Neya duu'nyulo. Kwolaiyo pwol nemiyo'moneyokwe me'no sonekumarokaikono. Kwolaiyo su tool Gooti toolluro nemi anekullabokaikono. Aki toro tool a'mwo aguto kig imo'nowo'ji nemi mido mollonekumwalmwalonekono. Toro toolluno yovo go'no go'no aro ton dumwalpinekono. Yovo puruv arokwono. Sobanyo Mollodaiyo'mo Sugudo Kuunodolekono. Puruv Gooti Jurogudo Kuunodolekono. Puruv Yiuwi'nokai Toga Aiyo Yiunokuudo Mujomwekovlaiyokwe Tovi Ganumiyagolekono. Puruv Sumwoluko Kavo Wosunyo'moneyokwe Aguto Kigolekono. Yovo su toro togai wuudumwalpinekono.
Joon 14:27 - Gooti Toolluro Yogalokwono27 Oo kevu sumwoluko kavo wosunmwalpino'moneyokwe tov nuu kemi ikubweyo'mi ikugollu'mo'monyugono. Sumwoluko kavo wosunyo'moneyokwe su tov a'mwo abolo kwako akavi mwalodupudo ton ku'nono maikullabupinokwono. Toro kuvi kuruv nuvnokwe toonyuno'gwowi moro sumwoluko kavo wosunyo'moneyokwe tov kemi aikullamono. Toro te kemoro poowokalago ton jul'nyo mibwosunpinono. Aki toro toorekul luko mipinono. အခန်းကိုကြည့်ပါ။ |
Joon 14:27
65 ပူးပေါင်းရင်းမြစ်များ
“Toro te a'mwo kaiyako yaikullugollo'mo winodupudo su tooraino kevu luko mipinono. Aro tovinokwono. Yiuwi'nokai ton yiulo tomuu abu'duvolnakopo kuvi kuruv lukomgu kuu'maiyo toru'no nobomollolupto'nosupinogano. Aki yiuwi'nokai jupweyo kuuguudo apuu'nakopo kunyuno kuruv lukomgu kuudo nyouromapinogano.
Toro te moro yogalo aikudumo su tov aro tovino'mokwono. Kevu mi nuguro'mwonyodupudo toorekul sumwoluko kavo to'no nokwo wosunmwalpinorekikono. Toro kworekul kuruv kwako akavi kuuno amwalpi toga jul'nyo tagunyo bwotonyago ton noma'mwalpinorekikono. Toro amapi kuvi kuruv nuvno'gwowi yiuwi'nokai kwako akavida'ai jurogudo tonyu me'no kuuwolovonyugono. Toro tovino tov kemi poowokalago ton jurogudo nokwo jumo'nogaulo.” Kuudokaikono.
Toruda'ai iruko Sande su tollugwojuro sulato toga Jisasolluro uumjunyokwe tooro ago puvi aullu'bwo'nomwaloporogano. Toro tooro Juu tooraino luko sopo tovino tov kudo'aiko tovi guureji momjoguropino sumaveyokwe aullu'bwo'nomwaloporogano. Toro kuullu'bwo'nomwalodopure toga Jisasol anakuuto tomuu kuullalo'nyuno sumaiyokwe uumjunyokwe su tooravuro akuuto toru davo'no aro kuudokaikono. “Kemoro sumwoluko ton kavo to'no doosunyulo.”
Toruda'ai 7-pela iruko pubuul me'no abawoka toga Jisasolluro uumjunyokwe tooro ago puvi aiko te aullu'bwo'nomwaloporogano. Su toro toga Toomasol kworogai aullu'bwo'nomwalokaikono. Toro kuullu'bwo'nomwalno sumaveyokwe kudo'aiko tonyu guureji momjoguropiyo'mno aulomwaloporogano. Toro kuulomwalodopure toga Jisasol kuullalo'no'no kworavuro akuuto toru aulodavokaikono. Toro kuuloda'mno sumaiyokwe aro kuudokaikono. “Kemoro sumwoluko ton kavo doosunyulo.”
