Hibruu 9:28 - Gooti Toolluro Yogalokwono28 Toro to'busuko kubalno Krais tool yiuno puru'monodo toga'no abolokaikono. Toro aboloka su tov noonyumwonyu kwiroudapiyajupo pwolbusuko imo'no'no gavnokwe tool a'mwo abolo ma'no ma'nodokwe bwotonyago tonyuro aiko toru maro'no abolokaikono. Lukomgu Krais su tool kwako akavi aki aiko te noolabwonekono. Su toro kwolabwo'ji toga'no'gwowi nemoro ma'no ma'nodo tonyu yovo'dogallo'moneyokwe wolabwonolmaiyo. Toro kuvi kuruv yiuwi'nokai a'mwo abolo gavuge mwallo'moneyokwe tovino sogwollo winodupudo su tobuurai gamoro ago muunyu kai'muuno nomollurolovomokailawonekono. အခန်းကိုကြည့်ပါ။ |
Hibruu 9:28
42 ပူးပေါင်းရင်းမြစ်များ
Toro boda'mno sumaleyokwe aro kuudolorakono. “E, Galilida'ai a'mwo akarekul, kevu akawai yasuwa'no da'mdupu muunyu kai'muu buro'nyo'mo jomuugonakovo? Jisasol kemi ikugollu'mo'mdowo muunyu kai'muuno sulmoka su tool aikomgu noolabwonekono. Sulugumdo tovi iloduke kwonmapo to'busuko kubalno aki aiko te sulugumdo tomuuda'ai noolabwonekono.” Kuudolorakono.
Sumdomgu Gooti sugudo to'no yodowodo tool aro me'no ajesokaikono. Jisasol neya bolowo'ji gamoro kulako tovida'ai mujako tov bwolawonokwono. Toro abwolawo'ji tovida'ai yiuwi'nokai Jisasolluno kuudo kuubwepi tonyuro ma'no ma'nodo tov nokwo mollol'movodukwopiyonekono. Aiyoga Jisasol yere mabwolaboloduke toga a'mwo abolo pun ma'no ma'no mujumovla'mdopure tonyu Gooti tool nokwo wonyapino to'no sajukekono. Gooti toollomno kuudo neya youragunyumo'nupureyokwe tovino sogwollo kwinyajukekono. Gooti tool aiyoga toro sajuko kwol kuruv aga'no'gwowi Jisasollu me'no kwolomonekwopiyabokaikono. Toro tovino tov, Oo Gooti tool sugudo kuunodoldeyo, kuudo yau'dowadonogano. Aki yiuwi'nokai a'mwo abolo Jisasolluno kuudo kuubwepi ton Gooti toolluro sumdo tovi sugudo wimo'nupinogano. Aki toro tonyuno Gooti tool, “Oo moro a'mwo abolo sugudogano,” nokwo modomaronekono. Gooti toolluro pasudo idopto'nodo tonyu su toro tomgu'aro wonodowadonogano.
A'mwo su tooral aval'nodoralmaiyo. Toro tovino tov kemoro womdo solo tovalluda'ai nevu yiuwi'nokai a'mwo abolo tonollu go'no go'nodo tomgu'aro yo'movanekwopiyodubulovakono. Adamolluro ma'no ma'no soka tovasuda'ai bolnodo tov a'mwo abolo bwotonyago tonollu yo'movanekwopiyodowodokwono. Toro kuvi kuruv Jisas Kraisolluro anekullo'mwojoka tovasuda'ai Gooti toolluro yasuwa'wino sugumaluko tov a'mwo abolo bwotonyago kuunodo tonollu yo'movanekwopiyodowodokwono. Toro tovino tov Gooti toolluro yasuwa'wino sugumaluko ma'dowado to'gwowi bolnodo tovi uuwolo'mdowodokwono.
Danyu'nyuwuulo su tov yiuno Gooti toolluro sokwollosoka avalo puno ibwosunodupudo'maiyo. Ne kunol kuruv nemi poowokalago tokwe danyu'nyuwuulo aval'no ibwosunodowadonogano. Toro ibwosunodowado kuvi kuruv nevu Gooti toolluro Kuullo tool me'no amarowonogano. Kuullo su tool Gooti toolluro yasuwa'no nekullabiyo'moneyokwe tovida'ai muudu'no amarowekono. Gamoro yasuwa'no nonekullabwono puno'gwowi yere mama'dowado tovino tov yiuno sogwollo to'no kingovla'mdowadonogano. Aki gamoro kwoloraiyo tonollu gavuge ilomwallo'moneyokwe sulowa'ji toga kulako muuduko ton nonekubweyono tovino sogwollo kingovla'mdowadonogano. Toro kingovlavowa'ji toga nemoro poowokalago togai danyu'nyuwuulo ton ibwosungovla'mdowadonogano.
