Toro agubwemi toga a'mwo pwol gumi kaiyako agujo'ji toollu nuu kaiyako nyugolmekono. Toro kuvi kuruv a'mwo pwol gumi ilaiyo amagujo'ji toolluno'gwowi nuu sugudo nuubwemekono. Toro te sugudo agubwemo akav yiuwi'nokai a'mwo abolo kwako akavi gomno gomno amwakopo kunyudaiyo'mo agubwemono.” Kuudokaikono.
Matyuu 8:11 - Gooti Toolluro Yogalokwono11 Toro te aro ikudumo'mokwono. A'mwo abolo pun kuujo tool sulopiyamoka tomuuda'ai togai'aro kuujo tool kwolmoka tomuuda'ai togai'aro yiuwi'nokai tomuuda'ai bwotonyago su ton muunyu kai'muuda'ai aguto kig toolluro mido mollomwalo toru nyullu'bwo'nupinogano. Toro i'bwo'nopi Eburaiyameke'aro Aisakeke'aro Jekoopeke'aro toorogai nyu'bwo'nonomwalpinogano. အခန်းကိုကြည့်ပါ။ |
Matyuu 8:11
40 ပူးပေါင်းရင်းမြစ်များ
Aki gumoro jukweyago kwolaiyo pwollu moro sugudo tov uubwemovla'mwalmonyugono. Toro uubwemovla'mdo'mure tovida'ai yiuwi'nokai a'mwo abolo kwako akavi mwalodupudo kun kuruv nomapinokwono. Guu moro yogalo tovi kaduko yodum anumjunmado tovino tov toro imonyugono. Gooti Yawel toro agudadopiyo.” Ensel tool Eburaiyamollu toro kuudokaikono.
Aki gumoro jukweyago kwoloraiyo sumo'nupi ton kwako akavida'ai we'gullugulludo wo'dowodo to'busuko bwotonyago imo'nupinogano. Toro ton yiuwi'nokai tomuu yo'mowopipinogano. Kuujo tool kwolmoka wes tomge'aro kuujo tool sulopiyamoka is tomge'aro aki wonyo sumdo tov kwolamoka noot tomge'aro wonyo kwolmoka saut tomge'aro yiuwi'nokai su tomuu mwalpinogano. Aki toro togaikullu sugudo aikubwemi tov yiuwi'nokai a'mwo abolo kwako akavi mwalodupudo kunyuda'aiyo'mo ikubwemonyugono.”
Toro kuudoganoka tovi aro kuudoporogano. “Womdo tovi jukwo tool abwo'ji toga aro yonekono. A'mwo kirovanyuvanyu su toorai kaiyako yiuno'no mollounapiyonekono. Aki gami wain womdo tovi mollomwalmwalpino'moneyokwe womdo tov a'mwo muuduko pworai jesonekono. Toro ajeso'ji su tooro wain womdo su tovida'ai yiuwi'nokai wosamujuko amulomapi ton pun jukwo su toollu kuvinono nuuwimwalpinogano.” Kuudoporogano.
Nuu su toro wolabodo'mure toga moro yiuwi'nokai a'mwo abolo ajesungiko tonyu bomollu'bwollo'mo tov moro ensel toorai biugel tovuro deko bwotonyo tokwe morapimonyugono. Su toro amorapimi toga moro a'mwo abolo ajesungiko ton yiuwi'nokai kwako tokwe sulugumdo tokwe tovalluro aiyowo'mo do'gwapiyo tovida'ai yiuno aiyowo'mo do'gwapiyo tomuuno amjomwekwingopo su tonyu miyomno bomollu'bwo'mogano.” Jisasol toro kuudokaikono.
A'mwo aguto tool aikomgu bowo'ji gamoro a'mwo ki'nato womdokwe tooro sa mworopi sogwollo kinodopure toorai abuuru'maro'ji toga womdokwe su tooro ilaiyo to'no ipinorogano. Nuu nebal'no ikudumo'mokwono. A'mwo aguto tool gamoro a'mwo womdokwe tekwojai su toro abwono'ji toga wosamujuko nupino'moneyokwe nomorumwallonekono. Me'no morumwallowo'ji a'mwo aguto su tool womdo yo'moneyokwe youro tov mollosowo'ji wosamujuko tokwe yado uumwodeyonekono.
Toro aulomwaloka toga a'mwo abolo su ton judo'no judo'no yogaljo tonyuda'ai do'mno Gooti toollu sulomoropiyapogano. Toro ilomoropiyodopure tonyu a'mwo Pitaike sulabopo tooro mwalo'mno amuugonallajuporogano. A'mwo su tooro wagwolago Joopada'ai Juu pworogano. Toro tooro Jisasolluro a'mworogano. Toro tooro muugona'no sumaveyokwe mollolokurosi yo'mno adoporogano. “Awi, a'mwo abolo Juu toonolluro miyawosunodowado kunyu kuruv Gooti tool gamoro Kuullo tool kwimokagano.” Adoporogano. Toro juno sumaveyokwe Pital aro kuudokaikono.
Toro sodubwasoka tovi wagwolago Jeruusalemda'ai Jisasolluro a'mwo abolo ton wuu'no'mno sumdomgu Pitallu yogalo amojurugollajupo kun kuruv su toro toga'no'gwowi kemoro sumwoluko tov noullo kwosunopogano. Toro wosunyuno sumaveyokwe Gooti toolluno ilomoropiyo'moneyokwe aro adopogano. “Oo a'mwo abolo Juu miyawosunodupudo kubuuro kuruv Gooti toollomno kuudo souragunyumo'nupi tonyu Gooti tool ilaiyo to'no mollomarowo'ji aiyo yiunokuudo mujomwekovlaiyo'moneyokwe tov nokwo wiyonoldeyo.” Adopogano.
