Hibruu 13:21 - Gooti Toolluro Yogalokwono21 Toro te kevu Gooti toolluro ilaiyo winodowo'jure tovi uumjunmwalpino'moneyokwe yiuwi'nokai supto supi ton Gooti su tool kemi nomollovrovaikubwemwalonekono. Aki Gooti tool Jisas Kraisollu'aro nemoro poowokalago tovi anakuuto tomuu womdo jurogudo noulanekullonekono. Womdo jurogudo nekullodowo'jure su tov nevu Gooti toolluro pasudo ilaiyo winodowodo tonyu yomjomwekovlaiyo'moneyokwe nomollerovonekudapiyonekono. Toro te nevu Gooti su toolluno yovo tovi yiunokuudo ilomoropino ilomoropino neya imwolowanonogano. Nebal'nodokwono. အခန်းကိုကြည့်ပါ။ |
Hibruu 13:21
53 ပူးပေါင်းရင်းမြစ်များ
Toro te muugunyo su todoralluda'ai pwol gami ganumiyago toollu kaduko wiyo'no kuvinono kuumjunoka su tool gadooldukono?” Jisasol toro kuudoganokaikono. Toro kuudoganoka tovi a'mwo mido mollomwalokwe su tooro kuudoporogano. “Muugunyo sumdomguda'ai tool gami ganumiyago toolluro yogalo tovi kuvinono kuumjunokaikono.” Kuudoporogano. Su toro me'no kuudopo toga Jisasol kavlo tovino kuu'maiyo toru po'dogalo aro kuudokaikono. “Nuu nebal'no ikudumo'mokwono. Kevu Juu mido mollomwalokwe toorekul aguto kig Gooti toolluro mido mollomwalo tovi dolago tomuu yere maulai'mopinorekikono. Toro kuvi kuruv takis nuugwiyo mallokwe pworogai'aro kwonyalabolo pugai'aro tono'gwowi kemi ikuuwolovopi sumdomgu noulai'mopinogano.
Aki a'mwo abolo su ton moro yiuwi'nokai kuuguudo daikullodumdo ton kunyuda'aiyo'mogano. Toro te kevu moro yiuwi'nokai kuuguudo daikullodumdo su tonyu a'mwo abolo ton neya uumjunpino'moneyokwe jodubwasogaulo. Aki aro tovino kuudo nyallulo'gwonmwalpiyo. Nuvu yiuwi'nokai toga kevuge nomwalmwalanonyugono. Kevuge mwalno mwalno yo'mi aki kwako akavuro aiyowo'mo abai'mowo'ji kuga kuruv kevuge kuuno mujomwekovla'mwalanonyugono.” Kuudokaikono.
A'mwo abolo bwotonyago ton mi aro nyudodupudogano. “Mi Agutoloo, Mi Agutoloo,” nyudodupudo kuvi kuruv yiuwi'nokai su ton muunyu kai'muuda'ai aguto kig mido mollomwalo tovi ku'nono maulomwalpinogano. Yiuno moro Nyunumiyago muunyu kai'muu mwalodowodo toolluro ilaiyo winodowo'jure kuudo tonyu kuumjuno'ji su toolno'gwowi kuvinono nokwo kuulomwalonekono.
Nuu a'mwo abolo su tonyu uuguro'mwonyugovlavo'mi aki guu kweku kuruv numi nuguro'mwonyugovla'binekugono. Su tov aro tovino'mokwono. Yiuwi'nokai a'mwo abolo kuudo kuubwepi su ton yiuno puru'monodo to'no pi'mwono neya imo'nugovla'mwalpinogano. Toro imo'nugovla'mdopure tonyu yiuwi'nokai kwako akavida'ai a'mwo abolo ton wonopi mino aro kuudo youronumapinogano. Oo akal Gooti toolluro amonekwopiyabokaldeyo. Su toro tovino kuudo youronumapinogano. Aki guvu mino kalo buuropino gujunodowodo to'busuko kubalno guu a'mwo abolo su to kunyuno kuruv kalo buuropino aval'no gujunodowodekugono. Su to kuvino kuruv kuudo nokwo youromapinogano.
