Kooloosi 3:24 - Gooti Toolluro Yogalokwono

²⁴ Kevu Krais toolluro womdo yodupudo togaikul aro tovino kuudo nyau'mwakovo. Aguto tool gamoro kwoloraiyo tobuurekullu ikullabiyo'moneyokwe me'no sovrowosungiko tollovo mubiyo to'busuko kuvinono nekullabwonekono. Aki kevu womdo wiyodupudo togaikulluro mido mollomwalokwe kuunodo su tool Krais tool kwekono.

Kooloosi 3:24 ပူးပေါင်းရင်းမြစ်များ

Muuduko 15:1

Toruda'ai Gooti Yawel Eburamollu wojo tovibusuko wiyalo'no'no aro kuudokaikono. “Eburamoloo, luko mibinono. Gumi sabiyo tou'busuko gujumo'nodumdo toonyu yellukuromollogumwalodumdonyugono. Toro toonyu mubiyo sugudo pun nogujamonyugono. Toro agujami su ton sugudo kuunodogano.” Kuudokaikono.

Matyuu 10:41

Aki a'mwo pwol a'mwo proofet mollajokwe pwolluno, Oo a'mwo akal proofet mollajokwe tooldeyo, kuudo yaurowo'ji ilaiyo amollomaro'ji tov a'mwo su tool Gooti toolluro mubiyo sugudo pun nomaronekono. Gamoro mubiyo marono su tov proofet mollajokwe tooravuro mubiyo amapi to'busuko kubalno aval'no nomaronekono. Aki a'mwo pwol a'mwo sugudo pwolluno, Oo akal a'mwo sugudoldeyo, kuudo yaurowo'ji ilaiyo amollomaro'ji tov a'mwo su to kwol kuruv Gooti toolluro mubiyo sugudo pun nomaronekono. Gamoro mubiyo marono tov a'mwo sugudo tooravuro mubiyo amapi to'busuko kubalno aval'no nomaronekono.

Matyuu 5:12

Kevu ilaiyo yopi aki kemoro sumwoluko kun kuruv ilaiyo to'no nokwo imwalpinogaikikono. Su tov aro tovinokwono. Kevu Gooti toolluro ago toru sulomwalpi toga kemi yiuwi'nokai mubiyo bwotonyo ton nomapinogaikikono. Kevu kuudo neya jaullulo. A'mwo kemi kaiyako yaikullugolodupudo su tooro sumdomguda'ai kemi proofet kworai kuruv kaiyako aval'nodo tomgu'aro sugollajuporogano.”

Matyuu 5:46

Kuudo neya jaullulo. A'mwo abolo pun kemino kalo buuropino ikullunodupudogano. Su toro ikullunodopure tonyuno to'no kevu kalo buuropino amollupi tov pasudo su tovino mubiyo sugudo pun nonagutokwono. Su tov aro tovinokwono. A'mwo kaiyako igolodupudo takis nuugwiyo mallokwe kworo kuruv pasudo avalo su tov yodupudorogano. Toro tovino tov pasudo su tovino mubiyo sugudo pun nonagutokwono.

Matyuu 6:16

Aki Jisasol aro kuudokaikono. “A'mwo kuunanokwe su tooro aro kuudo yau'dupudorogano. Oo nevu wosamujuko tonyuno kumako mwalodowa'jure toonollu a'mwo abolo pun neya anekwonpuro. Su toro kuudo yau'dupudo tooro kemoro sumdomago ton kumjuju kulako moropiyodupudorogano. Nebal'no ikudumo'mokwono. A'mwo su tooraino a'mwo abolo ton yovo aguto wiyodupudo tov kemi mubiyo to'busuko wimo'nodowodo su tovi me'no ma'dupudorogano. Toro kuvi kuruv kevno'gwowi wosamujuko tonyuno kumako amwalpi togaikul a'mwo kuunanokwe toorobusuko kumjuju kulako nomoropinmwalpiyo.