Toro tooral wagwolago go'no go'nodo su tonyu bai'mo'mdubul a'mwo abolo Jisasolluro uumjunyokwe tobuurai kemi poowokalago tonyu jurogudo duuwimwojo'moneyokwe kuuguudo aro kuujajulorakono. “Nevu aguto kig Gooti toolluro mido mollomwalo tovi dolago tomuu kuulomwallo'mo tov kavo kavo yovlavowa'ji maulomwalanonogano. Toro kunol kuruv kwako akavi mwalowa'ji toga jul'nyo go'no go'nodo ton nobaneki'mo'mwalononogano. Toro baneki'mo'mdowo'jure tonyu neya yodo'movlavowa'ji Gooti toolluro mido mollomwalo tovi dolago tomuu kuvinono kuulomwalanonogano. Toro tovino tov kevu jul'nyo ton baiki'mo'mdowo'jure toga nobwolorapiyokwe kuuguudo sugudo tovi kuudo uubweyodupudo su tovino guureji neya dogudupolarogaulo.” Aduuwimwojajulorakono.
Toro bai'mo'mno sumaleyokwe Jisasolluro a'mwo abolo tonyu amollu'bworolorakono. Toro mollu'bwo'no sumaleyokwe a'mwo abolo su tonyu Gooti toolluro jurogudo tokwe mollodubul kwimo'nyajuko tonyuno kuuguudo tov kuudolorakono. Toro wuujuno sumaleyokwe aki kuuguudo puruv aro kuudolorakono. “Nevu Juu tonol Jisasolluno kuudo uubweyodowado to'busuko kubalno Gooti tool a'mwo abolo Juu tonolluro miyawosunodowado kunyu kuruv Jisasolluno kuudo uubwepino'moneyokwe puuto me'no soulubweyokaikono.” Kuudolorakono.
Toro kuvi kuruv aga yiuno nebal'no ikudumo'mokwono. Krais tool me'no aboloka toollu Gooti tool aiyo aiko te me'no amodukavokaikono. Su tov wosamujuko ton suwiyo yodopure tonyu muudu'no mulodupudo to'busuko kubalno Krais tool sumdomgu kwolda'ai adukavokaikono. Toro adukavoka su tool sumdomgu wanodowo'jure toga kwolluda'ai yiuwi'nokai a'mwo abolo me'no abollungopo ton uumjunopi aiyo aiko te noduko'moulapinogano.
Kevu aro kuudo me'no youroma'dupudogaikikono. A'mwo abolo ma'no ma'nodokwe ton aguto kig Gooti toolluro mido mollomwalo tovi anakuuto tomuu ku'nono maulomwalpinogano. Toro tovino tov a'mwo pworo aro nyoukuu'naikudupiyo. “Ma'no ma'no mujumovla'mdupudo ton aguto kig Gooti toolluro mido mollomwalo tovi nokwo kuulomwalpinogano.” Nyoukuu'naikudupiyo. A'mwo abolo kwonyalo yodupudodeyo oo kuunano gooti pworai ilomoropiyodapudodeyo oo abekuuko yodupudorodeyo oo a'mwo pworo a'mwo pworogai imgu amgu kwonyalo inodupudorodeyo oo
Kuu'maiyo toru'no bomollolupto'nosodowodo su tov aro tovinokwono. Yiuwi'nokai Krais Jisasolluno kuuguudo sugudo tovino kuudo uubweyodowado tonol Gooti toolluro nonekullabwono dodowodo ton aval'no nomaranonogano. Kevu Juu toonolluro miyaikuuwosunodowadogaikuldeyo oo nevu Juuwonoldeyo yiuwi'nokai tonol aval'no nomaranonogano. Aki toro tonol aval'no guro'mwonyodowa kulako yiuno puru'monodo to'busuko imo'nodowadonogano. Aki toro tonol Gooti toolluro subuu'yamju yodowodo tovida'ai sugudo ton kuvinono nomaranonogano. Su tov yiuno Krais Jisasollu'aro kuvinono nonekullumo'nonokwono.
Toro tovino tov nemida'ai pwol Grikoldeyo oo Juuwoldeyo oo Juu tooravuro miyawosunodupudoldeyo oo lakulkulako do'nodowodoldeyo oo lakulkulako mado'nodowodoldeyo oo gabovo yogaljo dodowodoldeyo oo pumuuda'aiyoldeyo oo ki'nato womdo yodowodoldeyo oo ki'nato tovida'ai me'no birolo'nugolokwodowodoldeyo yiuwi'nokai go'no go'nodo su ton aguto'maiyo. Toro kuvi kuruv aguto to'gwowi yiuno Krais tookono. Krais su tool gamoro yiuwi'nokai a'mwo abolo tonollu me'no kuulonekumwalodowodekono.
Kemoro guureji gudupola'dupudo su tov aro tovino kuu'maiyo toru'no nekuduuwallodowodokwono. Gooti tool yiuwi'nokai a'mwo abolo tonyuro pasudo tonyu pi'mwono jainyubwollokwekono. Su tov aro tovinokwono. Kevu aguto kig Gooti toolluro mido mollomwalo tomuu mwallo'moneyokweyogaikikono. Toro togaikullu a'mwo pworo kaiyako yaikullugolodupudorogano. Toro yaikullugolodopure kuvi kuruv kevu Gooti toolluro mido mollomwalo su tovi kuvinono noulomwallo'moneyokwe yovrowosungelabodupudogaikikono.
ကြော်ငြာတွေ