Room 4:11 - Gooti Toolluro Yogalokwono11 Toro te lukomgu Gooti tool Eburaiyamollu kuudokaikono. “Ilaiyo me'no amolloguma'mo tovino duuwallo'moneyokwe gumi lakulkulako tov neya dodo'nono.” Kuudokaikono. Toro te agasuro a'mwo pworo kemi lakulkulako ton mado'nodupudo kworo kuruv yiuno Gooti toolluno kuudo kuubwepi toorai Gooti tool gamoro sumdo tovi sugudo wimo'nyo'moneyokwe ilaiyo mollomaronekono. Aki toro toorai Eburaiyamol kemi kuunumiyago kuunodo toolbusuko wimo'nonekono. အခန်းကိုကြည့်ပါ။ |
Room 4:11
46 ပူးပေါင်းရင်းမြစ်များ
Aki kemoro ago aulomwalpi tonyuro anoullo tovida'ai mujako aluviyourosupi su ton mi nyuduuwallo'mokwono. Toro te nuu Ijupda'ai tonyu toro romiyoso'mi kwonyu kuruv mujako aluviyourosupi su tonyu kwonmi toga kemino'gwowi muunyu toru'aro irukuwolovo'mi tabunyuwuulo su tov kemi kaiyako miyaikullugolonokwono.
Toro te aro ikudumo'mokwono. A'mwo abolo pun kuujo tool sulopiyamoka tomuuda'ai togai'aro kuujo tool kwolmoka tomuuda'ai togai'aro yiuwi'nokai tomuuda'ai bwotonyago su ton muunyu kai'muuda'ai aguto kig toolluro mido mollomwalo toru nyullu'bwo'nupinogano. Toro i'bwo'nopi Eburaiyameke'aro Aisakeke'aro Jekoopeke'aro toorogai nyu'bwo'nonomwalpinogano.
Toro te a'mwo pwol Gooti toolluro Kwolaiyo su toolluno kuudo kuubweyo'ji tov aiyo yiunokuudo mujomwekovla'mwalonekono. Toro kuvi kuruv a'mwo pwol Kwolaiyo su toolluro yogalo tovi kisuvolo so'ji toolno'gwowi aiyo yiunokuudo mujomwekovlaiyo'moneyokwe tov mamaronekono. Yiuno Gooti toolluro suroulo to'no maronekono.”
Aki Nyunumiyago toolluro ilaiyo winodowodo tov aro tovinokwono. Yiuwi'nokai a'mwo abolo pwolno puru'monodo ton gamoro Kwolaiyo toonyu nuwonopi kuudo anubwepi tov aiyo yiunokuudo mujomwekovlaiyo'moneyokwe tov nomapinogano. Aki toro tonyu aiyowo'mo toga nuvu aiyo aiko te nomoduka'monyugono.” Kuudokaikono.
Toro kuudoka tovi aro kuudoporogano. “Guu su toro anekudumodo kuvi kuruv nevu Eburaiyamolluro jukweyago kwoloraiyonogano. Toro toonol iruko pullugwonodo kullugwoji kuruv a'mwo abolo punyuro ki'nato womdo ku'nono mwiyokwenogano. Toro tovino tov nemi bomollurolovonekumokalokwiyo'moneyokwe gumoro yogalo anekudumodo su tov supto mimwakuuwono.” Kuudoporogano.
Nevu kuudo nyau'mwakuuwono. Krais tool nemi nekullo'mwojo'moneyokwe womdo tov me'no sopiyokaikono. Su toro sopiyoka toga loowo tovuro womdo tov abimwogapiyokakwono. Toro tovino tov aga'no'gwowi a'mwo abolo yiuno Krais toolluno kuudo kuubwepi ton Gooti toolluro sumdo tovi sugudo nokwo wimo'nupinogano.
Toro sakwolloka kuvi kuruv Krais toolluno kuudo uubweyopi Gooti toolluro sumdo tovi sugudo wimo'nyo'moneyokwe tovino'gwowi Gooti toolluro yogalo puruv aro sakwollungikokwono. “Kevu aro kuudo nyau'mwalpiyo. Oo nevu Gooti toolluro ago tomuuno ilowa'ji Krais toollu amokwolabwa'ji tov nemi nokwo nonekullo'mwojonekono. Krais tool me'no kwolaboka toolluno tov kevu su toro kuudo nyau'mwalpiyo.
Toro tovino tov a'mwo tooro kemi lakulkulako ton ado'nupiyorodeyo oo mado'nupiyorodeyo kworo kuruv yiuno Jisasolluno kuudo kuubwepi toorono'gwowi Gooti toolluro sumdo tovi sugudo nokwo wimo'nupinorogano. Gooti pwolnodo tool su toro toorai puuto judo'no judo'nodo tomgu'aro mamolloma'dowodekono. Toro kwol kuruv yiuno aval'nodo tomgu'aro mollomarowo'ji gamoro sumdo tovi sugudo wimo'nodopudorogano.
