Hibruu 4:14 - Gooti Toolluro Yogalokwono

¹⁴ Nemoro Pris Aguto kuunodo tool Gooti toolluro Kwolaiyo Jisasekono. Nemi Pris Aguto su tool Gooti toolluro ago muunyu kai'muu me'no sulomwalokaikono. Toro tovino tov nevu gamino kuudo uubweyodowado su tovi guureji neya agudupolarogawano.

Hibruu 4:14 ပူးပေါင်းရင်းမြစ်များ

Matyuu 4:3

Toro winoduke toga yamju wiyoganyokwe tool Jisasollomno abokaikono. Toro bino sumaiyokwe aro kuudokaikono. “Guvu Gooti toolluro kwolaiyo tookuno'juki sulo akarai bret mollumo'noso'moneyokwe neya duudono.” Kuudokaikono.

Kuuguudo Sugudo akav Makolluro sakwollokakwono Mak 1:1

Kuuguudo sugudo akav Gooti toolluro kwolaiyo Jisas Kraisollunokwono. Toro tov muudu'nodo toga aro sumo'nokakwono.

Kuuguudo Sugudo akav Makolluro sakwollokakwono Mak 16:19

Toro wuujuno sumaiyokwe Aguto Jisasol muunyu i'muuno sulokaikono. Toro ilno sumaiyokwe Gooti toolluro anato toru sulomwalokaikono.

Luuk 24:51

Toro me'no duubweno sumaiyokwe Jisasol gami uumjunyokwe su toorai wuugollu'movo'no muunyu kai'muuno sulokaikono. Toro iloduke toollu Gooti tool gami ago muunyu i'muuno amokailokaikono.

Kuurotokwe 1:11

Toro boda'mno sumaleyokwe aro kuudolorakono. “E, Galilida'ai a'mwo akarekul, kevu akawai yasuwa'no da'mdupu muunyu kai'muu buro'nyo'mo jomuugonakovo? Jisasol kemi ikugollu'mo'mdowo muunyu kai'muuno sulmoka su tool aikomgu noolabwonekono. Sulugumdo tovi iloduke kwonmapo to'busuko kubalno aki aiko te sulugumdo tomuuda'ai noolabwonekono.” Kuudolorakono.

Kuurotokwe 3:21

Toro tool Gooti toolluro ago muunyu kai'muu mwalodowodo tool kuwai neya mujomwekovla'mwalonekono. Toro mujomwekovlavowo'ji yiuno Gooti toolluro me'no ajesoka toga'no aikomgu wolabwonekono. Su toro wolabwono toga'no aiyoga gamoro proofet tooro aro me'no amodomollajuporogano. Lukomgu Gooti tool yiuwi'nokai noonyumwonyu uumdo wo'dupudo tonyu aiyo aiko te nyokwollosonekono. Amodomollajuporogano. Toro amodomollajupo su tov kuvinono imo'nyo'mo kuunodo toga Jisasol aikomgu noolabwonekono.”

Room 8:34

Aki a'mwo abolo pun nemino tov, “Nerekumwallo'moneyokweyogaikikono,” ku'nono majanekwonpinogano. Su tov aro tovinokwono. Nemi kironekumwallo'moneyokwe tov Krais Jisas gavnokwe tool nemoro aiko toru maro'no abolokaikono. Toro bolno sumaiyokwe aiyo aiko te dukavo'no Gooti toolluro anato toru sulomwalokaikono. Toro tool nemoro mago tovi'aro mollodavowo'ji nemi nekullo'mwojo'moneyokwe Gooti toollu wuudoganodowodekono.

2 Koorin 12:2

14-pela kworomo tobuul me'no abawoka toga nuu Krais toollu uuguro'mwonyodumdo toonyu Gooti tool gamoro ago muunyu kai'muuno anumokailokanyugono. Toro numokailno sumaiyokwe sulugumdo puruvallu uuwolokailano sulugumdo naba 3 tovi sulai'movonyugono. Su toro sulai'movo toga nuu moro kulako tokwe sulai'movonyudukono oo moro kuullo tooke sulai'movonyudukono. Su toro tovino nuu kuudo miyau'mwakono. Yiuno Gooti toolno'gwowi kuudo nyau'mwallo.

