Mollurolovomato 32:15 - Gooti Toolluro Yogalokwono

¹⁵ Toruda'ai Moosesol loowokwe sulbweko tooral ato tokwe momwora'no sumaiyokwe muumuudo toolluda'ai aikomgu yadu'mwonyo'no kwolabokaikono. Sulbweko su toorallu imgu amgu tomgu Gooti toolluro loowo ton sakwollungikorakono.

Mollurolovomato 32:15 ပူးပေါင်းရင်းမြစ်များ

Mollurolovomato 16:34

Toro wuujuno sumaiyokwe Gooti Yawelluro Moosesollu kuudoka kuvinono Eroonol bret mana pun mollu'bworomaro'no soospen puuwasi amollurosokaikono. Toro mollurosuno sumaiyokwe bret manakwe soospen su towa manyu toga mollomwallo'moneyokwe Subuu'yamjo'mo Bookis tovi sumdollu toru kwosokaikono.

Mollurolovomato 24:12

Toruda'ai Gooti Yawel Moosesollu aro kuudokaikono. “Guu muumuudo toollu miyomno ilabo'bi mino sogwollo bilainyunogawono. Toro bilainyunodo'bure toga nuu moro loowokwe sulbweko toval gujamonyugono. Loowo su ton a'mwo abolo tonyu yodubwaso'moneyokwe sulbweko tovallu sakwollo tov gujamonyugono.” Kuudokaikono.

Mollurolovomato 24:18

Toro adomaroka tovi Moosesol muumuudo toollu ilno sumaiyokwe sulu'wo tovi akuuto tomuu aulopuuropiyokaikono. Toro tool muumuudo toollu mwalno sumaiyokwe iruko 40-pela tobuuke'aro surakuuto 40-pela tobuuke'aro tobuul kuuwolo'nokaikono.

Mollurolovomato 32:16

Sulbweko su tooral Gooti gavnokwe toolluro sakwollokarakono. Aki loowo tonyuno puukwollo sokwollosungiko kun kuruv Gooti gavnokwe toollurokwono.

Mollurolovomato 40:20

Sel ago su tov me'no modosuno sumaveyokwe atousal loowokwe sulbweko tooral maro'mno Subuu'yamjo'mo Bookis tovi anakuuto tomuu amollurosoporogano. Aki bookis su tovi ikwovomokavlaiyo'moneyokwe iko pullal imgu amgu alomjosungiko tovallu'aro auluuloukuulopiyaporogano. Aki bwososo'mo atallo tov bookis tovi muunyu toru sulobwososoporogano.

2 Koorin 3:3

Aki kevu aro tovino kuu'maiyo toru wuuduuwallodupudogaikikono. Kevu Krais toolluro pas sokwollopiyaboka to'busukogaikikono. Pas su tov nemoro ato tovi'aro sokwollopiyabokakwono. Pas su tov pen tokwe puukwollo sakwolloka'maiyo. Toro kuvi kuruv aiyo mujomwekovla'mdowodo Gooti toolluro Kuullo tooke to'gwowi sakwollokakwono. Aki pas su tov Moosesolluro loowo to'busuko sulbweko tousi puukwollo sakwolloka'maiyo. Toro kuvi kuruv a'mwo abolo tonyuro poowokalago tomuuno'gwowi me'no yokwollubweyodowodokwono.

2 Koorin 3:7

Gooti tool Moosesollu loowo kwiyoka su tov aro nekuduuwallodowodokwono. Kevu nobolpinogaikikono. Toro nekuduuwallo'moneyokwe loowo su tovuro yogalo ton sulbweko tovallu puukwollo sokwollosungikokwono. Kuudo neya jaullulo. Loowo su tov, “Kevu nobolpinogaikikono,” nekujo'moneyokwe kuvi kuruv Gooti tool Moosesollu kwiyoka toga gamoro bako bwotonyo kurukwe'aro kwiyokaikono. Toro kwiyoka toga Moosesolluro sumdomago tovi bako su tov awopiyajukokwono. Aki Gooti toolluro bako bwotonyo pwopiyoduke su toga Isuraiyolda'ai a'mwo abolo ton Moosesolluro sumdomago tovi ku'nono mwonyajupogano. Lukomgu loowo tovuro bako bwotonyo su tov piyarupto imo'no'no me'no sovlavokakwono.

Hibruu 9:4

Gooti Toolluro Pwekwapto Kuunodo su toru wobeya sudo kuunyokwe i'mujako tovi iroudapiyo'moneyokwe dukwagupto tokwe'aro subuu'yamjo'mo bookis tokwe'aro toval wo'dubulorukono. Bookis su tovuro yiuwi'nokai tomuu yiuno gool tokwe suropingikokwono. Aki soospen puruv bret mana tokwe surosungiko tov bookis su tovi anakuuto tomuu aullu'nallajukokwono. Aki Eroonolluro yodeko sodolokwe tokwe'aro aki Gooti toolluro subuu'yamju sokwollosungiko sulbweko tovake'aro su ton bookis tovi anakuuto tomuu aullu'nallajupogano.

Adodolukuu'nosungiko 5:1

Toruda'ai sia kig tovi sulomwaloka su tool gami anato tokwe puukwollikwiyo aweyogunyugolowosungiko puruv mwora'duke kwononyugono. Puukwollikwiyo aweyogunyugolowosungiko su tovi imgu amgu anakuuto tomge'aro kwa'mgu tomge'aro puukwollo me'no sokwollosungikokwono. Aki puukwollikwiyo aweyogunyugolowosungiko su tovi guureji juguroso'moneyokwe tov gwomalo tokwe 7-pela go'no go'nodo toru guureji aluvomgutowosungikokwono.