Joon 15:25 - Gooti Toolluro Yogalokwono

²⁵ Su toro yodupudo tov kevnokweravuro loowo tovida'ai yogalo sakwollungiko puruvi suuwiyo imwojo'mokwono. Yogalo su tov arokwono. A'mwo pworo nuu ma'no ma'no miyodumdo toonyuno surodo yasuwa'no wuunpinorogano. Yogalo su tovi suuwiyo imwojo'moneyokwe yodupudorogano.

Joon 15:25 ပူးပေါင်းရင်းမြစ်များ

Da'buukiyo 69:4

Nuu ma'no ma'nodo tov miyodumdo kwonyuno kuruv a'mwo bwotonyago tooro mino surodo kuunmwakovo. A'mwo su tooro kwolallo bwotonyo imo'nodupu jurogudo sumo'nadokwoporogano. Toro tooro mi romiyanubweyo'mo kwinadokwoporogano. Aki toro tooro nuu kuuko miyodumdokwe kwonyuno kuruv kuunano yogalo soukuu'nuudumwakoporogano. Toro te nuu kuuko miyodumdo kwonyu kuruv nuvnokwenyuro kuunodo tonyuno'gwowi wiyodumdonyugono.

Matyuu 10:8

Aki kevu a'mwo abolo nobollokwe tobuurai neya duuwikulogaulo. Aki a'mwo abolo me'no bolodopure tonyu neya domodukavogaulo. Aki kevu wonawiyo nobollokwe tonyu duuwikulogaulo. Aki kuullo ma'no ma'nodo toorai neya domodovomjapiyogaulo. Kevu womdo su toro ton imwalpino'moneyokwe jurogudo aikullamo su ton Gooti gavnokwe toolluro yasuwa'no ikullabodowodogano. Toro tovino tov kevu womdo su tovi momjumovlavopi toga a'mwo abolo tonyuro nuugwiyo noma'mwalpiyo. Toro kworekul kuruv yiuno yasuwa'no to'no neya duuwiyo'mwojumovlavogaulo.

Luuk 24:44

Jisasol toro nyuno sumaiyokwe aki aro kuudokaikono. “Sumdomgu nuvu kevuge amwallajo toga aro me'no aikujajonyugono. “Yiuwi'nokai mino yogalo tov Moosesolluro loowo tokwe'aro proofet toorogai'aro Da'buukiyo tokwe'aro tonyuro ajakwollajupo su ton suuwiyo neya imwojupinogano,” aikujajonyugono.”

Joon 10:34

Toro kuudopo tovi Jisasol aro kuudokaikono. “Kemoro ato tovi mwora'dupudo Gooti toolluro loowo puruv aro sakwollungikokwono. “Nuu aro me'no aikudonyugono. Kevu toorekul gooti toorekulbusuko imo'nodupudorekikono.” Sakwollungikokwono.” Kuudokaikono.

Joon 13:18

Moro yogalo aikudumwako akav yiuwi'nokai toorekulluno maikudadokwono. Nuvnokwe toonyuro a'mwo me'no ajeso su toorekulluno kuudo me'no youroma'dumdonyugono. Toro kuvi kuruv Gooti toolluro yogalo sakwollungiko puruv suuwiyo imwojo'moneyokwe su toro aikudumonyugono. Gooti toolluro yogalo su tov arokwono. “A'mwo pwol wosamujuko ton aval'no mujonugovla'modowolo pwol lukomgu mino biyolo nuu'mwojowo'ji buulo nonyugunyumopiyonekono.” Toro sakwollungikokwono.

Joon 19:36

Jisasolluro suvlo tovallu marubuutovopo su tov Gooti toolluro yogalo ajakwollungiko puruvi suuwiyo imwojo'moneyokwe sumo'nokakwono. Yogalo su tov aro sakwollungikokwono. “Gamoro yogudo puru'monodo kuruv marubuutopinokwono.” Sakwollungikokwono.

Room 3:19

Kevu kuudo neya jaullulo. Moosesolluro loowo sakwollungiko ton yiuwi'nokai loowo su tovi dolago tomuu mwalodowado Juu tonollu danekullodowodokwono. Toro tovino tov yiuwi'nokai a'mwo abolo, “Oo nevu sugudonogano,” dodopure tonyuro mago tovi Gooti toolluro loowo tov uubuto'mdowodogano. Aki toro tovida'ai yiuwi'nokai a'mwo abolo kwako akavi mwalodupudo ton Gooti toolluro sumdo tovi jul'nyo kurukwe wimo'nodupudogano.

