Kevu ilaiyo yopi aki kemoro sumwoluko kun kuruv ilaiyo to'no nokwo imwalpinogaikikono. Su tov aro tovinokwono. Kevu Gooti toolluro ago toru sulomwalpi toga kemi yiuwi'nokai mubiyo bwotonyo ton nomapinogaikikono. Kevu kuudo neya jaullulo. A'mwo kemi kaiyako yaikullugolodupudo su tooro sumdomguda'ai kemi proofet kworai kuruv kaiyako aval'nodo tomgu'aro sugollajuporogano.”
Room 12:12 - Gooti Toolluro Yogalokwono12 Toro momjumovlavopi lukomgu Gooti tooke yiunokuudo mujomwekovlaiyo'moneyokwe tovino kuudo yauropi ilaiyo subwosunpi tov buro'nyo buro'nyo tagunyodeyo baiki'mo'mdowo'jure toga guureji neya dodavogaulo. Aki toro togaikul Gooti toollu subusu'nyogalo wuujo'mo tovino kuudo nyallulo'gwonmwalpiyo. Toro kugaikul kuruv yiuwi'nokai toga neya duudumovlavogaulo. အခန်းကိုကြည့်ပါ။ |
Room 12:12
71 ပူးပေါင်းရင်းမြစ်များ
Toro kuvi kuruv kuullo ma'no ma'nodo tooro kemoro yogalo tovi kuumjunmwakopo tovino tov kemi poowokalago togai ilaiyo nyubwosunmwalpiyo. Toro kworekullu kuruv Gooti tool kemino yovo ton gamoro ago muunyu kai'muu me'no yokwollaikubweyodowodo su tovino'gwowi kemi poowokalago togai ilaiyo nokwo ibwosunmwalpinorekikono.”
Aki wit sulo pun kwako ilaiyo tovi abwolorapo su ton a'mwo abolo punyuno'busukogano. A'mwo abolo su ton Gooti toolluro yogalo tovi wuu'nodupudo toga kemoro poowokalago kuunodo tousogai gudupola'dupudogano. Toro ton puluko tov kwako tovi anakuuto tomuu kuulolukumowopiyodowodo to'busuko kubalno Gooti toolluro yogalo tov kemoro poowokalago tovi anakuuto tomuu kuulolukumowopiyodowodokwono. Toro te a'mwo abolo su ton jurogudo imo'nugovlavopi sulo bwotonyago ki'nodupudogano.”
Toro guro'mwonyuno sumaveyokwe a'mwo kuurotokwe tooravuro yodubwasodopure tovi wuu'nodupu kuumjunyajupogano. Toro ton ibwoto'nyo'mo i'bwo'nodupu wosamujuko pun anomwekovlaiyajupogano. Wosamujuko su tov Aguto toolluno aki aiko te kuudo yaullo'moneyokwe anomwekovlaiyajupogano. Aki toro ton Gooti toolluno subusu'nyogalo kuujajupogano.
Toro te kemi Gooti toolluro Kuullo tool jurogudo ikubweyodowo'jure tokwe kevu Gooti toolluro subuu'yamju su ton adoga kuvinono imo'nupinodukoneyokwe tovino sogwollo kingovla'mwalpinogaikikono. Aki Gooti tool kuvinono ikullo'mwojono su toolluno kuudo to'no duubweyogaulo. Gooti su tool kemi poowokalago togai ilaiyo yo'mo tokwe'aro sumwoluko ton kavo wosunyo'mo tokwe'aro ton kemi nokwo aikubweyono. Gooti tool tono tono ikubwemovla'mwalono tovino nuu ilaiyo anyunadopiyo.
Toro te kevu kuudo neya jaullulo. Gooti toolluro yogalo ton nemiyo'moneyokwe aiyoga me'no sokwollanekubweyajupogano. Yogalo su ton nemi yonekubwaso'moneyokweyogano. Aki nevu yogalo su togai jurogudo mollodavowa'ji nemi poowokalago tonyu nokwo duuwimwoju'numwalanonogano. Toro duuwimwoju'nowa'ji Gooti tooke ilomwallo'moneyokwe tovino sogwollo to'no kingovla'mwalanonogano. Gooti toolluro yogalo ton su toro tovino'mo sokwollanekubweyajupogano.