Matyuu 6:5

Aki kevu subusu'nyogalo wuujo'mo togaikul a'mwo kuunanokwe pworobusuko subusu'nyogalo nodumwalpiyo. A'mwo kuunanokwe su tooro aro kuudo yau'dupudorogano. Oo nevu subusu'nyogalo wuudodowado toonollu a'mwo abolo pun neya anekwonpuro. Kuudo yau'dupudorogano. Pasudo su tovino ilaiyo bwotonyo winyokwerogano. Toro tooro Juu tooravuro i'bwo'nyago tonyu kuulomwalodupudo tomge'aro aki puuto aguto yomollodupudo tomge'aro tomuu kuu'maiyo toru'no davopi subusu'nyogalo wuudodupudorogano. Su toro tooraino nuvu nebal'no ikudumo'mokwono. A'mwo su tooraino a'mwo abolo ton yovo aguto wiyodupudogano. Su toro wiyodopure tovida'ai yovo aguto ma'dupudo su tov kemi mubiyo to'busuko me'no ma'dupudorogano.

Luuk 14:14

A'mwo adoma'bi su tekwojo gumoro wosamujuko kwibi to'busuko pun aikomgu ku'nono magujabupinorogano. Toro te guu su toro toorai kwibi tovino ilaiyo to'no neya jogawono. Su tov aro tovinokwono. Gooti tool lukomgu a'mwo abolo ton aiyo aiko te adukapi toga gumi mubiyo sugudo tov nogubiyonekono.”

Luuk 6:35

Toro kuvi kuruv kev togaikulno'gwowi kemi ikomago ikullumo'nodupudo tonyuno kalo buuropino neya domollogaulo. Aki toro tonyu ilaiyo to'no neya jugologaulo. Aki kemi dinau aikullupi toga kevu aki aiko te neya anekullabupureyokwe kuudo nyau'mwalpiyo. Kevu su toro tomgu'aro supi tovino Gooti toolluro mubiyo sugudo bwotonyo pun nomapinogaikikono. Kuudo neya jaullulo. Gooti Yiuwi'nokai Tonyu Uuwolo'mdowodo tool a'mwo abolo, Nenoloo, muudodupudo togai'aro a'mwo abolo kirovanyuvanyu kirounomollodupudo togai'aro yiuwi'nokai a'mwo abolo su tonyu ilaiyo aval'no igolodowodekono. Toro te kev kugaikul kuruv Gooti su toolluro pasudo tovi aval'no kuumjungovlapi tov aro kuudo yaikuupinogano. Oo su ton Gooti Yiuwi'nokai Tonyu Uuwolo'mdowodo toolluro kwoloraiyo wimo'nodupudodeyo. Kuudo yaikuupinogano.

Joon 12:26

Aki a'mwo pwol moro womdo anyo'ji tool numi neya numjunmwalonekono. Aki nuu buro'nyo buro'nyomuudeyo tomuu amwalmi kuruv moro womdokwe su tool nuuge nomwalosunekono. Aki a'mwo pwol moro womdo tovi anyo'ji su toollu moro Nyunumiyago tool yovo aguto nuuwiyonekono.” Kuudokaikono.

Kuurotokwe 20:32

Toro te aga Gooti gavnokwe tool kemi mollekumwalmwalono'moneyokwe gamoro ato tovi amaikubwemono. Gooti su tool gamoro yasuwa'wino sugumaluko tollovaino kuuguudo tov ikubweyodowodekono. Yasuwa'wino sugumaluko su tov kevu Gooti toolluro a'mwo abolo kuunodo wimo'nodupudo togaikullu jurogudo daikullumwojumwalonokwono. Toro togaikul Gooti toolluro yiuwi'nokai kemiyo'mo jesodowodo ton lukomgu kuvinono nomapinogaikikono. Aki gamoro yiuwi'nokai a'mwo abolo kuunodo wimo'nodupudo su togai aval'no nomapinogaikikono.

Room 1:1

Nuugeravoo, mino yovo tov Poololenyugono. Toro toonyu Krais Jisasolluro ki'nato womdokwe pwonyugono. Jisasol gavnokwe tool gamoro kuurotokwe wimo'nyo'moneyokwe mi donumaro'no Gooti toolluro kuuguudo sugudo tokwe moruudomollo'moneyokwe ajanubweyokanyugono.