Kevu kuudo neya jaullulo. Gooti toolluro loowo tov nemi ma'no ma'nodo tonyu ku'nono mamonekudukwopiyonokwono. Su tov aro tovinokwono. Nevu loowo tovi uumjunyo'mo nekullunodowodo kuvi kuruv kwako akavida'ai kuudo tooro kuuno kuulanekwo'dowodo tovino tov jurogudo nonaguto imo'nodowadonogano. Toro kuvi kuruv Gooti toolno'gwowi nonekullo'mwojo'moneyokwe gavnokweyolluro Kwolaiyo toollu kwolomonekwopiyabokaikono. Toro kwolomonekwopiyaboka su tool a'mwo pwolbusuko sumo'nyajukekono. Nevu ma'no ma'nodokwe imo'nodowado kuvi kuruv su toolno'gwowi ma'no ma'no puru'monodo kuruv miyajukekono. Toro tool nemoro ma'no ma'nodo tovuro mubiyo tov amobiyanekudukwopiyokaikono. Toro mobiyanekudukwopino sumaiyokwe aki ma'no ma'nodo tovuro jurogudo tovi yiunokuudo amodukwopiyokaikono.
Toro te kevu Gooti toolluro yiuwi'nokai ikullabodowodo tollovo me'no ma'dupudogaikikono. Gooti tool gamoro Kuullo toollu'aro buro'nyo buro'nyodeyo ton me'no ikullabodowodo tovino tov kevu noonyumwonyu punyuno supto mimwakovo. Kevu yiuwi'nokai ton me'no ma'dupudo togaikul aga nemi Aguto Jisas Kraisol lukomgu aki aiko te wolabwono toolluno sogwollo to'no kinodupudogaikikono.
Toro te nemoro kulako bwiyo buuropiyodupudo akan pumgu'aro imo'nopi bwiyo mabuuropipinogano. Aki aiyo yiunokuudo mujomwekovlaiyo'moneyokwe imo'nupinogano. Nevu kulako muuduko su ton me'no amaro'ji toga Gooti toolluro yogalo puvi suwiyo imwojonokwono. Yogalo su tov arokwono. “Gooti tool gami ikomago toorai me'no uuwolo'mdowodo su tool bolnodo kuvi kuruv yiunokuudo aromiyebuuropiyokaikono.
Aki puruv kemino aro yajunodupudogano. “Oo a'mwo abolo su ton Gooti toolluro Kwolaiyo tool gamoro ago muunyu kai'muuda'ai wolabwono toollu wonyo'mo sogwollo kinodupudodeyo.” Su toro yajunodupudogano. Gooti toolluro Kwolaiyo su tool sumdomgu aboloka kwollu kuruv Gooti tool aiyo aiko te me'no amodukavokaikono. Su tool Jisasol kwekono. Toro tool Gooti toolluro suroulo wuunodowodo tov lukomgu nobai'mowono tovida'ai nemi bomollurolovonekumokalokwodowodekono.
Toro te aga resis su tovi me'no uuwolo'mdupudo toorai mubiyo tov Aguto tool me'no mollovrowosodowodekono. Toro mollovrowosodowodo tovida'ai numiyo'moneyokwe tov mino sogwollo ainyunadopiyo. Numiyo'moneyokwe mubiyo su tov arokwono. A'mwo aguto kig tooravuro miguto yesodupudo tokwono. Miguto su tov yiuwi'nokai a'mwo abolo Gooti toolluro sumdo tovi sugudo wimo'nodupudo tonyuno to'no mapinokwono. Aguto tool a'mwo abolo tonyu pi'mwono jainyubwo'dowodo su toolluro iruko kwolabwo'ji toga miguto su tov kuvinono nonyabwonekono. Aki yiuno nuu judo toonyuno to'no nyabwonolmaiyo. Toro kwol kuruv yiuwi'nokai a'mwo abolo Aguto Jisasolluro aikomgu wolabwono tovino sogwollo kinodupudo kubuurai kuruv miguto su tov nuuwiyonekono.
Su toro yomjomwekovlavowa'ji lukomgu Jisas Kraisol gamoro bako bwotonyo tokwe nobiyalo'nonekono. Krais Jisas su tool nemi aguto Gootekono. Aki nemi ma'no ma'nodo tovuro kirumwallo tovida'ai mollurolovonekumokalokwiyo'moneyokwe tool kwekono. Toro toolluno sogwollo to'no kingovlavowa'ji lukomgu kuvinono abiyanekulo'no'ji toga nemoro poowokalago ton ilaiyo ibwosungoulapinogano.