2 Koorin 9:13

Kevu womdo su tovi toro sopipi tov kwako Juudiyada'ai a'mwo abolo ton kemi kamwoga yaikworopi aro kuudo yaupinogano. Oo Koorinda'ai a'mwo abolo su ton Krais toolluno kuuguudo sugudo tovi duumjunmwakovo. Toro ton nuugwiyo bwotonyo i'bworosodupu nevuge'aro yiuwi'nokai Jisasolluro a'mwo abolo pugai'aro tonollu donekullo'mwojumwakovoo. Su toro kuudo yaikuuropi Gooti toolluno yovo tov nyulomoropiyapinogano.

Efesos 4:10

Toro kwollu'noka su tool lukomgu muunyu kai'muuno sulokaikono. Toro tool ilno ilno sumaiyokwe yiuwi'nokai buro'nyo buro'nyomuudeyo kumuu kuruv aiyowomno kuullo'mowopiyowo'ji mido mollomwallo'moneyokwe kuuwolokailokaikono. Su toro tovino bomollolupto'nosodowodokwono.

Hibruu 1:8

Toro kuvi kuruv Gooti tool gami Kwolaiyo toolluno'gwowi aro me'no kuudokaikono. “Oo aguto kig Gooti tookujuro mido mollomwalbino tov yiunokuudo mujo'movla'mwalonokwono. Aki guu mido mollomwallo'moneyokwe womdo tovi subi toga pasudo idopto'nodo tonyuno to'no mujumovla'mwalbinekugono.

Hibruu 10:12

Toro kuvi kuruv Krais toolno'gwowi ma'no ma'nodo tovuro kirumwallo tovi modukwopiyo'moneyokwe yiuno puru'monodo toga'no gavnokwe tool kwiroudapinokaikono. Su toro kwiroudapinoka tov yiunokuudo mujo'movlaiyo'moneyokweyokwono. Toro te Krais tool yiuno puru'monodo toga me'no yopino sumaiyokwe Gooti toolluro anato toru sulomwalokaikono.

Hibruu 10:23

Nevu Gooti toolluro nonekullabwono tonyuno sogwollo kinodowado su tovino kuu'maiyo dodowiyoku'bworosodowadonogano. Toro dodowiyoku'bworosodowado su tovi guureji neya agudupolarogawano. Yiunokuudo su toro gudupolarowa'ji aki buulo nuugunyumopimwala'jo. Nevu su toro mujumovla'mwalano tovino kavlo tov arokwono. Subuu'yamju danekullodowodo Gooti tool buro'nyo buro'nyodeyo pun imokwe ado'ji tov yiuwi'nokai toga kuvinono yodowodekono. Toro te nevu noonyumwonyu sogwollo kinodowado su ton kuvinono nonekullumo'nupinogano.

Hibruu 10:29

Sumdomguda'ai Moosesolluro loowo tovi a'mwo pwol kisuvolo kwiyo'ji toollu kirumwallo tov su toro tomgu'aro amallajukekono. Toro kuvi kuruv a'mwo pwol Gooti toolluro Kwolaiyo toollu suvlo sulomavekuro'ji su toolno'gwowi kirumwallo kula'nyo to'no maronoldukono? Awiyo, kirumwallo bwotonyo tov nomaronekono. Aki Gooti tool gavnokweyolluro a'mwo abolo togai Krais toolluro mujako abwoloka su tokwe subuu'yamju muuduko tov me'no sajunokaikono. Aki a'mwo abolo su ton mujako su tovi'aro Gooti toolluro a'mwo abolo kuunodo wimo'nodupudogano. Toro kuvi kuruv a'mwo pwol ma'no ma'no so'ji tov Krais toolluro mujako su tovi suvlo to'busuko ilomavekuronekono. Aki a'mwo ma'no ma'no so'ji su tool yasuwa'wino sugumaluko tovuro Kuullo nekumokabodowodo toollu kisuvolo bwotonyo wimwalonekono.

