Luuk 3:11 - Gooti Toolluro Yogalokwono11 Toro kuudoganopo tonyu Joonol aro kuudokaikono. “A'mwo pweku youro puruval kurukwenyudeyokwe a'mwo youro nonagutokwe pwollu gumoro youro puul neya duuwiyono. Aki a'mwo pweku wosamujuko kurukwenyudeyokwe a'mwo supto yodowo'jure pwollu neya duuwiyono.” Kuudokaikono. အခန်းကိုကြည့်ပါ။ |
Luuk 3:11
22 ပူးပေါင်းရင်းမြစ်များ
Toro kuudoka toollu Jisasol wonyuno sumaiyokwe aro kuudokaikono. “Guu puvino supto kuuno sadokuuno. Mi neya donumjunono. Guu mi nonumjunyo'mo tooku aro ibinekugono. Gumoro yiuwi'nokai kuto ivito ton maket tovi neya doosono. Toro woso'bi nuugwiyo agubipi tov a'mwo apoo'nyaiyo tekwojai neya duumwodeyono. Toro uumwodeyogala'bi toga mi neya donumjunogawono. Toro tooku lukomgu Gooti toolluro ago toru sulomwalbi toga sugumaluko kuunodo pun noma'binekugono.” Kuudokaikono.
Toro duu'mwojodopure kuvi kuruv Sakiyasol gami ago tovi anakuuto tomuu iloda'mno sumaiyokwe Aguto toollu aro kuudokaikono. “Agutoloo, duu'nono. Nuu moro yiuwi'nokai kuto ivito mollu'bworosodumdo ton puruval dovorojosumonyugono. Toro adovorojosumi su tovalluda'ai puruv maro'mi a'mwo abolo apoo'nyaiyo tobuurai yasuwa'no wimonyugono. Aki nuugwiyo kwalo tovida'ai pwekwo a'mwo kaiyako sugollajo toorai neya wimonyugono. A'mwo abolo punyuro nuugwiyo tov kuunano ade'nomallajo su ton pugai'aro aiko te neya wimonyugono. Toro toonyu kemoro nuugwiyo pwolno pwolnodo ai'nomallajo su tov aki aiko te aval aval neya wimonyugono.” Kuudokaikono.
Toro tooraida'ai pworo aro kuudo sauroporogano. Oo Juudasol nemoro nuugwipweyo mwora'dowodo toollu Jisasol aro tovino kuudumokaldeyo, Guu lubullu doto yanano'moneyokwe wosamujuko pun dobiyomorawono oo Guu a'mwo abolo apoo'nyaiyo pubuurai nuugwiyo pun neya duuwiyono. Su toro tovino kuudumokaldeyokwe tovino kuudo sauroporogano.
Toro toorai mido amollomwallajuko Kooniliyosol Gooti toollu dolago tomuu mwallo'mo tool gami julkwolaiyo togai'aro tonumdoto po'dogalo uumjunodupu Gooti toolluno sulomoropiyajupogano. Aki toro tool yiuwi'nokai toga Juu a'mwo abolo apoo'nyaiyo tobuurai kuto ivitodeyo oo nuugwiyodeyo ton yasuwa'no bwotonyago kwiyajukekono. Aki toro tool Gooti toollu yiuwi'nokai toga subusu'nyogalo kuujajukekono.
Toro boda'mno sumaiyokwe aro anyudumwa'jukekono. “Kooniliyosoloo, gumoro subusu'nyogalo ilodopiyodamdo tonyu Gooti tool me'no guu'nodowodekono. Aki a'mwo abolo apoo'nyaiyo tobuurai yasuwa'no wiyodumdo tovino me'no gwonodowodekono. Gumoro su toro yodumdo tonyuno Gooti tool kuudo miyallulo'gwonodowo me'no youroguma'dowodekono.” Anyudumwa'jukekono.
Toro wuudoduke toga Kooniliyosol ensel su toollu wonyuno sumaiyokwe luko bwotonyo yo'no aro kuudoganokaikono. “Agutoloo, buro'nyo'mekudeyo?” Toro kuudoganoka tovi ensel tool aro kuudokaikono. “Gumoro subusu'nyogalo ilodopiyodore tonyu Gooti tool me'no guu'nodowodekono. Aki guu a'mwo abolo apoo'nyaiyo tonyu yasuwa'no wiyodumdo tovi me'no gwonodowodekono. Gumoro su toro yodumdo tonyuno Gooti tool kuudo miyallulo'gwonodowo me'no youroguma'dowodekono.”