Kuudo neya jaullulo. Gooti su tool muudu'nodo toga yiuwi'nokai noonyumwonyu tonyu yokwolloso'no gavnokwe tool mollomwalodowodogano. Toro sokwollosoka toolluno tov yovo aguto neya ma'mwalono'moneyokwekono. Toro te ne kunol kuruv gamino yovo tov yiunokuudo neya ilomoropimwolowanekono. Nebal'nodokwono.
Aki Gooti tool noonyumwonyu sugudo togai kemi nokwo ikullamwalonekono. Gooti toolluro su toro ikullamwalono tov aro tovino'mokwono. Buro'nyo buro'nyodeyo pun kemi abaiki'mowo'ji toga kevu noonyumwonyu punyuno supto mipinogaikikono. Aki yiuwi'nokai sugupasudo go'no go'nodo kun kuruv nokwo molludo'movla'mwalpinogaikikono.
Toro te neya duu'nyulo. Nevu yiuwi'nokai toga sugupasudo tonyu mujumovlaiyo'moneyokwe Gooti tool aiyogada'ai me'no sovrovanekubweyajukekono. Sugupasudo su tonyu kuvinono uumjungovlaiyo'moneyokwe Gooti tool nevu Krais Jisasollu uuguro'mwonyodowado tonollu aiyo aiko te me'no yokwollanekubweyodowodonogano.
Toro te nemi nonekullo'mwojo'moneyokwe Krais toolluro womdo me'no sopiyoka tovino tov nevu Juu tonogai'aro kevu Juu miyaikuuwosunodowado togaikike'aro yiuwi'nokai tonol Gooti toolluro Kuullo toollu aval'no ma'dowadonogano. Gooti toolluro Kuullo pwolnodo su tool nevu yiuwi'nokai tonollu Nellunumiyago Gooti toollomno wobo toru'no kuullo'moneyokwe puuto tovi kuusanekubweyodowodekono.
Gooti su tool sulo jurogudo toolbusukekono. Toro toolluro yiuwi'nokai womdo ton yiuno sugudo to'no yokwekono. Gooti su tool gamoro yogalo tov yiuwi'nokai toga uumjunodowodekono. Aki ma'no ma'no pasudo puruv nonagutekono. Gooti su tool sugu pasudo togai'aro nebal'no pasudo togai'aro tonyuno to'no yokwekono.
Aki ikulsulo ki'nodupudo to'busuko kubalno pasudo idopto'nodo pun yiuno Jisas Kraisollu'aro bodupudogano. Pasudo idopto'nodo su togai yomjomwekovlaiyo'moneyokwe kuudo tov kemoro poowokalago tovi neya aullo'movaikwopiyono. Kevu su toro tomgu'aro yomjomwekovla'mdopure togaikullu a'mwo abolo ton aikwonpi tov Gooti toollu yovo aguto wiyopi aki nyulomodomoropimwolapinogano.
Kuudo neya jaullulo. Gooti tool kemi poowokalago tonyu womdo kuulaikullodowodekono. Womdo kuulaikullodowodo su tovi'aro gamoro ilaiyo winodowo'jure tovi kevu nokwo uumjunmwalpinogaikikono. Aki kevu kuvinono uumjunpino'moneyokwe kuudo tokwe'aro jurogudo tokwe'aro yiuwi'nokai su toval ikubwemwalonekono.
Aga toga nuvu noonyumwonyu punyuno supto mimwakono. Toro kwonyu kuruv yiuwi'nokai noonyumwonyu nomjonomwekovlaiyo'moneyokwe ton kurukwenyugono. Su tov aro tovinokwono. Kemoro mi nonyo'mwojo'moneyokwe yasuwa'wino anuwopiyamwa'jupo ton Epafroodaitosol miyomno me'no amokamwa'jukekono. Kemoro yasuwa'wino amokamwa'juko su tonyu nuu me'no ama'mwa'jonyugono. Kemoro yasuwa'wino anuwopiyamwa'jupo su ton wobeya sudokwe pun Gooti toollu kwiroudapiyajupo tonbusuko wimo'nodupudogano. Toro te Gooti tool kemoro yasuwa'wino wobeya sudokwe tonbusuko su tonyu ilaiyo molloma'dowodekono. Toro molloma'dowodo su tonyuno ilaiyo winodowodekono.
