Poolol Gooti toolluro yogalo sakwollungiko tovi toro mojagilno sumaiyokwe kavlo tov aro sodubwasokaikono. “Aiyoga muudu'nodo toga Gooti tool aro anekudokaikono. “Nuu kemi ikullo'mwojo'moneyokwe Krais tool nomekwopiyamonyugono. Toro amekwopiyami tool dado bwotonyo ton ibwosunowo'ji yiuno'no bolonekono. Toro abolo'ji kwol kuruv aiyo aiko te nodukawonekono.” Gooti toolluro yogalo tovi toro sakwollungiko su tov kuvinono me'no sumo'nokakwono. Gooti toolluro nekullo'mwojo'moneyokwe amonekwopiyaboka Krais su tool Jisasol kwekono. Toro toolluno aga nuu kuu'maiyo toru'no aikudadokwono.” Sodubwasokaikono.
Juut 1:3 - Gooti Toolluro Yogalokwono3 Miyobuuravoo, sumdomgu nuu pas puruv kemi yokwollekwopiyabiyo'mo kuudo saullajonyugono. Pas su tov aro tovinokwono. Gooti tool kevuge'aro nevuge'aro yiuwi'nokai tonollu ma'no ma'nodo tovuro kirumwallo tovida'ai abomollurolovonekumokalokwokaikono. Su toro tovino yokwollekwopiyabiyo'mo kuudo guureji saullajonyugono. Toro kuvi kuruv aga'no'gwowi nuu kuuguudo gabovo purukwe daikumul'mwojumo'monyugono. Kuuguudo su tov aro tovinokwono. Krais Jisasolluno kuudo nebal'nodo tovi kevuge'aro nevuge'aro yiuwi'nokai tonol kuudo uubweyodowadokwono. Kuudo su tovi kevu sobanyo neya domollodavogaulo. Kuudo uubweyodowado su tov Gooti tool nevu gamoro a'mwo toonolluro ato tovi yiuno puru'monodo toga'no anekubweyokaikono. Su toro anekubweyoka tov yiunokuudo mujo'movla'mwalonokwono. အခန်းကိုကြည့်ပါ။ |
Juut 1:3
44 ပူးပေါင်းရင်းမြစ်များ
Toro tool aro sajukekono. Apoolosol kuu'maiyo toru'no Gooti toolluro kuuguudo sakwollungiko tovida'ai pi'mwono aro sodubwasajukekono. “Gooti toolluro nemi nekullo'mwojo'moneyokwe amonekwopiyaboka Krais tool Jisasol kwekono.” Pi'mwono toro sodubwasajuko su tov Juu tooravuro pi'mwo kuudo tonyu kuuwolovokakwono. Aki kuuguudo su tov kemoro yogalo jo'mo winodopure kunyu kuruv kuumjukullajukokwono.
Poolol toro wuujuno sumaiyokwe aki aro kuudokaikono. “Kevu kuudo neya jaullulo. Gooti toolluro nemi nekullo'mwojo'moneyokwe womdo sopiyoka tovino kuuguudo tov a'mwo Juu tooravuro miyawosunodupudo tooraiyomno me'no amodapiyokaikono. Toro te a'mwo Juu tooravuro miyawosunodupudo kworo kuruv Gooti toolluro kuuguudo tovi wuu'nopi kuudo nokwo uubwemwalpinorogano.” Kuudokaikono.
Nemi ma'no ma'nodo tovuro kirumwallo tovida'ai bomollurolovonekumokalokwiyo'moneyokwe a'mwo yasuwa'nodo pwol ku'nono mabomollurolovonekumokalokwononogano. Yiuwi'nokai kwako akavida'ai a'mwo pwolnodo kwol kuruv nekullo'mwojo'moneyokwe jurogudo nonagutorogano. Toro kuvi kuruv nemi nonekullo'mwojo'mo toolno'gwowi nomwallo. Su toolluno yovo tov Jisasolekono.” Pital toro kuudokaikono.