Toro te a'mwo abolo pun Gooti toolluro bako bwotonyo tovi anakuuto tomuu kuulomwallo'moneyokwe puuto tovi a'mgono yodupudogano. Aki Gooti tool muunyu toru'aro yomollonekumwallowo'ji yiunokuudo nobola'jokwe tovino winodupudogano. Su toro winodupudo ton sugupasudo yomjumovla'mdupu mimwogapiyodupudogano. Toro tonyu Gooti tool aiyo yiunokuudo mujomwekovlaiyo'moneyokwe tov kuvinono nuubweyonekono.
Toro te aga nevu pasudo puruvapuruv tonyu neya momjumovla'mwalanonogano. Pasudo puruvapuruv su ton arogano. Gooti toolluno kuudo uubweyo'moneyokwe tokwe'aro lukomgu Gooti toolluro ago toru nekumokailawono tovino sogwollo kingovlaiyo'moneyokwe tokwe'aro aki nevu a'mwo abolo punyuno kalo buuropino winyo'moneyokwe tokwe'aro pasudo puruvapuruv su ton yiuwi'nokai toga neya momjumovla'mwalanonogano. Toro kuvi kuruv pasudo puruvapuruv su tonyuro puruv yiuwi'nokai puruvallu uuwolo'mdowodokwono. Su tov a'mwo abolo tonyuno kalo buuropino winyo'moneyokwe pasudo tokwono.
Miyobuuravoo, nuu yogalo aiyowo'mo pun ikudumo'mokwono. Kevu Aguto toollu me'no uuguro'mwonyodupudo togaikulluno tov ilaiyo to'no neya jogaulo. Nuu yogalo aval'nodo akan kemi aki aiko te yokwollekwopiyabiyo'mo tovino burawo manyunyokwenyugono. Aki yogalo su ton sokwollekwopiyami tov kemi yellukuromollekumwallo'moneyokweyogano.
Aki Gooti tool gamoro yiuwi'nokai jurogudo tokwe kemi adaikullumwojoneyokwe subusu'nyogalo wuudodowolonakono. Jurogudo su tov gamoro bako bwotonyo tovida'ai daikullumwojomwalonekono. Toro te kevu gamoro jurogudo su tovi neya gudupola'mwalpinogaikikono. Toro gudupola'dopure togaikullu tagunyo pun abaiki'mopi toga kevu kavo to'no mollukwovopi kemi poowokalago togai ilaiyo nokwo ibwosunmwalpinogaikikono.
Gooti tool gami yiuwi'nokai a'mwo abolo su ton aro tovino kuudo youromapino'moneyokwe kwinyajukekono. Krais toolluro noonyumwonyu sugumaluko nonekullabwono tollovogai'aro aki Krais tooke ilomwallo'mo tokwe'aro su ton kevu a'mwo abolo Juu miyawosunodupudo kugaikul kuruv kuvinono nyulomapinogaikikono. Gooti tool gamoro a'mwo abolo togaikulluno su toro kwinyajukekono. Toro toolluro kuuguudo yiulo apuu'nallajuko tov arokwono. Krais tool gamoro a'mwo abolo togaikullu kuulekumwalonekono. Toro te aga kemi kuvinono kuulekumwalodowodo tovino tov lukomgu kevu Krais tooke gamoro bako bwotonyo pwopiyodowodo tovi anakuuto tomuu gavuge nyulomwalpinogaikikono. Su toro tovino sogwollo to'no kingovla'mdupudogaikikono.
Aki kemida'ai a'mwo pwolluno yovo tov Epafrosolekono. A'mwo su tool nuuge akawai mwalodowo Krais Jisasolluro ki'nato womdo wiyodowodekono. Toro tool kemi, “Ilaiyokwono,” adekwopiyamaiyo. Aki a'mwo su tool kemiyo'mo Gooti toollu subusu'nyogalo guurejuno aro wuudodowodekono. “Kooloosida'ai Jisasolluro a'mwo abolo ton a'mwono tonbusuko jurogudo neya imo'nopi kevnokwe ton kuudo neya yaurogapuro. Oo nevu yiuwi'nokai Gooti toolluro ilaiyo winodowo'jure tonyu yiuno ilaiyo to'no duumjunmwakuuwono. Kuudo yaurogapuro.” Gooti tool kemi jurogudo adaikullumwojoneyokwe tovino'mo a'mwo su tool subusu'nyogalo wuudodowodekono.
