Toro te Jisas Kraisollu somaroka tovino kuuguudo tov aro tomgu'aro sumo'nokakwono. Gamoro ganeyago Mariyav Joosepollo'moneyokwe ajudoubwengikokwono. Toro kuvi kuruv Joosepol Mariyavi yere mamaro'no sumwonyo miyodole toga Mariyav sumwoluko sumo'nokakwono. Su tov Gooti toolluro Kuullo toolluro jurogudo tovida'ai to'no sumo'nokakwono.
Joon 14:26 - Gooti Toolluro Yogalokwono26 Toro kuvi kuruv lukomgu mi Nyunumiyago tool gamoro Kuullo toolluno'gwowi kemi sobanyo mollekudaiyo'moneyokwe nomekwopiyabwonekono. Kuullo su tool moro yovo tovuro jurogudo tokwe bowo'ji yiuwi'nokai tonyuno yodekubwasumwalonekono. Aki moro yiuwi'nokai kuuguudo yodekubwosumelabodumdo tonyuno aki aiko te kuudo you'movlapino'moneyokwe ikullo'mwojumwalonekono. အခန်းကိုကြည့်ပါ။ |
Joon 14:26
75 ပူးပေါင်းရင်းမြစ်များ
Joosepol toro kuudo yau'duke kuvi kuruv Aguto toolluro ensel pwol wojo tovi'aro bwiyalo'nyuno sumaiyokwe aro kuudokaikono. “Joosepoloo, Devitolluro jukweyago kwolaiyo tooku Mariyavi mallo'mo tovino luko mibinono. Abolo su tovuro sumwoluko tovida'ai kwolaiyo aulomnasuko su tool Gooti toolluro Kuullo toolluda'ai sumo'nadopiyo.
Toro te kevu plavopi yiuwi'nokai kwako akavuro go'no go'nodo tomuuda'ai a'mwo abolo tonyu moro numjunyokwe imo'numwalpino'moneyokwe jodubwosomollogaulo. Toro yodubwosomollodopure tovida'ai moro numjunyokwe sumo'nupi tonyu kevu wonyo domogaluvollogaulo. Toro toorekul Gooti Nyunumiyago toolluno yovo tokwe'aro gamoro Kwolaiyo toonyuno yovo tokwe'aro gamoro Kuullo toolluno yovo tokwe'aro tonyuda'ai wonyo domogaluvollogaulo.
Toro te kevu Gooti toollomno kuudo souragunyumo'numwakopo toorekullu nuvu wonyo tokwe mogalaikuvollodumdonyugono. Toro kuvi kuruv pwol mi lukomgu anumjunadopiko su tool aguto kuunodekono. Nuu akaro tekwonyu Aguto su toolluro suulpweyo tov mokavlaiyo'mo kuruv ku'nonodo'mekwonyumaiyo. Su toolno'gwowi Gooti toolluro Kuullo tooke'aro duko tokwe'aro tovake mogalaikuvollonekono.
Gooti toolluro Kuullo tool Devitolluro kuudo tovi wiyoduke toga Devitol aro ajakwollokaikono. “Gooti tool numoro Aguto toollu aro kuudokaikono. Guu moro anato toru bomwalo'bi nuuge mwalbinekugono. Toro mwalodo'bure toga nuu gumi ikomago toorai maro'mi gumi dolago tomuu bomagubwemorogano.” Gooti toolluro adoka su tovino Devitol toro ajakwollokaikono.”
Toro te lukomgu kemi galekumworaropi kooti yogalo'mo morekwapipinorekikono. Toro amorekwapipi toga kemoro yogalo burowo'nyovo wuudanonoldukoneyokwe tovino kuudo kwolallo miyourukwapipinono. Gooti tool kemoro yogalo wuujo'moneyokwe tov nekullabwonekono. Toro ikullabodowo'jure toga nokwo wuudupinorekikono. Su toro wuujo'mo tov kemoro'maiyo. Toro kuvi kuruv Gooti toolluro Kuullo tool kemi daikullodowo'jure tovida'ai to'gwowi nokwo wuudupinorekikono.