Yiuwi'nokai ensel tooro kuullo pworogano. Toro tooro Gooti toolluro womdo tovi yodupudorogano. Ensel su tooro Gooti toolluro a'mwo abolo tonyu mollomwalmwalpino'moneyokwe modapiyodowodorogano. Gooti toolluro a'mwo abolo nomollurolovomokalokwodowo'jure tobuurai mollomwalmwalpino'moneyokwe gamoro ensel su toorai modapiyodowodorogano.
Kevu yiuwi'nokai a'mwo abolo togai sumwoluko noullo wosunyo'moneyokwe tovino womdo neya jogaulo. Aki kevu Gooti gavnokwe toolluro sugupasudo tollovai mujumovlaiyo'moneyokwe womdo neya jogaulo. Gooti gavnokwe toolluro sugupasudo su tollovai a'mwo pwol nonaguto sumo'no'ji su toolno'gwowi Aguto toollu ku'nono mwononekono.
A'mwo abolo loowo tovi kisuvolo kwiyajupo ton kirumwallo tovi su toro amallajupogano. Loowo su tov jurogudo adaiyajuko kuvi kuruv Gooti tool nemi ma'no ma'nodo tovuro kirumwallo tovida'ai nobomollurolovonekumokalokwono tovino yogalo to'gwowi aguto kuunodokwono. Toro tovino tov yogalo su tovi nevu muu'nyubusuko to'no nyumwala'jo. Nevu yogalo su tovi muu'nyubusuko to'no sa'ji tov kirumwallo tovi mirukuruwolowanonogano. Kuuguudo su tovino muudu'no amoruudoka tool yiuno Aguto toolnodokwono. Aki lukomgu kuuguudo su tovi a'mwo pworo me'no kuu'nyajuporogano. Toro kuu'nyajupo su tooro aro anekujajuporogano. “Oo Aguto toolluro kuuguudo adoka tov yiuno nebal'nodokwono.” Anekujajuporogano.
Nemi Pris Aguto su tool nemoro yiuwi'nokai jul'nyo ibwosunodowa'jure tonyuno kuudo me'no youroma'dowodekono. Su tov aro tovinokwono. Yiuwi'nokai nemi me'nonekumokavlaiyo'mo yamju baneki'mo'mdupudo su tooro Jisasol kwollu kuruv yamju aval'no kwiyoganyajupekono. Toro wiyoganodopure kuvi kuruv Jisasolno'gwowi ma'no ma'no pasudo puru'monodo kuruv miyajukekono.
Aki Krais su tool gamoro yiuwi'nokai womdo tovi sopiyoka toga Gooti tool yogalo aro adubweyokaikono. “Melkisodekol pris womdo sajuko toolbusuko kubalno guu pris aguto imo'numwalbinekugono.” Adubweyokaikono. Krais toolluro womdo sopiyoka su tovi'aro yiuwi'nokai a'mwo abolo kwollu kuumjunpi ton kemi ma'no ma'nodo tovuro kirumwallo tovida'ai birolo'nugolokwopi aiyo yiunokuudo mujomwekovla'mwalpinogano.
Su tool Livai iko tovasuda'ai pris aguto toorobusukolmaiyo. Aiyoga pris aguto tooro Gooti toollu yiuwi'nokai iruko go'no go'nodo toga neya aromiroudapiyajuporogano. Sumdomgu kevnokwe tooravuro ma'no ma'nodo tovino romiroudapiyodupu aki lukomgu a'mwo abolo tonyuro ma'no ma'nodo kunyuno kuruv aromiroudapiyajuporogano. Toro tooro yiuwi'nokai toga tono tono sumelabiyajuporogano. Toro kuvi kuruv nemi Pris Aguto Jisasolno'gwowi yiuwi'nokai iruko go'no go'nodo toga Gooti toollu maromiroudapiyodowodekono. Su tov aro tovinokwono. Jisasol yiuwi'nokai a'mwo abolo ma'no ma'nodokwe tonyuro aiko toru mallo'moneyokwe gavnokwe tool morubwenyuno sumaiyokwe abolokaikono. Toro tool yiuno puru'monodo toga'no aboloka su tovi'aro yiuwi'nokai a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe womdo tov yiuno'no sopiyokaikono.
