Toro ton aro aduumjunopogano. “Ilaiyokwono! Gooti toolluro sugumaluko to'no kwosungiko akallu amonekwopiyamokaikono. Aguto kig su tool Aguto toolluro yovo tovida'ai abumokaikono. Toro tool nevu sumwoluko kavo wosunyo'moneyokwe tovino Gooti toolluro ago muunyu kai'muuda'ai abadopiyo. Aki Gooti toolluno yovo tovi muunyu toru'aro ilomoropiyowanoo!” Aduumjunopogano.
Room 5:1 - Gooti Toolluro Yogalokwono1 Toro te nevu Krais toolluno kuudo me'no uubweyodowado tonolluno Gooti tool, “Sugudogano,” danekubweyoduke tovida'ai gamoro sumdo tovi sugudo wimo'nodowadonogano. Toro tovino tov nevu Gooti toolluro ikomago mwimo'nodowadonogano. Toro kuvi kuruv nemi Aguto Jisas Kraisol nekullo'mwojo'moneyokwe womdo tov me'no sopiyokaikono. Toro sopiyoka tovino Gooti tool kuudo yaurowo'ji gamoro sumwoluko tov nemino kavo nekubweyodowodekono. အခန်းကိုကြည့်ပါ။ |
Room 5:1
53 ပူးပေါင်းရင်းမြစ်များ
Oo kevu sumwoluko kavo wosunmwalpino'moneyokwe tov nuu kemi ikubweyo'mi ikugollu'mo'monyugono. Sumwoluko kavo wosunyo'moneyokwe su tov a'mwo abolo kwako akavi mwalodupudo ton ku'nono maikullabupinokwono. Toro kuvi kuruv nuvnokwe toonyuno'gwowi moro sumwoluko kavo wosunyo'moneyokwe tov kemi aikullamono. Toro te kemoro poowokalago ton jul'nyo mibwosunpinono. Aki toro toorekul luko mipinono.
Toro te moro yogalo aikudumo su tov aro tovino'mokwono. Kevu mi nuguro'mwonyodupudo toorekul sumwoluko kavo to'no nokwo wosunmwalpinorekikono. Toro kworekul kuruv kwako akavi kuuno amwalpi toga jul'nyo tagunyo bwotonyago ton noma'mwalpinorekikono. Toro amapi kuvi kuruv nuvno'gwowi yiuwi'nokai kwako akavida'ai jurogudo tonyu me'no kuuwolovonyugono. Toro tovino tov kemi poowokalago ton jurogudo nokwo jumo'nogaulo.” Kuudokaikono.
Toro kuvi kuruv kuuguudo me'no sokwollosumo su ton kevu aro tonyuno kuudo uubwepureyokweyo'mokwono. Oo nebalo'mdeyo. Jisasol Gooti toolluro amonekwopiyaboka Krais tool kwoldeyo. Aki toro tool Gooti toolluro Kwolaiyoldeyo. Su toro toolluno kevu kuudo kuubwepi tov gamoro yovo tovi'aro aiyo yiunokuudo mujomwekovlaiyo'moneyokwe tov nomapinogaikikono.
Nuvu nebal'no kuunodo aro ikudumo'mokwono. A'mwo pwol moro yogalo tovi wuu'nowo'ji mi amonuwopiyaboka toolluno kuudo kuubweyo'ji su tool aiyo yiunokuudo mujomwekovla'mwalonekono. A'mwo kuudo me'no kuubwengiko su tool kooti yogalo tovida'ai jul'nyogalo tov mamaronekono. Toro kwol kuruv bolnodo tovi me'no wuugollu'mo'mdowo aiyo yiunokuudo mujomwekovlaiyo'moneyokwe tovi anakuuto tomuuno'gwowi me'no kuulai'mo'mdowodekono.
Pital toro wuujuno sumaiyokwe aki aro kuudokaikono. “Kevu aro tovino kuudo nyau'mwakovo. Gooti tool nevu Isuraiyolda'ai tonollu Jisas Kraisolluno kuuguudo sugudo tov me'no anekwopiyabokaikono. Toro toolluro womdo sopiyoka tovida'ai Gooti toolluro sumwoluko tov kavo wosodowo nevuge ibwoto'nyo nokwo yonekono. Aki yiuwi'nokai kwako akavida'ai tonolluro Aguto kuunodo tool Jisas Kraisol kwekono. Kuuguudo sugudo anekwopiyaboka tov torokwono.