Nemi Nellunumiyago Gooti toollu aro tonyuno wuudodowadonogano. Kevu kuudo me'no kuubweyopo togaikulluro womdo mujumovla'mdopure tovino wuudodowadonogano. Aki kemoro kalo buuropino ikullunoduke tovida'ai womdo mollodupudo tovino wuudodowadonogano. Aki nemi Aguto Jisas Kraisolluro aikomgu wolabwono tovino sogwollo kinomwallo'moneyokwe tov muugollu'mo'mdupudogaikikono. Su toro tonyuno Gooti toollu, “Nenoloo,” wuudodowadonogano.
Toro kuvi kuruv nevno'gwowi iruko togasuro tonolluno tov kuudo ilaiyo to'no yovo'dogallourowa'ji nevnokwe tonol neya amollomwalnogawano. Toro te nevu Krais toolluno kuudo uubweyodowado tokwe'aro a'mwo abolo punyuno kalo buuropino nekullunodowodo tokwe'aro su toval neya amollosano. Pasudo su toval a'mwo mollurogudo tooravuro kupolmdo toruda'ai youro jurogudo mollosodupudo to'busuko neya nekullumo'numwalbullunovakono. Aki nemi ma'no ma'nodo tovuro kirumwallo tovida'ai Gooti tool nobomollurolovonekumokalokwono tovino sogwollo to'no neya kinmwalanonogano. Pasudo su tov a'mwo mollurogudo tooravuro miguto jurogudo yesodupudo to'busuko neya nekullumo'numwalonokwono.
Kemoro su toro yomjomwekovla'mdupudo tonyuno nevu ilaiyo yodowa yiuwi'nokai Gooti toolluro mollu'bwoto go'no go'nodo tonyu kemino aro ilomodomoropiyodowadonogano. “Oo a'mwo kuudo muubweyodupudo pworo Tesaloonaikada'ai Jisasolluro mollu'bwoto tobuurai kaiyako igolodopure tovida'ai tagunyo ton mo'movla'mdupudobuurogano. Toro kun kuruv kemoro Krais toolluno kuudo uubweyodupudo tovino'gwowi guureji to'no gudupola'dupudogano.” Kemino su toro dodowadonogano.
Aga kemino tov aro anekullunadopiyo. Aguto toolluro mollubworekumokavla'mdowo'jure tovi kevu kemi poowokalago togai neya duumjunogaulo. Kevu su toro kuumjunpi togaikul Gooti toolluro kalo buuropino winodowodo to'busuko kubalno kev kugaikul kuruv aval'no neya duuwinogaulo. Aki Krais toolluro guureji da'mdowodo to'busuko kubalno kev kugaikul kuruv noonyumwonyu tagunyo abekumaro'ji toga guureji aval'no neya dodavogaulo.
Toro kuvi kuruv Timootiyoloo guvno'gwowi Gooti toolluro a'mwo pwekugono. Toro tookujuno tov yiuwi'nokai ma'no ma'no pasudo su tooraida'ai manyu tomuuno lukado neya dovlavogawono. Aki sugupasudo togai'aro Gooti toolluro ilaiyo winodowodo togai'aro tonyu neya duumjunogawono. Aki Gooti toolluno kuudo uubwemovlavo'bi a'mwo abolo punyuno kalo buuropino neya domollogawono. Aki jul'nyo bagi'mo'mdopure kuga kuruv womdo tovi mimwogapiyo'bi guureji neya domomjumovlavogawono. Aki yiuwi'nokai a'mwo abolo tonyu kavo neya duubemwojogawono.