Hibruu 12:2

Aki toro tonol a'mwo pwol resis tovuro aiyo'wo tomgu kinamjodowodo to'busuko kubalno nevu yiuno Jisasolluno bekonarowa'ji neya ainomjumovlavogawano. Nemoro kuudo uubweyodowado tov yiuno Jisasolluno to'no porugwo'mo'na'dowodokwono. Aki lukomgu yiuno Jisasolno Gooti toolluro ago muunyu kai'muuno nekumokailawonekono. Jisasol aro kuudo me'no souromarokaikono. Oo nuu aiyowo'mo toru ai'mo'mi toga ilaiyo bwotonyo tov noma'monyudeyo. Toro tovino tov mi sumdollu toruda'ai puuto wo'dowodo tovi guureji neya ainamjumo. Kuudo me'no souromarokaikono. Toro souromaroka tool nokwo wonyapino to'no yoduke toga a'mwo kaiya'nodo tooro galomworaro'mno i'noguropte tovi amovoromiyoguroptowosopekono. Aki toro tool aro kuudo miyaullajukekono. Nuu i'noguropte tovi abolmi toonyuno yovo tov nobwolomonumwogapiyapinonyudeyo. Su toro tovino kuudo miyaullajukekono. Toro te Jisasol resis tovi me'no uuwolo'mno sumaiyokwe Gooti toolluro sia kig tovi anato toru sulomwalokaikono. Toro ilomwalno sumaiyokwe aga kuga kuruv kuuno mujomwekovla'mdowodekono.

Hibruu 2:1

Gooti toolluro Kwolaiyo tool ensel toorai me'no kuuwolovokaikono. Toro toolluno nevu nebal'no yogalo me'no kuu'nowo tovi kaveno to'no nogudupola'mwala'jo. Toro kunol kuruv nebal'no yogalo su tovi nuugollu'mo'mwala'jokwe guureji neya avorugwo'mo'narogawano.

Hibruu 2:17

Toro tovino tov Jisasol gami gagwai'yago jo'mwo tonyu wiyo'mwojo'moneyokwe su tonbusuko aval'no neya imo'nonekono. Toro tool su tonbusuko kuvinono me'no sumo'nokaikono. Su tov aro tovinokwono. Jisasol pris aguto nonekullumo'numwalono tovinokwono. Pris aguto su tool nemino kalo manekumwonyodowodo tovida'ai Gooti toolluro womdo tovi pi'mwono yomjumovla'mwalonekono. Pris aguto su tool womdo aro tovi imwalonekono. A'mwo abolo tonyuro ma'no ma'nodo tovuro kirumwallo tovi modukwopimwalonekono.

Hibruu 3:1

Krais toolluro mi a'mwo abolo avalobuuravoo, muunyu kai'muuda'ai mwalodowodo Gooti tool mi adonumaroka to'busuko kubalno kevu gavnokweyolluro a'mwo abolo kugaikullu kuruv aval'no me'no dekuma'dowodekono. Kevu Jisasolluno kuudo neya jaurogaulo. Su tool Gooti toolluro yogalo tokwe kuurotokwe imo'nodowodekono. Aki toro tool nemi pris aguto nonekullumo'nodowodekono. Aki toro toolluno kuudo uubweyodowado tonol gamino kuu'maiyo toru'no dodowiyoku'bworosodowadekono.

Hibruu 3:14

Kuudo neya jaullulo. Nevu Krais toolluno kuudo muudu'no kuubweyowo toga guureji agudupolarowo to'busuko kubalno aga kuga kuruv aval'no agudupolarogawano. Nevu Krais toolluno gudupola'no gudupola'no yowa'ji yiuno aiyowo'mo toga'no agudupolara'ji tov yiuwi'nokai Gooti toolluro nonekullabodowo'jure tonyu Krais tooke ne kunol kuruv aval'no nomaranonogano.