Aki kemida'ai a'mwo pwolluno yovo tov Epafrosolekono. A'mwo su tool nuuge akawai mwalodowo Krais Jisasolluro ki'nato womdo wiyodowodekono. Toro tool kemi, “Ilaiyokwono,” adekwopiyamaiyo. Aki a'mwo su tool kemiyo'mo Gooti toollu subusu'nyogalo guurejuno aro wuudodowodekono. “Kooloosida'ai Jisasolluro a'mwo abolo ton a'mwono tonbusuko jurogudo neya imo'nopi kevnokwe ton kuudo neya yaurogapuro. Oo nevu yiuwi'nokai Gooti toolluro ilaiyo winodowo'jure tonyu yiuno ilaiyo to'no duumjunmwakuuwono. Kuudo yaurogapuro.” Gooti tool kemi jurogudo adaikullumwojoneyokwe tovino'mo a'mwo su tool subusu'nyogalo wuudodowodekono.
Aki Aguto tool kemoro poowokalago tonyu jurogudo adaikullumwojogawono. Toro daikullumwojodowo'jure tovida'ai kevu nemi Nellunumiyago Gooti toolluro sumdo tovi gavnokweyolluro kuunodo wimo'nopi aki a'mwo abolo kaiya'nodomaiyokwe nokwo wimo'numwalpinogaikikono. Su toro kwimo'nupi togaikul lukomgu nemi Aguto Jisasol gami a'mwo abolo kuunodo togai kwolabwo'ji toga ilaiyo nokwo wuuru'mapinogaikikono. Gooti tool su toro daikullumwojumwalono tovino nevu subusu'nyogalo wuudoganodowadonogano. Nebal'nodokwono.
Oo kemino tov aro anekullunadopiyo. Gooti sumwoluko kavo wosunyo'moneyokwe tool kemi womdo nekullumwalonekono. Toro ikullodowo'jure tovida'ai kemoro yiuwi'nokai somjomwekovlapi tomgu'aro Gooti gavnokwe toolluro kuunodo nokwo wimo'numwalpinogaikikono. Toro wimo'nugovlavopi nemi Aguto Jisas Kraisol abwo'ji toga kevu a'mwo abolo kaiya'nodomaiyokwe to'no neya imo'nupinogaikikono. Su toro kuvinono ikullumo'nyo'moneyokwe Gooti tool pi'mwono nomollekumwalonekono. Kemoro poowokalago togai'aro kuudo togai'aro kulako togai'aro tonyu nokwo mollekumwalmwalonekono. Su toro tovino anekullunadopiyo.
Aki abekanyo su tobuuro womdo sugudo aro tonyu neya yodupudodeyokwe kemino yovo tov nokwo yakwollupinokwono. Abekanyo su tobuuravuro pubuul gami kwoloraiyo tonyu yiuno ilaiyo to'no mollumwojumelabodowodobuukono. Aki a'mwo abolo pun gamoro ago tovi buuru'ma'dopure tonyu ilaiyo mollomarowo'ji po'dogalo mollomwalodowodobuukono. Toro tobuul Gooti toolluro a'mwo abolo abuuru'mapi su tonyu kwako tomuu'aro wiyowo'ji kemoro suvlo tonyu wonyo tokwe mollal'mo'mdowodokwono. Aki a'mwo abolo jul'nyokwe tonyu po'dogalo wiyo'mwojodowodokwono. Aki toro tobuul sugupasudo go'no go'nodo ton mujumovla'mdowodobuukono. Abekanyo womdo su toro mujumovla'mdupudodeyo adupi tobuuraino yovo tov kevu nokwo yakwollumwalpinogaikikono.
Aki Gooti yiuno pwolnodo su tool mabolonekono. Aki gamoro bako mwalodowodo tovi wobo toru kwako akavida'ai a'mwo pwolnodo kwol kuruv ku'nono maulai'mowonekono. Aki kwako akavida'ai a'mwo pwolnodo kwol kuruv Gooti su toollu mwonyajukekono. Aki lukomgu kuga kuruv kwako akavida'ai a'mwo pwol ku'nono mwonekono. Gooti su toolluno aro dodowadekono. “Oo yiuno Gooti pwolnodo su tool yovo aguto neya ma'mwalonekono. Aki toro toolluro mido mollomwallo tov yiunokuudo mujo'movla'mwalonokwono. Kuuguudo su tov nebal'nodokwono.” Dodowadekono.