Room 3:24

Toro kuvi kuruv Gooti tool yiuno Krais Jisasollu'aro nemoro ma'no ma'nodo tovuro kirumwallo tovi amobiyodukwopiyokaikono. Aki gamoro yasuwa'wino sugumaluko tov nekubweyoduke tovida'ai to'no nevu gamoro sumdo tovi sugudo wimo'nodowadonogano.

2 Koorin 11:7

Nuu Gooti toolluro kuuguudo sugudo tokwe moruujo'mo tovino aro kuudo miyaullajonyugono. Oo yiuno a'mwo abolo nuugwiyo anubipi tonyuno to'no nokwo yodubwasumwalmonyugono. Nuu su toro kuudo miyaullajonyugono. Toro kwonyu kuruv nuu kemi ikullo'mwojo'mo Gooti toolluro kuuguudo sugudo tokwe kemi yasuwa'no sodekubwasajonyugono. Aki yasuwa'no sodekubwasajo su tomgu'aro nuvnokwe tekwonyu kwako tomuu bwolomodomoropinodam kevu togaikulluno'gwowi muunyu toru'aro sulomekwopiyajonyugono. Toro te nuu kemi ikullo'mwojo'moneyokwe womdo yasuwa'no sajo su tov kaiya'nodo'mdukono? Awiyo, nuu kaiya'no miyajonyugono.

Galesiya 2:21

Toro tovino tov nuu Gooti toolluro yasuwa'wino sugumaluko su tovi mamolluduvolmonyugono. Su tov aro tovinokwono. A'mwo abolo ton Moosesolluro loowo tovi'aro Gooti toolluro sumdo tovi sugudo kuvinono wimo'nyo'mo'mno'juki Krais toolluro aboloka tov yasuwa'no to'no imo'numwalonokwono.

2 Tesaloonaika 3:8

Kevu nemoro sajuuwo tonyuno kuudo neya jaullulo. Kemoro wosamujuko ton yasuwa'no mamanyajuwonogano. Toro kwonol kuruv wosamujuko me'no biyoma'dowore tonyuno to'no amanyajuwonogano. Nemi mollonekumwallo'moneyokwe womdo tov kevu a'mwo abolo pubuurekullu jul'nyo nekubweya'jokwe tovino tov nevnokwe toonol iruko togake'aro surakuuto togake'aro womdo guureji to'no amjumovlaiyajuwonogano.

Adodolukuu'nosungiko 21:6

Toro juno sumaiyokwe aki yogalo puruv aro anyudokaikono. “Me'nogano. Nuu Muudu'nodo Kuunodolenyugono. Aki nuu Aiyowo'mo Kuunodolenyugono. Yiuwi'nokai muudu'no imo'nodupudo ton nuu kwonyuda'ai imo'nodupudogano. Aki yiuwi'nokai aiyowo'mo nyumwogapiyo'mo ton nuu kwonyuda'ai imwogapiyodupudogano. Toro toonyu yiuwi'nokai a'mwo abolo wonyo'mo kuuleyaluko kwinpi su tonyu aiyo yiunokuudo mujomwekovlaiyo'moneyokwe wonyo sumdo ilowilovabodowo'jure tovida'ai nuu wonyo tov yasuwa'no nuuwimonyugono.

Adodolukuu'nosungiko 22:17

Gooti toolluro Kuullo tooke'aro aki Sipsip Muugunyo toolluro abolo nomallo'mo tokwe'aro toval aro dodubulovakono. “Oo kevu Krais toollomno dobogaulo.” Dodubulovakono. Aki yiuwi'nokai a'mwo abolo kuuguudo akavi kaduko kwipi kun kuruv aval'no aro neya adupuro. “Oo Krais toollomno dobogaulo.” Adupuro. Aki a'mwo kuuleyaluko kwino'ji tool Krais toollomno nokwo abwono. Aki yiuwi'nokai a'mwo abolo ton wonyo aiyo yiunokuudo mujomwekovlaiyo'moneyokwe lokabodowo'jure tovida'ai nonyo'mo kwinpi su ton wonyo su tovida'ai yasuwa'no nokwo abanupuro.