Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -




Room 6:17 - Gooti Toolluro Yogalokwono

17-18 Toro te aga nevu Gooti toollu, “Nenoloo,” neya wuudogawano. Su tov aro tovinokwono. Muudu'nodo toga kevu ma'no ma'nodo tovuro ki'nato womdokwe kwimo'nyajupo kugaikul kuruv Gooti toolluro nebaikuuguudo tovi wuu'no'mno kemi poowokalago kuunodo tokwe kuudo me'no kuubweyopogaikikono. Toro kuubweyopo toga'no'gwowi me'no birolo'nugolokwo'mno nebaikuuguudo su tovi uumjunodupudogaikikono. Toro togaikul sugupasudo yo'moneyokwe tovuro ki'nato womdokwe me'no wimo'nodupudogaikikono.

အခန်းကိုကြည့်ပါ။ ကော်ပီ




Room 6:17
37 ပူးပေါင်းရင်းမြစ်များ  

Toro sodubwasoka tovi wagwolago Jeruusalemda'ai Jisasolluro a'mwo abolo ton wuu'no'mno sumdomgu Pitallu yogalo amojurugollajupo kun kuruv su toro toga'no'gwowi kemoro sumwoluko tov noullo kwosunopogano. Toro wosunyuno sumaveyokwe Gooti toolluno ilomoropiyo'moneyokwe aro adopogano. “Oo a'mwo abolo Juu miyawosunodupudo kubuuro kuruv Gooti toollomno kuudo souragunyumo'nupi tonyu Gooti tool ilaiyo to'no mollomarowo'ji aiyo yiunokuudo mujomwekovlaiyo'moneyokwe tov nokwo wiyonoldeyo.” Adopogano.


Nevu puuto tovi pla'mdowore toga wagwolago Roomda'ai Jisasolluro a'mwo abolo pun wuu'no'mno nemi puuto su tomuu bwolonekuru'mallo'moneyokwe kwolabopogano. Toro ton wolabino sumaveyokwe pun puuto su tovida'ai wosamuju'maket wosodupudo toru abwolonekuru'maropogano. Maket su tovino yovo tov, Apiyosovo, dodupudokwono. Aki pun puuto su tovida'ai sa wollo'moneyokwe ago ton wo'dupudo toru abwolonekuru'maroponogano. Ago su tonyuno yovo tov Sa Wollo'moneyokwe Biyoma'dupudo Ago Puusapuulovogano. Toro tomuu a'mwo abolo su ton bwolonekuru'ma'no sumaveyokwe Poolol a'mwo abolo su tonyu wono'no Gooti toollu, “Nenyoo,” kuudokaikono. Aki toro tool a'mwo abolo su tonyu kwonoka toga gamoro poowokalago tovi jurogudo kwimwojokakwono.


Toro toolluno yovo tovi ilomoropiyo'moneyokwe nuu gamoro kuuguudo sugudo tokwe moruudomollodo'mure tovida'ai yiuwi'nokai a'mwo abolo pumuuda'ai ton Jisasolluno kuudo uubweyopi kwollu nokwo uumjunmwalpinogano. Toro tovino'mo Gooti gavnokwe tool gamoro Kwolaiyo Jisasollu'aro yasuwa'wino sugumaluko tov anubweyokanyugono. Toro toonyu kuurotokwe imo'nodum gamoro womdo tov yomjumovlaiyo'moneyokwe ajanubweyokanyugono.


Nuu sumdomgu aro ikudumo'monyugono. Yiuwi'nokai kwako akavi kemino tov aro me'no bomje'nugoulodawodokwono. “Oo a'mwo abolo su ton Jisasolluno kuudo me'no uubweyodupudogano.” Kemino toro bomje'nugouloduke tovi a'mwo abolo bwotonyago ton me'no wuu'nopiyodupudokwono. Toro te nuu kemino su toro kuudo yaikuu'dumdo toonyu Jisas Kraisolluro yovo tovida'ai Gooti toollu, “Nenyoo,” subusu'nyogalo wuudodumdonyugono.


Toro te nuvnokwenyuro womdo pworaino jo'mo manyunadopiyo. Toro kwonyu kuruv yiuno Krais gavnokwe toolluro womdo tovino to'no jo'mo anyunadopiyo. Krais toolluro womdo su tov numi'aro kuvinono sokaikono. Womdo su tov arokwono. A'mwo abolo Juu tooravuro miyawosunodupudo ton Gooti toollu neya uumjunpureyokwe moro yogalo togai pasudo togai kuvinono mollubworomokabodumdonyugono.


Nevu yiulo yogalo sumo'nyajuko su tovi yiuwi'nokai a'mwo abolo tonyu kuu'maiyo toru'no moruudomollodowadonogano. Yiuwi'nokai a'mwo abolo Juu tooravuro miyawosunodupudo kunyu kuruv Jisasolluno kuudo neya uubwepino'moneyokwe nevu proofet tooravuro puukwollo sakwollajupo togai yodubwasodowadonogano. Su toro yodubwasodowore tovi'aro yiulo yogalo sumo'nyajuko su tov yiuno kuu'maiyo toru'no bomollupto'nubweyodowadonogano. Aki Gooti aiyo yiunokuudo mujomwekovla'mdowodo toolluro yogalo nekudodowo'jure tomgu'aro kuvinono moruudomollodowadonogano.


