti toolluro Kuullo tool jurogudo ikubweyodowo'jure tokwe kemi kulako tovida'ai womdo mujeroungovla'mdupudo toorai suvlo neya julomavekurogaulo. Toro supi tov aiyo ilaiyo to'no mujomwekovla'mwalpinogaikikono.

Room 8:38

Gooti toolluro kalo buuropino nekullunodowodo su tovino nuu kuudo me'no youroma'dumdonyugono. Toro te nuu kuudo noullo maullo miyau'dum aro tovino guureji gudopola'dumdonyugono. Gooti toolluro nemino kalo buuropino winodowodo su tovi noonyumwonyu pworo ku'nono mamolloru'mdovonekwapipinorogano. Nobollo'mo tokwe'aro aiyo mwallo'mo tokwe'aro toval ku'nonodo'movalmaiyo. Aki ensel toorogai'aro kuullo ma'no ma'nodo toorogai'aro noonyumwonyu jurogudokwe toorogai'aro kworo kuruv ku'nonodo'moromaiyo. Aki aga baneki'mo'mdupudo toorogai'aro lukomgu nobaneki'mopino toorogai'aro kworo kuruv ku'nonodo'moromaiyo.

Room 8:39

Aki kwako tovi muunyu tomuu wo'dupudo toorogai'aro kwako tovi dolago tomuu wo'dupudo toorogai'aro kworo kuruv ku'nonodo'moromaiyo. Aki Gooti toolluro yiuwi'nokai sokwollosoka kworo kuruv ku'nonodo'moromaiyo. Yiuwi'nokai su tooro Gooti toolluro nemino kalo buuropino winodowodo tovi ku'nono mamolloru'mdovonekwapipinorogano. Gooti toolluro kalo buuropino winodowodo su tovi anakuuto tomuu me'no kuulomwalodowadonogano. Su tov nemi Aguto Krais Jisasollu'aro nonekullumo'nodowodokwono.

Room 8:6

Toro te kevu kwako akavida'ai kuudo toorai kuumjunpi tov bolnodo to'no yo'mgonomapinogaikikono. Toro kuvi kuruv kevu Gooti toolluro Kuullo toollu kuumjunpi to'gwowi aiyo yiunokuudo mujomwekovlaiyo'moneyokwe tovi maropi kemoro sumwoluko ton kavo wosungovla'mwalpinogaikikono.

Galesiya 3:10

Neya duu'nyulo. A'mwo abolo pun aro kuudo yau'dupudogano. Oo nevu Moosesolluro loowo tovi kuumjuna'ji tomgu'aro Gooti toolluro sumdo tovi sugudo imo'nanonoldeyo. Yiuwi'nokai su toro kuudo yau'dupudo ton Gooti toolluro jul'nyogalo tovi dolago tomuu mwalodupudogano. Neya duu'nyulo. Gooti toolluro yogalo sakwollungiko puruv aro dodowodokwono. “A'mwo pwol Moosesolluro loowokwe buukiyo tonyuda'ai yiuwi'nokai yogalo judo'no judo'no sakwollungiko su tonyu ku'nono muumjuno'ji tov Gooti tool a'mwo su toollu kaiyako nyugolonekono.” Sakwollungikokwono.

Taitos 1:2

Su toro uumjungovlavopi aiyo yiunokuudo mujomwekovlaiyo'moneyokwe tov kuvinono mallo'mo sogwollo to'no kingovla'mwalpinogano. Aiyo mujomwekovlaiyo'moneyokwe su tovino aiyoga yiuwi'nokai ton yere mimo'nyodopure toga Gooti tool subuu'yamju me'no kwiyajukekono. Aki subuu'yamju kwiyajuko Gooti su tool kuunano yogalo puru'monodo kuruv miyoukuu'najokwekono.

Jems 1:15

Kevu yovekurajo akavi duu'nyulo. Sumdomgu kwolaiyo tool sumwoluko tovi anakuuto tomuu kuullumo'nowo'ji lukomgu kwolaiyo muudoga toollu yomaronokwono. Kwolaiyo muudoga su tool aguto gulluno gulluno yowo'ji aiyowo'mo toga nobolonekono. Su toro to'busuko kubalno a'mwo pwol gavnokweyolluro ilaiyo igollunyo'mo kuudo toorai kuumjuno'ji tov ma'no ma'no pasudo tov nobai'mowonokwono. Ma'no ma'no pasudo su tov aguto gulluno gulluno yowo'ji bolnodo tov bai'mowonokwono.

1 Joon 2:25

Aki kuudo neya jaurogaulo. Krais toolluro subuu'yamju adanekulloka tov arokwono. Kevu aiyo yiunokuudo mujomwekovlaiyo'moneyokwe tov nomapinogaikikono. Adanekullokaikono.

Adodolukuu'nosungiko 21:8

Toro kuvi kuruv a'mwo abolo puno'gwowi luko yodupudo su togai'aro kuudo muubweyodupudo togai'aro kaiyako igolamo'nodupudo togai'aro romiyosodupudo togai'aro kwonyalo yodupudo togai'aro bulapto yodupudo togai'aro kuunano gooti toorai ilomoropiyodapudo togai'aro kuunano yogalo youkuu'nuudodupudo togai'aro yiuwi'nokai su tonyuno'gwowi dukworokakwe salfa sulo tokwe du'muudo nugovla'mdowo'jure tovi noulapinogano. Du'muudo su tovino, naba 2 bolnodovo, dodupudokwono.”