Eburaiyamollu su toro kwimo'noka tov gami lakulkulako tov me'no do'noduke toga kwimo'nokaldukono oo yere mado'noduke toga kwimo'nokaldukono? Eburaiyamol gami lakulkulako tov yere mado'noduke kuga kuruv yiuno Gooti toolluro yogalo tovi kuudo kuubweyoka su toollu, “Sugudekugono,” wuudo'no ilaiyo amollomarokaikono.
Toro tovino tov nevu aro kuudo neya yaurogawano. A'mwo abolo Juu tonolluro miyawosunodowado su ton sumdomgu Gooti toolluro sumdo tovi sugudo wimo'nyo'moneyokwe puuto tovino a'mgono miyajupogano. Toro kun kuruv aga'no'gwowi puuto su tovi me'no yo'mgonoma'dupudogano. Puuto su tov Krais toolluro wiyo'mwojo'moneyokwe womdo sopiyoka tovino kuudo uubweyodopure tovida'ai Gooti toolluro sumdo tovi sugudo wimo'nodupudogano.
Su toro tovino Gooti toolluro yogalo puruv aro sakwollungikokwono. “Kevu duu'nyulo. Nuu Isuraiyolda'ai a'mwo abolo tonyomno moro a'mwo pwol nomoropiyamekono. Amoropiyami su tool muumuudo Saiyoon toollu muunyu toru molludapimekono. Toro tool sulo pwolbusuko da'mdowo'jure toollu a'mwo abolo pun kuudo muubwepi tov sulo pwollubusuko bomunyukuuromaropi wolapinogano. Toro kuvi kuruv a'mwo abolo pun moro amoropiyami su toolluno kuudo kuubwepi tonyuno'gwowi a'mwo pworo wogulo ku'nono maduuwo'galpinorogano.” Gooti toolluro yogalo puruv su toro sakwollungikokwono.
Gooti tool moro avalo Isuraiyolda'ai tonyu subuu'yamju ton kwiyajukekono. Toro kuvi kuruv Isuraiyolda'ai bwotonyago su ton Gooti toolluro subuu'yamju tonyuno kavlo tov kuudo miyouromallajupogano. Toro tovino tov Gooti toolluro kwoloraiyo kuunodo mwimo'nyajupogano. Su toro tovino kevu aro kuudo nyaupiyo. Oo Gooti toolluro subuu'yamju tov me'no bwolo'dawodokwono. Kuudo nyaupiyo. Awiyo, Isuraiyolda'ai tonyuno Gooti toolluro subuu'yamju kwiyajuko su ton kuvinono bai'mo'mdupudogano. Kevu kuudo neya jaullulo. Yiuwi'nokai Isuraiyol iko tovasuda'ai yowosungobodupudo ton Gooti toolluro kwoloraiyo ku'nono mwimo'nodupudogano.
Aki Gooti tool gavnokweyolluro duuwallo tov nemi aro nekubweyodowodekono. Gamoro Kuullo tool nemoro poowokalago tonyu kuulonekumwalodowodekono. Toro te nevu Kuullo su toollu sumdomgu me'no ma'dowadonogano. Sumdomgu kwolda'ai ma'dowado su tov aro tovino nekuduuwallo'mokwono. Lukomgu nevu Gooti toolluro yiuwi'nokai nonekullabiyo'mo subuu'yamju yodowodo su to kunyu kuruv kuvinono nomaranonogano. Su toro tovino nekuduuwallo'mokwono.
Toro kuvi kuruv Gooti toolluro yogalo tov aro anekudadopiyo. “Yiuwi'nokai a'mwo abolo tonyu ma'no ma'no pasudo tov aiyowomno kirogabolmwallodowodokwono.” Anekudadopiyo. Toro te yiuwi'nokai a'mwo abolo ton ma'no ma'no pasudo tovuro wuulo killo'mo ago tovibusuko kuule'na'dupudogano. Su toro kuule'na'dopure tonyu Gooti tool wonyapino yodowodo tovino kavlo tov arokwono. Gooti tool a'mwo abolo Jisas Kraisolluno kuudo kuubwepi tonyu gamoro subuu'yamju tov kuvinono wiyo'moneyokwe tovinokwono.
Aki kevu Krais toolluro a'mwo abolo kuunodo wimo'nodupudo togaikul Eburaiyamolluro jukweyago kwoloraiyo kuunodo togaikulbusuko imo'nodupudogaikikono. Toro togaikul Gooti toolluro noonyumwonyu Eburaiyamollu subuu'yamju kwiyoka su tollovo kevuge'aro Eburaiyameke'aro yiuwi'nokai togaikul aval'no nomapinogaikikono.
Toro kuvi kuruv nevno'gwowi Gooti toolluro Kuullo tool jurogudo danekullumwojodowo'jure tokwe yomjomwekovla'mdowadonogano. Toro te nevu Krais toollu kuudo uubweyodowado tonol lukomgu Gooti toolluro aro anekudoneyokwe tovino sogwollo to'no kinyokwenogano. “Oo kevu moro a'mwo abolo sugudogaikikono.” Su toro anekudoneyokwe tovino sogwollo to'no kinyokwenogano.
