Hibruu 2:17 - Gooti Toolluro Yogalokwono

¹⁷ Toro tovino tov Jisasol gami gagwai'yago jo'mwo tonyu wiyo'mwojo'moneyokwe su tonbusuko aval'no neya imo'nonekono. Toro tool su tonbusuko kuvinono me'no sumo'nokaikono. Su tov aro tovinokwono. Jisasol pris aguto nonekullumo'numwalono tovinokwono. Pris aguto su tool nemino kalo manekumwonyodowodo tovida'ai Gooti toolluro womdo tovi pi'mwono yomjumovla'mwalonekono. Pris aguto su tool womdo aro tovi imwalonekono. A'mwo abolo tonyuro ma'no ma'nodo tovuro kirumwallo tovi modukwopimwalonekono.

Hibruu 2:17 ပူးပေါင်းရင်းမြစ်များ

Room 15:17

Gooti toolluro womdo su tovi nuvnokwe judo toonyu miyodumdokwono. Toro kuvi kuruv nuu Krais Jisasollu me'no uuguro'mwonyodumdo tovino tov Gooti toolluro womdo su tovino ilaiyo to'no yo'mi mujumovla'mdumdonyugono.

Room 5:10

Aki nevu Gooti toolluro ikomago kwimo'nyajuuwo kunol kuruv gamoro Kwolaiyo toolluro aboloka tovida'ai Gooti tool nemi amomgurovanekubweyokaikono. Toro amomgurovanekubweyoka tovida'ai nevu gamoro ibwoto'nyo wimo'nodowadonogano. Toro tovino tov aro nonekullumo'nononogano. Jisasol aiko te me'no dukavo'no aiyo mwallokwekono. Nevu toro tooke aiyo mwalodowado tovino tov Gooti toolluro kirumwallo tovi nobirolo'nugolokwanonogano.

Efesos 2:16

Yovodolobunyo go'no go'nodo su toval muuduko puru'mono mollumo'noso'no aki yiuwi'nokai tonol Gooti tooke sumwoluko puru'mono wosunyo'moneyokwe Krais tool nemoro ikomago pasudo anekwollajupo toorai gavnokweyolluro kulako aboloka tokwe i'noguropte tovi yiunokuudo aromiyebuuropiyokaikono. Toro romiyebuuropino sumaiyokwe nevu Gooti tooke ibwoto'nyo'moneyokwe kwollomno kuumokabokaikono.

Kooloosi 1:21

Sumdomgu kevu Gooti toollu manyu toru'aro somwallajupo toga kemi kuudo togai Gooti toollu ikomago kwimo'nyajupogaikikono. Aki toro togaikul kirovanyuvanyu pasudo toorai airoungovlaiyajupogaikikono.

Hibruu 10:21

Su tool nemi Pris Aguto nekullumo'nodowodekono. Toro tool nevu gamoro a'mwo abolo Gooti toolluro ago to'busuko wimo'nodowado tonollu mollonekumwalodowodekono.

Hibruu 2:11

Toro te Jisaseke'aro Gooti toolluro a'mwo abolo kuunodo wimo'nyo'moneyokwe mollumo'nosodowodo togai'aro yiuwi'nokai su tonyuro Kuunumiyago tool yiuno Gooti pwolnodo tookono. Toro tovino tov Jisasol Gooti gavnokwe toolluro a'mwo abolo kuunodo su tobuuraino, “Mi nyugwai'yagoruvavo nyo'mwovavo,” wuujo'mo tovino wogulo mibwosunodowodekono.

Hibruu 2:14

Gamoro kwoloraiyo tobuurobusuko su ton a'mwo abolo kulakokwe kuunodo imo'nodupudogano. Toro tovino tov Jisasol kwol kuruv a'mwo kulakokwe kuunodo sumo'nokaikono. Jisasolluro su toro sumo'noka tovino kavlo tov arokwono. Yiuno a'mwo kuunodo toolno nokwo bolonekono. Aki Jisasolluro abolo'ji tovi'aro bolnodo tovuro jurogudo tovi mwora'dowodo Satanyollu kaiyako nomollounapiyonekono.