Yogalo akav agasuro Jisasolluro a'mwo abolo pun nuugwiyo bwotonyagokwe tonyu dumul'mwojo'mokwono. Toro te guu a'mwo abolo su tonyu guureji aro neya duudogawono. “Kevu ilomoropunyu kuudo nyau'mwalpiyo. Aki kemoro nuugwiyo su ton yere imagwo'nodupudo tonyuno tov kemi nuugwiyo su tonyuno kuudo bwotonyo nuubwemwalpiyo. Toro kuvi kuruv Gooti toolluno'gwowi kuudo neya duubweyogaulo.” Duudogawono. Gooti su tool nemi ilaiyo yanekullugollo'moneyokwe yiuwi'nokai noonyumwonyu supto yodowado ton bwotonyago youllanekubweyodowodekono.
Toro te Jisasolluro a'mwo abolo nuugwiyo bwotonyagokwe ton sugupasudo tollovaino apoo'nyaiyo tobuurobusuko nyumo'numwalpiyo. Toro kun kuruv sugupasudo bwotonyago tollovogai neya amomjumovlavogapuro. Aki a'mwo abolo su ton pubuuro supto yodopure tobuurai wiyo'mwojo'moneyokwe kemi nuugwiyo togai yado yere neya uumwodemwalpinogano.
Gooti tool pasudo idopto'nodo to'no yokwekono. Toro tool kemoro womdo ilaiyo mujumovla'mdopure tonyuno kuudo miyallulo'gwonyokwekono. Aki kevu Gooti toolluno kalo buuropino ikullunodowodo tovida'ai gamoro a'mwo abolo su tonyu mollomwalodopure kuvino kuruv miyallulo'gwonyokwekono. Pasudo su tovi kuuno mujumovla'mdupudogaikikono.
Lootuu pasudo kuunodo puru'gwowi nemi Nellunumiyago Gooti toolluro sumdo tovi kaiya'no mimo'nodowodokwono. Su tov arokwono. Nevu kwoloraiyo solkaiyo tobuurogai'aro abekanyo tobuurogai'aro tobuuro jul'nyo mo'movla'mdopure su tobuurai neya mollomwalmwalanonogano. Aki nevu kwako akavida'ai kaiya'no pasudo toorai manyu tomuu'aro neya irukuruwolo'mwalanonogano. Lootuu pasudo kuunodo tov su torokwono.
Mi avalobuuravoo, a'mwo pwol aro donekono. “Nuu Krais toolluno kuudo kuubwemwakono.” Toro dowo'ji kwol kuruv sugupasudo pugai'aro mamolludo'movlawo'ji to'gwowi a'mwo su toolluro yogalo tov yiuno yasuwa'yogalo to'no imo'nonokwono. A'mwo su toolluro, “Oo kuudo kuubwemwakono,” yasuwa'yogalo ado'ji su tov gami ma'no ma'nodo tovuro kirumwallo tovida'ai nokwo bomollurolovomokalokwonoldukono? Awiyo. A'mwo su toolluro yasuwa'yogalo ado'ji tov gavnokweyolluro ma'no ma'nodo tovuro kirumwallo tovida'ai ku'nono mabomollurolovomokalokwonekono.
A'mwo pwol kwako akavida'ai kuto ivito ton kurukweyonyudeyo ado'ji su tool Jisasolluro a'mwo supto yodowo'jure pwekwoji kwono'ji tov neya wiyo'mwojonekono. Toro kuvi kuruv a'mwo su tool a'mwo supto yodowo'jure tekwojuno kalo mwinowo'ji mwiyo'mwojo'ji to'gwowi Gooti toolluro kalo buuropino winyo'moneyokwe pasudo tov a'mwo kuto ivitokwe su toollu kuuluuwo'dowodoldukono? Awiyo, Gooti toolluro kalo buuropino winyo'moneyokwe pasudo tov a'mwo mwiyo'mwojo'ji su toollu mauluuwo'dowodokwono.
Toro te Jisasolluro a'mwo pwol aro donekono. “Oo nuu Gooti toolluno kalo buuropino nyunodowodonyugono.” Toro dowo'ji kwol kuruv gami avalo Jisasolluro a'mwo abolo pubuuraino suroguudo sauro'ji to'gwowi a'mwo su tool yiuno kuunano yogalo to'no youkuu'nadonekono. Su tov aro tovinokwono. A'mwo su tool gami avalo Jisasolluro a'mwo abolo pubuurai me'no wonodowodekono. Toro wonodowodo kwol kuruv su tobuuraino kalo buuropino mwino'ji to'gwowi Gooti mwonodowodo kwolluno kuruv kalo buuropino ku'nono mwinonekono.
ကြော်ငြာတွေ