Matyuu 16:16 - Gooti Toolluro Yogalokwono

¹⁶ Toro kuudoganoka toga Saimoon Pital aro kuudokaikono. “Guu Gooti toolluro amonekwopiyaboka Krais tookugono. Toro tooku aiyo mujomwekovla'mdowodo Gooti toolluro Kwolaiyekugono.” Kuudokaikono.

Matyuu 16:16 ပူးပေါင်းရင်းမြစ်များ

Matyuu 1:16

Toruda'ai Jekoopol Joosepollu sawosunokaikono. Joosepol Mariyavi kwolo tookono. Mariyav Jisasollu somarokakwono. Jisasolluno a'mwo tooro aro dodupudekono, “Oo Krais tookono,” dodupudekono.

Matyuu 14:33

Toro sumwogapiyoka toga boot tovi sulomwallajupo su tooro Jisasollu ilomoropiyo'moneyokwe aro kuudoporogano. “Guu Gooti toolluro Kwolaiyo nebal'no kuunodekugonoo.” Kuudoporogano.

Matyuu 16:15

Toro kuudopo toorai Jisasol aro kuudokaikono. “A'mwo pworo mino tov su toro nyudodupudo kuvi kuruv kevu toorekulno'gwowi mino tov, Ala'mwekono, kuudo jukiyanuu'mwakovo?” Kuudoganokaikono.

Matyuu 26:63

Toro samuugojoka kwol kuruv Jisasolluro wuujo'mo tov mwinoduke tool yogalo puru'monodo kuruv maravokaikono. Toro toollu pris aguto tool aki aiko te guureji aro adumuurolovokaikono. “Gooti aiyo mujomwekovla'mdowodo toolluno yovo tovida'ai donyudono. Guu Gooti toolluro nekullo'mwojo'moneyokwe Krais ajesoka tool kwekudukono? Aki Gooti toolluro Kwolaiyo su tool guu kwekudukono?” Guureji toro adumuurolovokaikono.

Matyuu 27:54

Toruda'ai Jisasol nyaboloduke toollu mollurogudo pworogai'aro kemi mollubworomokwanyokwe tooke'aro tooro wobo toru amuugonodaiyajuporogano. Toro tooro wunyu wunyu tokwe'aro yiuwi'nokai imo'nodopure togai'aro tonyu me'no kwonopo tovino tov luko morumoukuropiyo'mno aro adoporogano. “Oo a'mwo akal Gooti toolluro Kwolaiyo kuunodo tookono.” Adoporogano.

Matyuu 4:3

Toro winoduke toga yamju wiyoganyokwe tool Jisasollomno abokaikono. Toro bino sumaiyokwe aro kuudokaikono. “Guvu Gooti toolluro kwolaiyo tookuno'juki sulo akarai bret mollumo'noso'moneyokwe neya duudono.” Kuudokaikono.

Kuuguudo Sugudo akav Makolluro sakwollokakwono Mak 14:61

Toro samuugojoka kwol kuruv gamoro wuujo'mo tov mwinoduke tool yogalo puru'monodo kuruv maravokaikono. Toro toollu pris aguto tool aki aiko te samuugojokaikono. “Guu Krais tookudeyo? Gooti sugudo to'no kuuwosuko toolluro kwolaiyo tookudeyo?” Samuugojokaikono.

Luuk 2:11

Kuuguudo sugudo su tov arokwono. Anuugwo toga a'mwo aguto kig Devitolluro wagwolago tovi anakuuto tomuu abolo puruv kwolaiyo muudoga pwollu soma'mokakwono. Kwolaiyo su tool kemi ma'no ma'nodo tovuro kirumwallo tovida'ai bomollurolovekumokalokwiyo'moneyokwekono. Aki kwolaiyo su tool Agutekono. Su tool Gooti toolluro ajesoka Krais tookono.

Joon 1:49

Toro wuujuno sumaiyokwe Natanyol kuudokaikono. “Ibwasokweyoloo, Gooti toolluro Kwolaiyo kuunodo tool guu kwekugono. Aki Isuraiyolda'ai Aguto Kig tool guu kwekugono.” Kuudokaikono.