Toro tov Gooti tool a'mwo abolo tonol gamoro sumdo tovi sugudo wimo'nyo'moneyokwe puuto soulonekubweyoka tovino nekuduuwallodowodokwono. Toro te a'mwo abolo yiuno kuuguudo sugudo su tovino kuudo kuubwepi tono Gooti toolluro sumdo tovi sugudo nokwo wimo'nupinogano. Toro tovino Gooti toolluro yogalo sakwollungiko puruv aro dodowodokwono. “A'mwo abolo kuudo kuubwepi ton Gooti toolluro sumdo tovi sugudo wimo'nopi aiyo yiunokuudo mujomwekovla'mwalpinogano.” Gooti toolluro yogalo sakwollungiko puruv toro dodowodokwono.
Gooti tool kevu Roomda'ai togaikulluno kalo buuropino wino'no gamoro a'mwo abolo kuunodo wimo'nyo'moneyokwe me'no adekumarokagaikikono. Toro te nuugebuuravoo, nuu kemi pas akav yakwollodum aro ikudumo'monyugono. Gooti toolluro yasuwa'wino sugumaluko ton nekubwemwalonekono. Nemi Nellunumiyago Gooti tooke'aro Aguto Jisas Kraiseke'aro tooralluda'ai yasuwa'wino sugumaluko su ton kuvinono noma'mwalpinogaikikono. Toro amapi tovida'ai kemoro sumwoluko ton kavo wosopi ilaiyo nokwo yomjomwekovla'mwalpinobuurekikono.
Su tov aro tovinokwono. Nevu nemi poowokalago togai Jisasolluno kuudo kuubweya'ji tov Gooti toolluro sumdo tovi sugudo wimo'nodowa'jure tonolluno Gooti tool, “Sugudogano,” danekubweyonekono. Aki nevu nemi mago togai Jisasolluno kuu'maiyo toru'no adodowiyoku'bworosuna'ji tov nemi ma'no ma'nodo tovuro kirumwallo tovida'ai Gooti tool nobomollurolovonekumokalokwonekono.
Aki yere mamoruudodowo'jure toga sumdomgu Gooti tool a'mwo pwollu neya amorapiyono. Su toro tovino Gooti toolluro yogalo sakwollungiko puruv aro dodowodokwono. “A'mwo abolo pun ilaiyo bwotonyo yopi aro modomapinogano. “Oo a'mwo kuuguudo sugudo tokwe amoruudomolladokwopo su tooravuro suvlo ton sugumalukogano.” Modomapinogano.” Gooti toolluro yogalo sakwollungiko puruv su toro dodowodokwono.
Su tov aro tovinokwono. Aguto kig Gooti toolluro mido mollomwalo tovi dolago tomuu mujomwekovlaiyo'moneyokwe tov wosamujuko tokwe wonyo tokwe toval aguto mimo'nodubulovakono. Toro kuvi kuruv Gooti toolluro mido mollomwalo tovi dolago tomuu mujomwekovlaiyo'moneyokwe aguto imo'nodupudo tono'gwowi arokwono. Nevu pasudo idopto'nodo yomjomwekovlaiyo'mo tokwe'aro sumwoluko puru'mono wosunyo'mo tokwe'aro a'mwo abolo punyuno kalo buuropino mollo'mo tokwe'aro su tono'gwowi aguto imo'nodupudogano. Pasudo su ton Gooti toolluro Kuullo tool nemi nekubweyodowodogano.
Toro te kemi Gooti toolluro Kuullo tool jurogudo ikubweyodowo'jure tokwe kevu Gooti toolluro subuu'yamju su ton adoga kuvinono imo'nupinodukoneyokwe tovino sogwollo kingovla'mwalpinogaikikono. Aki Gooti tool kuvinono ikullo'mwojono su toolluno kuudo to'no duubweyogaulo. Gooti su tool kemi poowokalago togai ilaiyo yo'mo tokwe'aro sumwoluko ton kavo wosunyo'mo tokwe'aro ton kemi nokwo aikubweyono. Gooti tool tono tono ikubwemovla'mwalono tovino nuu ilaiyo anyunadopiyo.