Toro te Gooti toolluro kuuguudo tov yiuwi'nokai tomuu guureji bomje'nugoulno bomje'nugoulno sajukokwono. Toro bomje'nugouloduke tovida'ai a'mwo abolo gabovo pun wuu'nodupu bwotonyago ton kuudo kuubweyajupogano. Toro tovino tov wagwolago Jeruusalem towai a'mwo abolo Jisasollu uumjunyokwe ton bwotonyago sumo'nyajupogano. Aki pris kworo kuruv bwotonyago pworo Jisasolluno kuudo uubweyo'mno kwollu uumjunyokwe sumo'noporogano.
Toro yajunodopure kuvi kuruv Soololno'gwowi kuuguudo sugudo tokwe yodubwasuno yodubwasuno yodowo jurogudo sumo'nyajukekono. Toro tool wagwolago Damaskosda'ai a'mwo abolo Juu tonyu aro sodubwasajukekono. “Oo Gooti toolluro nekullo'mwojo'moneyokwe amonekwopiyaboka Krais tool Jisasol kwekono.” Toro tovino kuuguudo ton yiuno pi'mwono yodubwasoduke toga kavlo tov kuu'maiyo toru'no sumo'nyajukokwono. Toro tovino tov Juu tooro Soololluro kuuguudo yodubwasoduke su tovi ku'nono mabwolomorumwogapiyajuporogano.
Toro kuvi kuruv nevno'gwowi kemino aro kuudo saikuurowonogano. Oo Krais Jisasolluno kuuguudo sugudo su tov kevnokwe tonyuro ato tovi neya uubweyano. Toro kuubweya'ji ton Jisasolluno nebaikuuguudo su tovi yiunokuudo neya uumjungovla'mwalpinogano. Nevu kemino su toro kuudo yaikuu'no sumawoneyokwe a'mwo kuunanokwe su tooravuro yogalo dodopure tonyu yiuno puga'nodo kuruv kaduko mwiyowonogano.
Toro togaikulluno tov go'no go'no mimo'nodupudogaikikono. Kevu Juu togaikike'aro Juu miyawosunodupudo togaikike'aro togaikul go'no go'no mimo'nodupudogaikikono. Aki ki'nato womdokwe togaikike'aro me'no birolo'nugolokwodupudo togaikike'aro togaikul go'no go'no mimo'nodupudogaikikono. Aki a'mwo toorekike'aro abolo togaikike'aro togaikul go'no go'no mimo'nodupudogaikikono. Kevu yiuwi'nokai su togaikul Gooti toolluro sumdo tovi go'no go'no mimo'nodupudo su tov aro tovinokwono. Kevu yiuwi'nokai Krais Jisasollu uuguro'mwonyodupudo togaikul a'mwo abolo yiuno puru'mono togaikulbusuko me'no imo'nodupudogaikikono.
Nuu Poolonyugono. Gooti tool gavnokweyolluro ilaiyo winoduke tovi uumjuno'no nuu Krais Jisasolluro kuurotokwe wimo'nyo'moneyokwe me'no ajanubweyokanyugono. Toro te moro pas sakwollumo akav kevu Efesosda'ai Jisasolluro a'mwo abolo togaikul Krais Jisasollu guureji uumjunyokwe togaikullomno sakwollumwakono.
Nuu Poolonyugono. Nuuge'aro Timootiyeke'aro toonal Krais Jisasolluro ki'nato womdokwe wimo'nodowolonakono. Toro toonal kevu wagwolago Filipaida'ai yiuwi'nokai Krais Jisasolluro a'mwo abolo togaikullomno pas akav sokwollekwopiyamawolo. Kevu Gooti gavnokwe toolluro a'mwo abolo kuunodo me'no wimo'nodupudogaikikono. Aki kevu wagwolago Filipaida'ai Jisasolluro mollu'bwoto tovi a'mwono moduvomwallokwe toorekike'aro aki a'mwo diken womdokwe kworekike'aro yiuwi'nokai su toorekullomno pas akav sokwollekwopiyamwakuuwolo.