Joon 11:27

Toro kuudoganoka toga Martav aro kuudokakwono. “Agutoloo, nebalokwono. Nuvu gumino kuudo agubwemono. Guu Gooti toolluro Kwolaiyekugono. Aki Gooti toolluro nekullo'mwojo'moneyokwe ajesoka Krais toolluno, “kwako akavi nobwonekono,” dodupudo tool guu kwekugono.” Kuudokakwono.

Joon 20:31

Toro kuvi kuruv kuuguudo me'no sokwollosumo su ton kevu aro tonyuno kuudo uubwepureyokweyo'mokwono. Oo nebalo'mdeyo. Jisasol Gooti toolluro amonekwopiyaboka Krais tool kwoldeyo. Aki toro tool Gooti toolluro Kwolaiyoldeyo. Su toro toolluno kevu kuudo kuubwepi tov gamoro yovo tovi'aro aiyo yiunokuudo mujomwekovlaiyo'moneyokwe tov nomapinogaikikono.

Joon 6:57

Moro Nyunumiyago amonuwopiyaboka tool yiuwi'nokai tonyu aiyo wiyokwekono. Toro te nuvu aiyo mwallo'moneyokwe jurogudo tov mi Nyunumiyago su to kwolluda'ai aiyo mwalodumdonyugono. Su toro to'busuko kubalno yiuwi'nokai a'mwo abolo moro kulako tovi anpi ton moro aiyo mwallo'mo jurogudo uubweyodo'mure tovida'ai aiyo yiunokuudo mujomwekovla'mwalpinogano.

Joon 6:68

Toro kuudoganoka tovi Saimoon Pital aro kuudokaikono. “Agutoloo, nevu agugollu'mowa'ji tov ala'mwollomno plawanonoldeyo? Guu tookuno'gwowi aiyo yiunokuudo mujomwekovlaiyo'moneyokwe yogalo tov mwora'dumdekugono.

Joon 6:69

Toro te nevu gumino kuudo me'no agubwemwakuuwo toonol aro kuudo saguu'mwakuuwono, Oo guu Gooti toolluro sugudo kuunodo tookudeyo, kuudo saguu'mwakuuwono.” Kuudokaikono.

Kuurotokwe 14:15

“Nami a'mworavoo, kemoro su toro sadokwopo tov buro'nyo'mo'mdeyo? Nav toonal kev togaikulbusuko kwako akavida'ai a'mwo yasuwa'nodonakono. Toro toonal kemino tov aro kuudo sau'mwakuuwolo. “Kemi kuunano gooti su tooraino buulo uugunyumopiyopi Gooti aiyo mwalodowodo toollomno neya abupuro.” Su toro kuudo yau'dowol kuuguudo sugudo akakwe aikumokamwakuuwolonakono. Gooti aiyo mwalodowodo su tool sulugumdo tokwe'aro kwako tokwe'aro soolwara tokwe'aro tonyu sokwollosokagano. Aki yiuwi'nokai sokwollosoka su towai mwalodupudo kugai'aro tonyu sokwollosokaikono.

Kuurotokwe 8:36

Toro yodubwosumovla'mno sumaiyokwe puuto tomuu kuuno plavolno wonyo buugo pwol wo'duke toollu wobo toru ai'movolorakono. Toro ki'mo'mno sumaleyokwe a'mwo Afrikada'ai tool Filipollu kuudokaikono. “Guu wonyo buugo kwosuko akaigwollu doonyopiyawono. Toro te aga nokwo'mo'mno'juki buugo su toollu guu wonyo mogalanuvollubino'mo anyunadopiyo.” Kuudokaikono.

Kuurotokwe 9:20

Toro mwalodowo wagwolago su tovida'ai Juu tooravuro i'bwo'nyago tonyu yere kuulodawo aro amoruujajukekono. “Gooti Toolluro Kwolaiyo kuunodo tool Jisasol kwekono.”

Room 1:4

Toro tool me'no aboloka toga Gooti tool aiyo aiko te amodukavokaikono. Toro amodukavoka tovino jurogudo kuunodo tomgu'aro Gooti toolluro Kuullo tool kuu'maiyo aro anekuduuwalladopiyo. Nemi Aguto Jisas Kraisol Gooti toolluro Kwolaiyo kuunodekono.

