Su toro toga Jisasol subusu'nyogalo aro kuudokaikono. “Mi Nyunumiyagoloo, guu muunyu kai'muuda'ai togai'aro kwako akavida'ai togai'aro tonyu Agutekugono. Toro tookuji, “Nenyoo,” agudumono. Su tov aro tovinokwono. A'mwo kwako akavida'ai pi'mwo kuudokwe tooravuro sumdo tovi yiulo kupuurubweyodumdekugono. Toro kuvi kuruv gumoro sumdo tovi kwoloraiyo tobuurobusuko gujumo'nodupudo tonyuno'gwowi yiuwi'nokai su tonyuno kavlo tov kuu'maiyo toru'no bomollolupto'nubweyodumdekugono.
Room 1:14 - Gooti Toolluro Yogalokwono14 Toro te a'mwo abolo kuuguudo sugudo nonagutokwe tobuurai moruudomollo'moneyokwe womdo tov dinau to'busuko mi anuwoso. Nuu yiuwi'nokai a'mwo abolo ajumiyo aguto tonyuda'ai mwalodupudo togai'aro a'mwo abolo i'womdo tomuu mwalodupudo togai'aro aki a'mwo kuudo agutokwe toorogai'aro kuudo agutomaiyokwe toorogai'aro toorai nokwo wonyapino mimonyugono. Toro kwonyu kuruv kuuguudo sugudo tokwe a'mwo abolo su tonyu neya moruudomollumonyugono. အခန်းကိုကြည့်ပါ။ |
Room 1:14
31 ပူးပေါင်းရင်းမြစ်များ
Su toro toga Gooti toolluro Kuullo tool molloduke tovida'ai Jisasol gami poowokalago tokwe ilaiyo bwotonyo ino sumaiyokwe subusu'nyogalo aro kuudokaikono. “Mi Nyunumiyagoloo, nuu aro tovino, Nenyoo, agudumono. Guu muunyu kai'muuda'ai togai'aro kwako akavida'ai togai'aro tonyu Agutekugono. Kavlo su tov a'mwo kwako akavida'ai pi'mwo kuudokwe tooravuro sumdo tovi yiulo kupuurubweyodumdekugono. Toro kuvi kuruv gumoro sumdo tovi kwoloraiyo tobuurobusuko gujumo'nodupudo tonyuno'gwowi yiuwi'nokai su tonyuno kavlo tov kuu'maiyo toru'no bomollolupto'nubweyodumdekugono. Mi Nyunumiyagoloo, guvnokwekujuro ilaiyo gujunodowodo tovi kuvinono uumjunodumdekugono. Ilaiyokwono.” Jisasol subusu'nyogalo toro kuudokaikono.
Toro youroma'no sumawoneyokwe aku'momdo su tovida'ai a'mwo mwalodupudo tooro nemi monekullubwoto'mno sumaveyokwe ilaiyo to'no amollonekumwaloporogano. Toro mollonekumwalno sumaveyokwe lukuuto tov nekumaro'no buuruko tov aiyo avomarokakwono. Toro imo'noduke tovino tov a'mwo su tooro duko puruv samjurovoporogano. Duko su tovi me'no yomjuroudapino sumaveyokwe nemi kulako ton duko tovi imwonyallo'moneyokwe adonekumaroporogano. Toro donekuma'no sumaveyokwe nevu kworogai duko tovi aiyowomno amomwodovomarowonogano.
Toro wimo'noduke tovi a'mwo aku'momdo tovida'ai mwalodupudo tooro amuugonaropogano. Toro tooro gabakuto Poololluro ato tov mogudupolopiyoduke toollu wono'mno aro sajunoporogano. “Oo a'mwo akal a'mwo pworai romiyosodowodoldeyo. Toro tool soolwara tovi me'no surolo'nugomoka kwollu kuruv nemoro gooti to'mono'gwowi gami mido marowo'ji yiuno'no bolonoldeyo.” Sajunoporogano. A'mwo su tooro kemi kuunano gooti su tovino aro dodupudorogano. “Nemi Gooti tov Yiuwi'nokai A'mwo Abolo Tonyu Mido Mallokweyokwono.” Dodupudorogano.