Toro kuudoka tovi ensel tool aro kuudokaikono. “Gooti toolluro Kuullo tool nobagi'mowono'guugono. Toro bagi'mowo'ji Gooti Yiuwi'nokai Tonyu Uuwolo'mdowodo toolluro jurogudo tov gumi noborogurogumarono'guugono. Toro tovino tov kwolaiyo soma'bi tool Gooti toolluro kuunodo wimo'numwalonekono. Toro toolluno yovo puruv, Gooti toolluro Kwolaiyolo, dupinekono.
Kevu kuunumiyago ma'no ma'nodokwe kworekul kuruv kemi kwoloraiyo tobuurai yasuwa'wino sugudo ton wiyodupudorekikono. Su toro to'busuko kubalno kemi Tellunumiyago muunyu kai'muu mwalodowodo kwol kuruv yiuwi'nokai a'mwo abolo, “donyabono,” kuudoganpi togaikullu gamoro Kuullo tool kuvinono ikullabwonekono. Aki Gooti su tool kwako akavida'ai tellunumiyago toorai uuwolo'mdowodo toolluno tov kevu kuudoganpi togaikullu muunyu toru'aro kuruv nekullamwalonekono.”
Su toro toga a'mwo pwol wagwolago Jeruusalem toru amwallajukekono. A'mwo su toolluno yovo tov Simiyoonolekono. A'mwo su tool Gooti toolluro sumdo tovi sugudo wimo'nodowo aki Gooti toollu dolago tomuu ilaiyo to'no amwallajukekono. Lukomgu Gooti tool Isuraiyolda'ai a'mwo abolo tonyuro sumwoluko iroto wosunyo'moneyokwe tovino Simiyoonol sogwollo aingelabiyajukekono. A'mwo su toollu Gooti toolluro Kuullo tool me'no kuuwollajukekono.
Neya duu'nyulo. Moro Nyunumiyago tool gamoro Kuullo toollu kemi wolomekwopiyabiyo'mo tovino subuu'yamju me'no aikullajukekono. Toro te nuu gamoro Kuullo su toollu kemi noolomekwopiyamonyugono. Gooti toolluro Kuullo su tool wolabowo'ji muunyu kai'muuda'ai jurogudo aikubweyo'ji su tov kemoro poowokalago tonyu noullo'movaikwopiyonokwono. Toro kuvi kuruv Gooti toolluro Kuullo su tool yere mwolabodowo'jure akaga kevu wagwolago akavi sogwollo neya denomwalogaulo.” Kuudokaikono.
Toro kuusoda'mduke tomuuda'ai Gooti toolluro Kuullo tool dokato sobuuro pwolbusuko wolabino sumaiyokwe Jisasollu abwolomwalokaikono. Toro bwolomwalno sumaiyokwe yogaimaguurai puruv sulugumdo tovi muunyu tomuuda'ai aro adokakwono. “Guvu moro Kwolaiyo kalo buuropino nyunodumdo tookugono. Toro tookujuno ilaiyo bwotonyo sumonoo.” Adokakwono.
Muudu'nodo toga nuvnokwe toonyu, Oo akal kwoldeyo, miworovoma'mwa'jo kuvi kuruv Gooti tool a'mwo abolo tonyu wonyo galuvollo'moneyokwe mi amonuwopiyabokaikono. Aki Gooti amonuwopiyaboka su tool aro anyudokaikono. “Gooti toolluro Kuullo tool sugudo to'nodo pwollu nobwolmwalonekono. Toro abwolmwalo'ji toga'no'gwowi kuudo youroma'binekugono. Oo akal kwekono. Toro tool a'mwo abolo tonyu Gooti toolluro Kuullo toolluda'ai mogaluvollonoldeyo. Su toro kuudo youroma'binekugono.” Anyudokaikono.
