A'mwo pwol gami ganumiyagoldeyo oo ganeyago'mdeyo tonyuno kalo buuropino guureji winowo'ji kwol kuruv mino kalo buuropino guureji mwino'ji to'gwowi a'mwo su tekwo mi numjunyo'moneyokwe tov ku'nonodo'mekwomaiyo. Aki a'mwo pwol gami kwolaiyoldeyo oo taiyo'mdeyo tonyuno kalo buuropino guureji winowo'ji kwol kuruv mino kalo buuropino guureji mwino'ji to'gwowi a'mwo su tekwo mi numjunyo'moneyokwe tov ku'nonodo'mekwomaiyo.
Joon 21:15 - Gooti Toolluro Yogalokwono15 Wosamujuko tov me'no nopino sumaveyokwe Jisasol Saimoon Pitallu aro kuudokaikono. “Joonolluro muugunyo Saimoonoloo, gumoro mino kalo buuropino gujunodowodo tov a'mwo pworavuro mino kalo buuropino winodupudo tovi dukuuwolo'mwallo?” Kuudoganokaikono. Toro kuudoganoka tovi Pital kuudokaikono. “Agutoloo, tade. Nuu gumino kalo buuropino nyunodowodo tovino guu kuudo me'no youronuma'dumdekugono.” Toro kuudoka tovi Jisasol kuudokaikono. “Guu moro sipsip taiyo tobuurobusuko tonyu wosamujuko neya javogawono.” Kuudokaikono. အခန်းကိုကြည့်ပါ။ |
Joon 21:15
49 ပူးပေါင်းရင်းမြစ်များ
Toro kuudoka toollu Jisasol aro kuudokaikono. “Joona'wolluro kwolaiyo Saimoonoloo, gumoro anyudumodo su tovino kwako akavida'ai a'mwo pwol miyodogubwasokaikugono. Toro kuvi kuruv moro Nyunumiyago muunyu kai'muuda'ai toolno'gwowi gumoro sumdo tovi kuu'maiyo toru abomollolupto'nagubwemokaikugono. Toro tovino guu ilaiyo nokwo ibinekugono.
Toro te kevu kwoloraiyo su tobuuraino biyolo noduu'mwojumwalpiyo. Su tovino aro ikudumo'mokwono. Muunyu kai'muuda'ai ensel pworo kwoloraiyo su tobuurai mollomwalodupudorogano. Ensel mollomwalodupudo su tooro moro Nyunumiyago muunyu kai'muuda'ai toolluro sumdomago toru yiuwi'nokai toga kuuloda'mdupudorogano. Toro tovino tov kevu kwoloraiyo su tobuuraino biyolo noduu'mwojumwalpiyo.”
Toro kuvi kuruv guvu mino kuudo nubweyodumdo tooku nobwolorabiyokweyo'mo Gooti tool gumi gujo'mwojono'moneyokwe tovino nuvu subusu'nyogalo me'no wuudodumdonyugono. Toro te nuu aro anyunadopiyo. Guu abwolorabi tov miyomno yere neya jouragunyumo'nono. Toro souragunyumo'nubi toga gumoro jugwai'yago toorobusuko gujumo'nodupudo pworo abwolorapi kuruv miyomno aikomgu yere neya youragunyumo'nupinorogano. Toro tekwojai jurogudo nokwo duuwimwojumwalbinekugono.” Kuudokaikono.
Toro wuujuno sumaiyokwe Jisasollomno amokabokaikono. Toro amokaboka toollu Jisasol wonyuno sumaiyokwe aro kuudokaikono. “Guu Joonolluro kwolaiyo Saimoonolekugono. Lukomgu gumino yovo tov Sifasolo gudumwalpinekugono.” Yovo su tovi amollovodo'mwojajungiko tov Pitaleyo'mokwono. Aki yovo Pitalo tovino kavlo tov Suloleyo'mokwono.
Toro te Jisasol gami uumjunyokwe toonollu anekudokaikono. “Kevu bopi wosamujuko tov bonomwallulo.” Anekudokaikono. Toro nekujuno sumaiyokwe nevu aro kuudo saurowonogano. Oo akal nemi Aguto tooldeyo. Su toro kuudo saurowo tovino tov nevu gamoro uumjunyokwe pwolnodo kwol kuruv Jisasollu yamuugojo aro muudoganowonogano. “Guu ala'mwekudeyo?” Muudoganowonogano.