Hibruu 6:20

Nevu Gooti toolluro ago mwalodowodo su toru'no yere maulodowado kuvi kuruv Jisasolno'gwowi nemi nekullo'mwojo'moneyokwe sumdomgu wano'no me'no aulomwalokaikono. Melkisodekol pris womdo sajuko su toolbusuko kubalno Jisasol pris aguto sumo'nokaikono. Jisasol toro imo'nyuno sumaiyokwe muunyu kai'muuda'ai Gooti toolluro mwalodowodo toru anakuuto tomuu nemi nonekullo'mwojo'moneyokwe pris womdo tov yiuwi'nokai toga mujumovla'mdowodekono.

Hibruu 7:3

Melkisodekolluro ganumiyago toolluno kuuguudo puruv Gooti toolluro yogalo tovi miyokwollosungikokwono. Aki Melkisodekolluro ganeyago tovino kuuguudo puruv Gooti toolluro yogalo tovi miyokwollosungikokwono. Aki Melkisodekolluro iko tovasuda'ai sawosunopo tovino kuuguudo puruv Gooti toolluro yogalo tovi miyokwollosungikokwono. Aki Melkisodekolluro muudu'no sumo'noka iruko tollugwojuno kuuguudo puruv Gooti toolluro yogalo tovi miyokwollosungikokwono. Aki Melkisodekolluro aboloka tovino kuuguudo puruv Gooti toolluro yogalo tovi miyokwollosungikokwono. Toro te Melkisodekol Gooti toolluro Kwolaiyo toolbusuko sumo'nyajukekono. Aki pris womdo tov yiunokuudo mujumovlaiyo'moneyokwekono.

Hibruu 8:1

Kuuguudo aikudumawo su tovino kavlo aguto tov arokwono. Nemi Pris Aguto tool Aguto Kuunodo Gooti toolluro ago muunyu kai'muu sia kig tovi anato toru me'no sulomwalokaikono.

Hibruu 9:12

Toro te Krais tool muunyu kai'muuda'ai Gooti toolluro pwekwapto kuunodo su toru yiuno puru'monodo toga'no aulokaikono. Toro tool meme toorogai'aro buulmokau taiyo toorogai'aro tooravuro mujako tokwe amokaulokalmaiyo. Toro kwol kuruv gavnokweyolluro mujako abwoloka tokwe amokaulokaikono. Gamoro mujako abwoloka su tovi'aro a'mwo abolo tonol aiyo yiunokuudo mujomwekovlaiyo'moneyokwe nemi ma'no ma'nodo tovuro kirumwallo tovida'ai abomollurolovonekumokalokwokaikono.

Hibruu 9:24

Neya duu'nyulo. Krais tool kwako akavida'ai a'mwo tooravuro ato tokwe ilomoropiyo'moneyokwe ago amojungiko puvuro pwekwapto toru maullokwekono. Buro'nyo buro'nyo ilomoropiyo'moneyokwe ago kwako akavida'ai a'mwo tooravuro ato tokwe mododupudo su ton Gooti toolluro ago muunyu kai'muu ilomoropiyo'moneyokwe ago kuunodo tovino duuwallo'moneyokweyogano. Toro kuvi kuruv Krais tool muunyu kai'muu Gooti toolluro ilomoropiyo'moneyokwe ago kuunodo tovino'gwowi me'no aulomwalokaikono. Krais tool Gooti toollu wobo toru kuulomwalno sumaiyokwe nemi nekullo'mwojumwalono'moneyokwe Gooti toollu wuudogangovla'mdowodekono.

1 Pita 3:22

Aki Jisas Kraisol Gooti toolluro ago muunyu kai'muuno me'no ilomwalno sumaiyokwe Gooti toolluro anato toru mwalo'no mido mollomwalokwe imo'nodowodekono. Toro toolluro mido mollomwalo tovi dolago tomuu yiuwi'nokai ensel toorogai'aro kuullo mido mollomwalokwe toorogai'aro kuullo jurogudokwe toorogai'aro tooro kuulomwalodupudorogano.