Hibruu 2:16

Nevu aro kuudo me'no yau'dowadonogano. Jisasol ensel toorai wiyo'mwojo'moneyokwe kwolabokalmaiyo. Toro kwol kuruv Eburaiyamolluro kwikweyago tobuuraino'gwowi wiyo'mwojo'moneyokwe kwolabokaikono.

Hibruu 3:1

Krais toolluro mi a'mwo abolo avalobuuravoo, muunyu kai'muuda'ai mwalodowodo Gooti tool mi adonumaroka to'busuko kubalno kevu gavnokweyolluro a'mwo abolo kugaikullu kuruv aval'no me'no dekuma'dowodekono. Kevu Jisasolluno kuudo neya jaurogaulo. Su tool Gooti toolluro yogalo tokwe kuurotokwe imo'nodowodekono. Aki toro tool nemi pris aguto nonekullumo'nodowodekono. Aki toro toolluno kuudo uubweyodowado tonol gamino kuu'maiyo toru'no dodowiyoku'bworosodowadekono.

Hibruu 3:2

Aiyoga Moosesol Gooti toolluro a'mwo abolo gami ago to'busuko wimo'nodupudo tonyu kwiyo'mwojajuko toga womdo pi'mwono amjumovlaiyajukekono. Su toro to'busuko kubalno Jisasol gami ajesoka Gooti toolluro yiuwi'nokai womdo tovi pi'mwono to'no guureji amjumovlaiyajukekono.

Hibruu 3:5

Moosesol Gooti toolluro a'mwo womdokwe sumo'nyajukekono. Toro tool Gooti toolluro a'mwo abolo gami ago to'busuko wimo'nodupudo tonyu pi'mwono amollomwallajukekono. Su tov Gooti toolluro yogalo ton gami a'mwo abolo tonyu lukomgu wuujo'moneyokwe su ton Moosesol ma'dowo a'mwo abolo tonyu yiuno kuu'maiyo toru'no kuvinono adodoluwosajukekono.

Hibruu 4:14

Nemoro Pris Aguto kuunodo tool Gooti toolluro Kwolaiyo Jisasekono. Nemi Pris Aguto su tool Gooti toolluro ago muunyu kai'muu me'no sulomwalokaikono. Toro tovino tov nevu gamino kuudo uubweyodowado su tovi guureji neya agudupolarogawano.

Hibruu 4:15

Nemi Pris Aguto su tool nemoro yiuwi'nokai jul'nyo ibwosunodowa'jure tonyuno kuudo me'no youroma'dowodekono. Su tov aro tovinokwono. Yiuwi'nokai nemi me'nonekumokavlaiyo'mo yamju baneki'mo'mdupudo su tooro Jisasol kwollu kuruv yamju aval'no kwiyoganyajupekono. Toro wiyoganodopure kuvi kuruv Jisasolno'gwowi ma'no ma'no pasudo puru'monodo kuruv miyajukekono.

Hibruu 5:1

Kuudo neya jaullulo. Gooti tool yiuwi'nokai pris aguto toorai jeso'mo tool a'mwo abolo tonyuro akuuto toruda'ai yenyubworomarowo'ji jesodowodekono. Pris aguto ajeso'ji su tooro Gooti toolluro sumdo tovi a'mwo abolo tonyuro aiko toru maropi womdo puruval momjumovla'mdupudorogano. Toro tooro puga dukwagupto tovi muunyu toru Gooti toollu yasuwa'wino pun romiroudapiyodupudorogano. Aki puga a'mwo abolo tonyuro ma'no ma'nodo tovuro kirumwallo tovi modukwopiyo'moneyokwe Gooti toollu romiroudapiyodupudorogano. Pris aguto tooro womdo su tovallu momjumovla'mdupudorogano.

Hibruu 5:2

A'mwo pris aguto gavnokwe su tool wollainyo imo'nodowodekono. Toro toolluno tov a'mwo abolo kuudo maiyokwe togai'aro a'mwo abolo ma'no ma'nodo tovi bwolo'dapudo togai'aro tonyuno kavo nokwo uubemwojumwalonekono.