A'mwo uumjunyokwe tooraida'ai pwonyuno Jisasolluro kalo buuropino winodowodo su toonyu Pitallu aro kuudonyugono. “A'mwo adapsuko akaigwol nemi Aguto tookono.” Toro kuudo tovi Saimoon Pital, a'mwo adapsuko akaigwol nemi Aguto tookono, kuudo su tovi wuu'nyuno sumaiyokwe gami youro adowiyosoka tov aki aiko te amolluro'nokaikono. Su tov aro tovinokwono. Domwoga kuurowabwollo'mo womdo tovi yo'mo tool gami kwa'mguda'ai youro tov adowiyosokaikono. Toro te Pital gami youro su tov aiko te molluro'nyuno sumaiyokwe wonyo wolo toru'no pwo'nugwiyo'mo tool wonyo buugo tovi kwolodukwopiyokaikono.
Toro wuujuno sumaveyokwe toga Jisasol aro kuudokaikono. “Gooti tool kemi Tellunumiyago kuunodo ikullumo'nodowodorekulno'juki kevu mino kalo buuropino nokwo aikullunowo'jujukorekikono. Su tov aro tovinokwono. Nuvu Gooti toolluda'ai kemiyomno abonyugono. Aki nuu akawai abumwako tov nuvnokwenyuro kuudo tovida'aiyo'maiyo. Toro kuvi kuruv Gooti tool amonuwopiyaboka tovida'ai abumwakono.
Toro te aga kevu a'mwono moduvomwallokwe toorekullu aro ikudumo'mokwono. Kevnokwe toorekul neya domoduvomwalnogaulo. Aki a'mwo abolo Gooti toolluno kuudo kuubwemwakopo kubuurai kuruv sipsip tobuuraibusuko kevu neya domoduvomwalogaulo. A'mwo abolo su tonyu Gooti tool gami kuunodo wimo'numwalpino'moneyokwe gami Kwolaiyo toolluro mujako tokwe abiyomarokagano. Toro abiyomaroka tonyu kevu mido mollomwalmwalpino'moneyokwe Gooti toolluro Kuullo tool me'no ajaikubweyokarekikono. Toro ajaikubweyoka toorekul Gooti toolluro a'mwo abolo su tobuurai sipsip duuwatokwe toorobusuko wimo'nopi neya domomjomwekovlavogaulo.
Aki puruv aro tovino kuudo me'no souroma'monyugono. Nuu kemi me'no aikugollu'mo'mi toga a'mwo kuullujuluko toorobusuko pworo kemiyomno nobupinorogano. Toro tooro bopi kevu Gooti toolluro sipsip tobuurekullu ikwonyapino to'no mipinorogano. Toro kworo kuruv kaiyako mollugolaikumeyo'moneyokwe nyoukuu'naikudupinorogano.
Jisasolluro a'mwo abolo pun kwolluno kuudo me'no kuubweyopogano. Toro kun kuruv kemoro kuudo uubweyodupudo su tov jurogudo mimo'nodupudogano. Su toro tonyu kevu neya wiyo'mwojopi kevuge mwallo'moneyokwe ilaiyo neya domollomarogaulo. Yopi a'mwo abolo jurogudo mimo'nodupudo su tobuuravuro kaiya'no kuudo yau'dupudo tooraino kevu yogalo miyoullajunpinono.
Toro te kevu kuunano gooti su tooraino, Oo kuunodoromaiyo, kuudo me'no youroma'dupudo togaikulluro nodopure tovasuda'ai Jisasolluro a'mwo abolo jurogudo mimo'nodupudo su tobuurai kaiyako igolodupudogaikikono. Krais tool a'mwo abolo su tobuurai wiyo'mwojo'moneyokwe me'no abolokaikono. Toro tovino tov kevu a'mwo abolo jurogudo mimo'nodupudo su tobuurai kaiyako nyugolamopiyo.
Kuudo neya jaullulo. A'mwo pwol Krais Jisasollu me'no uuguro'mwonyodowodo tool gami lakulkulako tov ado'no'jo'mdeyo oo mado'no'jo'mdeyo kuruv su toval aguto mimo'nodubulovakono. Toro kuvi kuruv aguto to'gwowi arokwono. A'mwo pwol Krais Jisasolluno kuudo uubweyodowodo su tovi'aro a'mwo abolo punyuno kalo buuropino winmwalono to'gwowi agutokwono.
Nevu su toro tomgu'aro sogullumovlawa'ji tov kwoloraiyo tobuurobusuko mimo'nanonogano. Aki toro tonol kwoloraiyo tobuuravuro yodupudo to'busuko kubalno aro nyumwala'jo. Ibwasokwe pworo bopi nemi yojelukuulovonekumallo'mo tooro kuuguudo judo pumgu'aro'mdeyo oo kuunano yogalo'mdeyo youkuu'nanekudodopure tonyu kaduko nuuwimwala'jo. Punol kaduko kwiya'ji tov dolo tokwe'aro wonyo tokwe'aro toval boot tovi manyu tomuuno molobemokwodubulo to'busuko kubalno nonekullumo'no'jo.