Su togasuro Jisasollu toro wimo'noduke tonyuno gamoro uumjunyokwe tooro kavlo tovino kuudo miyouromallajuporogano. Toro kworo kuruv lukomgu Jisasol muunyu kai'muuno me'no suloka toga'no'gwowi Jisasollu kwimo'numoka su tovino aki aiko te kuudo yau'no sumaveyokwe aro adoporogano. “Oo nebalo'mdeyo. Gami kwimo'noka su tovino proofet yogalo puruv Gooti toolluro yogalo tovi sakwollungiko tov dooso.” Adoporogano.
Kuvinono kwimo'noka su tov arokwono. Jisasol me'no aboloka toollu Gooti tool aki aiko te amodukavokaikono. Me'no amodukavoka toga gamoro uumjunyokwe tooro Jisasolluro yogalo adoka su tovino aki aiko te kuudo sauroporogano. Su toro kuudo yau'no sumaveyokwe Gooti toolluro yogalo sakwollungiko tokwe'aro Jisasolluro yogalo adoka tokwe'aro yiuwi'nokai tovalluno kuudo kuubweyoporogano.
Jisasol su toro amoruudoka tov Gooti toolluro Kuullo toollunokwono. Lukomgu a'mwo abolo Jisasolluno kuudo kuubwepi ton Gooti toolluro Kuullo su toollu kuvinono nomapinekono. Sumdomgu Gooti tool gamoro Kuullo toollu yere mwiyajuko tov aro tovinokwono. Su toro toga Jisasol Gooti toolluro bako bwotonyokwe tomuu yere maulomwaloduke tovinokwono.
Aki puga Jisasol gami a'mwo kuurotokwe toorogai wosamujuko i'bwo'nonomwalno sumaveyokwe aro kuudokaikono. “Kevu nemi Nellunumiyago toolluro subuu'yamju aikudo tovino kuudo nyallulo'gwonmwalpiyo. Subuu'yamju su tov arokwono. Joonol wonyo tokwe agalaikuvollajukekono. Toro kuvi kuruv Jisasolno'gwowi Gooti toolluro Kuullo tool ikullabodowo'jure su tomgu'aro mogalaikuvollumwalonekono. Subuu'yamju su tovino kuudo nyallulo'gwonmwalpiyo. Toro tovino tov kevu wagwolago Jeruusalemda'ai yere mabolokuupinorekikono. Toro kworekul kuruv iruko pubuul sogwollo mwalopi Gooti tool Kuullo toolluda'ai mogalaikuvollo'mo sogwollo neya kinpinorekikono.” Jisasol gami a'mwo kuurotokwe toorai toro kuudokaikono.
Toro kugaikul kuruv kemiyo'mo tov arokwono. Gooti tool gamoro Kuullo tool nekullabwonekono. Toro aikullabwo'ji toolluro jurogudo tokwe kevu mino kuuguudo tov kuu'maiyo toru'no dodoluwosumwalpinorekikono. Toro toorekul wagwolago Jeruusalem tokwe'aro proovins Juudiya tovuro yiuwi'nokai tomge'aro proovins Samariyake'aro tomuu dodoluwosomollogaulo. Aki kwako akavuro yiuwi'nokai do'gwapiyo kumuu kuruv kuu'maiyo toru'no dodoluwosomollogaulo.” Kuudokaikono.
Toro kuulomwaloduke kuga'gwo kuuno nuu Aguto Jisasolluro kuuguudo anekujajuko puvino aki aiko te kuudo sau'mwa'jonyugono. Kuuguudo su tov arokwono. “Joonol wonyo tokwe amogaluvollajuko kuvi kuruv Gooti toolno'gwowi gamoro Kuullo tool wiyodowo'jure tomgu'aro mogaluvollonekono.” Aguto toolluro kuuguudo su toro tovino aki aiko te kuudo sau'mwa'jonyugono.
A'mwo su tooro i'bwo'nodupu Aguto toolluno sulomoropiyajuporogano. Toro tooro puga Gooti toolluno ilomoropiyo'moneyokwe wosamujuko kumako amwaloporogano. Toro mwalodopure toga Aguto toolluro Kuullo tool aro kuudokaikono. “Moro womdo ajeso tovino imwalbulluno'moneyokwe kevu Banabaseke Sooleke toorallu dojesulo.” Kuudokaikono.
