Gooti Yawel aro adokaikono. “Oo Saiyoonda'ai togaikul ilaiyo bwotonyo yopi kemi wagwolago Jeruusalem towaida'ai ilaiyo deko dodelowo'nallulo. Kemi aguto kig abadopiko toollu denomallulo. Toro tool gami molo wiyodupudo toorai uuwolo'mdowo yovo agutokweyekono. Toro kwol kuruv gavnokweyol ilomoropunyu miyokwekono. Toro tool yovomaiyokwe pwolbusuko doonki muugunyo pwollu muunyu toru ilomwalodowo abadopiko toollu denomallulo.” Adokaikono.
Luuk 19:38 - Gooti Toolluro Yogalokwono38 Toro ton aro aduumjunopogano. “Ilaiyokwono! Gooti toolluro sugumaluko to'no kwosungiko akallu amonekwopiyamokaikono. Aguto kig su tool Aguto toolluro yovo tovida'ai abumokaikono. Toro tool nevu sumwoluko kavo wosunyo'moneyokwe tovino Gooti toolluro ago muunyu kai'muuda'ai abadopiyo. Aki Gooti toolluno yovo tovi muunyu toru'aro ilomoropiyowanoo!” Aduumjunopogano. အခန်းကိုကြည့်ပါ။ |
Luuk 19:38
21 ပူးပေါင်းရင်းမြစ်များ
Toro lobiyosuno sumaveyokwe Jisasol puuto tovi nouloduke toga a'mwo abolo pun sumdomgu aki pun lukomgu deko aro aduumjunopogano. “Anekullo'mwojonoo, aguto kig Devitolluro muugunyo tool ilaiyekonoo! Gooti toolluro sugumaluko to'no kwosungiko akallu amonekwopiyabokaikono. Toro tool Aguto toolluro yovo tovida'ai abumokaikono. Ilaiyokwono, muunyu kai'muuda'ai tool anekullo'mwojonoo!” Jisasollu ilaiyo mollomallo'mo ton toro aduumjunopogano.
Su toro toga aguto kig toonyu a'mwo abolo anato tomgu amwalpi tonyu aro wuudumonyugono. “Oo moro Nyunumiyago toolluro sugudo pun ikubweyodowodogaikikono. Toro togaikul aguto kig mido mollomwalo tovida'ai sugudo ton kuvinono mapino'moneyokwe dobiloo.” Wuudumonyugono. Sugudo mapino su ton aiyoga kwako akavi muudu'no sokwollosoka togada'ai kemiyo'mo me'no sovrovaikubweyokagano.
Toro kuvi kuruv neya duu'nyulo. Gooti tool ikwonyapino to'no yonekono. Toro yodowo'jure tovida'ai kemoro wagwolago tov kaiyako i'nopiyowo'ji anyabuullo to'no nyumo'nonokwono. Aki aro ikudumo'mokwono. Kevu numi aki aiko te yere manuwonpinorekikono. Toro kuvi kuruv iruko pullugwoji mino tov aro dupinorekikono. “Oo ilaiyokwonoo! Gooti toolluro sugumaluko to'no kwosuko akallu amonekwopiyamokaikono. Toro tool Aguto toolluro yovo tovida'ai abumokaikono. Ilaiyokwonoo!” Kevu su toro adupi toga'no numi aki aiko te nonuwonpinorekikono.”
Toro te nevu Krais toolluno kuudo me'no uubweyodowado tonolluno Gooti tool, “Sugudogano,” danekubweyoduke tovida'ai gamoro sumdo tovi sugudo wimo'nodowadonogano. Toro tovino tov nevu Gooti toolluro ikomago mwimo'nodowadonogano. Toro kuvi kuruv nemi Aguto Jisas Kraisol nekullo'mwojo'moneyokwe womdo tov me'no sopiyokaikono. Toro sopiyoka tovino Gooti tool kuudo yaurowo'ji gamoro sumwoluko tov nemino kavo nekubweyodowodekono.