Krais gavnokwe tool wiroudapinyo'moneyokwe Gooti toolluro ago muunyu kai'muu aiko te aiko te maullokwekono. Kwako akavida'ai pris aguto tooro noonyumwonyu pworavuro mujako togai momwora'dupu kwako akavida'ai ilomoropiyo'moneyokwe ago tovuro pwekwapto toru yiuwi'nokai kworomo toga amokaullajuporogano.
Krais su tool nemoro ma'no ma'nodo ton gavnokweyolluro kulako tovi ilomolloulloso'no amokavlavokaikono. Toro mokavla'mno sumaiyokwe i'noguropte tovi muunyu toru sulejuku'narokaikono. Nemoro ma'no ma'nodo ton gamoro kulako tovi sulomolloullosoka su tov aro'mokwono. Nemoro ma'no ma'no yo'moneyokwe kuudo tooro yiunokuudo neya bolopipinorogano. Aki nevu aiyo sumo'na'ji tovi'aro gamoro sugupasudo tonyuno'gwowi neya mujumovla'mwalano tovino'mokwono. Kuudo neya jaullulo. Krais toollu iwago aromiyopo tovida'ai imuulo amaroka su tovi'aro kevu ikulnodupu ilaiyo aiko te imo'nodupudogaikikono.
Kuudo neya jaullulo. Krais kwol kuruv a'mwo abolo tonyuro ma'no ma'nodo tovi modukwopiyo'moneyokwe danyu'nyuwuulo ton yiuno puru'monodo toga'no amarokaikono. Krais su tool yiuno sugudo to'no imo'nodowodo kwol kuruv nevu sugudo mimo'nodowado tonolluro aiko toru maro'no abolokaikono. Aki nemi Gooti toollu wobo toru nekumokabiyo'moneyokwe abolokaikono. Krais toolluro kulako tov me'no aboloka kuvi kuruv aiyo aiko te adukavoka toga'no'gwowi Kuullo sumo'nokaikono.
Aki Gooti toolluro noolabwono iruko tollugwojuno sogwollo to'no neya kinomwalmwalpinogaikikono. Aki iruko noolabwono su tollugwo yere abai'mowoneyokwe tovino kevu Gooti toolluro womdo tovi guureji neya domjumovlavogaulo. Iruko su tollugwo abai'mowo'ji toga Gooti tool sulugumdo tovi duko lumuugutowo'ji noluvirowapiyonekono. Aki duko aluvirowapiyo'ji su tovida'ai kuujo tooke'aro lobako tooke'aro sullugabwo togai'aro ton noduuwiyopipinogano.
Miyobuuravoo, Krais tool aikomgu yere mabiyalo'noduke akaga nemoro lukomgu nyumo'nano tov kuu'maiyo toru'no miyainyunyokwenogano. Toro kuvi kuruv aro kuudo me'no youroma'dowadonogano. Oo nevu Gooti toolluro kwoloraiyo me'no wimo'nodowadonoldeyo. Toro tonol lukomgu Krais tool kuvinono abiyalo'no'ji toga Krais su toollu yiuno'no noonanoldeyo. Aki nevu me'no kwona'ji su to kwolbusuko nyumo'numwalanonoldeyo. Su toro tovino kuudo me'no youroma'dowadonogano.
Aki kevu Gooti toolluro kalo buuropino winodowodo tovi anakuuto tomuu neya dovorugwo'mo'narogaulo. Aki Aguto Jisas Kraisol abwo'ji toga kalo nomaikumwonyonekono. Gamoro kalo maikumwonyono su tov kemi aiyo yiunokuudo mujomwekovlaiyo'moneyokwe tomuuno kuvinono mollubworekumokavlawonokwono. Toro ikullumo'nono su tovino kevu sogwollo to'no neya denugovlavogaulo.
Neya duu'nyulo. Jisas Kraisol sulu'wo tovi anakuuto tomuu yanekulo'nowo'ji noolabwonekono. Toro wolabodowo'jure toollu yiuwi'nokai a'mwo abolo ton sumdo noonpinekono. Aiyoga a'mwo mollurogudo pwol takubwopto tokwe Jisasolluro suumdo tovi juulowosoduke toga a'mwo abolo pun nokwo wonyapino to'no sopo su to kun kuruv noonpinekono. Toro kwonpi toga kwako akavida'ai yiuwi'nokai a'mwo abolo yovodolobunyo go'no go'nodo tonyuda'ai ton aro dupinogano. “Oo neronekumwallonoldeyo.” Su toro dopi kumdato dupinogano. Su tov kuvinono nyumo'nonokwono. Nebalokwono.
ကြော်ငြာတွေ