Matyuu 18:15 - Gooti Toolluro Yogalokwono

¹⁵ Aki Jisasol aro kuudokaikono. “Guvu gumi avalo Jisasolluro a'mwo pwekwo kaiyako sagujugolo'ji tov guu yiulo tomuu'aro kwollomno bo'bi gamoro kaiyako sagujugolo'ji su tovino kuu'maiyo toru neya dodolukuurubweyono. Gumoro su toro adodolukuurubwebi tovi a'mwo tool wuu'nowo'ji gami poowokalago kuunodo tokwe adodowiyoku'bworosuno'ji tov a'mwo su tekwo gumi jugwai'yago aki aiko te gujumo'nowo'ji nokwo ibwoto'numwalbullunorakikono.

Matyuu 18:15 ပူးပေါင်းရင်းမြစ်များ

Kooloosi 3:13

Aki a'mwo abolo kaiyako yaikullugolodopure tonyu kevu sumwoluko su'mno yere mwimo'nupinono. Aki a'mwo pwol kemi yogalo adaikurugolo'ji tov kevu jul'nyo su tovi modukwopiyopi aki aiko te kuudo nyau'mwalpiyo. Kuudo neya jaullulo. Aguto tool kemoro ma'no ma'nodo tonyu modukwopiyo'no aki aiko te kuudo miyou'movla'mdowodekono. Su toro to'busuko kubalno a'mwo abolo pun kemi kaiyako saikullugolpi tov kevu aki aiko te kuudo nyou'movla'mwalpiyokwe tov jul'nyo su tonyu neya domodukwopiyogaulo.

Galesiya 6:1

Mi avalobuuravoo, kevu Jisasolluro a'mwo abolo pugaikul Gooti toolluro Kuullo tool mollubworekumokavla'mdowo'jure tovi uumjunodupudo su togaikul kemida'ai pubuuro ma'no ma'no pasudo tovuro wuulo tovi awapi tobuurai neya duuwiyo'mwojogaulo. Kevu wiyo'mwojo'mo togaikul a'mwo abolo ma'no ma'no supi su tobuurai kavo neya duubemwojogaulo. Su toro uubemwojopi toga kevnokwe togaikul ilomoropunyu yapi ma'no ma'no pasudo tovuro wuulo tovi nowa'mwalpiyo.

2 Tesaloonaika 3:15

Toro kuvi kuruv a'mwo su tekwojuno aro kuudo nyaupiyo. Oo nemi ikomago anekullumo'nadopiyo. Kuudo nyaupiyo. A'mwo su tool Jisasolluro a'mwo abolo pubuurobusuko kemi avalo me'no ikullumo'nodowodekono. Toro tekwoji kevu duudapi yogalo aro neya duuwiyogaulo. “Oo guu wako neya dou'nogawono.” Duudogaulo.

Matyuu 18:35

Toro te moro Nyunumiyago muunyu kai'muuda'ai tool kemi su toro tomgu'aro aval'no nyaikullugolo'jo. Toro tovino tov kevu kemi avalo tellugwai'yago ikullumo'nodupudo tekwojavuro kaiyako saikullugolpi tov kevu su to kworavuro ma'no ma'no pasudo tovi kemi poowokalago kuunodo togai yiunokuudo neya domodukwopiyogaulo. Toro kuvi kuruv kevu su toro mipi to'gwowi moro Nyunumiyago muunyu kai'muuda'ai tool yovekurajo to'busuko tomgu'aro aval'no nyaikullugolmwalonekono.” Jisasol su toro kuudokaikono.

Room 12:21

Toro te ma'no ma'nodo tov kemi nekuuwolo'mwalo'jo. Toro kuvi kuruv kevu ma'no ma'nodo tovi uuwoleyo'moneyokwe yiuno sugupasudo to'no neya domjumovlavogaulo. Kevu su toro supi togaikul ma'no ma'nodo tovi suvlo nokwo ilomavolmwalpinogaikikono.