Toruda'ai Banabaseke Sooleke Gooti toolluro Kuullo tool amorapiyoka su tooral plaino plaino sumaleyokwe wagwolago puvi ai'movolorakono. Wagwolago su tovino yovo tov Seluusiyaveyokwono. Toro tov soolwaravuro wolo tomuu wo'dowodokwono. Toro towai ki'mo'mno sumaleyokwe sip puvi ilomwalolno avlavolorakono. Toro plaino sumaleyokwe aku'momdo Saipros toru ai'movolorakono.
Aki Gooti amonuwapiyoka su tool nevu yiuwi'nokai kwako akavida'ai toonolluro poowokalago tonyu youroonekwonodowodekono. Toro tool a'mwo Juu tooravuro miyawosunodupudo su tekwojai ilaiyo me'no amollomarokaikono. Toro amollomaroka tovino wuuduuwallo'moneyokwe gamoro Kuullo tool kwiyokaikono. Muudu'nodo toga nevu Juu tonollu anekullaboka to'busuko kubalno a'mwo Juu toonolluro miyawosunodowado tekwojai aval'no kwiyokaikono.
Toruda'ai Pooleke tooro plaino sumaveyokwe kwako Esiya tomuu kuuguudo sugudo tokwe modomollo'mo kwinopo kuvi kuruv Gooti toolluro Kuullo tool a'mwo su toorai kuumjukurokaikono. Toro kuumjukuroka tooro kwako su tomuuno mavlavopo kworo kuruv proovins puruvalluno'gwowi avlavoporogano. Proovins su tovalluno yovo tov Frijiyake Galesiyake tovakono. Proovins su tovallu tomuu'aro avlavoporogano.
Toruda'ai Gooti tool Jisasollu moduka'mno sumaiyokwe muunyu kai'muuno amokailokaikono. Toro mokailno sumaiyokwe Gooti tool noonyumwonyu pworai muunyu toru'aro uuwoleyo'moneyokwe Jisasollu gamoro anato toru amorumwallokaikono. Toro mwalodowodo toollu gami Ganumiyago tool gamoro subuu'yamju me'no soka kuvinono Kuullo tool kwiyokaikono. Toro wiyoduke tovi Jisasol ma'dowo aga toga nemi anekubweyadopiyo. Toro nekubweyoduke tovida'ai a'mwo abolo su tobuuravuro go'no go'no yogaljo adadokwopo tov kuvi kuunogano. Toro dodopure tonyu muugona'dupu kuu'numwakopo tov kuvigono.
Toro te aga kevu a'mwono moduvomwallokwe toorekullu aro ikudumo'mokwono. Kevnokwe toorekul neya domoduvomwalnogaulo. Aki a'mwo abolo Gooti toolluno kuudo kuubwemwakopo kubuurai kuruv sipsip tobuuraibusuko kevu neya domoduvomwalogaulo. A'mwo abolo su tonyu Gooti tool gami kuunodo wimo'numwalpino'moneyokwe gami Kwolaiyo toolluro mujako tokwe abiyomarokagano. Toro abiyomaroka tonyu kevu mido mollomwalmwalpino'moneyokwe Gooti toolluro Kuullo tool me'no ajaikubweyokarekikono. Toro ajaikubweyoka toorekul Gooti toolluro a'mwo abolo su tobuurai sipsip duuwatokwe toorobusuko wimo'nopi neya domomjomwekovlavogaulo.