Toro kuudoka tovi Aguto tool Ananaiyasollu kuudokaikono. “Guu luko mibinono. Soolollomno nokwo dovlavono. A'mwo su tool moro womdo tovi nyumwalono'moneyokwe me'no ajesekono. Toro ajeso su tool a'mwo abolo Juu tooravuro miyawosunodupudo togai'aro kemoro a'mwo aguto kig toorogai'aro Isuraiyolda'ai a'mwo abolo togai'aro tonyu moro kuuguudo tov yodubwasumwalonekono. Toro sodubwaso'ji tovida'ai mino yovo tovino nyouroma'mwalpinogano.
Toro te miyobuuravoo, nuu yiulo yogalo puruv ikudumo'mokwono. Yiulo yogalo aikudumi su tovi kevu wuu'nopi aro nyulomodomoropinapiyo. “Oo nevu pi'mwo kuudokwe me'no imo'nodowadonogano. Aki toro tonol a'mwo abolo Juu tonyuro aiko toru ma'dowadonogano.” Su toro nyulomodomoropinapiyokwe yiulo yogalo akavi neya duu'nyulo. Aga Isuraiyolda'ai pun kemoro poowokalago kuudo tov lumdo me'no kuulopiyodupudogano. A'mwo abolo su tonyuro lumdo kuulopiyodupudo su tov yiunokuudo'maiyo. Lukomgu Juu tooravuro miyawosunodupudo pun Jisasolluro kuuguudo tovino kuudo kuubwepi ton Gooti toollomno nobumwalpinogano. Toro bodopure tonyu Gooti tool jagilno jagilno yowo'ji, Me'nodeyo, donekono. Toro ado'ji su toga'no'gwowi Isuraiyolda'ai a'mwo abolo kun kuruv Gooti toollomno kuudo youragunyumo'nupi Jisasolluno kuudo nuubwepinogano.
Kevu yiuwi'nokai a'mwo abolo togai sumwoluko aval'no neya wosunmwalpinogaikikono. Aki toro togaikul aro kuudo nyau'mwalpiyo. Oo nevu yovo agutokwe tonol pi'mwo kuudokwenogano. Su toro kuudo miyauropi kugaikul kuruv a'mwo abolo yovomaiyokwe tobuurai wuuru'maropi a'mwo abolo su tobuurogai neya yomjomwekovla'mwalpinogaikikono.
Kevu a'mwo abolo punyuro dinau tov amapi toga lukomgu aro nuudupiyo. “Oo nuu dinau su tov aikomgu yere maikullamonyugono. Dinau su tov nuuge kuuno wo'donokwono.” Kevu su toro nuudupiyo. Toro kuvi kuruv yiuwi'nokai toga kemi dinau to'busuko ikwo'mwalono to'gwowi arokwono. Kevu a'mwo abolo tonyuno kalo buuropino neya domollogaulo. Kevu a'mwo abolo tonyuno su toro tomgu'aro kwipi tov Gooti toolluro yiuwi'nokai loowo go'no go'nodo tonyu uumjunodupudo togaikulbusuko imo'nupinogaikikono. Yiuno su to'gwowi yiuwi'nokai tonollu dinau to'busuko nekwo'dowodokwono.
Kevu kuudo neya jaullulo. Yiuwi'nokai tomuuda'ai Jisasolluro a'mwo abolo ton kemino aro kuudo me'no yaikuu'dupudogano. Oo a'mwo abolo su tobuuro kuuguudo sugudo tovi me'no uumjunodupudodeyo. Kuudo yaikuu'dupudogano. Kemino su toro kuudo yaikuu'dupudo tovino nuu ilaiyo yodumdonyugono. Toro te sugupasudo tonyuno kevu pi'mwo kuudokwe neya jumo'nogaulo. Toro kuvi kuruv ma'no ma'no pasudo tooraino'gwowi yiuno kuudo maiyokwe to'no jumo'nogaulo. Nuu kemino tov su toro tomgu'aro neya imo'nupureyokwe nyunodowodonyugono.
Toro te kevu su toro mipi tov kemida'ai pweku Gooti toollu, “Nenyoo,” wuujo'mo tooku yiuno gumi kuullo tooke to'no gabovo yogaljo tovida'ai dubinekugono. Su toro adubi tov a'mwo abolo guvuge amwalpi ton kavlo tovino kuudo miyouromapinogano. Su toro miyouromapino tovino tov guvu Gooti toollu subusu'nyogalo wuudodo'bure toga, “Nebalokwono,” ku'nono madupinogano.