Room 14:18

Toro te kevu pwolno puru'monodo togaikul su toro tomgu'aro uumjunopi Krais toolluro womdo kwimovlapi tov Gooti toollu ilaiyo igolpinogaikikono. Aki toro togaikullu a'mwo abolo pun ilaiyo nokwo mollekumapinogano.

1 Koorin 11:23

Kevu neya duu'nyulo. Kuuguudo akav Aguto tool gavnokweyolluro mi anyaboka tovi kemi aikullamono. Kuuguudo su tov arokwono. Surakuuto pullugwoji Juudasol Jisasollu ikomago tooravuro ato tovi amorubweyokaikono. Toro kuvi kuruv yere mamorubweyoduke toga surakuuto avalo su tollugwoji Jisasol bret tov amarokaikono.

1 Koorin 3:8

Toro te a'mwo Gooti toolluro yogalo tokwe sumdomgu moruudodowodo tooke'aro lukomgu ibwasodowodo tooke'aro tooral womdokwe aval'no imo'nodubulorakono. Aki lukomgu yiuwi'nokai tooral kemi womdo yodubulo tovino mubiyo tov noma'bullunorakono.

1 Koorin 7:22

Neya duu'nyulo. Aguto tool guu ki'nato womdo yodore tookuji adogumaro'ji tov Aguto toolluro sumdo tovi a'mwo me'no birolo'nugolokwodowodo pwolbusuko me'no wimo'nodumdekugono. Aki su toro to'busuko kubalno Aguto tool guu me'no abirolo'nugolokwingiko tookuji adogumaro'ji to'gwowi guu tooku Krais toolluro ki'nato womdokwe pwolbusuko me'no wimo'nodumdekugono.

Galesiya 1:10

Kuudo neya jaullulo. Moro su toro aikudumo tov a'mwo abolo ton mino ilaiyo amollonumapureyokweyo'mo'maiyo. Toro kuvi kuruv nuvu yiuno Gooti toolluno'gwowi ilaiyo igollo'moneyokwe womdo wiyodumdekwonyugono. Nuu a'mwo abolo tonyu ilaiyo igollo'mo kuudo sauro'mujuko'mno'juki nuu Krais toolluro womdokwe kuunodo mwimo'no'mujukekwonyugono.

Efesos 6:6

Aki toro togaikul kemi mido mollekumwalokwe toorai ilaiyo igollo'moneyokwe kevnokwe tooro muugonaikwo'dopure toga'no to'no womdo guureji nyumwalpiyo. Kevu su toro supi tov sugudo mipinogaikikono. Toro kuvi kuruv kevu Krais toolluro ki'nato womdokwe togaikulno'gwowi Gooti toolluro ilaiyo winodowodo ton kemoro poowokalago tovi kuulaikwo'dowodokwono. Su toro kuulaikwo'dowodo tovi uumjunopi kemi mido mollekumwalokwe tooravuro womdo tovi ilaiyo to'no neya duuwimovlavogaulo.

Efesos 6:8

Kevu kuudo neya jaullulo. Nevu ki'nato womdo yodowadonoldeyo oo yasuwa'no mwalodowadonoldeyo yiuwi'nokai tonol sugudo sa'ji tov lukomgu Aguto tool gavnokweyolluro sugudo pugai nonekubiyonekono.

Kooloosi 2:18

A'mwo pwol kemi aro ikudonekono. “Oo nuu wojo suwo'numwa'jo tovida'ai pasudo muuduko uumjunyo'mo puvino me'no kwonoma'mwa'jonyugono. Su tov arokwono. Kevnokwe togaikul neya bwolomorumwogapinapi ensel toorai julomoropiyogaulo. Moro wojo kwonmwa'jo su tov agutokwono. Toro tovi kevu neya duumjunyulo.” Ikudonekono. A'mwo pwol su toro aikudo'ji kuvi kuruv kevu muumjunpinono. A'mwo su toolluro yogalo aikudo'ji tovi kevu kaduko kwipi tov a'mwo su tool kemoro muunyu kai'muuda'ai mubiyo sugudo tonyu nyupolekumaro'jo. Toro te kevu a'mwo su toollu kaduko nuuwimwalpiyo. Kuudo neya jaullulo. A'mwo su tooro kemi kuudo uumdo toorai uumjunodupudo tovino tov ilomoropunyu bwotonyo yodapudorogano.