Kevu aro neya jogaulo. Krais toolluro kuuguudo sugudo tovino wuuduuwallo'moneyokwe kemoro pasudo tov pi'mwono to'no neya domjumovlavogaulo. Kemoro pasudo toro amjumovlapi tov nuu nobaikwonmonyudukono oo mabaikwonmonyudukoneyokwe tovino kuudo miyau'mwakono. Toro kuvi kuruv kemino kuuguudo pun kuu'numi toga aro kuudo nokwo yaikuu'mwalmonyugono. Oo a'mwo abolo judo'no judo'nodo su ton jurogudo da'mdupudodeyo. Aki yiuwi'nokai su ton kuudo puru'mono to'no yau'dupudodeyo. Toro ton kuuguudo sugudo tokwe moruujo'moneyokwe avaiwomdo yodupu imgu amgu sobanyo molluulnoda'mdupudodeyo. Toro yodopure tovida'ai a'mwo abolo pun kuuguudo sugudo su tovino kuudo nokwo uubwepinogano. Toro tovino'mo womdo su tovi guureji yodupudodeyo.
Toro toonal kevu wagwolago Kooloosida'ai Krais toollu me'no uuguro'mwonyodupudo togaikullomno pas akav sokwollapimawolokwono. Kevu Krais toollu uuguro'mwonyodupudo togaikul Gooti toolluro a'mwo abolo kuunodo wimo'nodupudogaikikono. Aki nemi nello'mwo nellugwai'yago togaikulbusuko nekullumo'nodupudogaikikono. Kevu Krais toolluno kuudo guureji uubweyodupudo su togaikullu aro adekwopiyamawolo. Nemi Nellunumiyago Gooti toolluro yasuwa'wino sugumaluko tov nokwo ikubwemwalonekono. Aki kevu sumwoluko kavo to'no wosungovlaiyo'moneyokwe kuruv nokwo ikubwemwalonekono.
Nevu kemi yere mabekuru'ma'dowore toga sumdomgu wagwolago Filipai toru abomwalowonogano. Su toro bomwalodowore toonollu a'mwo Filipaida'ai pworo danyu'nyuwuulo pun nekubweno sumaveyokwe kaiyako sanekullugoloponogano. Su toro sanekullugolopo tovino kevu me'no wuu'nodupudogaikikono. Ikomago tooro kaiyako toro sanekullugolopo kuvi kuruv Gooti toolluro kuuguudo sugudo tokwe kemi ikujo'moneyokwe tovino luko miyowonogano. Toro kwonol kuruv Gooti toolluro jurogudo nekubweyoduke tokwe kemi akuuto toru bomwalno sumawoneyokwe kuuguudo sugudo su tokwe guureji aikujajuwonogano.
Timootiyoloo, moro muugunyo tookubusuko nyumo'nodumdekugono. Toro tookujuno a'mwo pworo proofet yogalo tokwe aro me'no agujajupekugono. “Oo Timootiyol Gooti toolluro womdokwe wimo'nowo'ji Jisasolluno kuuguudo tokwe moruudomollonekono.” Gumino su toro me'no agujajupo tovi guu kuvinono neya uumjunmwalbino'moneyokwe nuu guureji adagubwemono. Guu su toro tomgu'aro kuumjungovla'bi tov a'mwo mollurogudo pwolbusuko ma'no ma'no pasudo toorogai molo po'dogalo mujumovla'mwalbinekugono.