Pital toro wuujuno sumaiyokwe aki aro kuudokaikono. “Kevu aro tovino kuudo nyau'mwakovo. Gooti tool nevu Isuraiyolda'ai tonollu Jisas Kraisolluno kuuguudo sugudo tov me'no anekwopiyabokaikono. Toro toolluro womdo sopiyoka tovida'ai Gooti toolluro sumwoluko tov kavo wosodowo nevuge ibwoto'nyo nokwo yonekono. Aki yiuwi'nokai kwako akavida'ai tonolluro Aguto kuunodo tool Jisas Kraisol kwekono. Kuuguudo sugudo anekwopiyaboka tov torokwono.
Toruda'ai surakuuto pullugwoji Aguto tool Poolollu wojo iwo'nodupudo to'busuko puvi'aro abwiyalo'nokaikono. Toro bwiyalo'nyuno sumaiyokwe Aguto tool Poolollu aro kuudokaikono. “Guu kuuguudo sugudo tokwe moruudomollo'mo tovino luko nyumwalbiyo. Aki gumoro mago tov nobutowosumwalbiyo. Toro kweku kuruv kuuguudo sugudo su tokwe neya domoruudomollogawono.
Gooti tool kevu Roomda'ai togaikulluno kalo buuropino wino'no gamoro a'mwo abolo kuunodo wimo'nyo'moneyokwe me'no adekumarokagaikikono. Toro te nuugebuuravoo, nuu kemi pas akav yakwollodum aro ikudumo'monyugono. Gooti toolluro yasuwa'wino sugumaluko ton nekubwemwalonekono. Nemi Nellunumiyago Gooti tooke'aro Aguto Jisas Kraiseke'aro tooralluda'ai yasuwa'wino sugumaluko su ton kuvinono noma'mwalpinogaikikono. Toro amapi tovida'ai kemoro sumwoluko ton kavo wosopi ilaiyo nokwo yomjomwekovla'mwalpinobuurekikono.
Toro te kemi Gooti toolluro Kuullo tool jurogudo ikubweyodowo'jure tokwe kevu Gooti toolluro subuu'yamju su ton adoga kuvinono imo'nupinodukoneyokwe tovino sogwollo kingovla'mwalpinogaikikono. Aki Gooti tool kuvinono ikullo'mwojono su toolluno kuudo to'no duubweyogaulo. Gooti su tool kemi poowokalago togai ilaiyo yo'mo tokwe'aro sumwoluko ton kavo wosunyo'mo tokwe'aro ton kemi nokwo aikubweyono. Gooti tool tono tono ikubwemovla'mwalono tovino nuu ilaiyo anyunadopiyo.
Toro te nevu Krais toolluno kuudo me'no uubweyodowado tonolluno Gooti tool, “Sugudogano,” danekubweyoduke tovida'ai gamoro sumdo tovi sugudo wimo'nodowadonogano. Toro tovino tov nevu Gooti toolluro ikomago mwimo'nodowadonogano. Toro kuvi kuruv nemi Aguto Jisas Kraisol nekullo'mwojo'moneyokwe womdo tov me'no sopiyokaikono. Toro sopiyoka tovino Gooti tool kuudo yaurowo'ji gamoro sumwoluko tov nemino kavo nekubweyodowodekono.
Aki nevu Gooti toolluro ikomago kwimo'nyajuuwo kunol kuruv gamoro Kwolaiyo toolluro aboloka tovida'ai Gooti tool nemi amomgurovanekubweyokaikono. Toro amomgurovanekubweyoka tovida'ai nevu gamoro ibwoto'nyo wimo'nodowadonogano. Toro tovino tov aro nonekullumo'nononogano. Jisasol aiko te me'no dukavo'no aiyo mwallokwekono. Nevu toro tooke aiyo mwalodowado tovino tov Gooti toolluro kirumwallo tovi nobirolo'nugolokwanonogano.