Hibruu 10:35

Kevu sumdomgu togada'ai Aguto toolluno kuudo guureji uubwemovla'mdupudogaikikono. Toro togaikul aga kuga kuruv kemi Aguto toolluno kuudo guureji uubwemovla'mdupudo su tovi nuugollu'mo'mwalpiyo. Kuudo neya jaullulo. Kemoro kuudo uubwemovla'mdupudo su tovuro mubiyo ikubiyo'moneyokwe tov kevu Gooti toolluro ago muunyu kai'muuda'ai sugumaluko tollovai kuvinono nomapinogaikikono.

Hibruu 11:6

Aki a'mwo pwol Gooti toolluno kuudo muubweyo'ji tov Gooti tool a'mwo su toolluro pasudo tovino ilaiyo mwinonekono. Toro tovino tov a'mwo pwol Gooti toollu wobo toru biyo'mo kwino'ji su tool Gooti toolluno aro kuudo neya yau'mwalonekono. Oo Gooti tool aiyo mujomwekovlaiyokweyoldeyo. Aki Gooti su tool a'mwo abolo gamiyomno biyo'mo winodopure tonyu muunyu kai'muuda'ai mubiyo sugudo pun uubiyodowodoldeyo. Su toro kuudo neya yau'mwalonekono.

Hibruu 9:15

Krais tool Gooti toollu me'no kwiroudapinoka su tov Gooti toolluro subuu'yamju muuduko tovi jurogudo imwojodowodekono. Krais su tool subuu'yamju muuduko su tovi'aro Gooti tooke'aro nevuge'aro akuuto toru momgurovonekubweyodowodekono. Aro tovino'mokwono. Yiuwi'nokai Gooti toolluro a'mwo abolo doma'dowodo ton aiyo yiunokuudo mujomwekovlaiyo'moneyokwe subuu'yamju wiyodowodo su tov kuvinono nomapinogano. Aki a'mwo abolo su ton sumdomguda'ai subuu'yamju tovi dolago tomuu amwallajupo tovida'ai ma'no ma'no pasudo tooraino kirumwallo tovida'ai mollurolowapiyo'moneyokwe Krais tool me'no abolokaikono. Su toro tovino'mokwono.

1 Pita 1:4

Gooti toolluro nonekullabwono su tovi kuvinono maranonogano. Gamoro nonekullabwono su tov buuto mabuuropiyonokwono. Aki kaiyako migolamo'nyokweyokwono. Aki su tov lapullo mimo'nyokweyokwono. Toro kuvi kuruv kevu Gooti toolluro ikullabwono su tonyu yere mama'dopure toga Gooti gavnokwe tool gamoro nekullabwono su ton gami ago muunyu kai'muu pi'mwono yellukuromollomwalodowodekono.

2 Pita 1:1

Mino yovo tov Saimoon Pitalonyugono. Toro toonyu Jisas Kraisolluro ki'nato womdo tov yodumdonyugono. Aki gamoro kuurotokwe wimo'nodumdonyugono. Kevu nemoro kuudo uubweyodowado su tollugwoji aval'no uubweyodupudo togaikullu nuu pas akav sokwollekwopiyamono. Nemoro kuudo uubweyodowado su tov nemi Jisas Kraisolluro pasudo idopto'nodo tovi'aro ma'dowadokwono. Jisas Kraisol nemi Gootekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono.

Juut 1:1

Mino yovo tov Juutolenyugono. Toro toonyu Jisas Kraisolluro ki'nato womdokwe wimo'nodumdonyugono. Aki nuu Jemsolluro gagwai'yagonyugono. Toro toonyu kemiyomno pas akav sokwollekwopiyamwakono. Toro togaikullu nemi Nellunumiyago Gooti tool kalo buuropino winyokwekono. Toro tool kemi me'no adekumarokaikono. Aki kevu Jisas Kraisolluro a'mwo abolo kuuno wimo'numwalpino'moneyokwe Gooti tool yellukuromollekumwalodowodekono.