Moro su toro sajo tovi kevu me'no kwonyajuporekikono. Toro te kev kworekul kuruv moro sajo to'busuko kubalno womdo guureji yopi a'mwo abolo wollainyo tobuurai neya duuwiyo'mwojogaulo. Su toro tovino nuu me'no aikuduuwallajonyugono. Aki nemi Aguto Jisasolluro yogalo puruv adoka tovino kuudo nyallulo'gwonmwalpiyo. Jisasol gavnokwe tool aro adokaikono. “Guu a'mwo pwollu burowo'nyodeyo ton yasuwa'no kwibi tov gumi poowokalago tovi ilaiyo bwotonyo ibwosunbinekugono. Toro tovino tov kevu aro kuudo nyaupiyo. Oo a'mwo pworavuro yasuwa'no anekullabupi tonyu amara'ji toga ilaiyo bwotonyo ibwosunanonogano. Awiyo, su toro aikullabupi toga ilaiyo pwekwono to'no ibwosunpinogaikikono. Toro kugaikul kuruv kemoro burowo'nyodeyo ton a'mwo pworai yasuwa'no kwipi toga'no'gwowi ilaiyo bwotonyo kuunodo ibwosunpinogaikikono.” Adokaikono.” Poolol wagwolago Efesosda'ai a'mwono moduvomwallokwe toorai toro kuudokaikono.
Toro te a'mwo abolo su ton kuudo go'no go'no yau'no sumaveyokwe imgu amgu puruval seru'mdeyomwalopogano. Toro yeru'mdeyomwalno sumaveyokwe Poololluro kuuguudo tovino yogalo aullajunopogano. Toro ton gamoro ago toru nuugollu'meyo'mo yodopure toga Poolol aiyowo'mo kuuguudo pwekwo aro kuudokaikono. “Aiyoga Gooti toolluro Kuullo tool nemi nellukweyago tonyu moruujo'moneyokwe kuuguudo tov proofet Aisaiyallu kuubweyokaikono. Kuuguudo su tov nebal'nodokwono. Su tov arokwono.
Toro buuwino sumaiyokwe Pital Ananaiyasollu aro kuudokaikono. “Oo Ananaiyasoloo, guu Gooti toolluro Kuullo toollu kuunano youkuu'nuujo'moneyokwe Satanyolluro mollubworomokavla'mduke tovi kuumjunmado tov buro'nyo kavlo tovino'mdeyo? Guu gumi kwako tovida'ai nuugwiyo ton pun yiulo apuurosumadekugono. Toro tooku gumi poowokalago tovi ma'no ma'no yo'mo tekwogu nemi buro'nyo'mo kuunano joukuu'nanekudadokuuno?
Stivenol kaunsel toorai toro wuujuno sumaiyokwe aki aro kuudokaikono. “A'mwo akarekul dogaipo'nyo yopiyodupu kemoro poowokalago ton lumdo kuulopiyodupudorekikono. Toro toorekul a'mwo pworo Gooti toolluno kuudo muubweyodupudo toorobusuko kubalno yopiyodupudorekikono. Aki aiyoga kemi tellukweyago tooro kisuvolo sajupo toorobusuko kubalno kev kworekul kuruv yiuwi'nokai toga Gooti toolluro Kuullo toollu kisuvolo to'no wiyodupudorekikono.
Toro kuvi kuruv Stivenolluno'gwowi Gooti toolluro Kuullo toollu uumjunyo'moneyokwe kuudo ton gamoro poowokalago tovi aullo'mowopiyokakwono. Toro kuullo'mowopiyoduke toga Stivenol muunyu kai'muuno to'no suloonyopiyokaikono. Toro iloonyopino sumaiyokwe Gooti toolluro bako bwotonyo puruv pwopiyoduke tovi kwonokaikono. Aki toro tovi wonyuno sumaiyokwe Jisasol Gooti toolluro anato toru da'mduke toollu kwonokaikono.
Su tov aro tovinokwono. Aguto kig Gooti toolluro mido mollomwalo tovi dolago tomuu mujomwekovlaiyo'moneyokwe tov wosamujuko tokwe wonyo tokwe toval aguto mimo'nodubulovakono. Toro kuvi kuruv Gooti toolluro mido mollomwalo tovi dolago tomuu mujomwekovlaiyo'moneyokwe aguto imo'nodupudo tono'gwowi arokwono. Nevu pasudo idopto'nodo yomjomwekovlaiyo'mo tokwe'aro sumwoluko puru'mono wosunyo'mo tokwe'aro a'mwo abolo punyuno kalo buuropino mollo'mo tokwe'aro su tono'gwowi aguto imo'nodupudogano. Pasudo su ton Gooti toolluro Kuullo tool nemi nekubweyodowodogano.