Gooti su tool sumwoluko kavo wosunyo'moneyokwekono. Toro tool nemi Aguto Jisasollu aiyo aiko te me'no amodukavokaikono. Jisasol nemi nekullo'mwojo'moneyokwe gamoro mujako tov me'no abwoloka tovino tov sipsip moduvomwallokwe aguto toolbusuko anekullumo'nokaikono. Aki gamoro mujako abwoloka su tovi'aro subuu'yamju muuduko tov me'no sumo'nokakwono. Subuu'yamju su tov aiyo yiunokuudo mujo'movlaiyo'moneyokweyokwono.
Aki yiuwi'nokai Gooti toolluro sokwollosoka ton gamoro sumdo tovida'ai yiulo puru'monodo kuruv miyoupuu'na'dupudogano. Toro kuvi kuruv yiuwi'nokai ton Gooti toolluro sumdo tovi yiuno kuu'maiyo toru'no bomollolupto'nosodupudogano. Toro tonyu Gooti tool pi'mwono youroonodowodekono. Gooti su tool nemoro pasudo tonyuno nojainyubworonekono. Toro ajainyubworo'ji toga nevnokwe tonol nemoro pasudo su tonyuno kavlo ton kuu'maiyo toru nododowiyoku'bworosunanonogano.
Kevu Krais Jisasollu yere mwonodupudo kuvi kuruv kwolluno kalo buuropino ikullunodowodogaikikono. Aki kevu Krais Jisasollu yere mwonodupudo kuvi kuruv kwolluno kuudo uubweyodupudogaikikono. Aki kevu Krais Jisasolluno ilaiyo bwotonyo yodupudogaikikono. Ilaiyo bwotonyo su tov kwako akavida'ai ilaiyo tonyu uuwolo'mdowodokwono. Aki ilaiyo su tovino a'mwo pwol gamoro mago tokwe jo'moneyokwe kuruv supto yonekono.
Kevu kwolaiyo muudoga pwol amuunallo nonyo'mo winodowodo to'busuko kubalno kemoro kuullo tobuuravuro amuunallo kuunodo tovino'gwowi neya aikullunogawono. Gooti toolluro yogalo tov amuunallo su to'busukokwono. Toro te Gooti toolluro yogalo tovi'aro kevu a'mwono abewalo togaikulbusuko yogullumovla'mwalpinogaikikono. Su toro yogullumovla'mno yogullumovla'mno yopi lukomgu iruko pullugwoji Gooti tool kemi ma'no ma'no pasudo tooravuro jurogudo tovida'ai yiunokuudo mollurolovekwapiyonekono. Toro amollurolovekwapiyo'ji toga'no'gwowi a'mwono kuunodo togaikulbusuko nyumo'nupinogaikikono.
Kevu sipsip tobuurobusuko imo'nodupudogaikikono. Sipsip su tooro kemi kuudo tovida'ai gomno gomno younopiyodupudo to'busuko kubalno kev kugaikul kuruv sumdomgu ma'no ma'no kuudo toorai airoungovlaiyajupogaikikono. Toro kuvi kuruv aga'no'gwowi kevu kemi Sipsip Duuwatokwe toolbusuko ikullumo'nodowodo toollomno aikomgu me'no buuru'ma'dupudogaikikono. Duuwatokwe su tool sipsip toorai yellukuromollomwalodowodo to'busuko kubalno kemoro kuullo tobuurai pi'mwono yellukuromollekumwalodowodekono.
A'mwo abolo pun aro kuudo uubweyodupudogano. “Oo Jisasol Gooti toolluro amonekwopiyaboka Krais tool kwekono.” Yiuwi'nokai su toro kuudo uubweyodupudo ton Gooti toolluro kwoloraiyo wimo'nodupudogano. Aki yiuwi'nokai a'mwo abolo su ton kemi Kuunumiyago toolluno kalo buuropino winodupudogano. Toro winodupudo su ton kemi Kuunumiyago toolluro kwoloraiyo kubuuraino kuruv kalo buuropino winodupudogano.
Aki abolo su tovuro kwoloraiyo wimo'nodupudo tonyu nuu noromiyosumonyugono. Su toro aromiyosumi toga moro yiuwi'nokai mollu'bwoto go'no go'nodo ton mino aro kuudo yanuupinogano. Oo Krais tool yiuwi'nokai a'mwo abolo pwolno puru'monodo tonolluro kuudo togai'aro poowokalago togai'aro tonyu youranekwonodowodekono. Aki toro tool yiuwi'nokai pwolno puru'monodo tonolluro pasudo yodowado tonyuno mubiyo tov nonekubweyonoldeyo. Mino su toro kuudo yanuupinogano.
ကြော်ငြာတွေ