Toro te nevu Gooti toolluro yasuwa'no nonekullabodowodo su tonyuno kwako akavida'ai pi'mwo kuudo tokwe miyodubwasokwenogano. Toro kuvi kuruv Gooti toolluro Kuullo tool nebaikuuguudo yodonekubwasodowo'jure togai to'gwowi kevu gamoro Kuullo kurukwe togaikullu kuu'maiyo toru'no yodekubwasodowadonogano.
Neya duu'nyulo. Kevu pugaikul aro kuudo yau'dupudogaikikono. Oo nevu kwako akavida'ai noonyumwonyu tonyuno pi'mwo kuudo kurukweyonogano. Su toro tovino kevnokwe togaikul kuunano nyoukuu'najunmwalpiyo. Toro kuvi kuruv kevu pi'mwo kuudokwe imo'nyo'mo aikulluno'ji tov kwako akavida'ai a'mwo tooravuro sumdo tovi kevu kuudo maiyokwe to'no neya jumo'nogaulo. Yiuno su toro tomgu'aro sumo'nupi to'gwowi Gooti toolluro sumdo tovi pi'mwo kuudokwe imo'nupinogaikikono.
A'mwo pworo yovo aguto mallo'moneyokwe kevnokwe tooro ilomodomoropunyu yodapudorogano. A'mwo su tooraida'ai pwol aro yonekono. Gavuge avalo pworavuro pasudo yodopure tovi'aro a'mwo su tool wonowo'ji gavnokweyolluro pasudo tovi gallainyubworonekono. A'mwo ilomodomoropunyu yodapudo tooro imgu amgu su toro gallainyubwo'nodupudorogano. Su toro gallainyubwo'nodupudo tovino tov a'mwo kuudo maiyokwe toorobusuko imo'nodupudorogano. Toro kuvi kuruv nevu kuurotokwe toonolno'gwowi a'mwo su toorobusuko ku'nono miyokwenogano.
Toro tovino tov nemida'ai pwol Grikoldeyo oo Juuwoldeyo oo Juu tooravuro miyawosunodupudoldeyo oo lakulkulako do'nodowodoldeyo oo lakulkulako mado'nodowodoldeyo oo gabovo yogaljo dodowodoldeyo oo pumuuda'aiyoldeyo oo ki'nato womdo yodowodoldeyo oo ki'nato tovida'ai me'no birolo'nugolokwodowodoldeyo yiuwi'nokai go'no go'nodo su ton aguto'maiyo. Toro kuvi kuruv aguto to'gwowi yiuno Krais tookono. Krais su tool gamoro yiuwi'nokai a'mwo abolo tonollu me'no kuulonekumwalodowodekono.
Su toro tovino a'mwo pworavuro yiuwi'nokai buro'nyo buro'nyo kaiyako yanyugolodopure kuruv nuvu kavo to'no mwalodum mido mamallokwenyugono. Moro su toro yodumdo tov a'mwo abolo Gooti toolluro me'no ajesungiko tobuuraiyo'mokwono. A'mwo abolo su ton Krais Jisasollu kuuguro'mwonyupi tovi'aro kemi ma'no ma'nodo tovuro kirumwallo tovida'ai nokwo abirolo'nugolokuupuro. Aki a'mwo abolo su ton Gooti tooke gamoro bako bwotonyo anakuuto tomuu aiyo yiunokuudo mujomwekovlaiyo'moneyokwe kuruv nokwo amapuro.
Kuudo neya jaullulo. Muudu'nodo toga ne kunol kuruv junorukuudo tooro yau'dowa Gooti toolluro yogalo tovi kisuvolo kwiyajuwonogano. Aki kuunano yogalo youkuu'nanekudodopure toorai kaduko wiyodowa noonyumwonyu kwanyu sumdo kinuwiyo'mo pasudo toorogai'aro nevnokwenollu ilaiyo igollunyo'mo pasudo toorogai'aro su toorai kiroungovlaiyo'moneyokwe ki'nato womdo sajuwonogano. Aki toro tonol magu'nyo kuudo toorogai'aro kwekuullu kuudo toorogai'aro you'movla'mdowa a'mwo abolo togai sumwoluko gwabo sungovlaiyajuwonogano. Muudu'nodo toga nevu kaiya'no pasudo su toro toorogai somjomwekovlaiyajuwonogano.
ကြော်ငြာတွေ