Toro kuvi kuruv a'mwo pwol Gooti toolluro Kuullo toollu kuumjungovlawo'ji toolluro sulo ki'nono tono'gwowi arogano. A'mwo abolo tonyuno kalo buuropino winyo'mo pasudo tokwe'aro poowokalago kuunodo tovida'ai ilaiyo yo'mo pasudo tokwe'aro sumwoluko kavo wosunyo'mo pasudo tokwe'aro jul'nyo bwi'mo'mdowo'jure kuga kuruv muugollu'meyo'mo pasudo tokwe'aro a'mwo abolo tonyuno ilaiyo mollo'mo pasudo tokwe'aro yanyago wimo'nyo'mo pasudo tokwe'aro sugupasudo tovi gudupolallo'mo pasudo tokwe'aro
Toro te yiuwi'nokai a'mwo abolo kuuguudo akavi kuumjunpi tonyu Gooti toolluro sumwoluko kavo wosunyo'mo tokwe'aro gamoro kalo mamwonyodowodo tokwe'aro toval nuubwemwalonekono. Aki a'mwo abolo su ton aiyogasuro Gooti toolluro a'mwo abolo kuunodo Isuraiyol tonbusuko imo'nodupudogano. Toro imo'nodopure kunyu kuruv aval'no nuubwemwalonekono.
Aki kemoro subusu'nyogalo su tovi'aro Gooti toolluro kavo wosunyo'moneyokwe tov nekullamwalonekono. Gooti toolluro kavo wosunyo'moneyokwe su tov yiuwi'nokai kwako akavida'ai kuudo youroma'dupudo tonyu uuwolo'mdowodokwono. Aki kevu Krais Jisasollu uuguro'mwonyodopure tovi'aro Gooti toolluro kavo wosunyo'moneyokwe su tov kemoro poowokalago togai'aro kuudo togai'aro tonyu pi'mwono yellukuromollekumwalmwalonokwono.
Toro toonal kevu wagwolago Kooloosida'ai Krais toollu me'no uuguro'mwonyodupudo togaikullomno pas akav sokwollapimawolokwono. Kevu Krais toollu uuguro'mwonyodupudo togaikul Gooti toolluro a'mwo abolo kuunodo wimo'nodupudogaikikono. Aki nemi nello'mwo nellugwai'yago togaikulbusuko nekullumo'nodupudogaikikono. Kevu Krais toolluno kuudo guureji uubweyodupudo su togaikullu aro adekwopiyamawolo. Nemi Nellunumiyago Gooti toolluro yasuwa'wino sugumaluko tov nokwo ikubwemwalonekono. Aki kevu sumwoluko kavo to'no wosungovlaiyo'moneyokwe kuruv nokwo ikubwemwalonekono.
Aki Gooti su tool yiuwi'nokai kwako akavi mwalodupudo togai'aro sulugumdo tovi mwalodupudo togai'aro yiuwi'nokai su tonyu gami wobo toru aki aiko te momgurowoso'mo winyokwekono. Toro tool gami Kwolaiyo toolluro mujako tov i'noguropte tovi abwoloka su tovi'aro sumwoluko noullo me'no wosunodowodekono. Gooti tool su toro tomgu'aro yiuwi'nokai tonyu gami wobo toru aki aiko te kuvinono momgurowosokwekono.
Aki Krais tool gamoro sumwoluko kavo wosunyo'moneyokwe tov me'no ikullabodowodekono. Toro te sumwoluko kavo wosunyo'moneyokwe su tov kemoro poowokalago tonyu mido neya mollekumwalmwalonokwono. Aki Gooti tool kemi me'no adekumarokaikono. Su toro adekumaroka tov aro tovino'mokwono. Kevu kulako puru'monodo to'busuko imo'nodupudo togaikul sumwoluko kavo wosunyo'moneyokwe adekumarokaikono. Aki yiuwi'nokai toga Gooti toollu, “Nenoloo,” neya duudumovlavogaulo.
Kuudo neya jaurono. Gooti tool gamoro Kuullo toollu nekullabodowodo tov nevu luko imwalano'moneyokwe nekullabodowodolmaiyo. Toro kuvi kuruv nevu jurogudo imo'nyo'mo tokwe'aro kalo buuropino mollo'mo tokwe'aro nevnokwenolluro pasudo tonyu pi'mwono mollomwallunyo'mo tokwe'aro su tonyuno'gwowi neya mujumovla'mwalano'moneyokwe Gooti tool gamoro Kuullo toollu nekullabodowodekono.