Toro te yiuwi'nokai judo'no judo'nodo tomgu'aro kaiyako yanyugolodupudo kuvi kuruv Aguto toolno'gwowi bomollurolovonumokalokwowo'ji gamoro ago muunyu kai'muuno nonumokailawonekono. Toro anumokailawo'ji toga aguto kig su tool gamoro mido mollomwalodowodo toru ilaiyo to'no nomonumwallonekono. Nevu Aguto su toolluno yiuwi'nokai toga yovo aguto to'no wiyowa'ji yiunokuudo ilomoropimwolowanekono. Nebal'nodokwono.
Neya duu'nyulo. Buro'nyo buro'nyo jul'nyodeyo pun kemi aikullumo'no'ji toga kevu jurogudo to'no neya dodavogaulo. Su tov aro tovino'mokwono. Kevu Gooti toolluro ilaiyo winodowo'jure tovi kuvinono kuumjunpi toga Gooti toolluro ato tovida'ai noonyumwonyu subuu'yamju daikullodowodo tollovai nokwo mapino tovino'mokwono.
Aki kevu Jisasolluro a'mwo abolo togaikul Gooti toolluro kwoloraiyo sujuraiyo tonbusuko wimo'nodupudogaikikono. Toro togaikul Gooti toolluro ago muunyu kai'muu gamoro kwoloraiyo sujuraiyo tobuuro i'bwo'nomwalodupudo toru me'no bai'mo'mdupudogaikikono. Aki Gooti tool gamoro ago muunyu kai'muu tovi anakuuto tomuu kwoloraiyo sujuraiyo su tonyuno yovo tov me'no sokwollosokaikono. Aki toro togaikul Gooti gavnokwe toollu wobo toru me'no bai'mo'mdupudogaikikono. Gooti su tool yiuwi'nokai a'mwo abolo tonyu kooti yogalo jainyubwo'dowodo tookono. Aki kevu a'mwo abolo Gooti toolluro sumdo tovi sugudo me'no wimo'nodupudo tobuuravuro kuullo tonyu wobo toru me'no bai'mo'mdupudogaikikono.
Aguto kig Gooti toolluro mido mollomwalo tovi nomarano su tov yaudo yaudo minonokwono. Yiuno jurogudo to'no adapsuko tovino tov Gooti toollu, “Nenoloo,” neya wuudumwalanonogano. Toro tonol Gooti toollu kwako tomuu'aro wiyowa'ji aki gamino luko wiyowa'ji neya ilomoropimwolowanonogano. Nevu su toro tomgu'aro sulomoropiyowa'ji tovino Gooti tool ilaiyo winyokwekono.
Aki kevu a'mwo abolo punyu sugupasudo neya igolopi noonyumwonyu supto yodopure tobuurai wiyo'mwojo'mo tovino kuudo nyallulo'gwonmwalpiyo. Gooti tool pris tooravuro kwiroudapiyajupo tonyuno ilaiyo kwinyajukekono. Toro to'busuko kubalno nevu a'mwo abolo tonyu sugupasudo igolodowa'jure su tonyuno ilaiyo winyokwekono.
Aki kevu Jisasolluro a'mwo abolo kugaikul kuruv sulo aiyokwe togaikulbusuko wimo'nodupudogaikikono. Kevu sulo togaikulbusuko wimo'nodupudo togaikike Gooti tool gamoro Kuullo tool kuulekumwallo'moneyokwe ago to'busuko modumelabodowodekono. Toro modumelabodowo'jure tovi'aro kevu Gooti gavnokwe toolluro ago to'busuko mujumo'nugelabodupudogaikikono. Aki kevu Gooti toolluro pris womdokwe togaikulbusuko wimo'nodupudogaikikono. Aki pris kwiroudapiyajupo to'busuko kubalno kevu Gooti toolluro Kuullo tool jurogudo ikubweyodowo'jure tokwe kemoro sugupasudo ton aval'no wiyodupudogaikikono. Kemoro pasudo wiyodupudo su tonyu Gooti tool Jisas Kraisolluro amomuugurovonekubweyoka tovi'aro ilaiyo mollomallokwekono.
