Kuuguudo Sugudo akav Makolluro sakwollokakwono Mak 16:20 - Gooti Toolluro Yogalokwono

²⁰ Toruda'ai gamoro uumjunyokwe tooro yiuwi'nokai tomuu plavo'mno kuuguudo tov amodomolloporogano. Toro modomollodopure toga Aguto Jisasol kworogai womdo yodowo kwiyo'mwojajukekono. Aki duuwallo jurogudo pugai kwiyo'mwojajukekono. Toro wiyo'mwojoduke tovida'ai kuuguudo modomollodopure su tovino jurogudo aduuwimwojajukekono.

Kuuguudo Sugudo akav Makolluro sakwollokakwono Mak 16:20 ပူးပေါင်းရင်းမြစ်များ

Kuuguudo Sugudo akav Makolluro sakwollokakwono Mak 16:19

Toro wuujuno sumaiyokwe Aguto Jisasol muunyu i'muuno sulokaikono. Toro ilno sumaiyokwe Gooti toolluro anato toru sulomwalokaikono.

Luuk 1:1

Guu a'mwo aguto Tiyafuloseku moro puukwollo sokwollagubwemo akav aro tovinokwono. Nemi akuuto toru yiuwi'nokai Gooti toolluro womdo nekulloduke tovino a'mwo judo'no judo'nodo tooro puukwollo yakwollo'mo yamju kwiyoganyajuporogano. Toro tooro puukwollo go'no go'nodo tonyu kuvinono me'no sakwollajuporogano.

Luuk 1:2

Toro sakwollajupo su tooro yiuwi'nokai nemi anekullumo'nugelabiyajupo tonyuno me'no amuugonallajuporogano. Aki toro tooro Gooti toolluro yogalo tokwe a'mwo womdokwe kwimo'nyajuporogano. Toro wimo'nodupu Gooti toolluro yogalo su tokwe amodomollajuporogano. Toro tooro yiuwi'nokai amuugonallajupo su togai'aro yogalo amodomollajupo togai'aro su ton nemoro ato tovi anekubweyoporogano.

Kuurotokwe 14:3

Toro kuvi kuruv Pooleke Banabaseke tooralno'gwowi wagwolago su toru manyu toga mwalodubul Aguto Jisasolluno kuuguudo tov guureji sodubwosumovlaiyajulorakono. Kuuguudo su tov Gooti gavnokwe toolluro yasuwa'wino sugumaluko nekubweyodowodo tovinokwono. Toro tovino yodubwosumovla'mdole toga a'mwo abolo ton, Oo nebalo'mdeyo, dupino'moneyokwe Aguto tool Pooleke Banabaseke toorallu duuwallo jurogudo pun kuubweyokaikono. Toro uubweyoduke tooral a'mwo abolo tonyu duuwallo judo'no judo'nodo ton kuuduuwallajulorakono.

Kuurotokwe 4:30

Aki guvnokwekujuro womdo sugudokwe Jisasolluno yovo tovida'ai a'mwo abolo nobollokwe tobuurai ikulo'bi duuwallo go'no go'nodo ton nokwo wuuduuwallubinekugono.” Subusu'nyogalo toro kuudopogano.

Kuurotokwe 5:12

Toruda'ai a'mwo kuurotokwe tooro a'mwo abolo tonyuro sumdo tovi duuwallo jurogudo judo'no judo'nodo ton kuuduuwallajuporogano. Toro wuuduuwallodupu Jisasolluro a'mwo abolo ton Gooti toollu ilomoropiyo'moneyokwe ago tovuro agwapto tovi kuulodapu roukuuropi ago tovi aullu'bwo'nyajupogano. Roukuuropi ago su tovino yovo tov Sooloomonolluro Roukuuropi Agoveyokwono.

Room 15:19

Aki toro toonyu womdo su tovi mujumovla'mdumdo toga duuwallo jurogudo judo'no judo'nodo togai'aro Gooti toolluro Kuullo toolluro jurogudo tokwe'aro togai wuuduuwollumovla'mdumdonyugono. Toro toonyu Krais toolluno kuuguudo sugudo su tokwe wagwolago Jeruusalem toru amoruudomollonyugono. Toro moruudomolluno sumoneyokwe toruda'ai yiuwi'nokai tomuu moruudomolluno moruudomolluno yodum yiuno kwako Ilirikam tomuu me'no moruudopiyodumdonyugono.

2 Koorin 6:1

Gooti tool a'mwo abolo tonyu wiyo'mwojo'moneyokwe womdo yodowodekono. Toro te nevu kweke womdo yodowado toonol kemi guureji aro ikudano'mokwono. “Kevu Gooti toolluro yasuwa'wino sugumaluko me'no ma'dupudo tovi nyuu'dapimwalpiyo.” Ikudano'mokwono.

Hibruu 2:3

A'mwo abolo loowo tovi kisuvolo kwiyajupo ton kirumwallo tovi su toro amallajupogano. Loowo su tov jurogudo adaiyajuko kuvi kuruv Gooti tool nemi ma'no ma'nodo tovuro kirumwallo tovida'ai nobomollurolovonekumokalokwono tovino yogalo to'gwowi aguto kuunodokwono. Toro tovino tov yogalo su tovi nevu muu'nyubusuko to'no nyumwala'jo. Nevu yogalo su tovi muu'nyubusuko to'no sa'ji tov kirumwallo tovi mirukuruwolowanonogano. Kuuguudo su tovino muudu'no amoruudoka tool yiuno Aguto toolnodokwono. Aki lukomgu kuuguudo su tovi a'mwo pworo me'no kuu'nyajuporogano. Toro kuu'nyajupo su tooro aro anekujajuporogano. “Oo Aguto toolluro kuuguudo adoka tov yiuno nebal'nodokwono.” Anekujajuporogano.

Hibruu 2:4

Su toro nekudodopure toga nevu kuuguudo su tovino, “Nebalo'mdeyo,” jo'moneyokwe tov Gooti kwol kuruv kuu'maiyo toru'no adodoluwosajukekono. Toro adodoluwosajuko su ton arogano. Duuwallo jurogudo togai'aro morumoukuropiyo'moneyokwe womdo togai'aro nobollo judo'no judo'nodo tonyu sukullajuko togai'aro Gooti toolluro Kuullo toolluro noonyumwonyu kwiyajuko togai'aro ton adodoluwosajukekono. Kuullo toolluro noonyumwonyu kwiyajuko su ton Gooti gavnokwe toolluro ilaiyo winoduke tovi uumjunodowo anekumwodeyajukogano. Toro te Gooti toolluro kuuguudo tovino nevu, “Nebalo'mdeyo,” jo'moneyokwe tov gavnokwe tool kuu'maiyo toru'no su toro adodoluwosajukekono.