1 Pita 3:1

Su to'busuko kubalno kevu abolo togaikul kemi kwolo tooravuro mido mollomwalodopure tovi kwako tomuu'aro neya duuwimovlavogaulo. Kevu kwako tomuu'aro su toro kwipi toga kemoro kwolo pworo kuuguudo sugudo tovino kuudo muubweyodupudorodeyokwe kevu abolo togaikulluro sugupasudo su togai nokwo wuuduuwallumwalpinogaikikono. Kevu kemi kwolo su toorai kuuguudo sugudo tovino kuu'maiyo toru mamoruudupi kuvi kuruv yiuno kemoro sugupasudo mujumovla'mdopure su tonyu wonekumaropi kuuguudo sugudo tovino, Oo nebalo'mdeyo, kuudo nokwo uubwepinorogano.

1 Koorin 8:12

Kemoro tovasuda'ai Jisasolluro a'mwo abolo jurogudo mimo'nodupudo tobuuro kemi poowokalago tonyu kisuvolo sunpi su tov kevu ma'no ma'no wipinogaikikono. Aki toro togaikul Krais kwollu kuruv ma'no ma'no wipinogaikikono.

2 Koorin 7:12

Toro te nuvu kemi pas puruv me'no sokwollekwopiyabonyugono. Pas su tov a'mwo kaiyako amolloluwosoka tooke'aro a'mwo kaiyako su'namovoka tooke'aro toorallu yovo'dogallo'moneyokwe sokwollekwopiyabonyumaiyo. Toro kuvi kuruv kevu kuurotokwe toonollu sobanyo guureji mollonekuda'mdupudo tovino Gooti toolluro sumdo tovi kuu'maiyo toru bomollolupto'naikubweyo'moneyokwe nuvu pas su tov me'no sokwollekwopiyabonyugono.

1 Tesaloonaika 4:6

Toro te pweku Jisasolluro a'mwo gumi jugwai'yago toolbusuko gujumo'nodowodo tekwoji kaiyako nyugolbiyokwe gamoro abolo tokwe kwonyalo mibinono. Su tov aro tovinokwono. Ma'no ma'no pasudo su tonyu Aguto tool kirumwallodowodekono. Su toro tovino kevu wako neya kuu'numwalpino'moneyokwe nevu sumdomgu duudapi yogalo me'no adaikullowonogano. Su toro adaikullowo tovi kevu kaduko neya duuwiyogaulo.

Matyuu 18:14

Su toro to'busuko kubalno moro Nyunumiyago muunyu kai'muuda'ai tool kwoloraiyo su tobuuravuro puru'monodo kuruv du'muudo tomuuno yiunokuudo novlapiyokwe tovino winodowodekono.”

Matyuu 18:21

Toruda'ai Pital Jisasollomno bino sumaiyokwe aro kuudoganokaikono. “Agutoloo, nuuge avalo pwol mi kaiyako sanyugolo'ji tov gamoro ma'no ma'no pasudo su tovino yiunokuudo modukwopiyo'mo tov adadobuul tomgu'aro su toro nokwo imwalmonyudukono? Nuvu yiunokuudo modukwopiyo'mo tov atobuul ato pumguda'ai pworake toga nokwo imwogapimonyudukono?” Kuudoganokaikono.

Taitos 3:10

Kemi anakuuto tomuuda'ai a'mwo pwol Gooti toolluro a'mwo abolo tonyu molleru'mdowapiyo'mo yodowo'jure toollu guu wonyapino mibinono. Toro kweku kuruv a'mwo su toollu duudapi yogalo neya doduuwiyono. Toro toollu duudapi yogalo pugasal me'no aduuwibi kwol kuruv aki aiko te muu'nyubusuko so'ji toga'no'gwowi a'mwo su toollu buulo to'no duugunyumopiyogawono.