Toro te sumdomgu nevu Juu tonolda'ai Krais toolluno kuudo kuubweyowonogano. Krais su toolluno a'mwo abolo pun kuudo yere muubweyodopure kuga kuruv nevno'gwowi kwolluno sogwollo me'no kwingovlaiyajuwonogano. Toro tovino tov aga nevu sumdomguda'ai tonol yasuwa'no nomjomwekovla'mwala'jo. Toro kunol kuruv Gooti toolluno yovo jurogudo su tovi yiuwi'nokai toga neya ilomoropimwolowanonogano.
Toro te Gooti tool gami Kwolaiyo kalo buuropino winodowodo toollu'aro gamoro yasuwa'wino sugumaluko nekullabodowodo su tov kuvinono nonekubweyodowodekono. Yasuwa'wino sugumaluko su tov kula'nyo'maiyo. Bwotonyo kuunodokwono. Toro tovino tov nevu yiuwi'nokai toga Gooti su toolluno neya ilomoropiyogawano.
Kuvinono bomollolupto'nosodowodo su tov arokwono. Nevu Juu tonogai'aro a'mwo abolo Juu tonolluro miyaikuuwosunodowado togaikike'aro tonol aval'no i'bwo'nodowa Jisasolluro mollu'bwoto puru'mono imo'nodowadonogano. Mollu'bwoto puru'monodo su tovi'aro Gooti toolluro pi'mwo kuudo tovi kuu'maiyo toru'no bomollolupto'nosodowodokwono. Su toro bomollolupto'nosoduke tovi muunyu kai'muuda'ai ensel kworo kuruv muugona'dupudorogano. Ensel mido mollomwalokwe toorogai'aro ensel yovokwe toorogai'aro tooro Jisasolluro mollu'bwoto su tovi muugona'dupu aro kuudo youroma'dupudorogano. Oo Gooti tool pi'mwo kuudo bwotonyago kurukweyoldeyo. Kuudo youroma'dupudorogano. Gooti tool kuu'maiyo toru'no su toro bomollolupto'noso'moneyokwe kuudo me'no sovo'dogallaullajukekono.
Aki nevu yiuwi'nokai Jisasolluro mollu'bwoto kunol kuruv Krais Jisasollu me'no uuguro'mwonyodowado tovino tov Gooti Jurogudo Kuunodo su toolluno to'no neya ilomoropimwolowanonogano. Nevu agasuro Jisasolluro mollu'bwoto tonogai'aro lukomguda'ai sumo'nugelabupi kugai'aro yiuwi'nokai tonol kwolluno neya ilomoropimwolowanonogano. Nebalokwono.
Aki Gooti su tool yiuwi'nokai kwako akavi mwalodupudo togai'aro sulugumdo tovi mwalodupudo togai'aro yiuwi'nokai su tonyu gami wobo toru aki aiko te momgurowoso'mo winyokwekono. Toro tool gami Kwolaiyo toolluro mujako tov i'noguropte tovi abwoloka su tovi'aro sumwoluko noullo me'no wosunodowodekono. Gooti tool su toro tomgu'aro yiuwi'nokai tonyu gami wobo toru aki aiko te kuvinono momgurowosokwekono.
Gooti tool aiyoga proofet su toorai aro tovino me'no kuuduuwallokaikono. “Kemoro proofet yogalo moruudodupudo womdo su tov kevnokweraiyo'mo'maiyo. Toro kuvi kuruv yogalo amoruujajupo su tov a'mwo abolo lukomguda'ai billumo'nupino tonyo'mokwono.” Gooti tool proofet su toorai kuu'maiyo me'no kuuduuwallajukekono. Toro te proofet yogalo su tokwe a'mwo kuurotokwe tooro modomollodupudorogano. Toro modomollodupudo su tov kev togaikullo'mokwono. Aki Gooti tool aiyogasuro su toorai gamoro Kuullo tool muunyu kai'muuda'ai kwolomoropiyabokaikono. Toro toolluro jurogudo tokwe Krais toolluno kuuguudo sugudo tov amodekumollajuporogano. Aki ensel kworo kuruv proofet tooravuro yogalo su tovino kavlo tov kuudo youromallo'mo winodupudorogano.
ကြော်ငြာတွေ