Toro kuvi kuruv guu tookuno'gwowi numi pi'mwono numjunodumdekugono. Moro gumi yodogubwasodumdo tokwe'aro moro yomjomwekovla'mdumdo tokwe'aro moro yomjomwekovla'mdumdo tovuro kavlo tokwe'aro moro Krais toolluno kuudo uubweyodumdo tokwe'aro moro kalo mamwonyo'moneyokwe pasudo tokwe'aro moro kalo buuropino mollodumdo tokwe'aro aki jul'nyo banyumo'mdopure kuga kuruv womdo tovi mimwogapiyodumdo tokwe'aro su tonyuno guu kuudo nyau'mwakuno.
Su toro yomjomwekovlavowa'ji lukomgu Jisas Kraisol gamoro bako bwotonyo tokwe nobiyalo'nonekono. Krais Jisas su tool nemi aguto Gootekono. Aki nemi ma'no ma'nodo tovuro kirumwallo tovida'ai mollurolovonekumokalokwiyo'moneyokwe tool kwekono. Toro toolluno sogwollo to'no kingovlavowa'ji lukomgu kuvinono abiyanekulo'no'ji toga nemoro poowokalago ton ilaiyo ibwosungoulapinogano.
Aki Gooti tool gamoro yasuwa'wino sugumaluko tov me'no anekubweyokaikono. Toro tovi'aro nevu gamoro sumdo tovi sugudo me'no wimo'nodowadonogano. Aki toro tonol aiyo yiunokuudo mujomwekovlaiyo'moneyokwe tovi, kuvinono nomaranonoldeyo, kuudo yau'dowadonogano. Su toro kuudo yaurowa'ji sogwollo to'no kingovla'mdowadonogano.
Kevu Gooti toolluro bako tovi muudu'no aulomwalopo toga'no aki aiko te kuudo pwekwo jaullulo. Kevu bako tovi muudu'no me'no kuulomwalno sumaveyokwe toga danyu'nyuwuulo pun kemi kaiyako saikullugollajupogaikikono. Toro yaikullugolodopure kuvi kuruv kevno'gwowi jurogudo to'no da'mdopure togaikullu jul'nyo su ton kemi maikuuwoleyajupogano.
Neya duu'nyulo. Buro'nyo buro'nyo jul'nyodeyo pun kemi aikullumo'no'ji toga kevu jurogudo to'no neya dodavogaulo. Su tov aro tovino'mokwono. Kevu Gooti toolluro ilaiyo winodowo'jure tovi kuvinono kuumjunpi toga Gooti toolluro ato tovida'ai noonyumwonyu subuu'yamju daikullodowodo tollovai nokwo mapino tovino'mokwono.
A'mwo abolo bwotonyago Gooti toollu kuudo kuubweyajupo su ton sulu'wo to'busuko nemi aiyowomno mwodovonekuma'dupudogano. Kemoro kuudo kuubweyajupo su tov nemi kuu'maiyo toru'no me'no nekuduuwallodupudo tovino tov nevu resis tovibusuko guureji neya yogawano. Nevu resis tovi yo'mo tonol noonyumwonyu pworo nemi nekumjukuto yodupudo toorogai'aro aki ma'no ma'no pasudo nemi nekumgu'mo'nodupudo toorogai'aro su toorai neya arobwotovodukwopiyogawano. Me'no robwotovodukwopiyowa'ji nevu resis tovi kano kano plaiyo'moneyokwe puuto tov nemi sumdollu toru wo'dowodo su tovi neya ainomjumovlavogawano. Puuto su tov Gooti toolluro anekuduuwalloka su tovi'aro guureji neya uumjungovlavogawano.
Toro te Moosesekwo Gooti toolluro ago to'busuko wimo'nodupudo a'mwo abolo su tonyuro womdokwe kwimo'nyajukekono. Toro kuvi kuruv Krais toolno'gwowi ago amodoka toolluro kwolaiyo kuunodekono. Toro tool Gooti toolluro ago to'busuko wimo'nodupudo a'mwo abolo tonyu pi'mwono to'no guureji mollomwalodowodekono. Neya duu'nyulo. Nevu Krais toolluno guureji neya agudupolarogawano. Aki nevu Krais toolluro nonekullabwono tonyuno sogwollo to'no aingovlavogawano. Nevu su toro sa'ji tov Gooti toolluro ago to'busuko kuvinono wimo'nugovla'mwalanonogano.