Toro tovino tov a'mwo tooro kemi lakulkulako ton ado'nupiyorodeyo oo mado'nupiyorodeyo kworo kuruv yiuno Jisasolluno kuudo kuubwepi toorono'gwowi Gooti toolluro sumdo tovi sugudo nokwo wimo'nupinorogano. Gooti pwolnodo tool su toro toorai puuto judo'no judo'nodo tomgu'aro mamolloma'dowodekono. Toro kwol kuruv yiuno aval'nodo tomgu'aro mollomarowo'ji gamoro sumdo tovi sugudo wimo'nodopudorogano.
Kwako akavida'ai nuugwi womdo yodupudo tooro su toro tomgu'aro yoma'dupudorogano. Toro kuvi kuruv Gooti toolluro sumdo tovi sugudo wimo'nyo'mo to'gwowi a'mwo abolo ton noonyumwonyu womdo pun kevnokwe ton yopi tovida'ai mwimo'nupinogano. Toro kun kuruv yiuno Gooti toolluno kuudo kuubwepi to'gwowi Gooti toolluro sumdo tovi sugudo nokwo wimo'nupinogano. Toro te a'mwo abolo ma'no ma'nodokwe tonyu ilaiyo mollomallo'moneyokwe tov yiuno Gooti toolnodokwono.
Krais tooke'aro Adameke'aro tooralluro solo su tovino aro kuudo neya jaullulo. Yiuno Adamol judo toolluro ma'no ma'no soka tovida'ai Gooti tool yiuwi'nokai a'mwo abolo tonollu, Nerekumwallumonyugono, adanekubweyokaikono. Toro kuvi kuruv yiuno Krais judo toolluro sugudo soka tovida'ai to'gwowi yiuwi'nokai a'mwo abolo tonollu irolovonekwapiyodowo aki aiyo yiunokuudo mujomwekovlaiyo'moneyokwe tov nekullabodowodonogano.
Kevu kuudo neya jaullulo. A'mwo abolo ma'no ma'nodo tovi dolago tomuu mwalodupudo ton kemi mubiyo tov ma'dupudogano. Mubiyo su tov bolnodo tokwono. Toro kuvi kuruv nemi Aguto Krais Jisasolluro womdo sopiyoka tovida'ai Gooti toolno'gwowi aiyo yiunokuudo mujomwekovlaiyo'moneyokwe tov yiuno yasuwa'no nekullabodowodekono.
Toro tovino tov nevu aro kuudo neya yaurogawano. A'mwo abolo Juu tonolluro miyawosunodowado su ton sumdomgu Gooti toolluro sumdo tovi sugudo wimo'nyo'moneyokwe puuto tovino a'mgono miyajupogano. Toro kun kuruv aga'no'gwowi puuto su tovi me'no yo'mgonoma'dupudogano. Puuto su tov Krais toolluro wiyo'mwojo'moneyokwe womdo sopiyoka tovino kuudo uubweyodopure tovida'ai Gooti toolluro sumdo tovi sugudo wimo'nodupudogano.
Toro kuvi kuruv nevu Jisasolluro a'mwo abolo tonolno'gwowi aro kuudo me'no youroma'dowadonogano. A'mwo pwol Moosesolluro loowo tovi kuumjuno'ji tovi'aro Gooti toolluro sumdo tovi sugudo ku'nono mwimo'nonekono. Toro kuvi kuruv yiuno Jisas Kraisolluno kuudo kuubweyo'ji su tovi'aro to'gwowi Gooti toolluro sumdo tovi sugudo kuvinono wimo'nonekono. Su toro tovino tov nevu Juu kunol kuruv Krais Jisasolluno kuudo me'no uubweyodowadonogano. Nemoro kuudo uubweyodowado su tov aro tovinokwono. A'mwo pwolnodo kwol kuruv Moosesolluro loowo kuumjuno'ji tovi'aro Gooti toolluro sumdo tovi sugudo ku'nono mwimo'nonekono. Su toro tovino tov ne kunol kuruv Moosesolluro loowo tovi kuumjuna'ji tovi'aro Gooti toolluro sumdo tovi sugudo mwimo'nanonogano. Toro kunol kuruv yiuno Krais toolluno kuudo kuubweya'ji tovi'aro to'no Gooti toolluro sumdo tovi sugudo wimo'nanonogano.
