Room 4:9 - Gooti Toolluro Yogalokwono

⁹ Toro te Devitol a'mwo pworaino, “Oo ilaiyo bwotonyo ibwosunodupudorogano,” ajakwolloka su tov Juu lakulkulako do'nodupudo tooraino ajakwollokaldukono? Awiyo, yiuno Juu tooraino to'no ajakwollokalmaiyo. A'mwo Juu tooravuro miyawosunodupudo tooro lakulkulako mado'nodupudorogano. Toro kworo kuruv Gooti toolluno kuudo uubweyodopudorogano. Toro uubweyodopure toorai Gooti tool gamoro sumdo tovi sugudo wimo'nyo'moneyokwe ilaiyo molloma'dowodorogano. Kevu kuudo neya jaullulo. Gooti toolluro yogalo puruv Eburaiyamolluno aro sakwollungikokwono. “Aiyoga Eburaiyamol Gooti toolluno kuudo uubweyoduke toolluno tov Gooti tool, “Sugudekugono,” wuudo'no ilaiyo amollomarokaikono.”

Room 4:9 ပူးပေါင်းရင်းမြစ်များ

Muuduko 15:6

Toro te Eburamol Gooti Yawelluro kuudoka tovi wuu'no'no, nebalo'mdeyo, kuudo kuubweyokaikono. Toro uubweyoduke toolluno Gooti Yawel adokaikono. “Sugudekono.” Toro juno sumaiyokwe gavnokwe toolluro sumdo tovi sugudo kwimo'nokaikono.

Luuk 2:32

Toro tool a'mwo abolo Juu tooravuro miyawosunodupudo tonyu bako wimo'nonekono. Bako wimo'nodowo'jure su tovi'aro gumino kuudo yourogumapinogano. Aki toro toollu'aro gumoro a'mwo abolo Isuraiyolda'ai ton yovo aguto noma'mwalpinogano.” Toro sulomodomoropiyokaikono.

Room 4:10

Eburaiyamollu su toro kwimo'noka tov gami lakulkulako tov me'no do'noduke toga kwimo'nokaldukono oo yere mado'noduke toga kwimo'nokaldukono? Eburaiyamol gami lakulkulako tov yere mado'noduke kuga kuruv yiuno Gooti toolluro yogalo tovi kuudo kuubweyoka su toollu, “Sugudekugono,” wuudo'no ilaiyo amollomarokaikono.

Room 4:3

Gooti toolluro yogalo puruv aro ajakwollungikokwono. “Eburaiyamol Gooti toolluro yogalo wuudoduke tovino kuudo kuubweyokaikono. Toro kuubweyoka toolluno tov Gooti tool ilaiyo mollomaro'no gamoro sumdo tovi sugudo kwimo'nokaikono.” Gooti toolluro yogalo puruv su toro sakwollungikokwono.

Galesiya 3:14

Krais toolluro abiyonekumoraboka su tov aro tovino'mokwono. Aiyoga Gooti tool Eburaiyamollu sugudo uubweyo'moneyokwe subuu'yamju me'no aduuwiyokaikono. Toro aduuwiyoka su tov a'mwo abolo Juu miyawosunodupudo kunyuda'aiyo'mokwono. Gooti tool Krais Jisasolluro womdo sopiyoka tovi'aro gamoro sugudo su tov kuvinono uubweyodowodekono. Aki nevu Gooti toolluro Kuullo toollu mallo'moneyokwe tovino Gooti tool subuu'yamju me'no ajajukekono. Toro te subuu'yamju su tovi nevu yiuno Krais Jisasolluno kuudo uubweyodowado tomgu'aro to'no Kuullo su toollu kuvinono ma'dowadonogano.

Efesos 3:8

Nuu yiuwi'nokai Gooti toolluro a'mwo abolo tonyu kwako tomuu'aro iwapiyodumdekwonyugono. Toro kwekwonyu kuruv Gooti tool mi ilaiyo yanyugollo'moneyokwe gamoro kuuguudo sugudo tokwe a'mwo abolo Juu tooravuro miyawosunodupudo tonyu moruudomollo'moneyokwe womdo tov anyabokaikono. Toro te kevu Juu toonolluro miyaikuuwosunodowado togaikul yasuwa'wino sugumaluko su tollovo neya mapino'moneyokwe aro modekumollodumdonyugono. Kevu Krais toollu kuuguro'mwonyupi tovi'aro gamoro yasuwa'wino sugumaluko tollovo nekubweyonekono. Sugumaluko su tollovo maiyo'nopiyodupudogano.

Kooloosi 3:11

Toro tovino tov nemida'ai pwol Grikoldeyo oo Juuwoldeyo oo Juu tooravuro miyawosunodupudoldeyo oo lakulkulako do'nodowodoldeyo oo lakulkulako mado'nodowodoldeyo oo gabovo yogaljo dodowodoldeyo oo pumuuda'aiyoldeyo oo ki'nato womdo yodowodoldeyo oo ki'nato tovida'ai me'no birolo'nugolokwodowodoldeyo yiuwi'nokai go'no go'nodo su ton aguto'maiyo. Toro kuvi kuruv aguto to'gwowi yiuno Krais tookono. Krais su tool gamoro yiuwi'nokai a'mwo abolo tonollu me'no kuulonekumwalodowodekono.