Neya duu'nyulo. Nemoro kuudo uubweyodowado tov resis to'busukokwono. Toro te a'mwo pwol resis tovi uuwoleyo'mo guureji yodowodo toolbusuko kubalno guu gumi kuudo me'no uubweyodumdo tovi guureji neya dogudupolarogawono. Aki guu aiyo yiunokuudo mujomwekovlaiyo'moneyokwe tovi mallo'moneyokwe Gooti tool me'no doguma'dowodekugono. Toro tooku a'mwo abolo bwotonyago tonyuro sumdo tovi aiyo yiunokuudo mujomwekovlaiyo'moneyokwe su tovino kuu'maiyo toru'no me'no dodowiyoku'bworosunodumdekugono. Toro tovino tov kuudo su tovi guureji neya dogudupolarogawono.
Toro te guu moro Krais Jisasolluno kuuguudo idopto'nodo sodogubwasajo tonyu me'no kuu'nyajudekugono. Kuuguudo idopto'nodo su ton a'mwo abolo punyu sodubwasubi toga yiuno aval'nodo tomgu'aro neya yodubwasumwalbinekugono. Guu Krais Jisasollu me'no kuuguro'mwonyajudekugono. Toro kuuguro'mwonyajudo tovida'ai gumoro kuudo uubweyodumdo tokwe'aro aki kalo buuropino gujunodowodo tokwe'aro pasudo su tovallu guureji neya dogudupolarogawono.
Pas akav Taitosekujo'mo sokwollagubwemono. Guu kuuguudo sugudo modomollodumdo tovi kuudo aval'no kuubweyodekugono. Toro tookujuno tov moro kwolaiyo kuunodo toolbusuko imo'nodumdekugono. Toro tookujuno nuu aro nyunodowodonyugono. Nemi Nellunumiyago Gooti tooke'aro ma'no ma'nodo tovuro kirumwallo tovida'ai mollurolovonekumallokwe Aguto Krais Jisaseke'aro tooral aro gubwemwalbullunekugono. Yasuwa'wino sugumaluko tokwe'aro sumwoluko kavo wosunyo'mo tokwe'aro toval nokwo gubwemwalbullunekugono.
Toro kuvi kuruv kevu nemoro kalo buuropino nekullunodowodo togaikulluno'gwowi yogalo jurogudo akav kemino maikudumwakuuwono. Nevu kemino aro kuudo yaikuu'dowadonogano. Oo a'mwo abolo su ton sugupasudo yodupudodeyo. Yaikuu'dowadonogano. Kemoro sugupasudo yodupudo su ton nemi aro tovino nekuduuwallunodupudogaikikono. Oo Gooti toolluro a'mwo abolo tonyu ma'no ma'nodo tovuro kirumwallo tovida'ai me'no bomollurolovomokalokwodowodo ton kevu kugaikuldeyo. Su toro tovino me'no nekuduuwallunodupudogaikikono.
Nuu a'mwo Sailasolluno aro kuudo yau'dumdekono. Oo Jisasolluro a'mwo su tool mi nyugwai'yago pwolbusuko nyumo'nodowodoldeyo. Toro tool Krais toollu guureji uumjunyokweyoldeyo. Kuudo yau'dumdekono. Pas kula'nyo akav kemi yokwollekwopiyabiyo'moneyokwe a'mwo su tool mi anyo'mwojokaikono. Nuu pas akavi'aro kemi jurogudo daikullumwojumo'monyugono. Aki kuu'maiyo toru'no aro dodoluwosumo'mokwono. Kemoro tabunyuwuulo ama'mwakopo su ton yiuno Gooti toolluro yasuwa'wino sugumaluko tovida'ai to'no ikullumo'nodupudogano. Toro te kevu Gooti toolluro yasuwa'wino sugumaluko su tovi akuuto tomuu guureji neya doulodavogaulo.
Mino yovo tov Saimoon Pitalonyugono. Toro toonyu Jisas Kraisolluro ki'nato womdo tov yodumdonyugono. Aki gamoro kuurotokwe wimo'nodumdonyugono. Kevu nemoro kuudo uubweyodowado su tollugwoji aval'no uubweyodupudo togaikullu nuu pas akav sokwollekwopiyamono. Nemoro kuudo uubweyodowado su tov nemi Jisas Kraisolluro pasudo idopto'nodo tovi'aro ma'dowadokwono. Jisas Kraisol nemi Gootekono. Aki toro tool nemi ma'no ma'nodo tovuro kirumwallo tovida'ai bomollurolovonekumokalokwodowodo tookono.