Toro te yiuwi'nokai a'mwo abolo kuuguudo akavi kuumjunpi tonyu Gooti toolluro sumwoluko kavo wosunyo'mo tokwe'aro gamoro kalo mamwonyodowodo tokwe'aro toval nuubwemwalonekono. Aki a'mwo abolo su ton aiyogasuro Gooti toolluro a'mwo abolo kuunodo Isuraiyol tonbusuko imo'nodupudogano. Toro imo'nodopure kunyu kuruv aval'no nuubwemwalonekono.
Aki kevu a'mwo abolo Juu toonolluro miyaikuuwosunodowado kugaikul kuruv nebaikuuguudo tovi me'no wuu'nodupudogaikikono. Toro togaikulluno tov Gooti toolluro a'mwo abolo kuunodo me'no wimo'nodupudogaikikono. Nebaikuuguudo su tov Gooti tool kemi ma'no ma'nodo tovuro kirumwallo tovida'ai bomollurolovekumokalokwiyo'moneyokwe kuuguudo sugudo tokwono. Aki aiyoga Gooti tool gamoro Kuullo toollu ikullabiyo'moneyokwe subuu'yamju me'no sajukekono. Toro te kevu Krais toolluno kuudo kuubweyopo toga Gooti tool gamoro subuu'yamju tovi kuvinono uumjuno'no Kuullo tool aikullabokaikono. Toro aikullaboka su tov gamoro a'mwo abolo kuunodo wimo'nyo'moneyokwe ajaikubweyokagaikikono.
Aki neya duu'nyulo. Gooti toolluro Kuullo aikullaboka tool aro tovino jaikubweyo'moneyokweyokwono. Lukomgu Gooti tool kemi ikumokailawo'ji ilaiyo to'no nyulomwalpinogaikikono. Su toro tovino jaikubweyo'moneyokwe Kuullo su tool aikullabokaikono. Toro tovino tov Gooti toolluro Kuullo su toollu kisuvolo wiyopi jul'nyo nuubwemwalpiyo.
Aki Krais toollu yiuno'no uuguro'mwonyo'moneyokwe to'nodonyugono. Toro te nuvnokwe toonyu Moosesolluro loowo tovi'aro Gooti toolluro sumdo tovi sugudo wimo'nodumdonyumaiyo. Toro kuvi kuruv nuu Krais toollu kuudo kuubweyo tovi'aro Gooti toolluro sumdo tovi sugudo wimo'nodumdonyugono. Kuudo neya jaullulo. Yiuno Krais toolluno kuudo uubweyodowa'jure tovida'ai to'no nevu Gooti toolluro sumdo tovi sugudo wimo'nodowadonogano.
Aki aiyoga Noowal Gooti toolluno kuudo kuubweyajukekono. Noowal Gooti toolluro lukomgu nyumo'nupino tonyuno duudapi yogalo wiyoduke tonyu kaduko kwiyokaikono. Toro wino sumaiyokwe Gooti toollu dolago tomuu amwallajukekono. Toro tool gami julkwolaiyo togai'aro tonumdotai buuru'allako tovida'ai kaiyako nomapiyokwe sip pwollu amodokaikono. Noowalluro su toro soka tovino tov yiuwi'nokai kwako akavida'ai a'mwo abolo Gooti toollu kuudo muubweyodupudo tobuurai kuu'maiyo aro kuuduuwallokaikono. Kevu kemi kirumwallo tov nomapinogaikikono. Aki yiuwi'nokai a'mwo abolo Gooti toollu kuudo kuubwepi tono'gwowi gamoro sumdo tovi sugudo wimo'nupinogano. Su toro to'busuko kubalno Noowal kwol kuruv Gooti toollu kuudo kuubweyoka tovi'aro Gooti toolluro sumdo tovi sugudo kwimo'nokaikono.
Mino yovo tov Saimoon Pitalonyugono. Toro toonyu Jisas Kraisolluro ki'nato womdo tov yodumdonyugono. Aki gamoro kuurotokwe wimo'nodumdonyugono. Kevu nemoro kuudo uubweyodowado su tollugwoji aval'no uubweyodupudo togaikullu nuu pas akav sokwollekwopiyamono. Nemoro kuudo uubweyodowado su tov nemi Jisas Kraisolluro pasudo idopto'nodo tovi'aro ma'dowadokwono. Jisas Kraisol nemi Gootekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono.
Gooti tool tomabore'bore su toorai aro aduumjukurokaikono. “Kevu kwako akavi bila'dupudo gwo'gwoptodeyo oo mekwakodeyo oo ikorodeyo tonyu kaiyako mamollounapipinorekikono. Toro kuvi kuruv a'mwo abolo Gooti toolluro nojeso'moneyokwe tov kemoro yomo tovi nonaguto tonyuno'gwowi kaiyako nokwo igolpinorekikono.
ကြော်ငြာတွေ