Toro kuvi kuruv a'mwo abolo puno'gwowi kevnokwenyuro kuudo tovino to'no uumjungovla'mdupudogano. Toro ton Gooti toolluro nebaikuuguudo tovi kisuvolo wiyodupu yiuwi'nokai toga ma'no ma'no yomjomwekovla'mdupudogano. Su toro ton Gooti toolluro surodo wuunodowodo tov maropi ma'no ma'nodo tovuro kirumwallo'mo mubiyo tov nomapinogano.


Gooti tool Krais Jisasollu'aro gamoro yasuwa'wino sugumaluko ton kemi me'no aikullabokaikono. Toro tovino tov nuvu kemino Gooti toollu, “Nenyoo,” subusu'nyogalo wuudodumdonyugono.


Mi avalobuuravoo, nuvu kemi bekuru'maro'mi yogaljo gabovo puruv kevu kuudo miyau'dupudo tovida'ai abaikudumi tov kemi ku'nono maikullo'mwojumonyugono. Toro kwonyu kuruv kemi ikullo'mwojo'moneyokwe kuuguudo tono'gwowi arogano. Gooti toolluda'ai bomollolupto'nosodowodo kuuguudo'mdeyo oo kuudo aguto tonyuno kuuguudo'mdeyo oo Gooti toolluro kuurokado mollajo'moneyokwe kuuguudo'mdeyo oo Gooti toolluro yodekubwaso'moneyokwe kuuguudo'mdeyo togano. Su toro tonyuda'ai pugai nuu kemi aikudumi tov jurogudo nokwo daikullumwojumonyugono.


Toro kuvi kuruv mi Gooti toollu, “Nenyoo,” wuujo'mo anyunadopiyo. Krais tool Satanyollu me'no kuuwolovokaikono. Nevu kunol kuruv Krais me'no uuguro'mwonyodowado toollu'aro kuuwolovowonogano. Toro te Gooti tool nevu Krais tooke me'no kuuwolo'nyuguuwo tonollu yiuwi'nokai toga mollubworonekumokavla'mdowodekono. Aki Gooti su tool nemi'aro Krais toolluno kuuguudo tov yiuwi'nokai tomuu juru'bworapiyodowodekono. Su tov yovekurajo aka'busukokwono. Wobeya sudo puruv yiuwi'nokai tomuu juru'bworopiyodowodo to'busuko kubalno Krais toolluno kuudo uubwemelabodupudo tov yiuwi'nokai tomuu bomje'nugoulodawodokwono.


Toro togaikulluno nuu Gooti toollu, “Nenyoo,” subusu'nyogalo wuudodumdonyugono. Aki Gooti tool kemi kuuno ikullo'mwojumovla'mwalono'moneyokwe subusu'nyogalo wuudodumdonyugono. Moro subusu'nyogalo wuudodumdo su tov muugollu'mo'monyugono.


Neya duu'nyulo. Nevu kemino kuudo yaikuu'dowado tovino tov Gooti toolluro sumdo tovi nemi poowokalago togai ilaiyo bwotonyo yodowadonogano. Toro toonol kemino tov Gooti toollu, “Nenoloo,” to'no subusu'nyogalo wuujokwenogano.


Nemi avalobuuravoo, kemoro Gooti toolluno kuudo uubweyodupudo tokwe'aro imgu amgu kalo buuropino ingovla'mdupudo tokwe'aro tovalluno kuudo yaikuu'dowadonogano. Kemoro pasudo su toval gullumovla'mno gullumovla'mno yodubul bwotonyo imo'nodubulovakono. Kevu su toro yomjomwekovla'mdupudo togaikulluno yiuwi'nokai toga Gooti toollu, “Nenoloo,” to'no wuudumwalano'monogano.


Toro te guu moro Krais Jisasolluno kuuguudo idopto'nodo sodogubwasajo tonyu me'no kuu'nyajudekugono. Kuuguudo idopto'nodo su ton a'mwo abolo punyu sodubwasubi toga yiuno aval'nodo tomgu'aro neya yodubwasumwalbinekugono. Guu Krais Jisasollu me'no kuuguro'mwonyajudekugono. Toro kuuguro'mwonyajudo tovida'ai gumoro kuudo uubweyodumdo tokwe'aro aki kalo buuropino gujunodowodo tokwe'aro pasudo su tovallu guureji neya dogudupolarogawono.


Yiuwi'nokai toga Gooti tool gumi agujo'mwojogawoneyokwe tovino subusu'nyogalo wuudodumdonyugono. Aki su toro wuudodumdo toga mi Gooti toollu gumino, “Nenyoo,” wuudodumdonyugono.