Toro te kemi Gooti toolluro Kuullo tool jurogudo ikubweyodowo'jure tokwe kevu Gooti toolluro subuu'yamju su ton adoga kuvinono imo'nupinodukoneyokwe tovino sogwollo kingovla'mwalpinogaikikono. Aki Gooti tool kuvinono ikullo'mwojono su toolluno kuudo to'no duubweyogaulo. Gooti su tool kemi poowokalago togai ilaiyo yo'mo tokwe'aro sumwoluko ton kavo wosunyo'mo tokwe'aro ton kemi nokwo aikubweyono. Gooti tool tono tono ikubwemovla'mwalono tovino nuu ilaiyo anyunadopiyo.
Gooti tool gavnokweyolluro sugudo tov mi me'no anubweyoka toonyuno tov nuu Krais Jisasolluro womdokwe wimo'nodumdonyugono. Toro toonyu Gooti toolluro kuuguudo sugudo tokwe a'mwo abolo Juu tooravuro miyawosunodupudo tonyu moruudomollodumdonyugono. Moro womdo yodumdo su tov pris tooravuro womdo sajupo to'busukokwono. Pris tooro Gooti toollu wiyo'moneyokwe sipsiporodeyo toorogai kwiroudapiyajuporogano. Toro kwiroudapiyajupo toga Gooti tool kemoro wiyodopure toorai ilaiyo amollomallajukekono. Su toro to'busuko kubalno nuu Jisasolluro kuuguudo tokwe a'mwo abolo Juu tooravuro miyawosunodupudo tobuurai moruudomollodumdonyugono. Su toro moruudomollodore tovi'aro a'mwo abolo pun kuudo uubweyodupudogano. Toro uubweyodopure tonyu Gooti tool ilaiyo molloma'dowodekono. Aki Gooti toolluro Kuullo tool a'mwo abolo su tobuurai ma'dowo Gooti toolluro kwoloraiyo kuunodo wimo'numwalpino'moneyokwe morumwallodowodogano.
Nevu su toro tomgu'aro sogwollo aina'ji tov wogulo'mo miyanonogano. Su tov aro tovinokwono. Gooti tool nemino kalo buuropino winodowodo tovi nekuduuwallo'moneyokwe gamoro Kuullo tool anekubweyokaikono. Toro te Kuullo su toollu'aro Gooti tool gamoro kalo buuropino winodowodo tov nemoro poowokalago tonyu kuulemovanekubweyodowodekono.
Toro te aga nuvu aro aikudadokwono. Gooti toolluro Kuullo tool a'mwo pwollu mollubworomokavla'mdowo'jure tovi kuumjuno'ji tov a'mwo su tool Jisasolluno bwolomorumwogapiyo'moneyokwe kaiya'no yogalo puru'monodo kuruv madonekono. Aki a'mwo yasuwa'no pwolnodo kwol kuruv nemi Aguto Jisasolluno ku'nono milomodomoropiyawonekono. Toro kuvi kuruv yiuno Gooti toolluro Kuullo tool jurogudo uubweyodowo'jure tokwe to'gwowi a'mwo su tool aro nokwo donekono. “Oo nemi Aguto tool Jisasol kwekono.” Donekono.
Oo aro tovino nyunodowodonyugono. Nemi Aguto Jisas Kraisolluro yasuwa'wino sugumaluko tov kemi nekubwemwalonekono. Aki Gooti toolluro kalo buuropino winodowodo tov kemi nekwo'mwalonokwono. Aki Gooti toolluro Kuullo tool kemoro yiuwi'nokai poowokalago go'no go'nodo tonyu aval'no moguro'mwojaikubweyowo'ji kevu puru'mono nokwo guro'mwonyumwalpinogaikikono.