2 Koorin 1:19

Kuudo neya jaullulo. Sumdomgu nuuge'aro Sailaseke'aro Timootiyeke'aro toonol Gooti toolluro Kwolaiyo Jisas Kraisolluno kemi me'no amodekumollowonogano. Jisas Krais su tool gamoro mido tokwe, Awiyo, kuudo yaurowo'ji gamoro mago tokwe, “Tade,” miyoukuu'najokwekono. Toro kwol kuruv yiuwi'nokai toga, “Tade,” to'no dowo'ji kuvinono uumjunyokwekono.

2 Koorin 3:3

Aki kevu aro tovino kuu'maiyo toru wuuduuwallodupudogaikikono. Kevu Krais toolluro pas sokwollopiyaboka to'busukogaikikono. Pas su tov nemoro ato tovi'aro sokwollopiyabokakwono. Pas su tov pen tokwe puukwollo sakwolloka'maiyo. Toro kuvi kuruv aiyo mujomwekovla'mdowodo Gooti toolluro Kuullo tooke to'gwowi sakwollokakwono. Aki pas su tov Moosesolluro loowo to'busuko sulbweko tousi puukwollo sakwolloka'maiyo. Toro kuvi kuruv a'mwo abolo tonyuro poowokalago tomuuno'gwowi me'no yokwollubweyodowodokwono.

2 Koorin 6:16

Aki kuunano gooti pwol Gooti toollu ilomoropiyo'moneyokwe ago tovi anakuuto tomuu nokwo kuulludapiyonoldukono? Awiyo, ku'nono maulludapiyonekono. Kuudo neya jaullulo. Nevu Gooti aiyo mwalodowodo toollu ilomoropiyo'moneyokwe ago to'busuko wimo'nodowadonogano. Su toro tovino Gooti tool aro me'no adokaikono. “Nuu a'mwo abolo tonyu akuuto tomuu mwalo'mi su togai pla'mwalmonyugono. Toro toonyu kemoro Gooti kuunodo nuuwimo'numwalmonyugono. Aki su ton moro a'mwo abolo kuunodo nonyumo'numwalpinogano.” Gooti tool su toro me'no adokaikono.

1 Tesaloonaika 1:9

Toro kuvi kuruv a'mwo abolo su tono'gwowi kevu nemi ilaiyo amollonekumaropo togaikulluno kuuguudo me'no junodupudogano. Aki kevu kuunano gooti toorai buulo uugunyumopino sumaveyokwe Gooti kuunodo toollomno bo'mno gamoro womdo wimovla'mdopure kuvino kuruv me'no yajunodupudogano. Gooti kuunodo su tool aiyo mujomwekovla'mdowodekono.

1 Timooti 3:15

Nuu kemi yere mabekuru'ma'mi tov kevu kuuguudo akavino sogwollo nenpiyo. Kuuguudo akavi wonopi kemoro nyomjomwekovla'mwalpino tovino aro kuudo nokwo youromapinogaikikono. Oo nevu Gooti aiyo mujomwekovla'mdowodo su toolluro mollu'bwoto tonol gamoro ago wimo'nodowadonogano. Aki toro tonol anyutuko to'busuko imo'nodowa gamoro nebaikuuguudo tovi sobanyo molloda'mdowadonogano. Toro molloda'mdowa'jure tovida'ai nebaikuuguudo su tov guureji yoda'mdowodokwono. Su toro kuudo nokwo youromapinogaikikono.

1 Timooti 4:10

Toro te nevu womdo bwotonyo imo'na'dowa guurejuno mujumovla'mdowadonogano. Su tov aro tovinokwono. Nevu Gooti aiyo mujomwekovla'mdowodo toolluno sogwollo kinodowadonogano. Gooti su tool yiuwi'nokai a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe tookono. Toro toolluno kuudo me'no uubweyodowado tonollu kuvinono bomollurolovonekumokalokwodowodekono.

Hibruu 10:31

Toro te Gooti aiyo mwallokwe su tool a'mwo pwollu kuudo wuuteyo'moneyokwe agalomworaro'ji tov a'mwo su tool luko bwotonyo neya imwalonekono.