Toro kuvi kuruv a'mwo pwol Gooti toolluro Kuullo toollu kuumjungovlawo'ji toolluro sulo ki'nono tono'gwowi arogano. A'mwo abolo tonyuno kalo buuropino winyo'mo pasudo tokwe'aro poowokalago kuunodo tovida'ai ilaiyo yo'mo pasudo tokwe'aro sumwoluko kavo wosunyo'mo pasudo tokwe'aro jul'nyo bwi'mo'mdowo'jure kuga kuruv muugollu'meyo'mo pasudo tokwe'aro a'mwo abolo tonyuno ilaiyo mollo'mo pasudo tokwe'aro yanyago wimo'nyo'mo pasudo tokwe'aro sugupasudo tovi gudupolallo'mo pasudo tokwe'aro
Gooti toolluro nemi su toro amonekumwalloka tov aro tovino wuuduuwallo'mokwono. Krais Jisasolluro nemi ilaiyo yanekullugollo'moneyokwe womdo sopiyoka su tovi'aro Gooti tool gamoro yasuwa'wino sugumaluko tollovo nonekubweyodowodekono. Su toro tollovo maluko'nyonmaiyo. Bwotonyo kuunodollovogano. Aki toro tollovo nemi yiuno ilaiyo to'no yanekullugolodupudogano. Su toro tollovaino yiuwi'nokai lukomgu kuga kuruv kuuno wuuduuwollumovlaiyo'moneyokweyogano.
Aki Krais toollu yiuno'no uuguro'mwonyo'moneyokwe to'nodonyugono. Toro te nuvnokwe toonyu Moosesolluro loowo tovi'aro Gooti toolluro sumdo tovi sugudo wimo'nodumdonyumaiyo. Toro kuvi kuruv nuu Krais toollu kuudo kuubweyo tovi'aro Gooti toolluro sumdo tovi sugudo wimo'nodumdonyugono. Kuudo neya jaullulo. Yiuno Krais toolluno kuudo uubweyodowa'jure tovida'ai to'no nevu Gooti toolluro sumdo tovi sugudo wimo'nodowadonogano.
Aki Gooti su tool yiuwi'nokai kwako akavi mwalodupudo togai'aro sulugumdo tovi mwalodupudo togai'aro yiuwi'nokai su tonyu gami wobo toru aki aiko te momgurowoso'mo winyokwekono. Toro tool gami Kwolaiyo toolluro mujako tov i'noguropte tovi abwoloka su tovi'aro sumwoluko noullo me'no wosunodowodekono. Gooti tool su toro tomgu'aro yiuwi'nokai tonyu gami wobo toru aki aiko te kuvinono momgurowosokwekono.
Aki Krais tool gamoro sumwoluko kavo wosunyo'moneyokwe tov me'no ikullabodowodekono. Toro te sumwoluko kavo wosunyo'moneyokwe su tov kemoro poowokalago tonyu mido neya mollekumwalmwalonokwono. Aki Gooti tool kemi me'no adekumarokaikono. Su toro adekumaroka tov aro tovino'mokwono. Kevu kulako puru'monodo to'busuko imo'nodupudo togaikul sumwoluko kavo wosunyo'moneyokwe adekumarokaikono. Aki yiuwi'nokai toga Gooti toollu, “Nenoloo,” neya duudumovlavogaulo.
Oo kemino tov aro anekullunadopiyo. Gooti sumwoluko kavo wosunyo'moneyokwe tool kemi womdo nekullumwalonekono. Toro ikullodowo'jure tovida'ai kemoro yiuwi'nokai somjomwekovlapi tomgu'aro Gooti gavnokwe toolluro kuunodo nokwo wimo'numwalpinogaikikono. Toro wimo'nugovlavopi nemi Aguto Jisas Kraisol abwo'ji toga kevu a'mwo abolo kaiya'nodomaiyokwe to'no neya imo'nupinogaikikono. Su toro kuvinono ikullumo'nyo'moneyokwe Gooti tool pi'mwono nomollekumwalonekono. Kemoro poowokalago togai'aro kuudo togai'aro kulako togai'aro tonyu nokwo mollekumwalmwalonekono. Su toro tovino anekullunadopiyo.
Gooti su tool sumwoluko kavo wosunyo'moneyokwekono. Toro tool nemi Aguto Jisasollu aiyo aiko te me'no amodukavokaikono. Jisasol nemi nekullo'mwojo'moneyokwe gamoro mujako tov me'no abwoloka tovino tov sipsip moduvomwallokwe aguto toolbusuko anekullumo'nokaikono. Aki gamoro mujako abwoloka su tovi'aro subuu'yamju muuduko tov me'no sumo'nokakwono. Subuu'yamju su tov aiyo yiunokuudo mujo'movlaiyo'moneyokweyokwono.
ကြော်ငြာတွေ