Aki nevnokwe toonol kaiya'no pasudo togai migolamo'nodowadonogano. Aki nevu Gooti toolluro kuudo tonyuno you'movla'mdowadonogano. Aki toro toonollu kaiyako sanekullugolpi tovino biyolo madou'mwonyopiyokwenogano. Toro kwonol kuruv yiuwi'nokai a'mwo abolo tobuurai yiuno ilaiyo to'no igolodowadogano. Aki Gooti toolluro Kuullo tool mollubworonekumokavla'mdowo'jure tovi nevu uumjunodowadonogano. Aki a'mwo abolo pubuuraino kalo buuropino kuunodo mollodowadonogano.
Aki kevu a'mwo abolo Juu toonolluro miyaikuuwosunodowado kugaikul kuruv nebaikuuguudo tovi me'no wuu'nodupudogaikikono. Toro togaikulluno tov Gooti toolluro a'mwo abolo kuunodo me'no wimo'nodupudogaikikono. Nebaikuuguudo su tov Gooti tool kemi ma'no ma'nodo tovuro kirumwallo tovida'ai bomollurolovekumokalokwiyo'moneyokwe kuuguudo sugudo tokwono. Aki aiyoga Gooti tool gamoro Kuullo toollu ikullabiyo'moneyokwe subuu'yamju me'no sajukekono. Toro te kevu Krais toolluno kuudo kuubweyopo toga Gooti tool gamoro subuu'yamju tovi kuvinono uumjuno'no Kuullo tool aikullabokaikono. Toro aikullaboka su tov gamoro a'mwo abolo kuunodo wimo'nyo'moneyokwe ajaikubweyokagaikikono.
Toro kwonyu kuruv nemi Aguto Jisas Kraisolluro Gooti toollu kuuno wuudumovla'mwalmonyugono. Gooti su tool bako bwotonyo pwopiyodowodo tomuuda'ai Nellunumiyago kuunodekono. Toro toollu nuu aro tonyuno subusu'nyogalo wuudodumdonyugono. Gooti toolluro Kuullo tool pi'mwo kuudo tov kemi nokwo ikubwemwalonekono. Gamoro pi'mwo kuudo ikubweyodowo'jure tokwe kevu Gooti toolluno kuudo bwotonyago nyouroma'mwalpinogaikikono.
Aki neya duu'nyulo. Gooti toolluro Kuullo aikullaboka tool aro tovino jaikubweyo'moneyokweyokwono. Lukomgu Gooti tool kemi ikumokailawo'ji ilaiyo to'no nyulomwalpinogaikikono. Su toro tovino jaikubweyo'moneyokwe Kuullo su tool aikullabokaikono. Toro tovino tov Gooti toolluro Kuullo su toollu kisuvolo wiyopi jul'nyo nuubwemwalpiyo.
Gooti tool nemi ma'no ma'nodo tovuro kirumwallo tovida'ai kuvinono abomollurolovonekumokalokwokanogano. Su toro abomollurolovonekumokalokwoka su tov nevnokwenolluro sugupasudo sajuuwo tovida'aiyo'maiyo. Toro kuvi kuruv yiuno gavnokwe toolluro kalo mamwonyodowodo tovida'ai nemoro ma'no ma'nodo tonyu amollol'movonekumarokaikono. Toro mollol'movonekuma'no sumaiyokwe gamoro Kuullo anekullaboka toollu'aro nemoro poowokalago tonyu amonekudukavokaikono. Toro monekuduka'mno sumaiyokwe a'mwo abolo muuduko tonolbusuko yomjomwekovlawano'moneyokwe me'no sumo'nowonogano.
Su toro nekudodopure toga nevu kuuguudo su tovino, “Nebalo'mdeyo,” jo'moneyokwe tov Gooti kwol kuruv kuu'maiyo toru'no adodoluwosajukekono. Toro adodoluwosajuko su ton arogano. Duuwallo jurogudo togai'aro morumoukuropiyo'moneyokwe womdo togai'aro nobollo judo'no judo'nodo tonyu sukullajuko togai'aro Gooti toolluro Kuullo toolluro noonyumwonyu kwiyajuko togai'aro ton adodoluwosajukekono. Kuullo toolluro noonyumwonyu kwiyajuko su ton Gooti gavnokwe toolluro ilaiyo winoduke tovi uumjunodowo anekumwodeyajukogano. Toro te Gooti toolluro kuuguudo tovino nevu, “Nebalo'mdeyo,” jo'moneyokwe tov gavnokwe tool kuu'maiyo toru'no su toro adodoluwosajukekono.