Aki aiyoga Eburaiyamol Gooti toolluno kuudo kuubweyajukekono. Toro toollu Gooti tool doma'no sumaiyokwe aro kuudokaikono. “Guu moro kwako nogujamo tomuuno dovlavono.” Toro kuudoka tovi Eburaiyamol Gooti toolluno kuudo kuubweyajuko toolluno tov kuvinono kuumjunokaikono. Toro tool kwako su tomuuno kuudo yere miyouroma'duke kugada'ai nokwo plaino sokaikono.


Aki Krais su tool gamoro yiuwi'nokai womdo tovi sopiyoka toga Gooti tool yogalo aro adubweyokaikono. “Melkisodekol pris womdo sajuko toolbusuko kubalno guu pris aguto imo'numwalbinekugono.” Adubweyokaikono. Krais toolluro womdo sopiyoka su tovi'aro yiuwi'nokai a'mwo abolo kwollu kuumjunpi ton kemi ma'no ma'nodo tovuro kirumwallo tovida'ai birolo'nugolokwopi aiyo yiunokuudo mujomwekovla'mwalpinogano.


Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.


Toro kuvi kuruv kemino'gwowi Gooti tool me'no ajaikubweyokaikono. Toro togaikul kemi aguto kig Gooti toolluro pris womdokwe wimo'numwalpino'moneyokwe me'no imo'nodupudogaikikono. Aki a'mwo abolo pun kemi aguto kig toolluro kantri toru mwalodupudo tonbusuko kubalno kevu Gooti gavnokwe tooke mujomwekovla'mwalpino'moneyokwe gamoro a'mwo abolo wimo'nodupudogaikikono. Aki kevu Gooti toolluro me'no ajaikubweyoka togaikul yiuno gavnokweyolluro a'mwo abolo wimo'nugovla'mdupudogaikikono. Toro tovino tov kevu Gooti toolluro pasudo sugumaluko yaikullugolodowodo tonyuno a'mwo abolo punyu nokwo moruudumwalpinogaikikono. Gooti su tool kevu dugumwuulo tomuu amwallajupo togaikullu bomollurolovekumokalokwiyo'moneyokwe dekuma'no sumaiyokwe gamoro bako sugumaluko tomuuno amogaibworekumokaulokaikono.


Su to'busuko kubalno kevu abolo togaikul kemi kwolo tooravuro mido mollomwalodopure tovi kwako tomuu'aro neya duuwimovlavogaulo. Kevu kwako tomuu'aro su toro kwipi toga kemoro kwolo pworo kuuguudo sugudo tovino kuudo muubweyodupudorodeyokwe kevu abolo togaikulluro sugupasudo su togai nokwo wuuduuwallumwalpinogaikikono. Kevu kemi kwolo su toorai kuuguudo sugudo tovino kuu'maiyo toru mamoruudupi kuvi kuruv yiuno kemoro sugupasudo mujumovla'mdopure su tonyu wonekumaropi kuuguudo sugudo tovino, Oo nebalo'mdeyo, kuudo nokwo uubwepinorogano.


Neya duu'nyulo. Nevu a'mwo abolo Gooti tooke mwalodowado tobuuronollu gamoro kuudo nekuuteyo'moneyokwe tov me'no abai'mo'mwallukokwono. Toro te gamoro a'mwo abolo tonollu tagunyo togai sumdomgu anekuutemwallo. Gooti tool gamoro a'mwo abolo tonollu me'no nekuuteyodowodo tovino tov a'mwo abolo Gooti toolluro kuuguudo sugudo tovi kisuvolo wiyodupudo kunyu kuruv kuvinono nuuteyonekono. Aki su tonyuro jul'nyo mapino to'gwowi bwotonyo kuunodokwono.


Nuu a'mwo abolo gumoro kwoloraiyo tobuurobusuko gujumo'nododupudo pubuuraino ilaiyo bwotonyo sumwakonyugono. A'mwo abolo su tobuuraino aro souroma'mwakonyugono. Oo a'mwo abolo su tobuuro nebal'no yogalo tovi kuvinono uumjunodupudodeyo. Nebal'no yogalo su tovi neya uumjunmwalpino'moneyokwe tovino sumdomgu togasuro nemi Nellunumiyago Gooti tool me'no adanekulloka tomgu'aro kuvinono uumjungovla'mdupudodeyo. Toro me'no souroma'mwako tobuuraino nuu ilaiyo bwotonyo sumwakonyugono.


Neya duu'nono. Jisasolluro a'mwo modomollodupudo pworo miyomno akawai abai'mo'mwa'juporogano. Toro tooro gumino aro adodoluvanubwemwa'juporogano. “Oo a'mwo su tool Gooti toolluro nebal'no yogalo tovi pi'mwono uumjunodowodekono.” Adodoluvanubwemwa'juporogano. Toro te nuu gumino kuuguudo su tovi wuu'nyuno sumoneyokwe aro kuudo souroguma'mwa'jonyugono. “Oo a'mwo su tool nebal'no yogalo tovi kuvinono uumjungovlaiyokweyoldeyo.” Toro kuudo yourogumarono gumino ilaiyo bwotonyo sumwa'jonyugono.


ကြှနျုပျတို့နောကျလိုကျပါ:

ကြော်ငြာတွေ


ကြော်ငြာတွေ