Gooti su tool sumwoluko kavo wosunyo'moneyokwekono. Toro tool nemi Aguto Jisasollu aiyo aiko te me'no amodukavokaikono. Jisasol nemi nekullo'mwojo'moneyokwe gamoro mujako tov me'no abwoloka tovino tov sipsip moduvomwallokwe aguto toolbusuko anekullumo'nokaikono. Aki gamoro mujako abwoloka su tovi'aro subuu'yamju muuduko tov me'no sumo'nokakwono. Subuu'yamju su tov aiyo yiunokuudo mujo'movlaiyo'moneyokweyokwono.
Toro duubweno sumaiyokwe Eburaiyamol yiuwi'nokai kuto ivito aikomgu avipolomokaboka tonyu mollu'bworosuno sumaiyokwe atousal amomuudeyosokaikono. Toro te Eburaiyamol kuto ivito atousal amomuudeyosoka su tonyuda'ai puruv Melkisodekollu kwiyokaikono. Melkisodekolluro yovo tovino kavlo puruv arokwono. Aguto kig su tool pasudo idopto'nodo to'no yomjomwekovlaiyokwekono. Aki kavlo puruv wagwolago Salem tovuro aguto kig sumo'nyajukekono. Toro toolluro yovo su tovino aro mollovodo'mwojadodupudekono. Aguto kig su tool sumwoluko kavo wosunyo'moneyokweyolekono.
Nuvu Joononyu kevu kwako Esiya tomuuda'ai Jisasolluro 7-pela mollu'bwoto go'no go'nodo togaikullu pas akav sokwollekwopiyamono. Toro togaikulluno nuvu aro nyunodowodonyugono. Gooti tool gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval nokwo ikubwemwalonekono. Agasuro Gooti mwalodowodo su tool aiyoga amjomwekelabiyajukekono. Aki lukomgu kuga kuruv kuuno mujomwekovla'mwalonekono. Aki Gooti toolluro Kuullo kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo aikubweyogawono. Gooti toolluro Kuullo su tool 7-pela kuullo toorobusuko imo'nodowodekono. Toro tool Gooti toolluro sia kig tovi sumdollu toru ilomwalodowodekono.
Neya duu'nono. Guu danyu'nyuwuulo pworo noma'binekugono. Toro ma'do'bure su tooraino luko nyubiyo. Satanyolluro womdokwe pworo kemoro kuudo uubweyodupudo tovi yamju ikulloganyo'moneyokwe kevu pugaikullu wuulo killo'mo ago tovi nomeraikubwepinorogano. Me'no meraikubweyopi iruko atousal tobuullu kaiyako yaikullugolodopure su toga danyu'nyuwuulo ton nyubwosunmwalpinogaikikono. Toro kuvi kuruv kemi kuudo uubweyodupudo tovi buulo nuugunyumopimwalpiyo. Kemi romiyaikubweyo'mo yodopure kuga kuruv guureji to'no gudupolaropi resis tovi kuuwolopi togaikullu nuu mubiyo tov aiyo yiunokuudo mujomwekovlaiyo'moneyokwe nekullamonyugono.
Toro kuvi kuruv a'mwo abolo puno'gwowi luko yodupudo su togai'aro kuudo muubweyodupudo togai'aro kaiyako igolamo'nodupudo togai'aro romiyosodupudo togai'aro kwonyalo yodupudo togai'aro bulapto yodupudo togai'aro kuunano gooti toorai ilomoropiyodapudo togai'aro kuunano yogalo youkuu'nuudodupudo togai'aro yiuwi'nokai su tonyuno'gwowi dukworokakwe salfa sulo tokwe du'muudo nugovla'mdowo'jure tovi noulapinogano. Du'muudo su tovino, naba 2 bolnodovo, dodupudokwono.”
ကြော်ငြာတွေ