Toro kuvi kuruv kevu nemi Aguto Jisas Kraisollu'aro jurogudo neya jogullumwoju'nugovlavogaulo. Su tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Kevu gamoro yasuwa'wino sugumaluko togai'aro Krais toolluno kuudo togai'aro tonyuno kuudo souromapi tovida'ai aguto yogullumwoju'nugovlavopi kwolluno nokwo ilomoropimwolapinekono. Agake'aro aki lukomgu aiyo yiunokuudo mujomwekovla'mwalano kugake'aro yiuwi'nokai iruko tollugwojai gamino yovo tov neya ilomoropiyo'moneyokwekono. Nebal'nodokwono.
Gooti pwolnodo su tool nemi Aguto Jisas Kraisolluro womdo sopiyoka tovi'aro ma'no ma'nodo tovuro kirumwallo tovida'ai me'no abomollurolovonekumokalokwokaikono. Toro toolluno yovo tovi neya ilomoropimwolowanekono. Gooti su tool Aguto kig kuunodo imo'nodowodekono. Toro tool jurogudo bwotonyokwekono. Aki toro tool yiuwi'nokai tonyu mido momjomwekovlaiyokwekono. Gooti su tool aiyoga sumdomgu me'no amwallajukekono. Aki aga kuga kuruv kuuno mujomwekovla'mdowodekono. Aki lukomgu kuga kuruv yiunokuudo tono mujomwekovla'mwalonekono. Nebal'nodokwono.
Aki sia kig su tovi sumdollu toru wonyo buugo bwotonyo to'busuko puruv wo'dowodokwono. Wonyo buugo su tov gles to'busuko imo'nodowo gamoro bako tov yiunokuudo kilukuuropiyodowodokwono. Aki sia kig su tovuro yiuwi'nokai deyo aiyowomno toru aiyo mwalodupudo aral aral tooro amomwodovomaroporogano. Yiuwi'nokai aral aral go'no go'nodo su toorai sumdo bwotonyago ton kemoro kulako tovuro sumdollu toruke'aro buulo tomgu'aro tomuu so'mowopingoporogano.
Su toro tovi wuu'nyuno sumoneyokwe yiuwi'nokai muunyu kai'muuda'ai toorogai'aro kwako akavida'ai toorogai'aro kwako tovi dolago tomuuda'ai toorogai'aro soolwara tovi mwalodupudo toorogai'aro Gooti toolluro yiuwi'nokai sokwollosoka su tooro deko aro dodopure tovi kuu'nonyugono. “Sia kig tovi ilomwalodowodo tooke'aro Sipsip Muugunyo tooke'aro toorallu nevu yogalo sugudo tokwe dubweyowa'ji aki yovo aguto tov yiuwi'nokai toga neya wimwalanorakono. Aki yiuwi'nokai tonyu mido mollomwallo'moneyokwe jurogudo tov kworallu yiunokuudo uuwo'dowodokwono.” Su toro dodopure tovi kuu'nonyugono.
Aki aiyokwe aral aral toorogai'aro 24-pela a'mwono moduvomwallokwe toorogai'aro tooro Sipsip Muugunyo toollu ilomoropiyo'moneyokwe dato muuduko puruv aro adoporogano. “Guvu judo tookuno puukwollikwiyo aweyogunyugolowosungiko su tovi maro'bi gamoro 7-pela gwomalo amugutowopingiko su tonyu nokwo modogaipolodukwopibinekugono. Yo'bi puukwollikwiyo su tovi guu nokwo kuusogunyugolowosubinekugono. Su tov aro tovinokwono. Gumi aromiyagubweyopo toga guu judo tookujuro mujako abwoloka tokwe Gooti tool a'mwo abolo tonyu abiyomarokagano. A'mwo abolo abiyomaroka su ton yiuwi'nokai judo'no judo'no yovodolobunyo togai'aro aki judo'no judo'no yogaljo togai'aro aki judo'no judo'no kula'nokakwe togai'aro aki judo'no judo'no kantri tovida'ai togai'aro yiuwi'nokai su tonyuda'ai a'mwo abolo tonyu Gooti tool gamiyo'mo abiyomarokagano.
ကြော်ငြာတွေ