Hibruu 12:22

Kevu muumuudo su toollu abai'mo'mwakopogaikulmaiyo. Toro kuvi kuruv kevu muumuudo Saiyoon toolluno'gwowi wobo toru me'no abai'mo'mwakopogaikikono. Aki kevu Gooti aiyo mwallokwe toolluro wagwolago Jeruusalem kuvi kuruv bai'mo'mdupudogaikikono. Wagwolago su tov muunyu kai'muu wo'dowodokwono. Su tomuu tausen tausen ensel tooro i'bwo'nomwalodupu ilaiyo yodupudorogano. Toro i'bwo'nomwalodopure su toorai wobo toru kevu me'no bai'mo'mdupudogaikikono. Aki a'mwo pwolnodo kwol kuruv yiuwi'nokai ensel bwotonyago su toorai ku'nono majagilonekono.

Hibruu 3:12

Toro te miyobuuravoo, kevu wako neya dou'nogaulo. Kevnokweyogaikulluro poowokalago ton kirovanyuvanyu kuudo tooro noullo'movaikwopimwalpiyo. Aki kemoro poowokalago su togai Gooti toolluno kuudo uubweyodupudo tovi nomolluduvolmwalpiyo. Aki kemoro poowokalago su ton Gooti aiyokwe toollu buulo uugunyumopiyo'moneyokwe nomollubworekumokavla'mwalpiyo.

Hibruu 9:14

Meme toorogai'aro buulmokau toorogai'aro tooravuro mujako tokwe su toro amollol'movodukwopinyajupo kuvi kuruv Krais toolluro mujako to'gwowi meme toorogai'aro buulmokau toorogai'aro tooravuro mujako tovi muunyu toru'aro uuwolo'mdowodokwono. Su tov aro tovinokwono. Gooti toolluro Kuullo yiunokuudo mujomwekovla'mdowodo toolluro jurogudo tokwe Krais tool sipsip meme kaiya'nodomaiyokwe pwolbusuko imo'no'no gavnokwe tool Gooti toollu kwiroudapinokaikono. Toro toolluro mujako su tov nemi mollol'movanekudukwopiyodowodokwono. Mujako su tov nemi poowokalago tovida'ai bolnodo'moneyokwe pasudo me'no kuulanekwo'dupudo toorai mollol'movanekudukwopiyodowodokwono. Nemi toro mollol'movanekudukwopiyodowodo su tov nevu Gooti aiyokwe toollu womdo wimwalano'moneyokwe tovinokwono.

1 Joon 4:15

Toro dodoluwosodowa'jure tovi a'mwo pwol wuu'nowo'ji aro dodowiyoku'bworosonekono. “Oo nebalo'mdeyo. Jisasol Gooti toolluro Kwolaiyekono.” Dodowiyoku'bworosonekono. Gooti tool a'mwo su toro adodowiyoku'bworoso'ji toollu nuuguro'mwonyonekono. Aki a'mwo su to kwol kuruv Gooti toollu nuuguro'mwonyonekono.

1 Joon 5:20

Aki nevu aro tovino kuudo me'no youroma'dowadonogano. Gooti toolluro Kwolaiyo tool kwako akavi me'no abwolomwalokaikono. Toro bwolomwalno sumaiyokwe Gooti kuunodo su tool gavnokweyolluno kuudo youromallo'moneyokwe tov nemi me'no anekullabokaikono. Toro te nevu Gooti kuunodo su toolluro Kwolaiyo Jisas Kraisollu uuguro'mwonyodowadonogano. Jisas Krais su tool Gooti kuunodekono. Aki yiuno Jisas Kraisollu'aro nevu aiyo yiunokuudo mujomwekovla'mwalanonogano.

1 Joon 5:5

Toro te kwako akavida'ai tooravuro jurogudo tovi uuwoleyo'mo tov aro tomgu'arokwono. A'mwo pwol aro kuudo uubweyonekono. Oo Jisasol Gooti toolluro Kwolaiyekono. Yiuno a'mwo su toro kuudo kuubweyo'ji toolno kuvinono uuwolowonekono.

Adodolukuu'nosungiko 7:2

Aki nuu ensel pwol kuujo tool sulopiyamoka tomuuda'ai boduke toollu kwononyugono. Toro tool Gooti aiyo mwalodowodo toolluro a'mwo abolo tonyu nojeso'mo purukwe amokabokaikono. Toro mokabino sumaiyokwe ensel aral aral tooro kwako tokwe soolwara tokwe tovallu kaiyako igollo'moneyokwe jurogudo kuubweyopo su toorai ensel tool deko guureji aro kuudokaikono.