Hibruu 5:5

Su toro tomgu'aro Krais tool pris aguto imo'nowo'ji yovo aguto mallo'moneyokwe tov gavnokwe tool majesunokaikono. Toro kuvi kuruv pris aguto imo'nyo'moneyokwe ajesoka toolluro yogalo puruv aro sakwollungikokwono. “Guu moro Kwolaiyekugono. Iruko akallugwoji nuu gumi Junumiyago agujumo'numono.” Sakwollungikokwono. Toro kuudoka toolno ajesokaikono.

Hibruu 6:20

Nevu Gooti toolluro ago mwalodowodo su toru'no yere maulodowado kuvi kuruv Jisasolno'gwowi nemi nekullo'mwojo'moneyokwe sumdomgu wano'no me'no aulomwalokaikono. Melkisodekol pris womdo sajuko su toolbusuko kubalno Jisasol pris aguto sumo'nokaikono. Jisasol toro imo'nyuno sumaiyokwe muunyu kai'muuda'ai Gooti toolluro mwalodowodo toru anakuuto tomuu nemi nonekullo'mwojo'moneyokwe pris womdo tov yiuwi'nokai toga mujumovla'mdowodekono.

Hibruu 7:26

Pris Aguto su tool nemi nekullo'mwojo'moneyokwe pi'mwono kuvinono nekullumo'nyokwekono. Toro tool Gooti gavnokwe toolluro kuunodo wimo'nyokwekono. Aki toro tool ma'no ma'nodomaiyekono. Aki kaiya'no puru'monodo kuruv mamollugolamo'nodowodekono. Aki a'mwo abolo ma'no ma'no yodupudo tonyu manyu tomuu'aro yomwallokwekono. Aki Gooti tool Pris Aguto su toollu gamoro ago muunyu kai'muu me'no sulomorumwallokaikono.

Hibruu 7:28

Toro te kuudo neya jaullulo. Pris aguto imo'nyo'moneyokwe Moosesolluro loowo tov kwako akavida'ai a'mwo wollainyo tekwojai ajesajukokwono. Toro kuvi kuruv Gooti toolluro subuu'yamju muuduko su to'gwowi sumdomguda'ai loowo tovuro aiko toru ma'dowodokwono. Aki subuu'yamju muuduko su tov gavnokweyolluro Kwolaiyo toollu Pris Aguto imo'nyo'moneyokwe ajesokakwono. Gooti toolluro Kwolaiyo Pris Aguto sumo'noka su tool nemi nekullo'mwojo'moneyokwe pi'mwogaikono. Toro tool yiunokuudo mujomwekovlaiyo'moneyokwekono.

Hibruu 8:1

Kuuguudo aikudumawo su tovino kavlo aguto tov arokwono. Nemi Pris Aguto tool Aguto Kuunodo Gooti toolluro ago muunyu kai'muu sia kig tovi anato toru me'no sulomwalokaikono.

Hibruu 8:3

Kuudo pun jaullulo. Yiuwi'nokai pris aguto tooro Gooti toollu yasuwa'wino pun neya wimovlavopi aki sipsiporodeyo toorogai neya romiroudapimwalpinorogano. Toro to'busuko kubalno nemi Pris Aguto Jisas kwol kuruv Gooti toollu wiyo'moneyokwe yasuwa'wino pun neya buuwiyonekono.

Hibruu 9:11

Aga'no'gwowi Krais tool Pris Aguto me'no imo'nodowodekono. Nemi Pris Aguto Krais su toolluro ato tovida'ai yiuwi'nokai sugudo nemi baneki'mo'mdupudo ton nekullabodowodekono. Aki toro tool Gooti toolluro ago muunyu kai'muuda'ai sel ago to'busuko muunyu toru'aro uuwolo'mdowodo tovino'gwowi me'no aulokaikono. Ago su tov yiuno sugudo to'nodokwono. Gooti toolluro ago auloka su tov kwako akavida'ai a'mwo tooravuro ato tokwe amojungiko'maiyo. Aki kwako akavida'ai mimo'nokakwono.