Toro te a'mwo abolo kaiya'no pasudo toorai wuulo awapi ton puuto idopto'nodo tovino sumdomgu kuudo miyouromaropujuko'mno'juki ilaiyo sumo'nopujukogano. Su tov aro tovinokwono. A'mwo abolo su ton puuto idopto'nodo tovino kuudo me'no youroma'dupudogano. Toro kun kuruv Gooti gavnokwe toolluro kinamjo'moneyokwe yogalo tovi buulo kuuguunyumopipi to'gwowi kaiya'no bwotonyokwono. Toro tovino tov a'mwo abolo buulo kuuguunyumopipi su tobuuro sumdomgu puuto idopto'nodo tovino kuudo miyouromaropujuko'mno'juki kaiya'no bwotonyo su tov mwimo'nowo'jujukogano.
Mino yovo tov Juutolenyugono. Toro toonyu Jisas Kraisolluro ki'nato womdokwe wimo'nodumdonyugono. Aki nuu Jemsolluro gagwai'yagonyugono. Toro toonyu kemiyomno pas akav sokwollekwopiyamwakono. Toro togaikullu nemi Nellunumiyago Gooti tool kalo buuropino winyokwekono. Toro tool kemi me'no adekumarokaikono. Aki kevu Jisas Kraisolluro a'mwo abolo kuuno wimo'numwalpino'moneyokwe Gooti tool yellukuromollekumwalodowodekono.
Toro kuvi kuruv kevu moro kalo buuropino nyunodowodo tobuurekulno'gwowi Gooti gavnokwe toolluro nebal'no yogalo anekullaboka tovino kuudo me'no uubweyodupudogaikikono. Toro te kemoro kuudo uubweyodupudo su tovi'aro jurogudo neya jogullumovlavogaulo. Aki Gooti toolluro Kuullo tool jurogudo ikubweyodowo'jure tokwe kevu Gooti toollu subusu'nyogalo neya duudumovlavogaulo.
Aki toro toollu Jisasolluro a'mwo abolo tobuuro me'no kuuwolovopogano. A'mwo abolo su tobuuro kwako akavida'ai mujomwekovla'mdupudo tovino biyolsumdo sajupogano. Toro yodupudo tobuuro kemoro bollo'mo kuvino kuruv me'no sovrowosunyajupogano. A'mwo abolo su tobuuro Sipsip Muugunyo toolluro mujako abwoloka tokwe'aro aki Krais Jisasolluno kuu'maiyo toru dodoluwosodupudo tokwe'aro tovalluro jurogudo tokwe Satanyollu me'no kuuwolovopogano.
Neya duu'nono. Guu danyu'nyuwuulo pworo noma'binekugono. Toro ma'do'bure su tooraino luko nyubiyo. Satanyolluro womdokwe pworo kemoro kuudo uubweyodupudo tovi yamju ikulloganyo'moneyokwe kevu pugaikullu wuulo killo'mo ago tovi nomeraikubwepinorogano. Me'no meraikubweyopi iruko atousal tobuullu kaiyako yaikullugolodopure su toga danyu'nyuwuulo ton nyubwosunmwalpinogaikikono. Toro kuvi kuruv kemi kuudo uubweyodupudo tovi buulo nuugunyumopimwalpiyo. Kemi romiyaikubweyo'mo yodopure kuga kuruv guureji to'no gudupolaropi resis tovi kuuwolopi togaikullu nuu mubiyo tov aiyo yiunokuudo mujomwekovlaiyo'moneyokwe nekullamonyugono.
ကြော်ငြာတွေ