Toro te Jisasol kwako akavi somollajuko toga noromiyoso'mo yodopure tool aro kuudo saullajukekono. Yiuno Gooti toolno moro bolnodo tovida'ai nokwo bomollurolovonumokalokwonoldeyo. Toro kuudo yau'dowo Gooti toollu subusu'nyogalo kuudumovlaiyajukekono. Aki Gooti toollu yamuugojo kuudoganyajukekono. Subusu'nyogalo wuujo'mo tool deko bwotonyo togai'aro kumdato togai'aro togai kuudoganyajukekono. Jisasol Gooti su toollu kwako tomuu'aro kwiyajukekono. Toro tovino tov gamoro subusu'nyogalo wuudoduke tovi Gooti su tool kuvinono kuu'nyajukekono.
Aki kevu Gooti toolluro womdo mujumovlaiyo'moneyokwe tovino burawo nyumwalpiyo. Toro kugaikul kuruv aiyogasuro a'mwo abolo pun Gooti toolluro subuu'yamju tonyu kuvinono mallo'moneyokwe kuudo guureji uubweyodupu manyu togada'ai sogwollo aingovlaiyajupo tonbusuko kubalno kevu aval'no neya domjumovlavogaulo.
Mi avalobuuravoo, Aguto tool aikomgu yere mabai'mo'mdowo'jure toga kevu gamoro lukomgu nobai'mowono tovino sogwollo to'no denomwalogaulo. A'mwo wosamuju'womdo kuudosodupudo tooro kwako akavida'ai wosamujuko no tollovo bilapino'moneyokwe tovino sogwollo kinodupudorogano. Toro kuudosodupudo su tooro sumdomguda'ai buuruko tonyuno sogwollo kinodopudorogano. Aki lukomguda'ai buuruko kunyuno kuruv sogwollo kinodupudorogano. Sogwollo me'no kinopi toga no su tollovai kuvinono muloma'dupudorogano. No su tollovai amulomapi tov nuugwiyo bwotonyo biyoma'dupudollovogano.
Kevu Krais toollu me'no uuguro'mwonyodupudo togaikul gamoro tabunyuwuulo amaroka to'busuko kubalno aga tabunyuwuulo pun ama'mwakopogaikikono. Toro ama'mwakopo tovino ilaiyo to'no jubwosunogaulo. Kevu ilaiyo ibwosunmwalpino su tov kavlo aro tovinokwono. Lukomgu Krais tool gamoro bako bwotonyo tokwe kuu'maiyo toru abiyalo'no'ji toga kevu kwollu me'no uuguro'mwonyodupudo togaikul bako su tovi anakuuto tomuu nouloonomollupinogaikikono. Su toro toga kemoro ilaiyo ibwosunpino tov maluko'nyo'maiyo. Ilaiyo bwotonyo nyubwosunpinogaikikono.
Aki kemoro Gooti toolluno kuudo youroma'dupudo su tovi muunyu toru'aro kevnokweyogaikulluro kulako tonyu pi'mwono neya domollomwalnogaulo. Aki pi'mwono mollomwalnodupudo su tovi muunyu toru'aro jul'nyo baiki'mo'dowo'jure toga Gooti toollu guureji neya dogudupolarogaulo. Aki Gooti toollu guureji gudupola'dupudo su tovi muunyu toru'aro kevu Gooti gavnokwe toolluro pasudo tonyuno to'no neya jomjomwekovlavogaulo.
Gooti tool a'mwo pwollu wuulo killo'mo ago tovi kuulomeroso'mo me'no ajeso'ji su toollu wuulo killo'mo ago tovi kuvinono nomerosupinekono. Aki Gooti tool a'mwo pwollu molo'mo kwallu'mopto tovida'ai bolono'moneyokwe ajeso'ji su toollu kwallu'mopto tovida'ai kuvinono nobolonekono. Toro tovino tov Gooti gavnokwe toolluro a'mwo abolo ton buro'nyo buro'nyo kaiya'nodo tov abwi'mowo'ji toga jurogudo neya da'mwalpinogano. Toro davopi kemi Gooti toolluno kuudo uubweyodupudo tovi guureji neya gudupola'mwalpinogano.
ကြော်ငြာတွေ