Pris aguto toolluro sumdomguda'ai sel ago tovi womdo amjumovlaiyajuko su tovino Gooti toolluro Kuullo tool aro nekuduuwallodowodekono. Sumdomguda'ai sel ago su tov kuuno da'mduke toga Gooti toolluro ago muunyu kai'muuda'ai pwekwapto kuunodo toru'no kuullo'moneyokwe puuto tov yere mausu'nyajukokwono.
Gooti tool aiyoga proofet su toorai aro tovino me'no kuuduuwallokaikono. “Kemoro proofet yogalo moruudodupudo womdo su tov kevnokweraiyo'mo'maiyo. Toro kuvi kuruv yogalo amoruujajupo su tov a'mwo abolo lukomguda'ai billumo'nupino tonyo'mokwono.” Gooti tool proofet su toorai kuu'maiyo me'no kuuduuwallajukekono. Toro te proofet yogalo su tokwe a'mwo kuurotokwe tooro modomollodupudorogano. Toro modomollodupudo su tov kev togaikullo'mokwono. Aki Gooti tool aiyogasuro su toorai gamoro Kuullo tool muunyu kai'muuda'ai kwolomoropiyabokaikono. Toro toolluro jurogudo tokwe Krais toolluno kuuguudo sugudo tov amodekumollajuporogano. Aki ensel kworo kuruv proofet tooravuro yogalo su tovino kavlo tov kuudo youromallo'mo winodupudorogano.
Aki proofet su tooravuro yogalo puru'monodo kuruv kevnokwe tooravuro kuudo tonyuda'ai amollajajuporomaiyo. Toro kworo kuruv yiuno Gooti toolluro Kuullo tool proofet su toorai amollubworomokavlaiyajukekono. Toro mollubworomokavla'mduke tovi proofet su tooro uumjunodupu Gooti toolluro yogalo tokwe to'no amollajajuporogano.
Kev togaikulno'gwowi Krais toolluro ato tovida'ai gamoro Kuullo aikullaboka toollu me'no amaropogaikikono. Kuullo su tool kemoro poowokalago tonyu kuulemovaikubweyodowodo tovino tov kevu kemi yekubwaso'moneyokwe a'mwo pwolluno supto mimwakovo. Toro kuvi kuruv Kuullo su toolno'gwowi kemoro yiuwi'nokai supto yodopure tonyuno kuvinono yekubwasokwekono. Aki gamoro yekubwasodowodo su ton kuunanonmaiyo. Yiuno nebal'nodogano. Kuullo su toolluro yekubwasodowodo tonyu kevu neya uumjungovlavopi Krais toollu guureji nokwo uuguro'mwonyumwalpinogaikikono.
Toro kuvi kuruv kevu moro kalo buuropino nyunodowodo tobuurekulno'gwowi Gooti gavnokwe toolluro nebal'no yogalo anekullaboka tovino kuudo me'no uubweyodupudogaikikono. Toro te kemoro kuudo uubweyodupudo su tovi'aro jurogudo neya jogullumovlavogaulo. Aki Gooti toolluro Kuullo tool jurogudo ikubweyodowo'jure tokwe kevu Gooti toollu subusu'nyogalo neya duudumovlavogaulo.
A'mwo pwol kaduko nyabiyo'mo kwino'ji tov Gooti toolluro Kuullo tool moro mollu'bwoto go'no go'nodo tonyu kuuguudo wuudodowo'jure akavi neya wuu'nowo'ji kuudo youromaronekono. Kuuguudo su tov arokwono. A'mwo pwol Satanyolluro molo tovi kuuwolowo'ji su tool bolnodo naba 2 tov bai'mo'mdowo'jure kuga kuruv kaiyako mamaronekono.”
ကြော်ငြာတွေ